Bamaraika Barangirra Okuzaarwa kwa Yesu

Omulemi wa Roma arukukwetwa Kaisali Augusito, akaragira ngu Abayudaaya boona bagaruke omu byaro byabo nukwo basobole kuhandiikibwa. Yusufu na Malyamu bagarukayo Beterehemu, omu rubuga rw’abaisenkuru Yusufu. Omu kasumi ako, Malyamu akaba ali haihi kuzaara.

Obu bahikire Beterehemu, bakahikira omu kiju ky’ente habwokuba nikyo kiikaro kyonka basoboire kutunga ah’okuraara. Kandi oku nuho Malyamu yazaliire Yesu. Akamufubika omu ngoye kandi yamubyamya omu kyato nambere ente zaliiraga.

Haihi na Beterehemu, hakaba haroho abaliisa abakaba bali aheru ekiro nibaliinda entaama zaabo. Aho naho, maraika akaija yabemerra omu maiso kandi ekyererezi ky’ekitinisa kya Yahwe kyabamulika. Abaliisa bakatiina muno, baitu maraika akabagambira ati: ‘Mutatiina. Mbainiire amakuru amarungi. Masiya azairwe kiro kinu omu Beterehemu.’ Omu kasumi nuko kamu, hakaija bamaraika abandi haiguru nibagamba: ‘Ekitiinisa kigaruke hali Ruhanga ow’omu iguru kandi obusinge bube omu nsi.’ Hanyuma abamaraika bakaburaho bagenda. Kiki abaliisa eki bakozere?

Bakagambirangana bati: ‘Hati, tugendereho Beterehemu.’ Bakarahuka bagenda kandi basanga Yusufu na Malyamu omu kiju ky’ente baine omwana.

Buli omu wena ayahuliire ebigambo bamaraika bagambiire abaliisa, akahunirra. Malyamu akecumitiriza muno ha bigambo bya maraika kandi atabyebwe. Abaliisa obu bakaba nibagarukayo kurolerra ebisoro byabo, bakagenda nibasiima Yahwe habw’ebibarozere hamu n’ebibahuliire.