Yesu Azaarwa Mu Kiraaro Ky’ente

OMANYIRE enkerembe niyo eha? Mali niwe Yesu. Nubwo akaba yakazaarwa mu kiraaro ky’ente. Malyamu nateeka Yesu mu kikwato nambere bateka eby’okulya by’endogoyi n’ebisoro ebindi. Baitu habwaki Malyamu na Yusufu bali hanu n’ebisoro? Gunu tiguli mwanya abaana habazaalirwa. Niho?

Nangwa tihali niho. Enu niyo nsonga habwaki bali hanu: Omukama w’Abarumi Kaisali Agusito akatekaho ekiragiro nti buli muntu aina kugaruka mu rubuga oru yazaalirwemu ibara lye lihandikwe mu kitabu. Yusufu uwe akaba azaalirwe mu Beterehemu. Baitu uwe na Malyamu obu bahikireyo, batasobole kutunga omwanya gw’okuraramu gwona. Nikyo baiziire kuba n’ebisoro. Mu kiro kinu kyonyini, Malyamu yazaara Yesu! Baitu, nkoku okurora, uwe ali kurungi.

Norora abaliisa abaizire kurora Yesu? Bakaba bali omwirisizo nibalinda entaama zabu ekiro, kandi okumulikya okukooto kwabehinguliriza. Akaba ali maraika! Abaliisa bakatiina muno. Baitu maraika yabagamba: ‘Mutatiina, mbaletiire amakuru amarungi. Kiro kinu, mu Beterehemu, Kristo Omukama azairwe. Naija kujuna abantu! Nimwija kumusanga azingirwe mu bugoye kandi abyamire mu kiraaro ky’ente.’ Ahonaho, bamaraika baingi baija kandi batandika kukugiza Ruhanga. Mu bwangu abaliisa banu bayanguha kuserra Yesu, kandi hati bamuzoire.

Omanyire ahabwaki Yesu w’embaganiza y’amaani? Omanyire mali niwe oha? Ijuka, muruganikyo orw’okubanza orw’ekitabu kinu, tukagambaho ha mwana wa Ruhanga omuzigaijo. Omwana onu akakorra hamu na Ruhanga mukukora iguru n’ensi n’ebintu ebindi byoona. Onu nuwe Yesu mali!

Ego, Yahwe akaiha obwomezi bw’Omwana we omu iguru kandi y’abuteeka omunda ya Malyamu. Ahonaho omwana yatandika kukurra munda ye nkoku abaana bakurra munda z’abanyinabo. Baitu onu akaba ali Mwana wa Ruhanga. Mu kumalirra, Yesu yazalirwa mu kiraaro ky’ente mu Beterehemu. Hati norora habwaki bamaraika bakaba basemerirwe muno okugambira abantu nti Yesu akaba azairwe?