ISOMO 17

Yesu Muntu wa Mulingo Ki?

Omulingo Kirukusisana ha Rupapura

Obutumanya ebintu Yesu yabalize n’ebiyakozere obw’akaba ali munsi, tuzoora emiringo ey’etukonyera kwirra haihi nauwe hamu na Ise, Yahwe. Emu ha miringo enu ey’erukusikiiriza niyo eha? Kandi nitusobora tuta kuhondera ekyokurorraho kya Yesu omu bwomeezi bwaitu?

1. Yesu n’asisana Ise omu mulingo ki?

Kumara obuhumbi n’obuhumbi bw’emyaka omu iguru, Yesu aikaire n’arora Ise ow’okugonza kandi n’amwegeraho. Nahabweki atekereza, ayehurra kandi ayetwaza nka Ise. (Soma Yohana 5:19.) Yesu akamarrayo kimu emiringo ya Ise kandi egi niyo ensonga habwaki yagambire ati: “Anyakundozire nyowe, buli arozire Ise nyowe.” (Yohana 14:9) Obworayegaho emiringo ya Yesu, noija kumanya kurungi Yahwe. Ekyokurorraho, omulingo Yesu yafaahoga abantu nigwoleka omulingo Yahwe akufaaho.

2. Yesu ayolekere ata ngu n’agonza Yahwe?

Yesu akagamba ati: “Baitu ensi emanye ningonza Isenyowe, kandi nka Isenyowe okuyandagiire, nukwo nkora nti.” (Yohana 14:31) Yesu obw’akaba ali omu nsi, akooleka okugonza kwingi okw’akaba ainiire Ise kurabira omu kumworobera n’omu nyikara ezigumire. Yesu yagonzaaga kubazaaho Ise n’okukonyera abantu abandi kutunga enkoragana enungi na Ise.—Yohana 14:23.

3. Yesu ayolekere ata ngu n’agonza abantu?

Baibuli n’egamba ngu Yesu ‘akasemerererwa abaana babantu.’ (Enfumo 8:31) Akooleka okugonza kwe kurabira omu kugarramu abantu amaani n’okwehayo kubakonyera. Akakora ebyamahano hatali kwoleka amaani ge kwonka, baitu n’okwoleka ngu nasaalirirwa abandi. (Marako 1:40-42) Akatwaza abantu omu mulingo ogw’embabazi kandi atarukusoroora. Ebigambo bye bikahuumuza kandi byaha okunihira abo abaine emitima emirungi abamuhulirizaaga. Yesu akehayo kubonabona n’okufa habw’okugonza okw’akaba ainiire abantu. Baitu akakira kugonza abo abagonzaaga kuhondera enyegesa ze.—Soma Yohana 15:13, 14.

YEGA EBIRUKUKIRAHO

Manya ebirukukiraho ebirukukwata ha miringo ya Yesu. Kandi orole omulingo osobora kwoleka okugonza n’okugaba nk’oku yakozere.

4. Yesu n’agonza Ise

Ekyokurorraho kya Yesu nikitwegesa omulingo tusobora kwoleka ngu nitugonza Ruhanga. Musome Luka 6:12 na Yohana 15:10; 17:26. Hanyuma y’okusoma buli Kyahandiikirwe, mubazeeho ekikaguzo kinu:

Nitusobora tuta kuhondera ekyokurorraho kya Yesu, kandi tukooleka ngu nitugonza Yahwe?

Yesu nasaba. — Yesu yagonzaaga Ise ow’omu iguru kandi yabazaaga nauwe obutoosa kurabira omu kusaba

5. Yesu afaaho abantu abali omu bwetaago

Yesu yayebembezaaga ebyetaago by’abantu abandi kukira ebye. N’obuyabaga ajwahire, akakozesa obwire n’amaani ge kukonyera abantu. Musome Marako 6:30-44, Hanyuma mubazeeho ebikaguzo binu:

Kusigikirra ha Byahandiikirwe binu, Yesu akooleka ata ngu nafaaho abandi?—Rora orukarra 31, 34, 41, na 42.
Kiki ekyayekambisize Yesu kukonyera abantu?—Rora orukarra 34.
Nk’oku Yesu ahondera emiringo ya Yahwe yoona, eki nikikwegesa ki hali Yahwe?
Nitusobora tuta kuhondera ekyokurorraho kya Yesu obukirukuhika ha kufaaho abandi?

Omu mulingo ogw’ekyamahano, Yesu naliisa enkumi n’enkumi z’abantu kurabira omu kukanyisa emigaati etaano hamu n’encu ibiri entaito. Abegeswa be nibagabira abasaija, abakazi hamu n’abaana ebyokulya.

6. Yesu mugabi

Yesu akaba ali mugabi n’obukiraaba ngu akaba ataine bintu bingi, kandi naitwe n’atwekambisa kuba bagabi. Musome Engeso Ezabakwenda 20:35, hanyuma mubazeeho ekikaguzo kinu:

Kusigikirra hali Yesu nitusobora tuta kutunga okusemererwa?

Mutekeho VIDIYO, hanyuma mubazeeho ekikaguzo ekirukuhonderaho.

VIDIYO: ‘Omu Kugaba Harumu Okusemererwa’—Akacweka ka vidiyo (4:00)

Miringo ki eyitusobora kugabamu n’obuturukuba tutaine ebintu bingi?

Obaire Okimanyire?

Baibuli etwegesa kusaba hali Yahwe kurabira omu ibara lya Yesu. (Soma Yohana 16:23.) Obutusaba omu mulingo ogu, tuba nitwoleka ngu nitusiima habw’ekintu Yesu yatukoliire kutukonyera kufooka banywani ba Yahwe.

ABANTU ABAMU BAGAMBA: “Abantu babonabona habwokuba Ruhanga n’abalenga.”

Nk’oku Yesu ayoleka emiringo ya Ise, ebikorwa bye nibyoleka bita ngu Yahwe natufaaho?

OYEGERE KI?

Yesu n’agonza Yahwe, kandi agonza n’abantu. Nk’oku Yesu ali nka Ise, obw’orayeyongera kumumanya, noija kweyongera kumanya Yahwe.

Kweijukyamu

Nitusobora tuta kweyongera kugonza Yahwe, nk’oku Yesu yakozere?
Nitusobora tuta kwoleka abantu okugonza nk’oku Yesu yakozere?
Mulingo ki ogworukukirayo kugonza hali Yesu?

Ekiro tumaliriize isomo linu:

Lengaho Kinu

Komamu omulingo gumu ogwa Yesu kandi olengeho kugwoleka wiiki enu.

Ekindi:

Your other goal

SERULIIRIZA

Wetegereze emu ha miringo ya Yesu eitusobora kumwegeraho.

“Kusobora Kuhondera Ekyokurorraho kya Yesu, Ba muntu . . .” (Jesus—The Way, the Truth, the Life, orupapura 317)

Manya habwaki tusemeriire kusaba kurabira omu ibara lya Yesu.

“Habwaki Osemeriire Kusaba Kurabira omu Ibara lya Yesu?” (Watchtower, eya Febwali 1, 2008)

Baibuli eyoleka omulingo Yesu akaba n’azookamu?

“Yesu Akaba Nasisana Ata?” (Ekicweka kinu kiri ha mukura)

Omulingo Yesu yatwazamuga abakazi nigutwegesa ki?

“Ruhanga Atwara Abakazi Kuba b’Omuhendo Kandi Abatamu Ekitiinisa” (Watchtower, eya Sebutemba 1, 2012)