EKICWEKA KY’OKWEGA 17
“Mbesere Enganjani”
“Mbesere enganjani; [habwokuba] byona ebinahuliire hali Isenyo we, mbibagambiire inywe.”—YOHANA 15:15.
EKIZINA 13 Kristo, Ekyokurorraho Kyaitu
EBITURAYEGAa
1. Kiki eky’osobora kukora kufooka munywani w’omuntu nfe na nfe?
KUSOBORA kufooka munywani nfe na nfe ow’omuntu, osemeriire kumara nauwe obwire. Kuhingisaniza ebitekerezo n’omuntu ondi kandi n’okubazaaho ebimwarabiremu kibaletera kufooka banywani. Baitu obuturukuba nitugonza kufooka banywani ba Yesu nfe na nfe, haroho ensonga ezisobora kutulemesa. Ezimu ha nsonga zinu niziha?
2. Nsonga ki ey’okubanza ey’esobora kutulemesa kufooka banywani ba Yesu?
2 Ensonga ey’okubanza, titukaroraga Yesu maiso ha maiso. Abakristaayo baingi omu kyasa eky’okubanza nabo batamurole. Eki n’obukiraaba nukwo kiri, omukwenda Petero akagamba ati: “N’obumuraaba mutaramurozere, nimumugonza. N’obukiraaba ngu hati timurukumurora mumwikiririzaamu.” (1 Pet. 1:8, NW) Nahabweki nikisoboka kutunga enkoragana enungi na Yesu n’obukiraaba ngu titukamurorahoga.
3. Nsonga ki eyakabiri ey’esobora kutulemesa kufooka banywani ba Yesu?
3 Ensonga yakabiri, titusobora kubaza na Yesu. Obutusaba tuba nitubaza na Yahwe. Ky’amananu ngu tusaba omu ibara lya Yesu, baitu tali nuwe tubaza nauwe omusaara zaitu. Kandi n’ekindi, Yesu tarukugonza nuwe tusabe. Habwaki? Habwokuba okusaba guli gumu ha miringo ey’okuramya, kandi Yahwe nuwe wenka ou tusemeriire kuramya. (Mat. 4:10) Eki n’obukiraaba nukwo kiri, nitusobora kwoleka Yesu ngu nitugonza.
4. Nsonga ki eyakasatu ey’esobora kutulemesa kufooka banywani ba Yesu, kandi kiki ekiturukwija kubazaaho omu kicweka kinu?
4 Ensonga eyakasatu, Yesu aikara omu iguru, nahabweki titusobora kwikara nauwe. Baitu nitusobora kumanya bingi ebirukukwata hali Yesu n’obuturaaba tutali nauwe maiso h’amaiso. Nitwija kubazaaho ebintu bbina ebisobora kutukonyera kufooka n’okwikara tuli banywani ba Yesu nfe na nfe. Katubanze twekebiije habwaki kikuru kufooka banywani be.
HABWAKI TUSEMERIIRE KUFOOKA BANYWANI BA YESU?
5. Habwaki tusemeriire kufooka banywani ba Yesu? (Rora n’obusanduuko “Kufooka Banywani ba Yesu Kituletera Kufooka Banywani ba Yahwe” hamu na “Kurora Ekiikaro kya Yesu omu Mulingo Oguhikire.”)
5 Tusemeriire kufooka banywani ba Yesu kusobora kutunga enkoragana enungi na Yahwe. Habwaki? Wetegereze ensonga zinu ibiri. Ey’okubanza, Yesu akagambira abegeswa be ati: “Isenyowe wenka nabagonza, [habwokuba] mugondeze nyowe.” (Yoh. 16:27) Akongera yagamba ati: “Busaho aija hali Isenyowe rundi araba omuli nyowe.” (Yoh. 14:6) Kakuba tulengaho kufooka banywani ba Yahwe tutabandize kufooka banywani ba Yesu, nikisisana nk’okulengaho kutaaha omu kyombeko tutarukuraba omu mulyango. Yesu akakozesa ekyokurorraho nikyo kimu obuyagambire ngu: “Ninyowe irembo lyentama.” (Yoh. 10:7) Ensonga eyakabiri eri ngu Yesu akahondera ekyokurorraho kya Ise kikumi ha kikumi. Akagambira abegeswa be ati: “Anyakundozire nyowe, buli arozire Isenyowe.” (Yoh. 14:9) Omulingo omukuru ogutumanyamu Yahwe nugwo ogw’okwegaho obwomeezi bwa Yesu. Obuturayeyongera kwegaho Yesu, nitwija kweyongera kumugonza. Obuturayeyongera kufooka banywani ba Yesu, nitwija kweyongera kugonza Ise.
6. Nsonga ki endi habwaki tusemeriire kutunga enkoragana enungi na Yesu? Soborra.
6 Tusemeriire kuba n’enkoragana enungi na Yesu esaara zaitu kusobora kugarukwamu. Obuturukuba nitusaba tikirukumara kugamba bugamba ngu “omu ibara lya Yesu.” Baitu tusemeriire kwetegereza omulingo Yahwe akozesamu Yesu kugarukamu esaara zaitu. Yesu akagambira abakwenda ati: “Ekimurasabaga kyona omu ibara lyange ndikikora.” (Yoh. 14:13) Nobukiraaba ngu Yahwe nuwe ahurra kandi agarukamu esaara zaitu, ahaire Yesu obusobozi obw’okuhikiriza ebyaba acwiremu. (Mat. 28:18) Nahabweki, Ruhanga atakagarukiremu esaara zaitu, abanza kurora obuturaaba tuhondiire obuhabuzi Yesu obuyahaire. Ekyokurorraho, Yesu akagamba ati: “Obumuliganyira abantu okusisa kwabu, Isinywe ali omu iguru alibaganyira nainywe. Kandi obumutaganyira bantu ebyokusiisa byabu, na Isinywe talibaganyira inywe ebyokusiisa byanyu.” (Mat. 6:14, 15) Mali kikuru muno kutwaza abandi omu mulingo ogw’embabazi nk’oku Yahwe na Yesu batutwaza!
7. Nibaha abarukwija kugasirwa omu kicunguro kya Yesu?
7 Abo bonka abaine enkoragana enungi na Yesu nubo barukwija kugasirwa omu kicunguro kye. Kinu nitukimanya tuta? Yesu akagamba ngu akaba nagenda “okuhayo obwomezibwe habwengajanize.” (Yoh. 15:13) Abaheereza ba Yahwe abesigwa abaali baroho Yesu atakaizire omu nsi nibaija kumwegaho kandi bamugonze. Abasaija n’abakazi abesigwa nka Iburahimu, Sara, Musa, na Rahabu nibaija kuhumbuuka, baitu nabo nikiija kubetaagisa kufooka banywani ba Yesu kusobora kutunga obwomeezi obutahwaho.—Yoh. 17:3; Eng. 24:15; Baheb. 11:8-12, 24-26, 31.
8-9. Nk’oku kyolekerwe omu Yohana 15:4, 5, enkoragana yaitu na Yesu etusobozesa kukora ki, kandi habwaki kikuru kwikara tuli omu bumu na Yesu?
8 Twine omugisa ogw’okukorra hamu na Yesu omu kutebeza n’okwegesa amakuru amarungi ag’Obukama. Yesu obwakaba ali omu nsi akaba ali mwegesa. Kandi kuruga Yesu agaruka omu iguru, agumizeemu n’ayembera omulimo ogw’okutebeza n’okwegesa habwokuba nuwe mutwe gw’ekitebe. Yesu nasiima habw’amaani goona ag’orukuteekamu kukonyera abantu kumumanya n’okumanya Ise. Kandi omulingo gwonka, ogutusobozesa kuhikiriza omulimo gunu nukwo kutunga obukonyezi kuruga hali Yahwe na Yesu.—Soma Yohana 15:4, 5.
9 Baibuli n’eyoleka kurungi ngu kusobora kusemeza Yahwe tusemeriire kugonza kandi n’okwikara nitugonza Yesu. Nahabweki katubazeeho ebintu bbina ebitusobora kukora kufooka banywani ba Yesu.
EBITUSEMERIIRE KUKORA KUSOBORA KUFOOKA BANYWANI BA YESU
Nosobora kufooka munywani wa Yesu kakuba (1) omumanya kurungi, (2) oyegera ha ntekereza n’enyetwaza ye, (3) osagika bagenzi ba Kristo, kandi (4) okasagika entekaniza ezikozerwe omu kitebe (Rora akacweka 10-14)b
10. Kintu ki eky’okubanza ekitusemeriire kukora kufooka banywani ba Yesu?
10 (1) Manya Yesu kurungi. Kinu nitusobora kukikora kakuba tusoma Matayo, Marako, Luka, na Yohana ebitabu ebiri omu Baibuli. Kakuba twecumitirizaaho Ebyahandiikirwe ebirukubazaaho obwomeezi bwa Yesu, kituletera kumugonza n’okumutamu ekitinisa habw’omulingo ogw’embabazi oguyatwaizeemu abantu. Ekyokurorraho, nobwaraaba akaba ali Mukama w’abegeswa be, atabatwaze nk’abairu. Baitu yabagambiraga eby’arukutekereza n’omulingo yabaga nayehurra. (Yoh. 15:15) Yesu yasasaga kandi yarraga nabo. (Yoh. 11:32-36) N’abanyanzigwa ba Yesu bakakirora nk’oku abantu abaikirizaaga obutumwa bwe yabafooraga banywani be. (Mat. 11:19) Obututwaza abantu omu mulingo Yesu y’atwaizeemu abageswa be, enkoragana yaitu nabo ey’eyongera kusemera, tutunga okumarwa n’okusemererwa, kandi tweyongera kumugonza.
11. Kintu ki ekyakabiri ekitusemeriire kukora kufooka banywani ba Yesu, kandi habwaki kikuru muno?
11 (2) Yegera ha ntekereza n’enyetwaza ya Yesu. Obutweyongera kumanya n’okuhondera entekereza ya Yesu tweyongera kufooka banywani be. (1 Kol. 2:16) Nitusobora tuta kuhondera ekyokurorraho kya Yesu? Tekerezaaho omulingo gunu. Yesu yayebembezaaga kukonyera abandi omu kiikaro eky’okwesemeza wenka. (Mat. 20:28; Bar. 15:1-3) Entekereza enu ekamuletera kwefereza nukwo akonyere abandi kandi n’okubaganyira. Tiyarahukaga kubiihirwa abantu obu bamubazaahoga kubi. (Yoh. 1:46, 47) Kandi tiyaikaraga n’abatekerezaaho kubi habw’ensobi bakozere kara. (1 Tim. 1:12-14) Yesu akagamba ati: “Nukwo bona balimanya muli begeswa bange obumurabaga nokugonzangana inywenka.” (Yoh. 13:35) Wekaguze, “Mpondera ekyokurorraho kya Yesu obu ninkora kyona ekirukusoboka kwikazaaho obusinge hagati yange n’Abakristaayo bagenzi bange?”
12. Kintu ki ekyakasatu eky’osobora kukora kufooka munywani wa Yesu, kandi nosobora ota kukikora?
12 (3) Sagika bagenzi ba Kristo. Byona ebitukora kusagika bagenzi be abaseserweho amagita, Yesu abirora nk’ebitukoliire uwe wenyini. (Mat. 25:34-40) Omulingo omukuru ogutusagikamu abaseserweho amagita nugwo ogw’okwejumbira omu mulimo Yesu yaragiire abahondezi be ogw’okutebezaaho Obukama kandi n’okufoora abantu abegeswa. (Mat. 28:19, 20; Eng. 10:42) Bagenzi ba Kristo tibakusoboire kuhikiriza omulimo ogw’okutebeza amakuru amarungi, ogurukukorwa omu nsi yoona hati, kakuba batarukukonyerwa ab’entaama ezindi. (Yoh. 10:16) Obworaaba oli omu ha ntaama ezindi, buli murundi oyejumbira omu mulimo ogw’okutebeza oyoleka ngu nogonza abaseswereho amagita kandi nogonza na Yesu wenyini.
13. Nitusobora tuta kuteeka omu nkora obuhabuzi obuli omu Luka 16:9?
13 Tufooka banywani ba Yahwe na Yesu obutuhayo sente kusagika omulimo ogubarukwebembera. (Soma Luka 16:9.) Ekyokurorraho, nitusobora kuhayo sente kusagika omulimo ogw’okutebeza ogw’ensi yoona, sente zinu zikonyera omu kutebeza omu bicweka ebya hara, kwombeka n’okudabiriza ebyombeko ebitukozesa omu kuramya kandi n’okukonyera ab’oruganda abahikirweho ebigwererezi kutunga ebyetaago byabo. Kandi nitusobora okuhayo sente kukonyera ekitebe kyaitu rundi kukonyera abo abaturukumanya bali omu bwetaago. (Nfu. 19:17) Enu niyo miringo eitusobora kukonyeramu bagenzi ba Kristo.
14. Kusigikirra ha Abefeso 4:15, 16, kintu ki ekyakana ekitusobora kukora kufooka banywani ba Yesu?
14 (4) Sagika entekaniza z’ekitebe. Tugumya enkoragana yaitu na Yesu obutusagika abo abakomerwe kuturolerra. (Soma Abefeso 4:15, 16.) Ekyokurorraho, kasumi kanu nitulengaho kurora ngu twakozesa kurungi Ebyombeko byaitu eby’Obukama. Kandi kinu kiresereho ebitebe ebimu kuteranizibwa kandi n’okuhindura ebicweka eby’okutebezaamu. Entekaniza enu ekonyire omu kukozesa kurungi sente ezihebwayo. Habw’entekaniza enu, kiretiire abatebezi abamu kuhinduramu nukwo bamanyiire empindahinduka zinu. Abatebezi abo abesigwa nibasobora kuba bamazire emyaka nyingi nibaheereza omu kitebe kimu kandi kinu nikisobora kuba kibaletiire kuba n’enkoragana ey’amaani. Nahabweki tikibanguhira obubasabwa kuheereza omu bitebe ebindi. Yesu asemererwa muno kurora abegeswa be abo abesigwa nibasagika entekaniza enu!
BANYWANI BA YESU EBIRO N’EBIRO
15. Obunywani bwaitu na Yesu burayeyongera buta kuguma omu bwire obw’omu maiso?
15 Abo abaseserweho amagita baine okunihira ngu nibaija kufooka banywani ba Yesu ebiro n’ebiro, obu nibalema nauwe omu Bukama bwa Ruhanga. Nibaija kuba na Kristo obwire bwona—bamurole, kandi babaze nauwe. (Yoh. 14:2, 3) Abo abaine okunihira okw’okwikara omu nsi nibaija kurora omulingo Yesu ali bagonza kandi abafeeho. N’obukiraaba ngu tibarukwija kurora Yesu, enkoragana yabo nauwe niija kweyongera kuguma obu baliba nibegondeza omu bwomeezi oburungi Yahwe na Yesu obu bali baha.—Is. 9:6, 7.
16. Migisa ki eitwine kasumi kanu habwokuba banywani ba Yesu?
16 Obutwikiriza omugisa ogw’okufooka banywani ba Yesu, tutunga emigisa nyingi. Ekyokurorraho, n’omu kasumi kanu Yesu atwoleka okugonza kandi atuha obukonyezi. Twine n’omugisa ogw’okwomeera ebiro n’ebiro. Kandi ekirukukira obukuru kiri ngu, obunywani bwaitu na Yesu nibwija kutuhikya ha kintu ekindi eky’omuhendo mwingi, eky’okutunga enkoragana enungi muno na Yahwe Ise Yesu. Mali kamugisa gw’amaani kuba banywani ba Yesu!
EKIZINA 17 “Ningonza”
a Abakwenda bakamara emyaka nibabaza kandi nibakora na Yesu, kandi eki kikabaletera kufooka banywani be nfe na nfe. Yesu nagonza naitwe tufooke banywani be, baitu habw’ensonga ezimu itwe nikisobora kutugumira kukira nk’oku kyagumire abakwenda. Ekicweka kinu nikiija kubazaaho ensonga ezi kandi nikiija n’okutuha amagezi agatusobora kukozesa kufooka n’okwikara tuli banywani ba Yesu nfe na nfe.
b KUSOBORRA EBISISANI: (1) Omukuramya kwaitu okw’eka nitusobora kwegaho obwomeezi n’obuheereza bwa Yesu obwakaba ali omu nsi. (2) Omu kitebe, nitusobora kwekamba kwikazaaho obusinge. (3) Kandi obutwekambira obuheereza, tusagika bagenzi ba Kristo. (4) Ebitebe obubiteranizibwa, tusemeriire kusagika encwamu ez’abagurusi bakozere.