Ensonga Habwaki Entekaniza ey’Okubinga omu Kitebe Eyoleka Okugonza

“JULIAN nagamba ati: Obunahuliire ekirango ngu mutabani wange akaba abingirwe omu kitebe kikasisana ngu ensi yange yahika ha mpero. Akaba ali mwana wange omuzigaijo kandi tukaba tuli banywani muno; twakoraga ebintu bingi hamu. Akaba ali mwana w’engeso, baitu aho naaho akatandika kukora ebintu ebitahikire. Mukazi wange akarra muno kandi nkaba ntamanyire nk’oku nsobora kuhuumuza. Tukaikara nitwekaguza obuharaaba haroho ekintu ekitutarakozere nk’abazaire.”

Habwaki nitugamba ngu kubinga Omukristaayo eri ntekaniza erukwoleka okugonza kandi kunu ereta obusaasi? Ebyahandiikirwe nibaha nsonga ki obukirukuhika ha kubinga? Habwaki omuntu abingwa omu kitebe?

ENSONGA IBIRI HABWAKI OMUNTU ABINGWA

Ensonga zinu ibiri nizo zisigikirwaho kusobora kubinga omu h’Abakaiso ba Yahwe ow’abatiziibwe. Eky’okubanza, obw’arukuba akozere ekibi ky’amaani. Ekyakabiri, kakuba ayanga kwegarukamu ekibi kye.

N’obukiraaba ngu Yahwe akimanyire ngu tituhikiriire, aine orulengo rw’obwecumi orw’arukugonza abaheereza be bahondere. Ekyokurorraho, Yahwe aturagira kwetantara ebibi nk’obusiihani, okuramya ebisisani, obusuma, omururu, obwisi hamu n’oburaguzi.​—1 Kol. 6:9, 10; Kus. 21:8.

N’okiikiriza ngu endengo za Yahwe ez’obwecumi nizetaagisa kandi ziroho kutulinda? Nooha atagonza kwikara n’abantu ab’obusinge, abaine engeso enungi kandi abarukwesigwa? Ab’oruganda na banyaanya itwe nukwo betwaza bati habwokuba itwena obutwayehaireyo hali Ruhanga tukamuraganiza ngu nitwija kuhondera oburagirizi bwe bwona obuli omu Kigambo kye.

Baitu kakuba obuceke bwaitu nk’abantu buleetera Omukristaayo anyakubatiziibwe kukora ekibi ky’amaani? Abaheereza ba Yahwe abesigwa aba kara bakakora ensobi nk’ezi, baitu Ruhanga atabange aho naaho. Ekyokurorraho ekimanyirwe muno nikyo eky’Omukama Daudi. Daudi akasiihana kandi yaita n’omuntu. Baitu Nabbi Nasani akamugambira ati: “Yahwe . . . akuganyiire ekibi kyawe.”​—2 Sam. 12:13, NWT.

Ruhanga akaganyira Daudi habwokuba Daudi akegarukamu kuruga ha mutima. (Zab. 32:1-5) Nikyo kimu n’omu kasumi kanu, omuheereza wa Yahwe abingwa omu kitebe obwayaga kwegarukamu rundi obw’agumizaamu nakora ekibi. (Eng. 3:19; 26:20) Abagurusi abali h’akatebe ak’okucwa omusango obubatarora obwokurorraho oburukwoleka ngu omuntu ayegarukiremu kuruga ha mutima, bamubinga.

Ha kubanza nitusobora kutekereza ngu kucwamu kubinga omusiisi tikiri kikorwa ky’embabazi kukira muno obuturukuba nitumugonza muno. Baitu Ekigambo kya Yahwe nikituha ensonga habwaki encwamu enu n’eyoleka okugonza.

ENTEKANIZA Y’OKUBINGA EGASIRA BULI OMU

Yesu akagamba ngu “amagezi gaihwaho omusango obwemirimo yago.” (Mat. 11:19) Encwamu enungi ey’okubinga omusiisi atarukwegarukamu erugamu ebirungi. Leka tubazeeho bisatu hali byo:

Kubinga omusiisi kihaisa ibara lya Yahwe ekitiinisa. Habwokuba nitwetwa ibara lya Yahwe, omulingo twetwazaamu gukwataho ibara lye. (Is. 43:10) Nk’oku engeso z’omwana zisobora kujumisa ibara lya ise, n’omulingo abantu baroramu Yahwe nigusobora kusigikirra ha bintu abantu abarukwetwa ibara lye barukukora. Ibara lya Ruhanga erirungi liheebwa ekitiinisa, abantu abarukwetwa ibara eri, obubahondera endengo ze ezirukukwata ha ngeso. Nukwo kikaba kiri n’omu kasumi ka Ezekyeri, abantu ab’amahanga agandi obubaali nibamanya ngu ibara Yahwe liine akakwate n’Abayudaaya.​—Ez. 36:19-23.

Nituba nitujumisa ibara lya Ruhanga erirukwera kakuba twejumbira omu busiihani. Omukwenda Petero akahabura Abakristaayo ati: ‘Nk’abaana ab’okuhurra mutesisaniriza nk’okwegomba kwanyu okwaira okukuli, omu kutamanya kwanyu: baitu nk’ogu ayabeesere okwali arukwera, nukwo nainywe mube abarukwera omu ngeso zoona, baitu kikahandikwa ngu mube abarukwera, baitu ninyowe arukwera.’ (1 Pet. 1:14-16) Engeso enungi kandi ezirukwera zihaisa Ruhanga ekitiinisa.

Omu h’Abakaiso ba Yahwe obw’agumizaamu n’akora ekibi, banywani be n’abantu abandi abamumanyire nibasobora kuhika bakakimanya. Entekaniza ey’okubinga eyoleka ngu Yahwe aine abantu abecumi abahondera emisingi ya Baibuli kusobora kwikara nibeera. Omu ihanga lya Switzerland omuntu akaija ha Kyombeko ky’Obukama yagamba ngu n’agonza kweteranizaaho ekitebe. Munyaanya akaba abingirwe omu kitebe habw’okwejumbira omu busiihani. Akagamba ngu akaba n’agonza kweteranizaaho ediini “etarukwikiriza engeso embi.”

Okubinga kulinda ekitebe kiri kyecumi. Omukwenda Paulo akahabura Abakristaayo ab’omu Kolinso ha kabi akali omu kuleka omusiisi akaikara omu kitebe. Akalengesaniza ebikorwa byabo ebibi n’ekitumbisa kitaito ekiletera ekintu ekike kutumba kikafooka kingi. Akagamba ati: “Ekitumbisa ekike kitumbisa ekihuro kyona.” Hanyuma yabatererra ati: “Muihemu omubi ogu hagati omulinywe.”​—1 Kol. 5:6, 11-13.

Nikizooka ngu, “omubi” Paulo ow’akaba nabazaaho, akaba ayejumbiire omu busiihani bw’ekika kya haiguru, kandi n’abandi omu kitebe bakaba nibakisagika ekikorwa kye. (1 Kol. 5:1, 2) Kakuba omusiisi ogu yaikiriziibwe kwikara omu kitebe, n’Abakristaayo abandi nabo bakaba nibaija kutandika kwejumbira omu bikorwa by’obusiihani ebikaba bikanyire omu rubuga oru. Kugurukya amaiso ebibi ebirukukorwa bakigenderiire, kiretera abandi kuleka kutekamu amaani kuhondera endengo za Ruhanga. (Mug. 8:11) Ekindi, abasiisi abatarukwegarukamu nibasobora kuleetera okwikiriza kw’Abakristaayo abandi kuceka.​—Yud. 4, 12.

Okubinga kuletera omusiisi kwegarukamu. Yesu akabazaaho omusigazi ayarugire omu ka ya ise yagenda yasiisira obugwetwa bwe omu kucakara. Omwana ayazaahire akeega ngu kwikara aheeru y’eka ya ise ky’akabi. Hanyuma omwana onu akakyetegereza ngu akakora ekibi, yayegarukamu, kandi yatekamu amaani kugaruka omwa ise. (Luk. 15:11-24) Omulingo Yesu yabalizeeho okusemererwa ise omwana ogu okuyatungire mutabani we obuyayegarukiremu, nikitukonyera kwetegereza omulingo Yahwe ayehurramu. Natugambira ati: “Tinyina okusemererwa okufa kwomubi; baitu omubi aruge omu muhandagwe abe omwomezi.”​—Ez. 33:11.

Omulingo nugwo gumu, ababingirwe abatakyali kicweka ky’ekitebe Ekikristaayo, enyakuli eka yabo ey’eby’omwoyo nibasobora kukyetegereza ngu haroho ebibarukufeerwa. Obubarukuhikwaho ebizibu habw’ekibi kyabo, bakaijuka okusemererwa n’ebirungi ebibakaba baine obubaali bakyaine enkoragana enungi na Yahwe hamu n’abantu be, nikisobora kubaletera kwegarukamu.

Entekaniza enu kusobora kurugamu ebirungi, nikyetaagisa kwoleka okugonza n’obumanzi. Omuhandiiki wa zabuli Daudi akahandiika ati: “Anyakuhikiriire antere, kiriba kyembabazi; Kandi ampane, kiriba nkamagita hamutwe.” (Zab. 141:5) Ekyokurorraho: Tekerezaaho omurambuzi ow’ajwahire muno kandi nambere ali haliyo ebirika. Omubiri gwe nigufuka muno kandi atandika kuhurra n’agonza kugwijagira. Obwaragwijagira ali omu birika, naija kufa. Obwaba akyalinzire abaramukonyera, munywani we aikara namuteera oruhi ha maiso kumusisiimura. Oruhi nirusobora kumusaasa baitu nirusobora kukiza obwomeezi bwe. Nikyo kimu, Daudi akakyetegereza ngu ow’ahikiriire kakuba omuha obuhabuzi oburukusaaliza, naaba yakikora kumugasira.

Emirundi erukira obwingi, okubinga kuheereza omusiisi okuhanwa okw’abaire nayetaaga. Hanyuma y’emyaka ikumi kurabaho, mutabani wa Julian outubalizeeho ha kutandika, akaleka ebibi bye yagaruka omu kitebe kandi hati naheereza nk’omugurusi omu kitebe. Nagamba ati: “Kubingwa kukampambiriza kwerorra nyenka ebizibu ebyarugire omu mulingo omubi ogunkaba nintwazaamu obwomeezi bwange. Nkaba ninyetaaga okuhanwa kwa mulingo gunu.”​—Baheb. 12:7-11.

OMULINGO GW’OKUGONZA OGUTUSEMERIIRE KUTWAZAAMU ABABINGIRWE

Ky’amananu ngu tusaasa muno omuntu obw’abingwa omu kitebe, baitu ekikuru nukwo kukonyera omuntu ogu akagaruka hali Yahwe. Kinu nitusobora kukikora tuta?

Abagurusi abaine omulimo ogugumire ogw’okucwamu omuntu obwaraaba asemeriire kubingwa, basemeriire kwoleka okugonza nk’okwa Yahwe. Obubaba nibamanyisa omuntu encwamu yabo, omu mulingo gw’embabazi bamusoborra kurungi eby’asemeriire kukora nukwo agarurwe omu kitebe. Buli hanyuma y’akasumi, abagurusi babungira abo aboolekere ngu nibagonza kuhinduramu engeso zaabu nukwo babaijukye omulingo basobora kugaruka hali Yahwe.a

Ab’omu ka yanyakubingirwe nibasobora kwoleka okugonza hali ekitebe hamu n’omusiisi kurabira omu kusigika encwamu y’okubinga. Julian nagamba ati; “Akaba akyali mutabani wange, baitu eby’akaba nakora bikateka ekisiika hagati yange nauwe.”

Abali omu kitebe boona nibasobora kwoleka okugonza okurukusigikirra ha misingi ya Baibuli kuraba omu kwetantara kukwataniza n’okubaza n’anyakubingirwe. (1 Kol. 5:11; 2 Yoh. 10, 11) Obubakora eki, booleka obukuru bw’okuhana Yahwe okw’amuhaire kurabira omu bagurusi. Ekindi, basemeriire kweyongera kwoleka okugonza n’okusagika ab’eka y’ogu anyakubingirwe, habwokuba baba baine obusaasi bwingi kandi titusemeriire kubaletera kutekereza ngu nabo tubecwireho.​—Bar. 12:13, 15.

Julian namalirra ati: “Entekaniza ey’okubinga n’eyetaagisa muno habwokuba etukonyera kwetwaza omu mulingo ogurukwikiraganiza n’endengo za Yahwe. Hanyuma y’akasumi harugamu ebirungi n’obukiraaba ngu kuleeta obusaasi. Kakuba nagumizeemu ninkoragana na mutabani wange, akaba atarukwija kugaruka hali Yahwe.”