3 Obukonyezi obw’Okugumiisiriza omu Bizibu

Haroho ebizibu kasumi kanu ebi tutasobora kwetantara rundi kumaraho. Nk’ekyokurorraho, kakuba oba oferiirwe omugonzebwa rundi oine oburwaire obutarukukira, n’osobora kuba otaine eky’okukora oihireho kugumira obusaasi. Baibuli n’esobora kukonyera omu nyikara nka zinu ezigumangaine?

OBURWAIRE OBUTARUKUKIRA

Rose ow’emyaka 20 nagamba ngu: “Nyine oburwaire obutarukukira kandi obundetera obusaasi obw’amaani obwa buli kaire. Obwomeezi bwange tibuli kurungi nakati.” Kimu ha bintu ebyakiraga kumweraliikiriza, nukwo kusanga ngu akaba atakyasobora kusoma Baibuli hamu n’okukora ebintu ebindi eby’omwoyo. Baitu akakonyerwa muno ebigambo bya Yesu ebiri omu Matayo 19:26 ebirukugamba ngu: “Ruhanga nasobora byona.” Rose akakyetegereza ngu haroho emiringo nyingi asobora kwesomesa. Obwire obumu habw’obusaasi obwingi tikyamwanguhiraga kusoma baitu akatandika kuhuliiriza Baibuli n’ebitabu ebindi ebirukusigikirra ha Baibuli ebikwasirwe ha maraka.a Rose nagamba ati: “Kakuba nkaba ntaine emiringo nk’enu, tinakusoboire kulinda enkoragana yange na Ruhanga.”

Rose obwasalirwa habw’okulemwa kukora ebintu ebiyakoraga kara, ahumuzibwa ebigambo ebiri omu 2 Abakolinso 8:12 ebirukugamba ngu: “Nambere haroho okugonza nukuikirizibwa nkomuntu okwanyina, tikuli nkokwa tanyina.” Ebigambo binu biijukya Rose ngu, Ruhanga nasiima eby’arukukora habwokuba alengaho kukora kyona ekyarukusobora kusigikirra ha buceke bwe.

OBUJUNE

Delphine, ou tusangirwe tubalizeho nagamba ati: “Hanyuma ya muhara wange ow’akaba aine 18 kufa, nkatunga obusaasi obw’amaani muno kandi nkaba nintekereza ngu ningenda kufa. Obwomeezi bwange bwona bukahinduka.” Akatunga okuhumuzibwa okw’amaani kuruga omu bigambo ebiri omu Zabuli 94:19, nambere omuhandiiki wa Zabuli enu yagambiire Ruhanga ati: ‘Omu bitekerezo byange ebingi ebiri omuli nyowe, okuhumuza kwawe kusemeza obwomezi bwange.’ Delphine nagamba ati, “Nkasaba Yahwe ankonyere tunge ebintu eby’okukora ebira mpumuza.”

Akacwamu kukora omulimo ogw’okukonyera abantu abandi. Hanyuma y’akasumi, akatandika kwesisaniriza na kalamu ey’abaana bakozesa kusiiga ebisisani eraangi—habwokuba n’obuyakuba ecwekere, eba n’eky’asobora kusiiga ekisisani eraangi. Omu mulingo nugwo gumu, n’obukiraaba ngu nauwe nayehurra kuba nka kalamu ecwekere, n’akyasobora kukonyera abantu abandi. Nagamba ati: “Nkakyetegereza ngu obunatandikire kukozesa emisingi ya Baibuli n’okuhondera obuhabuzi obuli omu Byahandiikirwe, kukonyera abantu abanayegesaaga Baibuli, nugwo omulingo Yahwe akaba n’akozesa kumpumuza.” Akahandiika amabara g’abantu abali omu Baibuli abarabire omu bujune obwingi. Akakyetegereza ngu: “Boona baali bantu abayekambaga kusaba.” Kandi akakyetegereza ngu “okusaba kwawe tikusobora kugarukwamu kakuba otasoma Baibuli.”

Kwega Baibuli kikonyire Delphine kwetegereza ekintu ekindi—kwebwa eby’abaireho, nukwo omutima aguteke ha bintu ebirabaho omu busumi obw’omu maiso. Ahumuzibwa okunihira okuli omu kitabu kye Engeso Ezabakwenda 24:15 orukugamba: “Halibaho okuhumbuka okwabahikiriire nabatahikiriire.” Mali, Delphine n’agumya ngu Yahwe ali humbuura muhara we? Delphine katugambire: “Ninkigumiza kimu ngu muhara wange naija kuhumbuuka omu kasumi ak’omu maiso, Yahwe obwaliba nahumbuura abantu. Kandi ninteeramu akasisani twikaliire hamu omu ka yaitu.”

a Ha mukura ogwa jw.org haroho ebintu biingi ebikwasirwe omu maraka eby’okuhuliiriza.

Baibuli n’esobora kukuhumuza n’omu busumi obugumangaine

RUHANGA ATUKONYERA ATA?

Baibuli n’etugarukamu kurungi. N’egamba eti: “Mukama ali haihi na bona abamukunga, bona abanyakumukunga namananu. Uwe alihikiriza okwegomba kwabo abanyakumutina; alihu’ra oku’ra kwabu, kandi alibajuna.” (Zabuli 145:18, 19) Eki tikurukugarramu amaani? Baitu, Ruhanga naija kugarukamu ata okusaba kwabo abaserra obuhabuzi kuruga hali we?

ATUHA AMAANI:

Ebizibu nibisobora kutumaramu amaani n’okutufookera mugugu—omu by’omwoyo, eby’omubiri hamu n’omubitekerezo. (Enfumo 24:10) Baitu Yahwe “aha amani ogu aruhirire; nogu atanyina mani, amwongeraho amani.” (Isaya 40:29) Omukwenda Paulo ayagumisirize okulengwa kwingi akagamba ati: “Ninsobora okukora byona habwogu arukumpa amani.” (Abafiripi 4:13) Ruhanga akakozesa omwoyo ogurukwera kuha omukwenda Paulo amaani. Naiwe n’osobora kusaba Ruhanga akuhe omwoyo gwe ogurukwera.—Luka 11:13.

ATUHA AMAGEZI:

Ninkaha nambere osobora kwiha obukonyezi obw’okwetegereza n’okuta omu nkora obuhabuzi bwa Baibuli? Omuhondezi wa Yesu arukwetwa Yakobo akahandiika ati: “Omuntu wena omulinywe obwaburwa amagezi, asabe Ruhanga, arukuha bona okutaima kunu tarukuhana, kandi alihabwa.” (Yakobo 1:5) N’osobora kukorra ha by’osabire kuraba omu kwesomesa Baibuli n’okukora eby’erukuturagira. (Yakobo 1:23-25) Obworakora eki, noija kwerorra obuhabuzi oburungi obuli omu Baibuli.

ATUHA OBUSINGE:

N’obworaaba oine ebintu bingi ebirukweralikiriza, Yahwe n’asobora kukuhumuza. Ekigambo kye nikitugambira ngu: “Mutatuntura na kake, baitu omu kusaba kwona nokwesengereza hamu nokusima mumanyisege ebimuserra hali Ruhanga. Kandi nobusinge bwa Ruhanga oburukukira okumanya kwona bulirinda emitima yanyu nebitekerezo byanyu omu Kristo Yesu.” (Abafiripi 4:6, 7) Habwaki otasaba Yahwe kukuha obusinge?

Baitu, kandi, kakuba ebizibu byawe bitahwaho bwangu? Otatekereza ngu Ruhanga akakwebwa, n’obworarora ngu ebizibu byawe tibirukuhwaho. Ruhanga naija kukuha obumanzi hamu n’amaani kugumisiriza. (1 Abakolinso 10:13) Baibuli eturaganiza ngu nihaija kubaho akasumi nambere ebizibu byaitu birihweraho kimu!