Osobora Ota Kuba N’obwomeezi Oburungi?

OBWOMEEZI kasumi kanu, tibuli nk’oku Ruhanga yabutekaniize kuba. Ensi hati yakubaire ijwiremu abantu abarukugonza Ruhanga kubalema, kubahabura n’abantu abarukugonza kwegera ha miringo ye yoona enungi. Abantu banu bakubaire baine okusemererwa omu maka gabo, bakwegere ebintu ebihyaka, kandi bakufoire ensi yoona orugonjo orurungi.

RUHANGA NARAGANIZA NGU NAGENDA KUHINDURA OBWOMEEZI OMU NSI BUFOOKE NK’OKU BUKABA BUSEMERIIRE KUBA HA KUBANZA

• “Nagenda kumaraho obulemu okuhika ha mpero z’ensi.”​—Zabuli 46:9, NW.

• “Empiko ezokucweramu omusango . . . nokuhwerekereza abo abahwerekereza ensi.”​—Okusuku’rwa 11:18.

• “Anyakuikarayo taligamba ati ndi murwaire.”​—Isaya 33:24.

• “Nabakome bange balisemererwa omwanya omukoto omulimo ogwengaro zabu.”​—Isaya 65:22.

Obunabbi bunu bwona bulihikirra buta? Ruhanga akomere Omwana we Yesu, kuba Omukama wa gavumenti ey’ehikiriire ey’erukwija kulemera omu iguru kulema ensi. Gavumenti enu Baibuli egibazaaho nk’Obukama bwa Ruhanga. (Danieri 2:44) Baibuli ebazaaho eti Yesu: “Mukama Ruhanga alimuha ekitebe . . . , kandi alirema” nk’Omukama.​—Luka 1:32, 33.

Yesu obwakaba ali omu nsi, akakora eby’amahano bingi kwoleka nk’oku obwomeezi bw’abantu buliba burungi obwaliba atandikire kulema nk’Omukama.

YESU AKOOLEKA EBINTU EBIRUNGI EBY’ALIKORRA ABANTU ABAHULIZI

• Akakiza endwaire nyingi, kwoleka nk’oku arukwija kumaraho endwaire zoona omu bantu.​—Matayo 9:35.

• Akaculeeza ihuunga ery’amaani ha nyanja, kwoleka nk’oku arukwija kuliinda abantu kutahikwaho ebigwererezi.​—Marako 4:36-39.

• Akaliisa enkumi n’enkumi ez’abantu, kwoleka nk’oku arukwija kuhikyaho abantu ebyetaago byabo.​—Marako 6:41-44.

• Akahindura amaizi yagafoora amaarwa obwakaba ali ha bugenyi, ekirukwoleka ngu naija kukonyera abantu kwegonza.​—Yohana 2:7-11.

Osobora ota kutunga obwomeezi oburungi Ruhanga obwaliyo natekaniriza abantu abarukukora eby’agonza? Haroho “omuhanda” ogw’osemeriire kurabamu. Baibuli egweta ‘omuhanda ogutaaha omu bwomeezi, kandi nabo abaguzoora bake.’​—Matayo 7:14.

OMULINGO OSOBORA KUZOORA OMUHANDA OGURUKUTAAHA OMU OBWOMEEZI OBURUNGI

Omuhanda ogw’obwomeezi nugwo guha? Ruhanga nagamba ati: “Ninyowe [Yahwe] Ruhanga wawe, arukukwegesa okugasa, arukukuterekereza omu muhanda ogwoliba nogendamu.” (Isaya 48:17) Kakuba ohondera obuhabuzi bunu obwomeezi bwawe nibwija kuba kurungi.

Yesu akagamba ati: “Ninyowe muhanda namananu nobwomeezi.” (Yohana 14:6) Kakuba tukora Yesu ekiyagambire kandi tukahondera ekyokurorraho kye, nitwija kwirra haihi na Ruhanga kandi obwomeezi bwaitu nibwija kuba kurungi.

Osobora ota kuzoora omuhanda ogw’obwomeezi? Haroho amadiini maingi, baitu Yesu Kristo akatuhabura ati: “Omuntu wena anyakungambira ati Mukama wange, Mukama wange, tali ogu alitaha omu Bukama obwomu iguru; baitu ogu anyakukora Isenyowe ali omu iguru ebyagonza.” (Matayo 7:21) Akongera yagamba ati: “Mulibamanyira ha byana byabu.” (Matayo 7:16) Baibuli n’esobora kukukonyera kuzoora ediini ey’amananu.​—Yohana 17:17.

Osobora ota kutandika kurubatira omu muhanda ogw’obwomeezi? Osemeriire kubanza kwega ebirukukwata ha muntu ayahaire buli omu obwomeezi: Muntu ki ogu? Ibara lye niryo liha? Muntu wa mulingo ki? Bintu ki ebyarukutukorra? Bintu ki eby’arukugonza tukole?a

Ruhanga atahange abantu kuba n’ebigendererwa nk’okukora, kulya, kuzaana, hamu n’okuzaara kwonka, baitu nagonza tumumanye kandi tufooke banywani be. Twoleka ngu nitumugonza obutukora ebintu eby’agonza. Yesu akagamba ati: “Bunu nubwo obwomezi obutahwaho, okumanya iwe Ruhanga omu owamananu.”​—Yohana 17:3.

KUTEERA ORUTAMBU ORW’OKUBANZA OMURUGENDO RWAWE

Obuturamanya ebintu Ruhanga arukugonza tukole, tusemeriire kukora empindahinduka. Eki nikisobora kuzooka nk’ekintu ekigumire kukora. Baitu amananu gali, obwomeezi bwaitu nibwija kusemera kakuba tutandika kurubatira omu muhanda ogurukutaaha omu bwomeezi. Kusobora kumanya ebikaguzo ebikuru ebirukukwata hali Ruhanga, Abakaiso ba Yahwe nibegeseza busa Baibuli omu bwire n’ekiikaro eky’orukugonza. Nosobora kutuhikirra obu n’okozesa omukura gwaitu ogwa www.pr418.com.