Kozesa Kurungi Obwire Bwawe Oli omu Buheereza
Omwaka gw’obuheereza 2014, Abakaiso ba Yahwe bakamara esaaha 1,945,487,604 nibatebeza—ekirukwoleka ngu twehaireyo kukora omulimo gwa Yahwe! (Zab. 110:3; 1 Kol. 15:58) Nk’oku “ebiro bisigaireyo bike,” Tikyakubaire kirungi kukozesa obwire obusigaireyo kuhikirra abantu baingi omu buheereza?—1 Kol. 7:29.
Kusobora kukozesa kurungi obwire bwaitu, twina kuba bantu abetegekere kukora empinduka. Nk’ekyokurorraho, esaaha obweraaba n’esobora kuhwaho n’otebeza baitu otaina ow’obalize nauwe, osobora kuhinduramu n’ogenda nambere orasobora kutunga abantu ab’orabaza nabo. Ebiikaro ebitutebezaamu tibisisana. Nahabwekyo amagezi ganu gasobora kukutoonyera kukozesa kurungi obwire bwaitu nukwo “tutatera masa.”—1 Kol. 9:26.
Kutebeza Nju ha Nju: Kuruga kara, abatebezi abarukukira obwingi babaire nibatandika kutebeza nibabanza kugenda nju ha nju. Baitu nkoku kiri ngu abantu baingi basiiba ha mirimo yabo, tikyakubaire kirungi kutebeza nju ha nju obwire bwa rwebagyo bamazire kwinuka kandi bateekaine? Tusobora kukozesa obwire bwa nyamusana kutebeza ha nguuddo rundi nambere abantu bakorra emilimo yaabu.
Okutebeza Nambere Abantu Baingi Baba: Obu muraaba nimukozesa emeeza rundi akagaali, musemeriire kubiteeka hali abantu baingi baraba, omu kicweka nambere ekitebe kyanyu kitebeza. (Rora Our Kingdom Ministry ya Julaayi 2013, rup. 5.) Kakusangwa abantu bakeeha omu kiikaro ekyo, Akatebe k’Abagurusi kasobora kucwamu mugende omu kiikaro ekindi nambere abantu baraba.
Ab’Oraganiize Kugarukira n’ab’Oyegesa Baibuli: Osobora kuhinduraho obwire obw’ororraho abeegi rundi ab’oraganiize kugarukira nukwo osobole kubarora omu obwire obw’otakira kutunga abantu baingi ogenzere kutebeza? Nk’ekyokurorraho, kakuba okyetegereza ngu abantu abarukukira obwingi baba muka obwire bwa nyenkyakara Kyamukaaga, kiba ky’amagezi kutebeza nju ha nju obwire obwo, abeegi baawe n’obeegesa obwire bwa nyamusana rundi rwebagyo.
Gonze kiri ngu tusobora kubara obwire obutumazire omu buheereza, ekirakira kutuleetera okusemererwa nukwo kubara obwire obutumanyire ngu tubukozeseze kurungi. Obworasanga omulingo gumu ogw’okutebeza gutarukukora ha bwire bumu, osobora kukozesa omulingo gundi. Saba Yahwe, “Omukama wokugesa,” akuhe oburagirizi omu miringo ey’osobora kukozesa kurungi obwire bwawe oli omu buheereza.—Mat. 9:38.