Omulingo Omuhyaka ogw’Okutebeza omu Rwijwire
1. Ebitebe ebiina ebiikaro nambere abantu baingi baraba bitererirwe kukora ki?
1 Ebitebe ebiina ebiikaro nambere abantu baingi baraba bibaire nibitererwa kutandika okutebeza okw’omurwijwire nibakozesa emeeza n’obugaali. Akagaali obu kakozesebwa, omutebezi omu asobora kwikaara rundi kwemerra haihi nako. Baitu obu mukozesa emeeza, hasemerire kubaho abatebezi babiri. Abatebezi abo basemerire kuba nibafaayo h’abantu kandi baina kuba abarukwanguha kuhikiirwa. Kakuba omuntu asikirizibwa ebitabu byaitu, omutebezi omu nuwe asemerire kubaza nauwe. Asobora kumugamba, “wali wekagwizeho Baibuli eky’eyegesa ha nsonga enu?” Omutebezi ondi rundi babiri basobora kweyongera okubaza n’abantu abandi abarukurabaho baitu bemerire nambere barukusobora kusigara nibarora emeeza eroho ebitabu.
2. Ha ekyokuroorraaho ekirukwoleka oburungi bw’okutebeza omu rwijwire nimukozesa obugaali rundi emeeza ebiteirweho ebitabu.
2 Enkora enu ekonyiire baingi kutunga ab’okwegesa Baibuli. Hahoro omwegi ayali n’akora okuserruliriza hali Abakaiso ba Yahwe baitu obu y’aserwire Ekyombeko ky’Obukama kikamubura. Wiiki eyahondireho akarora emeeza eteirweho ebitabu omw’itendekero nambere y’asomeraga. Akatandika kwegesebwa Baibuli, hati ali omu h’Abakaiso ba Yahwe. Nauwe hati akozesa enkora enu ey’okutebeza omu rwijwire.
3. Enkora enu ey’okutebeza omu rwijwire abatebezi abamu bagisangire bata?
3 Munyanya itwe omu atebeza omu mulingo gunu akagamba: “Abantu abamu baija ha meeza kutunga magaziini ezakaturuka. Abandi tibakahurraga hali Abakaiso ba Yahwe. Nkirozire ngu enkora enu neija kutukonyera kuhikiirra baingi.” Ondi akagamba: “Enkora enu empyaka ey’okutebezamu nungi habwokuba abantu nubo baija nambere oli nibagonza kumanya ebirukukiraho.”
4. Habwaki kiri kirungi okuteeka emeeza yaitu rundi akagaali kaitu omu biikaro ebyakomererwemu obwire nubwo bumu buli wiiki?
4 Kirungi okuteeka emeeza yaanyu n’akagaali kaanyu omu biikaro ebi mwakomeremu, obwire nubwo bumu buli wiiki. Abantu obu baikara nibarora ebitabu omu kikaaro nikyo kimu, kibanguhira okuhikiira abali ha meeza okubakaguza ebikaguzo rundi kusaba ebitabu. Ekitebe kyaanyu kimazire ira kukora entekaniiza enu? Obu kiraaba kiri kiti, naiwe osobora kuba omu hali ‘abarukuhikya honahona Obukama bwa Ruhanga.’—Luka 9:60.