Okutebeza Nitukozesa Akagaali Rundi Emeeza

Kyetegereziibwe ngu kukozesa akagaali rundi emeeza miringo erukusikiriza muno abantu abarukugonza kwega amaananu. (Yoh. 6:44) Nahabwekyo, abagurusi batereriirwe kutandikaho entekaniza enu hali abantu baingi baraba omu bicweka nambere ebitebe byabu bitebeza. Emirundi erukukira obwingi, tikirukutwetaagisa kubanza kusaba abebambezi b’ekicweka ekyo orusa kutwikiriza kutekaho akagaali kaitu n’emeeza yaitu. Batebezi ba mulingo ki abasemeriire kukozesebwa omu ntekaniza enu? Basemeriire kuba abamanyirwe kuba ab’amagezi, abakwetwara omu omulingo ogurukuheesa ekitinisa, kandi abamanyirwe kubaza kurungi n’abantu. Ebirukuhonderaho hansi nibyo omutebezi asemeriire kukora rundi butakora.

Eby’Osemeriire Kukora:

Osemeriire kuba muntu arukwanguhira abantu kandi n’ofaayo. Abatebezi abamu bamwega obu barora omuntu aizire hanyuma nibamuramukya kurungi batakatandikire kubaza nauwe. Kakuba omuntu aba n’arabaho akarora ebitabu byaitu, osobora kumugamba “Osobora kukomamu ekitabu eky’orukugonza.”
Lekaho omwanya ogusemeriire hagati yawe n’akagaali rundi emeeza. Omu biikaro ebimu, abatebezi beemerra haihi n’ebitabu. Abandi bagamba ngu obu beemerra haihi, abantu batiina kwija kwihaho ebitabu nahabwekyo beemerra ha rubaju nibalinda mpaka omuntu aiziire kimu nambere emeeza eri rundi akagaali nubwo nibaija kubaza nauwe. Omuntu obw’asemberra ebitabu, tandikiraho kubaza nauwe. N’osobora kumukaguza, “Ekikaguzo kinu wali okiteekeriizeho?”
Lengaho muno kukozesa Baibuli n’ogarukamu abantu.
Kakuba omuntu akomamu ekimu ha bitabu ebitukozesa kwegesa Baibuli nka Baibuli Mali Eyegesa Ki?, musoborre enteekaniza yaitu y’okwegesa abantu Baibuli. Mutereho vidiyo Habwaki Osemeriire Kwega Baibuli?
Omuntu obwaraaba n’agonza kumanya ebirukukiraho, musabe enaamba y’esimu rundi endagirro yoona. Obwaraaba atarukwikara omu kicweka nambere mutebeza, ijuza fomu ya Please Follow Up-E (S-43) ogiheereze omuhandiiki w’ekitebe kyanyu.