Okuhikiriza Kurungi Obuheereza Bwaitu—Kugaba Akatabu Baibuli eky’Eyegesa

Habwaki Kiri Kikuru: Akatabu Baibuli eky’Eyegesa tukakozesa kwegesa abantu. Baitu tutakatandikire kwega n’omuntu, twina kuba twakamulekiire. Nahabwekyo, itwena tusemeriire kumanya omulingo gw’okugabamu akatabu kanu tuli omu buheereza. (Nfu. 22:29) Haroho emiringo nyingi ey’okugabamu akatabu kanu, nahabwekyo buli omu asemeriire kukozesa omulingo agurukumwanguhira.

Omulingo gw’Okukikoramu:

Kaguza omuntu ekikaguzo n’ekigendererwa ky’okumugarukamu n’okozesa emu ha suura eziri omu katabu kanu. Osobora n’okukozesa kimu ha bikaguzo ebiri ha kutandika kw’esuura. Omuntu amazire kukugarukamu, musomere ekyahandiikirwe ekirukusagika ebi mubalizeho hanyuma musomere akacweka akarukugarukamu ekikaguzo ekyo kandi okamusoborre.
Rundi osobora kumwoleka ebikaguzo ebiri omu nyanjura hanyuma n’omutwara nambere bigarukirwemu omu katabu. Nk’ekyokurorraho, osobora kubaza ha kizibu eky’amaani ekyagwire omu kicweka ekimu hanyuma n’omugambira ngu ebintu nk’ebyo obu bibaho, abantu bamu beekaguza ebikaguzo nk’ebyo ebiri ha rupapura 3. Rundi osobora kugamba ngu obungiire abataahi baawe kubagambira ebintu ebirungi ebiraabaho omu busumi bw’omu maiso. Hanyuma mwoleke ebisisani ebiri ha rupura 4-5 kandi omukaguze, “Kizibu ki ekiwakugondeze Ruhanga abanze kwihaho?” Rundi osobora kugamba ngu n’obungira abantu kubakoonyera kutunga eby’okugarukamu omu bikaguzo ebikuru omu bwomeezi. Hanyuma mwoleke ebikaguzo ebiri ha kumalirra kw’orupapura 6, kandi omukaguze ekikaguzo ekiyakugondeze mugarukemu.
Omulingo ogundi, nugwo ogw’okutandikiraho kwegesa omuntu Baibuli ha murundi gw’okubanza. Osobora kugamba: “Nitwoleka abataahi baitu akatabu kanu akatukozesa kwegesa Baibuli. Orakarozereho? [Muleke agarukemu.] Obworaaba oineho obwire buke, n’akugondeze nkwoleke omulingo osobora kukakozesa kwega Baibuli.”

Lengaho Kinu Okwezi Kunu:

Mulengeho kuraba omu nyanjura zinu muli omu kuramya kwanyu okw’eka.
Gambiraho abatebezi bandi enyanjura ey’otekaniize kukozesa. (Nfu. 27:17) Hanyuma y’okuhuliriza enyanjura ez’abandi, osobora kuhindura enyanjura yaawe obukiraaba nikyetaagisa.