OBWOMEEZI BWAITU NK’ABAKRISTAAYO
Sagika Emisingi ya Yahwe Erukukwata ha Ngeso
Yahwe nuwe ateraho abantu emisingi erukukwata ha ngeso ei basemeriire kuhondera. Nk’ekyokurorraho, Yahwe naragira obuswere hagati y’omusaija n’omukazi kugumaho. (Mat 19:4-6, 9) Atanga obusihani obwa buli mulingo. (1Kol 6:9, 10) Kandi aha abahereza be emisingi erukukwata ha kujwara n’okwekoraho.—Bir 22:5; 1Tim 2:9, 10.
Abantu abarukukira obwingi omu kasumi kanu, tibarukworobera emisingi ya Yahwe. (Bar 1:18-32) Engeso zaabo, omulingo bajwaramu hamu n’okwekoraho bisigikirra h’abantu abandi nk’oku bakora. Tibatiina n’okwoleka engeso zaabo embi kandi n’okujumirra abo abatakwetwaza nk’abo.—1Pet 4:3, 4.
Itwe nk’Abakaiso ba Yahwe, tusemeriire kuhondera emisingi ya Ruhanga erukukwata ha ngeso n’obumanzi. (Bar 12:9) Kinu tukikora tuta? Omu mulingo ogw’amagezi tusemeriire kumanyisa abantu abandi Yahwe eby’agonza. Baitu kandi, kikuru muno naitwe kworobera emisingi ye omu bwomeezi bwaitu. Nk’ekyokurorraho, obuturukuba nitucwamu engoye eziturajwara n’omulingo turayekoraho, nitusobora kwekaguza ebikaguzo binu: ‘Obumba ninkora encwamu, nsigikirra ha misingi ya Yahwe rundi entekereza ey’ensi? Omulingo njwaramu n’okwekoraho byoleka ngu ndi muheereza wa Ruhanga?’ Kandi obu turaaba nituserra omuzaano ogw’okurora ha tivi rundi filimu, nitusobora kwekaguza: ‘Yahwe n’asiima omuzaano gunu? Omuzaano gunu nigukurakuraniza engeso za mulingo ki? Eby’okwesemeza byange nibisobora kusiisa engeso zange enungi? (Zab 101:3) Eby’okwesemeza byange nibisobora kutabaijura ab’omu ka yange rundi abantu abandi?’—1Kol 10:31-33.
Habwaki kikuru kusagika emisingi ya Yahwe erukukwata ha engeso? Omu kasumi akatali kahara Yesu nagenda kuhwerekereza amahanga goona hamu n’ebikorwa ebibi byona. (Ez 9:4-7) Abo bonka abarukukora Ruhanga eby’agonza nubo barasigaraho. (1Yoh 2:15-17) Nahabweki tusagike emisingi ya Yahwe erukukwata ha ngeso nukwo abo boona abararora engeso zaitu enungi basobole kuhaisaniza Ruhanga.—1Pet 2:11, 12.
Omulingo njwaramu n’okwekoraho byoleka ki ha ngeso zange?
MUROLE VIDIYO FOOKA MUNYWANI WA YAHWE—OMUSAIJA OMU, OMUKAZI OMU, KANDI HANYUMA MUGARUKEMU EBIKAGUZO BINU:
Habwaki ky’amagezi kworobera emisingi ya Yahwe?
Habwaki abazaire basemeriire kwegesa abaana baabo emisingi ya Yahwe erukukwata ha ngeso bakyali bato?
Abato hamu n’abakuru nibasobora kukonyera bata abandi kugasirwa omu burungi bwa Yahwe?