Habwaki Ruhanga Atagarukamu Esaara Zoona?

“Naiwe bwosaba otalisaba endanda.”​—Matayo 6:7.

Yahwe tarukugonza twikale nitugarukamu esaara ezitukwasire omu mutwe rundi kumusaba nitukozesa ezitusomere omu kitabu ky’esaara. Oihireho, nagonza tumubalize kuruga ha mitima yaitu. Tekerezaaho omulingo osobora kwehurra kakuba munywani wawe aikara nakubaliza ebigambo nibyo bimu buli kiro. Abanywani abarungi tibaserekangana ekintu kyona baitu bagambirangana ebiri ha mitima yabo. Obutusaba Isiitwe ow’omu iguru nitukozesa bigambo byaitu, kyoleka ngu nitumutwara kuba munywani waitu.

“Musaba, kandi tumurukuhabwa, baitu musaba kubi.”​—Yakobo 4:3.

Titusobora kunihira Ruhanga kugarukamu esaara zaitu kakuba tumusaba ebintu ebitumanyire ngu tarukugonza tukole rundi tutunge. Ekyokurorraho, kakuba omuntu arukuteera ejaara asaba Ruhanga kumukonyera kutunga omugisa kusinga sente, mali Yahwe nasobora kugarukamu esaara nk’egi? Yahwe atutererra kwetantara kuba n’omururu hamu n’okwikiririza omu rugisagisa. (Isaya 65:11;a Luka 12:15) Titusobora kunihira Yahwe kugarukamu esaara nk’ezi! Obuturaaba nitugonza Ruhanga agarukemu esaara zaitu, twine kukigumiza kimu ngu ebitumusaba nibiikiranganiza n’eby’atugambira omu Baibuli.

“Ahindura okutu okutahurra ebiragiro, nokusabakwe muziro.”​—Enfumo 28:9.

Omu busumi obwa kara, Ruhanga tiyagarukamuga esaara z’abantu abajemeraga ebiragiro bye. (Isaya 1:15, 16) Ruhanga takahindukaga. (Maraki 3:6) Obuturaaba nitugonza Ruhanga agarukemu esaara zaitu, tusemeriire kukora kyona ekirukusoboka kuhondera ebiragiro bye. Hati tugambe ngu Yahwe talihurra esaara zaitu obuturaaba twakozere ebintu ebibi omu busumi obwakara? Nangwa! Ruhanga habw’okutugonza naija kutuganyira kakuba tuhindura obwomeezi bwaitu, kandi tukakora kyona ekirukusoboka kumusemeza.​—Engeso Ezabakwenda 3:19.