OMULINGO TUSOBORA KULEKA ENOBI

3 | Ebitekerezo Byawe Biihemu Enobi

Baibuli Egamba:

“Muhindurwe omu magezi ganyu amahyaka, nukwo mwerorre inywenka Ruhanga ebyagonza okubiri ebirungi ebisemiire, ebihikiriire.”—ABARUMI 12:2.

Eki Nikimanyisa Ki?

Entekereza yaitu nkuru muno hali Ruhanga. (Yeremiya 17:10) N’obukiraaba ngu tusemeriire kwetantara kubaza n’okukora ekintu kyona ekirukwoleka enobi, titusemeriire kugarukira aho. Enobi etandikira omu bitekerezo n’omu mutima. Nahabweki, tusemeriire kweyihiramu kimu ebitekerezo byona n’enyehurra zoona ez’enobi. Obu nubwo mali ‘turahindurwa’ kandi tukatangira enobi kujanjaara.

Eky’Osemeriire Kukora:

N’obwegendereza, tekerezaaho omulingo oyehurramu hali abantu abandi, kukira muno ab’erangi endi rundi abarukuruga omu ihanga erindi. Wekaguze: ‘Mbarora nta? Omulingo mbaroramu gusigikirra ha bimbamanyireho? Rundi nsigikirra ha kusoroora?’ Wetantale emikura ey’okubalizaaho rundi eby’okwesemeza ebirumu enobi n’okurwana.

Baibuli n’esobora kutukonyera kweyihamu enobi omu mitima yaitu n’omu bitekerezo byaitu

Tikyanguhire kwekebera kurungi tukamanya enyehurra n’ebitekerezo byaitu. Baitu Ekigambo kya Ruhanga kisobora kutukonyera ‘kwetegereza ebitekerezo n’okuhanuura eby’omu mutima.’ (Abaheburaniya 4:12) Nahabweki ikara n’osoma Baibuli. Lengesaniza ebyerukwegesa n’entekereza yaawe, kandi okole kyona ekirukusoboka kuhinduramu entekereza yaawe n’osigikirra hali eki Baibuli eky’eyegesa. Ekigambo kya Ruhanga nikisobora kutukonyera kusingura enobi enyakuli ‘nk’enkomera’ omu bitekerezo n’omu mitima yaitu.—2 Abakolinso 10:4, 5.

Ekyokurorraho Ekyabaireho Kwo—STEPHEN

Akahindura Entekereza Ye

Abantu ab’erangi erukwera baanobaga Stephen hamu n’ab’omu muka y’owabu. Ekyarugiremu, aketeranizaaho ekitebe eky’eby’obulemi ekyakozesaaga emundu kurwanirra obugabe bw’abantu. Akasumi kakahika nauwe yatandika kwejumbira omu kurwana kunu. Stephen nagamba ati: “Nyowe n’abanywani bange twakiraga kurora filimu ezirukwoleka omulingo abairu kuruga omu Afrika baabonabonesebwaga omu Amerika. Ebitwaroraga byatuleteraga kukwatwa ekiniga, niturwanisa abasigazi ab’erangi erukwera abatwabaga tuli nabo omu kibaanda kya filimu. Hanyuma twagendaga omu biikaro nambere abarukwera baikaraga, nituserra abantu abandi ab’okuteera.”

Entekereza ya Stephen ekahinduka bwangu obuyatandikire kwega Baibuli n’Abakaiso ba Yahwe. Nagamba ati: “Habwokuba bansorooraga muno habw’erangi yange, nkahunirra muno habw’ekinarozere omu Bakaiso ba Yahwe. Ninyijuka, omu h’Abakaiso ba Yahwe obuyali n’agonza kugenda omu ihanga erindi, abaana be akabasiga omu ka y’abairaguzi. Ekindi, eka y’Abakaiso ba Yahwe ab’erangi erukwera bakaikiriza kwikara n’omusigazi omwiraguzi ow’akaba n’ayetaaga ah’okwikara.” Stephen akakigumya ngu Abakaiso ba Yahwe ruli ruganda orw’abantu abarukugonzangana kwo, kandi nibahikiiriza Yesu ebiyagambire ngu abahondezi be ab’amananu bakubaire n’okugonza.—Yohana 13:35.

Kiki ekyakonyiire Stephen kuleka ebikorwa eby’enobi? Akakonyerwa Abarumi 12:2 nagamba ati: “Nkakyetegereza ngu nyine kuhindura entekereza yange. Kandi nikyo nakozere, naleka kurwana. Nkarora ngu kuba muntu w’obusinge, nubwo bwomeezi oburukukirrayo kimu oburungi.” Hati, Stephen ayegondiize omu bwomeezi obutarumu enobi kumara emyaka erukuhingura omu 40.