OMULINGO TUSOBORA KULEKA ENOBI

2 | Otahoora Enzigu

Baibuli Egamba:

“Mutagarurra omuntu obubi obwobubi. . . . Kiraba nikisoboka omu bigambo byanyu, muterane nobusinge nabantu bona. Mutehorra inywenka enzigu, . . . baitu kikahandikwa ngu: Okuhora enzigu kwange; Nyowe ndigarurra, nukwo agamba [Yahwe].”—ABARUMI 12:17-19.

Eki Nikimanyisa Ki?

N’obukiraaba ngu ky’obuhangwa kukwatwa ekiniga obuturukuba tubihiirwe, Ruhanga tagonza tuhoole enzigu. Baitu n’agonza tumulindirre habwokuba omu kasumi akatali ka hara, naija kumaraho obutali bwinganiza bwona.—Zabuli 37:7, 10.

Eky’Osemeriire Kukora:

Abantu abatahikiriire obubahoora enzigu kiretera enobi kweyongera. Nahabweki, omuntu obw’arakusaaliza rundi akakukora kubi, otahoora enzigu. Lengaho kwetanga n’okwetwaza omu mulingo oguralinda obusinge. Omu nyikara ezimu, kirungi kutateeka omutima ha kintu ekibaireho. (Enfumo 19:11) Baitu, obwire obundi nikisobora kuba kirungi kubazaaho ekizibu. Nk’ekyokurorraho, omu nyikara nambere orukuba otwaziibwe kubi, nikisobora kukwetaagisa kunyegerra ha poliisi rundi hali ab’obusobozi abandi.

Obw’ohoora enzigu oba n’oyerwanisa wenka

Baitu kakuba haba hataroho omulingo gwona ogw’osobora kumaraho ekizibu omu businge? Rundi kakuba oba okozere kyona ekirukusoboka kumaraho ekizibu omu mulingo ogw’obusinge baitu tikyasoboka? Otahoora enzigu. Habwokuba, kakuba ohoora enzigu nooba n’oyongera kusiisa ebintu. Baitu kakuba otakikora, noija kuba n’okonyera kumaraho enobi. N’osobora kwega kwesiga omulingo Ruhanga agonza tumaleho ekizibu. “Omwesigege” naija kukukonyera.—Zabuli 37:3-5.

Ekyokurorraho Ekyabaireho Kwo—ADRIÁN

Akaleka Kugonza Kuhoora Enzigu

Adrián obw’akaba akyali musigazi, akafooka murwani kandi yagonzaaga kuhoora enzigu ha buli muntu ayamukoraga kubi. N’agamba ati: “Nakiraga kwejumbira omu kurwana okurumu kukozesa emundu, kandi emirundi nyingi nayesangaga nyijwire esagama kandi obundi nibandeka ha muhanda nimpoijahoija.”

Adrián akatandika kwega Baibuli aine emyaka 16. Ayongera agamba ati: “Obunayeyongiire kwega Baibuli, nkarora ngu nsemeriire kuhindura omulingo nayetwazaamuga.” Akaba aine kuleka enobi n’okurwana. Kukira muno, akagasirwa obuyasomere enkarra eziri omu Abarumi 12:17-19 ezirukubazaaho kutahoora enzigu. N’agamba ati: “Nkakyetegereza ngu Yahwe naija kumaraho obutali bwinganiza omu mulingo gwe kandi omu kasumi akahikire. Mporampora nkaleka kurwana.”

Rwebagyo rumu, bamu h’abantu Adrián yarwanisaaga, bakamutaahirra. Omukuru w’ekikoosi eki akatokera haiguru n’agamba ati: “Werwaneho!” Adrián n’agamba ati: “Nkahurra nagonza kubarwanisa.” Baitu omu kiikaro ky’okukikora, akasaba Yahwe kandi yabahigiza.

Adrián agumizaamu n’agamba ati: “Ekiro ekyahondiireho nkatangatangana omukuru w’ekikoosi wenyini. Obunamurozere, nkahurra nagonza kuhoora enzigu baitu nabwo, nkasaba Yahwe omu mutima ankonyere kwetanga. Ekyampuniriize omusigazi akaija nambere ndi yangambira ati: ‘Ninkusaba onganyire habw’ekibairehoga ijo. Amananu gali nanyowe ningonza kuba nka iwe. Ningonza kwega Baibuli.’ Kikansemeza muno ngu nkasobora kulema ekiniga kyange! Mali eki kikaba kirungi habwokuba nkatandika kumwegesa Baibuli.”