OMULINGO TUSOBORA KULEKA ENOBI

Leka Ruhanga Akukonyere Kusingura Enobi

Baibuli Egamba:

“Ebi ebiri omu kyana eky’omwoyo nibyo okugonza, okusemererwa, obusinge, okugumisiriza, oburungi, embabazi, okwesigwa, obuculezi, okwerinda.”—ABAGARATIYA 5:22, 23, “NWT.”

Eki Nikimanyisa Ki?

Ruhanga n’asobora kutukonyera kuleka enobi. Omwoyo gwe ogurukwera nigusobora kutukonyera kuba n’emiringo eitutasobora kutunga habwaitu itwenka. Nahabweki omu kiikaro ky’okulengaho kusingura enobi omu maani gaitu itwenka, tusemeriire kwesiga Ruhanga kutukonyera. Obuturakora eki, nitwija kwehurra nk’omukwenda Paulo ayahandiikire ati: “Ninsobora okukora byona habwogu arukumpa amani.” (Abafiripi 4:13) Kandi naitwe nitwija kusobora kugamba ngu: “Okukonyerwa kwange nikuruga hali Mukama.”—Zabuli 121:2.

Eky’Osemeriire Kukora:

Saba Yahwe kuruga ha mutima akuhe omwoyo gwe ogurukwera. (Luka 11:13) Musabe akukonyere kwoleka emiringo emirungi omu bwomeezi bwawe. Wesomeseeho Baibuli eby’egamba ha miringo ey’erakukonyera kweyihamu enobi, ekyokurorraho okugonza, obusinge, okugumiisiriza, hamu n’okwetanga. Lengaho kukurakuraniza emiringo enu omu bwomeezi bwawe. Nywana abantu abarukulengaho kukurakuraniza emiringo egi. Abantu nk’abo nibaija ‘kukwekambisa kugonza n’okukora engeso ezisemiire.’—Abaheburaniya 10:24.

“Yahwe akankonyera kuleka kurwana kandi yanfoora muntu ow’obusinge.”—WALDO

Ekyokurorraho Ekyabaireho Kwo—WALDO

Akaleka Kurwana

Waldo akakurra omu nyikara ey’egumangaine muno ekyamuletiire kwijura enobi. Nagamba ati: “Nakiraga kurwanira ha nguudo n’abaatundaga ebitokooza bwongo . . . Kiro kimu, ekikoosi ekyali kitarukutugonza kikasasura omusaija ow’akaba amanyirwe kuba mwisi nukwo anyite. Akancumita ekihyo baitu ntafe.”

Waldo kitamusemeze mukazi we obuyatandikire kwega Baibuli n’Abakaiso ba Yahwe. Nagamba ati: “Tinagonzaaga Abakaiso ba Yahwe kandi emirundi nyingi nabacoomeraga nimbajuma. Baitu bangarukamuga kurungi.”

Hanyuma, Waldo nauwe akatandika kwega Baibuli. Nagamba ati: “Kitanyanguhire kuteeka omu nkora ebinkaba ninyega. Nkaba ninkigumya ngu tindisobora kulema ekiniga kyange.” Baitu haroho ekiyagere kuruga omu Baibuli ekyamukonyiire kuhinduka.

Waldo n’asoborra ati: “Kiro kimu, Alejandro ow’akaba n’anyegesa Baibuli akansaba kusoma Abagaratiya 5: 22, 23. . . . Alejandro akansoborra ngu nkaba ntarukusobora kukurakuraniza emiringo enu habwange nyenka, baitu Ruhanga akaba naija kumpa omwoyo gwe ogurukwera kunkonyera. Eki kikandetera kukimanya ngu ninsobora kuhinduka!”

Waldo akasobora kulekera kimu kunoba abandi habwokuba akaikiriza obukonyezi bwa Ruhanga. Nagamba ati: “Abanyabuzaale n’abanywani bange bakahunirra muno habw’okurora omulingo nahindukire.” Ayongera agamba ati: “Yahwe akankonyera kuleka kurwana kandi yanfoora muntu ow’obusinge.”