Omulingo Osobora Kutunga Obusinge n’Okusemererwa Obwoba Oyetuntwire

OKWETUNTURA nikusobora kusisana n’okwetweka omugugu ogulemiire muno. (Nfu. 12:25) Wakahurraga okwetuntura kukuhinguraineho omu bwomeezi bwawe? Haroho obwoyehurra ngu tokyasobora kugumira okwetuntura? Obukiraaba nukwo kiri, okimanye ngu n’abandi nukwo behurra. Baingi omuliitwe nitusobora kuba niturolerra omunyabuzaale ow’arwaire, tuferiirwe omuntu outurukugonza, tuhikirweho ekigwererezi, rundi nituraba omu nyikara endi ey’etuletiire kwehurra ngu tujwahire muno, twetuntwire, kandi twenubire. Baitu kiki ekisobora kutukonyera kugumira okwetuntura?a

Ekyokurorraho ky’Omukama Daudi nikisobora kutukonyera kwega bingi ha mulingo tusobora kugumira okwetuntura. Akaraba omu nyikara nyingi ezigumire, kandi obwire obumu obwomeezi bwe bwabaga omu kabi. (1 Sam. 17:34, 35; 18:10, 11) Kiki ekyakonyire Daudi kugumira okwetuntura? Nitusobora tuta kwegera ha kyokurorraho kye?

OMULINGO DAUDI YASOBOIRE KUGUMIRA OKWETUNTURA

Daudi akahikwaho ebizibu bingi ha murundi gumu. Ekyokurorraho, tekerezaaho kyahikire hali Daudi obwakaba nairuka Omukama Saulo ayali nagonza kumwita. Daudi n’abasaija be obubagarukire kuruga omu bulemu, bakasanga abanyazingwa baabo baibire ebintu byabo, bookeze amaka gaabo, kandi batwaire abakazi hamu n’abaana baabo. Daudi aketwaza ata? “Daudi nabantu abakaba bali nauwe baimukya amaraka gabu barra, okuhikya amani obugababuzire okurra.” Kwongera ha kwetuntura Daudi okwakaba aine, abasaija abaakaba nayesiga bakaba “nibagamba okumutera amabale.” (1 Sam. 30:1-6) Omu kaire ako Daudi akatunga ebizibu bisatu eby’amaani ha murundi gumu: Eka ye ekaba eri omu kabi, akaba natiina ngu abasaija be nibagenda kumwita, kandi Omukama Saulo akaba nakyamuserra. Hataroho kugurukyagurukya Daudi aine kuba yayetuntutwire muno!

Kiki Daudi ekiyakozere? Aho naaho ‘akegumya omu Yahwe Ruhanga we.’ Kinu Daudi nasobora kuba yakikozere ata? Tukimanyire ngu Daudi yakiraga kusaba hali Yahwe kandi yatekerezaahoga omulingo Yahwe yamukonyiremu omu busumi obwakara. (1 Sam. 17:37; Zab. 18:2, 6) Daudi akaba akimanyire ngu nayetaaga oburagirizi bwa Yahwe, nahabweki akamwekaguzaaho. Hanyuma ya Daudi kutunga oburagirizi kuruga hali Yahwe, aho naaho akabukorraho. Ekyarugiremu, Yahwe akaha Daudi hamu n’abasaija be omugisa, bacungura abakazi, abaana, hamu n’ebintu byabo. (1 Sam. 30:7-9, 18, 19) Oyetegeriize ebintu bisatu Daudi ebiyakozere? Akasaba Yahwe amukonyere, akecumitirizaaho omulingo Yahwe yamukonyiremu omu busumi obwakara, kandi akakorra ha buragirizi bwa Yahwe. Nitusobora tuta kwegera ha kyokurorraho kya Daudi? Tekerezaaho emiringo enu esatu.

YEGERA HA KYOKURORRAHO KYA DAUDI OBWORAABA OYETUNTWIRE

1. Saba. Buli murundi obututandika kwetuntura, nitusobora kusaba Yahwe kutukonyera n’okutuha amagezi. Kugambira Yahwe buli kimu kyona ekitweralikiriize nikisobora kutukonyera kwehurra kurungi. Nitusobora n’okusaba esaara engufu omu mutima, eki obukiraaba nikyo kirukusoboka omu nyikara eiturumu. Buli murundi tusaba Yahwe obukonyezi twoleka ngu nitumwesiga nk’oku Daudi yakozere, obuyagabire ati: “[Yahwe nuwe] mwandara gwange, kandi nurwo rukomero rwange, nomujuni wange; Ruhanga wange, omwandara gwange ogugumire, nuwe ndayesigaga.” (Zab. 18:2) Mali okusaba kw’omugaso? Munyaanya itwe Kahlia arukuheereza nka payoniya akagamba ati: “Hanyuma y’okusaba, ntunga obusinge. Kusaba kunkonyera kuba n’entekereza nk’eya Yahwe, n’okweyongera kumwesiga.” Mananu kwo, okusaba kisembo eky’amaani kuruga hali Yahwe ekitukonyera kugumira okwetuntura.

2. Wecumiitirize. Noijuka ebizibu ebiwasoboire kugumiisiriza habw’obukonyezi bwa Yahwe? Kutekerezaaho omulingo Yahwe yatukonyiremu n’omulingo yakonyiiremu abaheereza be ab’omu busumi obwa kara, kitukonyera kutunga obusinge omu mutima n’okweyongerra kimu kumwesiga. (Zab. 18:17-19) Omugurusi w’ekitebe arukwetwa Joshua akagamba ati: “Nkahandiika orukarra orw’esaara zange Yahwe eziyagarukiremu. Kinu kinkonyiire kwijuka obusumi nambere n’asabire Yahwe ekintu kandi yampa eki kyonyini ekinkaba ninyetaaga.” Mali, obututekerezaaho omulingo Yahwe aikaire natukonyeramu, tutunga amaani agaturukwetaaga ag’okwikara niturwanisa okwetuntura.

3. Gira ekiwakoraho. Omu nyikara yoona eiturumu, nitusobora kubanza kuserra obuhabuzi oburukwesigwa kuruga omu Kigambo kya Ruhanga tutakakozere encwamu. (Zab. 19:7, 11) Baingi bakizoire ngu obubakora okuseruliiriza ha Kyahandiikirwe, kibakonyera kwetegereza kurungi omulingo ekyahandiikirwe eki kirukukwataho obwomeezi bwabo. Omugurusi w’ekitebe arukwetwa Jarrod akasoborra ati: “Kukora okuseruliiriza kinkonyera kwega bingi ha rukarra, n’okwetegereza Yahwe ekyarukungambira. Mali kinu kinkonyera kwikiririza omu bintu ebinsomere, nukwo nsobole kuteeka omu nkora obuhabuzi bwa Yahwe.” Obutuserra oburagirizi bwa Yahwe kuruga omu Byahandiikirwe kandi tukabuteeka omu nkora, kitukonyera kutunga obusinge n’okusemererwa n’obutukuba twetuntwire.

YAHWE NAIJA KUKUKONYERA KUGUMIRA OKWETUNTURA

Daudi akaba nakyetegereza ngu kusobora kugumira okwetuntura, akaba nayetaaga obukonyezi bwa Yahwe. Akasiima muno obusagiki bwa Yahwe eky’amuletiire kugamba ati: “Obwa Ruhanga wange nguruka omuhuruzi. Nuwe Ruhanga [anteega] amani omunda.” (Zab. 18:29, 32) Nitusobora kwehurra ngu ebizibu byaitu bigumire muno titusobora kubigumira. Baitu habw’obukonyezi bwa Yahwe, nitusobora kugumira ebizibu eby’amaani muno! Ego, obutusaba Yahwe kutukonyera, tukatekerezaaho omulingo yatukonyiremu omu busumi obwa kara, kandi tukagira ekitwakoraho kuhondera oburagirizi bwe, tukigumye ngu Yahwe naija kutuha amaani hamu n’amagezi ebiturukwetaaga kusobora kugumira okwetuntura kwaitu!