1 | Okusaba ‘Munagire Okutuntura Kwawe Kwona’

BAIBULI EGAMBA: “Nimunagira okutuntura kwanyu kwona [hali Ruhanga] baitu nabitaho omutima ebigambo byanyu.”—1 PETERO 5:7.

Eki Nikimanyisa Ki?

Yahwe Ruhanga naturaaliza kumugambira byona ebirukutweraliikiriza. (Zabuli 55:22) Nitusobora kumugambira ebizibu byaitu ebitaito n’eby’amaani. Obukiba kikuru haliitwe, na hali Yahwe kiba kikuru. Kumusaba kitukonyera kutunga obusinge omu bitekerezo.—Abafiripi 4:6, 7.

Eki Kitukonyera Kita?

Obutuba nitutalibanizibwa oburwaire bw’omutwe nitusobora kwehurra tuli itwenka. Abantu abandi tibakira kwetegereza kurungi omulingo gwonyini oguturukwehurramu. (Enfumo 14:10) Baitu obutugambira Ruhanga omulingo turukwehurramu kuraba omu kusaba, twehurra ngu natuhuliiriza kandi natwetegereza. Yahwe aturora, amanyire obusaasi bwaitu n’ebiturukurabamu, kandi n’agonza tumugambire byona ebirukutweraliikiriza.—2 Ekyebyomubusinge 6:29, 30.

Obutubaza na Yahwe omu kusaba kitugumya ngu n’atufaaho. Nitusobora kwehurra nk’omuhandiiki wa Zabuli ayasabire ati: “Okarora omuhito gwange; okamanya obwomezi bwange omu bujune.” (Zabuli 31:7) Kukimanya ngu Yahwe amanyire ebiturukurabamu nikisobora kutukonyera kugumiisiriza. Baitu tagarukira ha kurora obujune bwaitu. Nayetegereza kurungi enyikara yaitu kukira omuntu ondi wena kandi akozesa Baibuli kutuhuumuza n’okutugarramu amaani.

Omulingo Baibuli Ekonyiire Julian

Omulingo Ntalibanizibwa Okwetuntura

“Ntalibanizibwa okwetuntura ekinguraine n’oburwaire oburukumanywa nka obsessive-compulsive disorder (OCD). Nkira kuhurra natandika kwetuntura ahonaaho. Mba ninyehurra kurungi baitu ahonaaho ntandika kweralikirra hataroho ensonga yoona erukunyeraliikiriza. Nkira muno kwehurra nti obundukuba ndi n’abantu abandi. Nyeralikirra muno ha kibarukuntekerezaaho.

“Abo abamanyire ekizibu kyange bankonyera muno. Obwire obumu babaza ebintu ebirukumara amaani. Baitu nkimanya ngu nibalengaho kunkonyera.

“Habw’oburwaire bunu, obwire obumu kingumira kusaba. Kinyetaagisa kuteekamu amaani kutekaana omu bitekerezo nukwo mbaze na Yahwe omu kusaba. Ntekerezaaho ebintu bingi ha murundi gumu, ekindetera kuburanganizibwa. Kinu obukibaho, kingumira kugambira Yahwe omulingo ndukwehurramu.”

Omulingo Baibuli Enkonyiire

“Kuraba omu kusoma Baibuli, nyegere ngu esaara tizirukwetaagisa kuba ziraihire muno rundi kukozesa ebigambo eby’embaganiza kusobora kuhulirwa Ruhanga. Obwire obumu obundukuba ntasobora kusoborra omulingo ndukwehurra, nsaba ngu: ‘Yahwe, nkwesengeriize, nkonyera.’ Eki obunkikora, nyehurra ngu Yahwe n’anyetegereza kandi ankorra ekimba musabire. Oihireho okusaba, nserwire obujanjabi. Ebintu binu binkonyiire kwehurra kurungi kandi mali eki nikinsemeza. N’obukiraaba ngu tikinyanguhira kusaba Yahwe, nkikora habwokuba nkimanyire ngu n’angonza kandi naija kunkonyera.”