Omulingo Obulemu n’Okurwana Birihwaho

RUHANGA ALIIHAHO GAVUMENTI Z’ABANTU

Ruhanga naija kwihaho gavumenti z’abantu naakozesa Baibuli eki eyeta obulemu bw’Amagedoni.a (Okusuukururwa 16:16) Akasumi obu kalihika, “abakama abensi zona” balisoroozebwa hamu “hali obulemu obwekiro ekikuru ekya Ruhanga owobusobozi bwona.” (Okusuukururwa 16:14) Amagedoni nubwo bulemu bwa Ruhanga oburukwija kumaraho obulemu bwona.

Ruhanga naija kuhwerekereza gavumenti z’abantu zoona kandi omu kiikaro kyazo agarreho Obukama bwe rundi gavumenti ye, ey’erukwija kulemera omu iguru kandi terihwerekerezebwa. (Danieri 2:44) Ruhanga akomere Omwana we, Yesu Kristo kuba mulemi wa gavumenti egi. (Isaya 9:6, 7; Matayo 28:18) Gavumenti enu nubwo Bukamab Yesu obu yayegeseze abahondezi be kusaba ngu bwije. (Matayo 6:9, 10) Abantu boona nibaija kuba hansi ya gavumenti erukulemwa Yesu kandi baikale omu bumu.

Kwahukanaho n’abantu abarukulema kasumi kanu, Yesu tarukwija kukozesa obusobozi bwe kwefaaho wenka. Habwokuba w’obwinganiza kandi tarukusoroora, busaho muntu n’omu arukwija kwehurra ngu tarukufiibwaho rundi ngu tarukutwazibwa omu mulingo ogw’obwinganiza habw’erangi, ihanga rundi oruganda rwe. (Isaya 11:3, 4) Kandi tikirukwija kwetaagisa abantu kurwanirra obugabe bwabo. Habwaki? Habwokuba Yesu naija kufaaho ebyetaago bya buli omu. Baibuli egamba eti: “Alijuna omunaku obwakunga; nomuseege atanyina mukonyezi. . . . Alicungura obwomezi bwabu omu kwenderezebwa nitima.”—Zabuli 72:12-14.

Obukama bwa Ruhanga nibwija kwihaho eby’okurwanisa byona omu nsi. (Mika 4:3) Ekindi, buliihaho abantu ababi abarukugonza kwikara nibarwana kandi nibamaraho abandi obusinge. (Zabuli 37:9, 10) Abasaija, abakazi, hamu n’abaana balyehurra ngu baine obulinzi omu nsi yoona.—Ezekyeri 34:28.

Hansi y’Obukama bwa Ruhanga, buli omu naija kuba n’obwomeezi oburungi mali. Obukama bwa Ruhanga nibwija kumarraho kimu ebizibu ebireetera abantu kurwana nk’obunaku, ibura ly’ebyokulya, n’okutaba n’oburaaro. Buli omu aliba n’ebyokulya bingi kandi eby’ekiriisa kandi abantu boona baliba n’oburaaro oburungi.—Zabuli 72:16; Isaya 65:21-23.

Hansi y’Obukama bwa Ruhanga, ebintu ebibi ebireetwaho obulemu biriba bitakyaroho. Kinu tikirukugarukira ha kuhutaara baitu nikitwarramu oburwaire bw’omutwe, n’okwetuntura habw’ebintu ebibi ebireetwa obulemu n’okurwana. Abantu abaafiire na bo balihumbuuka baikale omu nsi. (Isaya 25:8; 26:19; 35:5, 6) Abantu balyongera babe n’abanyabuzaale baabo kandi tibalyongera kwijuka ebintu ebibi ebyaleserweho obulemu n’okurwana, habw’okuba “ebyokubanza [biriba] bihoireho.”—Okusuukururwa 21:4.

RUHANGA NAIJA KWIHAHO EKIBI

Obukama bwa Ruhanga obu buraatandika kulema ensi, abantu boona nibaija kuramya Ruhanga omu ow’amananu, Yahwec, anyakuli “Ruhanga ow’okugonza kandi ow’obusinge.” (2 Abakolinso 13:11) Abantu nibaija kwega kwikara hamu omu businge. (Isaya 2:3, 4; 11:9) Abantu aboorobera Ruhanga nibaija kuba batakyaine ekibi baitu nibaija kuba bantu abahikiriire.—Abarooma 8:20, 21.

RUHANGA NAIJA KWIHAHO SITAANI NA BADAIMOONI BE

Obukama bwa Ruhanga bulihwerekereza abo abaleetaho obulemu, Sitaani hamu na Badaimooni be. (Okusuukururwa 20:1-3, 10) Habwokuba baliba batakyaroho, halibaho ‘obusinge bwingi.’—Zabuli 72:7.

Busaho kugurukyagurukya omurago gwa Ruhanga ogw’okumaraho obulemu n’okurwana nigwija kuhikirra. Aine obusobozi n’ekihika ekyokumarraho kimu obulemu.

• Ruhanga aine amagezi n’amaani ag’okumaraho obulemu n’okurwana. (Yobu 9:4) Busaho ekisobora kumulemesa kuhikiiriza eki arukugonza.—Yobu 42:2.

• Ruhanga tarukugonza kurora abantu nibabonabona. (Isaya 63:9) Anoba abantu abagonza okurwana.—Zabuli 11:5.

• Ruhanga ahikiiriza byona ebi aba abalize, tasobora kubiiha.—Isaya 55:10, 11; Tito 1:2.