Yegera Hali Yahwe na Yesu omu Mulingo Oteekereza

1-2. Kugonza Yahwe nikitwarramu ki, kandi Yesu akakyoleka ata?

“OGONZEGE Yahwe Ruhanga waawe n’omutima gwawe gwona, n’obwomeezi bwawe bwona, n’ebiteekerezo byawe byona, n’amaani gaawe goona.” (Mar. 12:30) Yesu akakyoleka kurungi ngu kinu nikyo ekiragiro ekikaba nikikirayo obukuru omu Biragiro bya Musa. Wetegereze ngu okugonza oku twiniire Yahwe nikutwarramu omutima gwaitu, ekirukutwarramu ebintu ebi twegomba hamu n’enyehurra zaitu. Ekindi, nikitwarramu obwomeezi bwaitu bwona, n’amaani gaitu goona. Baitu ekindi, kugonza Yahwe nikitwarramu ebiteekerezo byaitu, ekirukutwarramu omulingo tuteekerezaaho ensonga. Amananu gali titusobora kwetegerereza kimu enteekereza ya Yahwe. Baitu nitusobora kwetegereza kurungi enteekereza ya Ruhanga kuraba omu kwesomesaaho “enteekereza ya Kristo” habwokuba Yesu ayolekera kimu enteekereza ya Ise.—1 Kol. 2:16 na study note “we do have the mind of Christ.”

² Yesu yagonzaaga Yahwe n’ebitekerezo bye byona. Akaba amanyire ekigendererwa kya Ruhanga hali uwe, kandi akaba acwiremu kutwaza obwomeezi bwe naasigikirra ha kigendererwa eki, n’obu kiraaba ngu kukikora kikaba nikiija kumurugirramu kubonabona habw’okukora ekihikire. Habwokuba Yesu akaba ataire omutima ha kukora Ise ebi agonza, ataikirize ekintu kyona kumulemesa kuhikiriza ekigendererwa eki.

3. Kiki Petero eki yayegiire hali Yesu kandi kiki ekiyayekambisize Abakristaayo bagenzi be kukora? (1 Petero 4:1)

³ Petero hamu n’abakwenda bagenzi be bakatunga omugisa ogw’okumara obwire na Yesu n’okwega omulingo Yesu yatekerezaamuga. Petero obu yahandiikire ebbaruha ye ey’okubanza eyaterekereziibwe omwoyo ogurukwera, akekambisa Abakristaayo kuhagatira omutima nugwo gumu rundi enteekereza niyo emu n’eya Kristo. (Soma 1 Petero 4:1.) Petero akakozesa ekigambo ekikozesebwa abaserikale obu yahandiikire ati: “Muhagatirege ebyokurwanisa.” Nahabweki, Abakristaayo obu beegera ha nteekereza ya Yesu, nibaija kuba baine ekyokurwanisa eky’amaani ekirukwija kubakonyera kurwanisa okwegomba kwona okw’okukora ekibi, hamu n’okurwanisa ensi ey’erukulemwa Sitaani.—2 Kol. 10:​3-5; Bef. 6:12.

4. Kiki eki turukwija kubazaaho omu kicweka kinu?

⁴ Nitwija kubazaaho omulingo Yesu yateekerezaamuga, kandi turole omulingo tusobora kumwegeraho. Nitwija kurora omulingo tusobora kwegera (1) ha nteekereza ya Yahwe, ekirukwija kutukonyera itwena kuba n’enteekereza emu, (2) kuba bebundaazi, kandi (3) kuba n’enteekereza enungi obu nitwesiga Yahwe kuraba omu kusaba.

YEGERA HA MULINGO YAHWE ATEEKEREZAAMU

5. Nyikara ki emu nambere Petero yalemerwe kwoleka enteekereza ya Yahwe?

⁵ Teekerezaaho enyikara emu nambere Petero atarayolekere enteekereza nk’eya Yahwe ha nsonga. Yesu akaba nubwo yakaruga kugambira abakwenda be ngu akaba aine kugenda Yerusalemu, ahebweyo hali abebembezi b’amadiini, agumire okubonabonesebwa kandi hanyuma aitwe. (Mat. 16:21) Nikisobora kuba kyagumiire Petero kukiikiriza ngu Yahwe yaakwikiriize Yesu ow’akaba ali kunihira kwa Isaleri kandi Masiya ow’araganiziibwe, kwitwa. (Mat. 16:16) Nahabweki Petero akatwara Yesu ha rubaju kandi yamugambira ati: “Wegirre embabazi Mukama wange, ebi byona tibirukwija kukuhikaho nakake.” (Mat. 16:22) Habwokuba Petero atooleke enteekereza ya Yahwe ha nsonga egi, akaba atarukuteekereza nka Yesu.

6. Yesu akooleka ata ngu enteekereza ye ekaba nesisana n’eya Yahwe?

⁶ Enteekereza ya Yesu ekaba n’esisanira kimu n’eya Ise ow’omu iguru. Yesu akagambira Petero ati: “Ngaruka enyuma Sitaani! Oli kitabaijura hali nyowe, habwokuba noteekereza ebiteekerezo by’abantu, hatali ebya Ruhanga.” (Mat. 16:23) Petero naasobora kuba akaba aine ebigendererwa ebirungi, baitu Yesu akanga obuhabuzi bwe. Isomo ki eriturukwega? Kikaba kitali kigendererwa kya Yahwe, Yesu kwesaalirirwa. Kiro eki, Petero akeega isomo erikuru erirukukwata ha kuba n’enteekereza nk’eya Ruhanga.

7. Petero akooleka ata hanyuma ngu akaba naagonza kuterekereza enteekereza ye kusisana n’eya Yahwe? (Rora ekisisani.)

⁷ Hanyuma, Petero akooleka ngu akaba naagonza kuba n’enteekereza nk’eya Yahwe. Akasumi kakaba kahikire ab’amahanga abakaba batasazirwe kufooka kicweka ky’abantu ba Ruhanga. Petero akasindikwa kutebeza omunyaihanga Koroneeriyo, ow’akaba naija kuba muntu ow’okubanza omu guruupu enu empyaka ey’Abakristaayo. Abayudaaya tibaakoraganaga muno n’abamahanga, nahabweki tikirukuhuniiriza ngu Petero akaba naayetaaga obukonyezi kwetekaniriza obujunanizibwa bunu. Petero obu yayetegeriize ekigendererwa kya Ruhanga ha nsonga egi, akahindura enteekereza ye. Ekyarugiremu, atange kugenda obu yatumirwe. (Ebik. 10:​28, 29) Akatebeza Koruneeriyo n’eka ye kandi baabatizibwa.—Ebik. 10:​21-23, 34, 35, 44-48.

8. Nitusobora tuta kwoleka ngu enteekereza yaitu nesisana n’eya Yahwe? (1 Petero 3:8)

⁸ Hanyuma y’emyaka, Petero akeekambisa Abakristaayo bagenzi be kuba ‘n’omutima gumu’ rundi enteekereza emu. (Soma 1 Petero 3:8.) Nk’abantu ba Yahwe, nitusobora kuba n’enteekereza emu kuraba omu kuteekerezaaho enteekereza ya Yahwe nk’oku erukwolekwa omu Kigambo kye. Ekyokurorraho, Yesu akeekambisa abahondezi be kwebembeza Obukama omu bwomeezi bwabo. (Mat. 6:33) Omutebezi omu kitebe kyanyu naasobora kucwamu kutaaha obuheereza obw’akasumi koona. Omu kiikaro ky’okumugambira kwesaalirirwa, tusemeriire kumusiima habw’encwamu enungi ei akozere kandi tumusagike.

BA MWEBUNDAAZI

9-10. Yesu akooleka ata obwebundaazi obw’amaani?

⁹ Omu bwire bw’ekiro Yesu obu akaba atakaisirwe, akeegesa Petero hamu n’abakwenda be abandi isomo erikuru ery’obwebundaazi. Enyumaho, Yesu akaba asindikire Petero na Yohana kubateekaniriza ekiihuro eky’okumalirra eki akaba naagenda kulya na bo atakaisirwe. Okuteekaniza oku kwine kuba kwatwaliiremu kuteekaniza ebbafu hamu na tawulo nukwo abagenyi basobole kunaabibwa ebigere byabo batakaliire ekiihuro. Baitu nooha ow’akaba naagenda kukora omulimo gunu ogwa hansi akasumi obu kaakuhikire?

¹⁰ Yesu atange kukora omulimo gunu ogukaba nigwetaagisa obwebundaazi bw’amaani muno. Abakwenda be nibasobora kuba baahuniriire muno kurora Yesu naakora ekintu ekyakorwaga abaheereza bonka. Yesu akaihamu ekijwaro kye ekya haruguru yakwata etawulo yagyeteega omunda, yateeka amaizi omu bbafu kandi yatandika kubanaabya ebigere. (Yoh. 13:​4, 5) Nikisobora kuba kyatwaire akaire kunaabya ebigere by’abakwenda 12 boona otwaliiremu na Yuda ow’akaba naagenda kumugobeza. Baitu habw’obwebundaazi, Yesu akakora omulimo gunu gwona. Hanyuma, Yesu akasoborra ati: “Mwetegeriize habwaki mbanaabize ebigere? Inywe munyeta ‘Omwegesa’ kandi ‘Mukama waitu,’ kandi muhikire habwokuba nukwo kiri. Nahabweki, obu kiraaba ngu nyowe, Mukama wanyu kandi Omwegesa, mbanaabize ebigere, na inywe musemeriire kunaabisangana ebigere.”—Yoh. 13:​12-14.

11. Petero akooleka ata ngu akaba ayegere kuba mwebundaazi? (1 Petero 5:5) (Rora n’ekisisani.)

¹¹ Petero akeegera ha bwebundaazi bwa Yesu. Hanyuma ya Yesu kugaruka omu iguru, Petero akakora ekyamahano obu naakiza omusaija ow’akaba ali mulema kuruga ha kuzaarwa kwe. (Ebik. 1:​8, 9; 3:​2, 6-8) Ekyamahano kinu kiine kuba kyaleetiire abantu baingi kwija hali Petero. (Ebik. 3:11) Petero akaba atarukugonza abantu kumuteekaho omutima n’obu kiraaba ngu akaba akuliire omu buhangwa nambere abantu baagonzaaga muno kuba ruranganwa. Oihireho akagarurra Yahwe na Yesu ekitiinisa obu naagamba ati: “Kandi kuraba omu ibara [lya Yesu], na habw’okwikiriza oku twine omu ibara lye, nikyo kyaleetera omusaija onu ou murukurora kutunga amaani.” (Ebik. 3:​12-16) Ebigambo Petero yakozeseze omu bbaruha ye hali Abakristaayo obu akaba naabagambira ebirukukwata ha kukurakuraniza obwebundaazi, nibisobora kutwijukya ekiro Yesu yayeteegere etawulo omunda kandi yanaabya ebigere by’abakwenda be.—Soma 1 Petero 5:5.

12. Kusisanaho na Petero, nitusobora tuta kugumizaamu nitukurakuraniza obwebundaazi?

¹² Nitusobora kuhondera ekyokurorraho kya Petero obu turukuba nitukurakuraniza obwebundaazi. Ijuka ngu obwebundaazi bwonyini tiburukugarukira ha kubaza ebigambo ebihikire. Ekigambo Petero yakozeseze kumanyisa obwebundaazi nikyoleka ngu obwebundaazi nibutwarramu omulingo twetekerezaaho, n’omulingo tuteekerezaaho abandi. Tuhikiriza obujunanizibwa bwaitu habwokuba nitugonza Yahwe hamu n’abantu, baitu hatali ngu habwokuba nitugonza abandi kutwegomba. Obu tukora kyona eki turukusobora kuheereza Yahwe hamu n’ab’oruganda na banyaanya itwe tusemeriirwe, abantu n’obu baakuturora rundi nangwa tuba nituha obwakaiso oburukwoleka ngu tuli bebundaazi.—Mat. 6:​1-4.

BA N’ENTEEKEREZA ENUNGI

13. Kuba “n’enteekereza enungi” nikitwarramu ki? Soborra.

¹³ Kuba “n’enteekereza enungi” nikitwarramu ki? (1 Pet. 4:​7, NWT; 2 Kol. 5:13) Omukristaayo ow’aine enteekereza enungi akora kyona eki arukusobora kukora encwamu enungi ezirukwoleka enteekereza ya Yahwe. Omukristaayo nk’ogu akimanyire ngu busaho ekintu kyona omu bwomeezi ekiba kikuru kukira enkoragana ye na Yahwe. Ayetekerezaaho omu mulingo oguhikire obu naakyetegereza ngu tamanyire buli kimu. Kandi ayoleka obwesige bwe omuli Ruhanga kuraba omu kuhikirra Yahwe omu kusaba emirundi nyingi.a

14. Nyikara ki emu nambere Petero yalemerwe kwesiga Yahwe?

¹⁴ Omu bwire bw’ekiro Yesu atakafiire, akatererra abegeswa be ati: “Ekiro kinu, inywena nimwija kutabaijuka habwange.” N’obumanzi, Petero akagarukamu ati: “Abandi boona n’obu baratabaijuka habwawe, nyowe tindukwija kutabaijuka!” Kiro eki Yesu akahabura bamu h’abegeswa be ati: “Mwikale nimurora kandi mwikale nimusaba.” (Mat. 26:​31, 33, 41) Petero atahondere obuhabuzi obu. Kakuba yabuhondiire, yakubaire n’obumanzi obw’okugamba ngu ali omu h’abegeswa ba Yesu. Oihireho, Petero akeehakana Mukama we kandi hanyuma yayeijukya.—Mat. 26:​69-75.

15. Yesu akaikara ata aine enteekereza enungi ha kiro eky’okumalirra atakafiire?

¹⁵ Yesu akeesigira kimu Yahwe. N’obu kiraaba ngu akaba ahikiriire, yaikaraga naasaba. Eki kikamuha obumanzi obw’okukora ebintu Yahwe ebi akaba naagonza akole. (Mat. 26:​39, 42, 44; Yoh. 18:​4, 5) Kurora Yesu naasaba kiine kuba kyakwasireho muno Petero.

16. Petero akooleka ata ngu akaba akurakuraniize enteekereza enungi? (1 Petero 4:7)

¹⁶ Obwire bukahika, Petero yayeyongera kwesigira kimu Yahwe kuraba omu kusaba. Yesu ow’akaba ahumbuukire akagumya Petero hamu n’abakwenda abandi ngu naija kutunga omwoyo ogurukwera nukwo basobole kuhikiiriza kurungi obujunanizibwa bwabo obw’okutebeza. Baitu, Yesu akabasaba kwikara omu Yerusalemu kuhikya eki obu kiraabaho. (Luk. 24:49; Ebik. 1:​4, 5) Kiki Petero ekiyakozere obu akaba alindiriire? Petero hamu n’Abakristaayo bagenzi be “bakaikara nibekamba omu kusaba.” (Ebik. 1:​13, 14) Hanyuma, omu bbaruha ye ey’okubanza, Petero akekambisa Abakristaayo bagenzi be kuba n’enteekereza enungi, hamu n’okwesiga Yahwe kuraba omu kusaba. (Soma 1 Petero 4:7.) Petero akeega kwesiga Yahwe, kandi akafooka nyomyo omu kitebe.—Bag. 2:9.

17. N’obu kiraaba ngu nitusobora kwekorra ebintu ebimu, kiki eki tusemeriire kwikara nitukora? (Rora n’ekisisani.)

¹⁷ Kusobora kuba n’enteekereza enungi, tusemeriire kuhikirra Yahwe butoosa kuraba omu kusaba. Nitukyetegereza ngu tusemeriire kwikara nitusaba Yahwe n’obu kiraaba ngu kyanguhire kuteekereza ngu nitusobora kwekorra ebintu ebimu. Nahabweki, kukira muno obu turukuba nitugonza kukora encwamu enkuru, leka tusabe Yahwe oburagirizi obu nitumwesiga ngu nnamanya ekirukukirayo oburungi hali itwe.

18. Kiki eki tucweriiremu kimu kukora?

¹⁸ Mali ka nitusiima muno Yahwe ngu akatuhanga omu mulingo ngu nitusobora kwoleka emiringo ye! (Kub. 1:26) Ky’amananu ngu titusobora kwegera hali Yahwe kikumi ha kikumi. (Is. 55:9) Baitu, kusisanaho na Petero, nitusobora kweyongera kuba n’enteekereza nk’eya Yahwe. Leka tugumizeemu nitukikora kuraba omu kwegera ha mulingo Ruhanga atekerezaamu, kuba bebundaazi n’okuba n’enteekereza enungi.