EKICWEKA KY’OKWEGA 50
EKIZINA 48 Kurubata na Yahwe Buli Kiro
Yegera ha Bwebundaazi bwa Yahwe
“Mwegere hali Ruhanga nk’abaana abarukugonzebwa.”—BEF. 5:1.
EBI TURAYEGA
Nitwija kurora emiringo ena ei tusobora kwegera ha bwebundaazi bwa Yahwe.
1. Habwaki nikihuniiriza kukimanya ngu Yahwe mwebundaazi?
OBU orora abantu abaine obusobozi kasumi kanu, bakuzookera nk’abantu abeebundaazi? Nangwa. Baitu kwahukanaho na bo, noobu kiraaba ngu Yahwe ali Ruhanga ow’obusobozi bwona, mwebundaazi. (Zab. 113:5-8) Busaho muntu weena ow’aine obwebundaazi nk’obwa Yahwe; tagira myehembo yoona. Omu kicweka kinu, nitwija kurora emiringo ena ey’erukwoleka omulingo Yahwe ayetwazaamu, kandi nitwija kurora nkooku buli gumu ha miringo egi gwoleka ngu mwebundaazi. Kandi hanyuma nitwija kurora omulingo Yesu yayegiire ha bwebundaazi bwa Ise. Kwecumiitirizaaho ebintu binu nikiija kutukoonyera kwirra haihi na Yahwe kandi tweyongere kwegera ha bwebundaazi bwe.
KYANGUHIRE KUHIKIRRA YAHWE
2. Kiki eki turukwegera ha Zabbuli 62:8 obukirukuhika hali Yahwe? (Rora n’ekisisani ekya ha kyesweko.)
2 Emirundi erukukira obwingi, tikyanguhire kuhikirra abantu ab’emyehembo. Bakira kutwaza kubi bagenzi baabo habwokuba nibateekereza ngu nibabakira. Nahabweki abantu bacwamu kubeetantara. Yahwe naayahukanira kimu na bo! Habwokuba Isiitwe ow’omu iguru mwebundaazi, naaturaaliza kumusaba kandi tukamugambira ebintu byona ebirukutweraliikiriza. (Soma Zabbuli 62:8.) Nkooku taata arukufaayo ahuliiriza abaana be obu baba nibamugambira ebibali ha mutima, na Yahwe araaliza abaheereza be kumusaba kandi abahuliiriza. Kandi omu Baibuli harumu esaara z’abaheereza be nyingi ezi yahandiikisize. Eki nikyolekera kimu ngu Yahwe ayanguhire kumuhikirra omu kusaba. (Yos. 10:12-14; 1 Sam. 1:10-18) Baitu kiki eki osemeriire kukora kakuba obwire obumu oyehurra ngu torukusobora kusaba Yahwe habw’ensobi nyingi ezi okozere?
Taata ow’arukwegera hali Yahwe n’obwebundaazi naahuliiriza mutabani we ow’ayasire ecupa y’ebyakyo obu naazaana (Rora akacweka 2)
3. Kiki ekirukukugumya ngu Yahwe naagonza omuhikirre kuraba omu kusaba butoosa?
3 Nitusobora kuhikirra Yahwe omu kusaba noobu turukuba nitwehurra ngu tasobora kutugonza. Habwaki nitugamba tuti? Omu kyokurorraho kya Yesu ekirukukwata ha mwana ayazaahire, Yesu akalengesaniza Yahwe na taata ow’embabazi ow’akaba aine omutabani ayayehuliire ngu akaba atasemeriire kubarwa nk’omwana w’eka. Taata ogu aketwaza ata mutabani we obu yagarukire omuka? Yesu akagamba ngu taata obu yarozere mutabani we ahonaaho “[akairuka], yamugwa omu kifuba, kandi yamunywegera.” (Luk. 15:17-20) Yahwe naasisana nka taata ogu. Obu ahurra nitumusaba habwokuba twine enaku habw’ensobi ei tukozere rundi twetuntwire, ahonaaho ataho omutima kutuhuliiriza. (Emp. 3:55-57) Embabazi zireetera Yahwe kwija nambere tuli, kutuhuumuza n’okutugumya ngu naatugonza. (Is. 57:15) Eki Yahwe akikora ata? Akira kukikora naakozesa abagurusi, abanyabuzaale baitu abali omu mananu, hamu n’Abakristaayo bagenzi baitu abandi. (Yak. 5:14, 15) Yahwe naakikora omu mulingo gunu habwokuba naagonza tumwirre haihi.
4. Habwaki kyayanguhiraga abantu kuhikirra Yesu?
4 Yesu ayegera hali Ise. Kusisanaho na Ise, Yesu na uwe mwebundaazi. Egi niyo ensonga habwaki obu akaba ali omu nsi, abantu baagonzaaga kwija nambere ali. Tibaatinaga kumukaguza ebikaguzo. (Mar. 4:10, 11) Kandi obu yabakaguzaaga ekintu kyona, baamugambiraga omulingo gwonyini ogu barukwehurra. (Mat. 16:13-16) Kandi obu baakoraga ensobi, tibaatiinaga habwokuba baabaga bakimanyire ngu Yesu aine embabazi, okuganyira hamu n’okugumiisiriza. (Mat. 17:24-27) Habwokuba Yesu akeegera hali Ise omu buli kimu kyona, abahondezi be bakasobora kumanya kurungi Yahwe. (Yoh. 14:9) Bakakyetegereza ngu Yahwe akaba atarukusisana nk’abeebembezi baabo ab’amadiini abakaba bali bakaali, b’emyehembo, kandi abatarukuhikirirwa.
5. Kuba bantu abebundaazi kireetera kita abandi kutuhikirra?
5 Nitusobora tuta kwegera hali Yahwe? Obu tukurakuraniza obwebundaazi, kyanguhira abandi kutuhikirra. Obwebundaazi nibwija kutukoonyera kutaba bantu ab’ihali, ab’emyehembo, kandi abatarukuganyira—emiringo ey’eretera abandi kutwirra hara. Oihireho nibwija kutukoonyera kuba bantu ab’embabazi, abarukugumiisiriza, kandi abarukuganyira—emiringo ey’eretera abandi kutwirra haihi. (Bak. 3:12-14) Abagurusi, kukira muno nubo basemeriire kuleetera abandi kwanguhirwa kubahikirra. Kandi abagurusi kusobora kukora eki, basemeriire kumara obwire bwingi n’ab’oruganda na banyaanya itwe. Kinu nikimanyisa ngu basemeriire kuba omu nsorrokano ez’amaiso h’amaiso, kukira kuba ha videoconferencing obu kirukuba kitarukwetaagisa. Kakuba enyikara yabo eba neebasobozesa, basemeriire kulengaho kutebeza n’ab’oruganda na banyaanya itwe omu kutebeza okw’enju ha nju. Kandi ab’oruganda na banyaanya itwe obu baraamanya kurungi abagurusi, nikiija kubanguhira kubahikirra obu barukuba nibeetaaga obukoonyezi.
YAHWE AYOLEKA OKWETEGEREZA
6-7. Bazaaho ebyokurorraho ebirukwoleka omulingo Yahwe yahindwiremu encwamu ye, abaheereza be obu baamusabire.
6 Abantu baingi ab’emyehembo tibooleka okwetegereza obu baba nibakoragana n’abandi. Baitu habwokuba Yahwe mwebundaazi, ayoleka okwetegereza, noobu kiraaba ngu naakirra hara abantu boona. Leka turole omulingo yatwaizemu mugenzi wa Musa Miriamu. Miriamu na Aroni bakatontorromera Musa ow’akaba atumirwe Yahwe. Nahabweki omu mulingo ogu, bakaba nibasisana nk’abarukurabyamu Yahwe amaiso. Ekyarugiremu, Yahwe akabiihirirwa muno Miriamu kandi yamurwaza ebigenge. Baitu hanyuma, Aroni akesengereza Musa kukoonyera mugenzi we kandi na Musa yayesengereza Yahwe kukiza Miriamu. Kiki Yahwe eki yakozere? Yahwe atalemere ha musango ogu akaba acweriire Miriamu. Habwokuba Yahwe mwebundaazi, akahuliiriza Musa kandi yakiza Miriamu.—Kubar. 12:1-15.
7 Yahwe akongera yayoleka obwebundaazi obu yahuliriize okusaba kw’Omukama Hezekiya. Yahwe akaba akozeseze nabbi we kumugambira nkooku akaba naagenda kufa. Hezekiya akarra kandi yasaba Yahwe kumukiza. Yahwe akuhuliiriza okusaba kwa Hezekiya kandi yamwongera emyaka endi 15. (2 Bakam. 20:1, 5, 6) Habwokuba Yahwe mwebundaazi, ayoleka abantu embabazi kandi abahuliiriza.
8. Byokurorraho ki ebirukwoleka ngu Yesu ayoleka okwetegereza? (Marako 3:1-6)
8 Yesu ayegera hali Ise. Yesu obu akaba ali omu nsi, yakorraga abandi ebirungi obu kyabaga kyetaagisize. Ekyokurorraho, akakiza abantu ha Sabbiti, noobu kiraaba ngu abantu abamuhakanizaaga baabaga batarukukigonza. (Soma Marako 3:1-6.) Na kasumi kanu, Yesu naakyagumizaamu kwoleka okwetegereza hamu n’embabazi omu mulingo ayebemberamu ekitebe Ekikristaayo. Ekyokurorraho, omuntu omu kitebe obu akora ekibi eky’amaani, amugumiisiriza obu naamuha omugisa ogw’okwegarukamu.—Kus. 2:2-5.
9. Nitusobora tuta kwoleka okwetegereza omu biteekerezo byaitu n’ebikorwa byaitu? (Rora n’ebisisani.)
9 Nitusobora tuta kwegera hali Yahwe? N’obwebundaazi tusemeriire kwegera ha kwetegereza kwa Yahwe obukirukuhika ha mulingo tuteekerezaamu n’ebikorwa byaitu. (Yak. 3:17) Ekyokurorraho, abazaire abarukwoleka okwetegereza tibarukwija kunihirramu abaana baabo kukora ebintu ebi batarukusobora. Yakobbo ali kyokurorraho ekirungi obukirukuhika ha mulingo yatwaizeemu abaana be. (Kub. 33:12-14) Ekindi, abazaire abebundaazi kandi abarukwoleka okwetegereza basemeriire kwetantara kulengesaniza abaana baabo. Abagurusi b’ekitebe na bo basemeriire kwoleka okwetegereza. Gumu ha miringo basobora kukikoramu nukwo kwikiraniza n’encwamu y’abaingi h’akatebe k’abagurusi kakuba eba etarukucwa emisingi ya Baibuli. (1 Tim. 3:2, 3) Kandi itwena tusemeriire kulengaho kwetegereza enteekereza z’abandi noobu zaakuba nizaahukana n’ezaitu. (Bar. 14:1) Mali, itwena omu kitebe tusemeriire kwekamba kurora ngu ‘okwetegereza kwaitu kwamanywa abantu boona.’—Baf. 4:5.
Taata naayoleka okwetegereza obukirukuhika ha bintu ebi arukunihirramu abaana be omu buheereza (Rora akacweka 9)
YAHWE AYOLEKA OKUGUMIISIRIZA
10. Miringo ki Yahwe ei yayolekeremu okugumiisiriza?
10 Noosobora kuba okyetegeriize ngu abantu ab’emyehembo tibagonza kulinda. Emyehembo ebaleetera kuba bantu abatarukugumiisiriza. Yahwe naayahukanira kimu hali abantu nk’abo, habwokuba nuwe akyakizireyo kwoleka okugumiisiriza! Omu biro bya Nuha, Yahwe akagamba ngu akaba naija kulindaho kumara emyaka 120 atakahwerekeriize abantu ababi. (Kub. 6:3) Kinu kikaha Nuha obwire bw’okukuza abaana be n’okwombeka eryato obu naakoonyerwa eka ye. Hanyuma, Malaika wa Yahwe akahuliiriza Ibburahimu n’okugumiisiriza obu akaba naamukaguza ebikaguzo ebirukukwata ha kuhwerekerezebwa kwa Sodomu na Gomora. Omuntu ow’emyehembo akaba naasobora kukaguza Ibburahimu ati, ‘Nooha akuhaire obusobozi bw’okunkaguza ebikaguzo ebi!’ Baitu Malaika ogu obu naayegera hali Yahwe akooleka okugumiisiriza Ibburahimu obu akaba naamukaguza.—Kub. 18:20-33.
11. Nkooku kyolekerwe omu 2 Petero 3:9, habwaki Yahwe naayoleka okugumiisiriza kasumi kanu?
11 N’obwebundaazi, Yahwe naakyayoleka okugumiisiriza omu kasumi kanu. Akyalindiriire akasumi akayataireho nukwo empero ehike. Habwaki akyagumiisiriize? “Habwokuba tarukugonza omuntu weena ahwerekerre, baitu naagonza boona beegarukemu.” (Soma 2 Petero 3:9.) Amaani Yahwe atairemu kugumiisiriza gafiire busa? Nangwa! Habwokuba Yahwe amazire akasumi agumisiriize, obukaikuru n’obukaikuru bw’abantu basoboire kufooka baheereza be. Kandi nitunihira ngu abantu abandi baingi muno na bo nibaija kufooka baheereza be. Baitu nabwo, kugumiisiriza kwa Yahwe kwine obugarukiro. Noobu kiraaba ngu Yahwe agonza abantu, tarukwija kubaleka kwikara nibakora kyona eki barukugonza. Naija kumarraho kimu obubi, ebiro n’ebiro.—Hab. 2:3.
12. Yesu naayoleka ata ngu naayegera ha kugumiisiriza kwa Yahwe?
12 Yesu ayegera hali Ise. Kumara emyaka nyingi, Yesu aikaire naayegera ha kugumiisiriza kwa Yahwe. Yesu aikaire naarora Sitaani naabazaaho Yahwe ebisuba hamu n’abaheereza be abeesigwa. (Kub. 3:4, 5; Yob. 1:11; Kus. 12:10) Kandi, Yesu aikaire naarora abantu baingi nibabonabona muno. Mali alindiriire n’ekihika akaire kuhika “nukwo ahwerekereze emirimo ya Sitaani”! (1 Yoh. 3:8) Kiki ekikoonyera Yesu kulindirra n’okugumiisiriza kuhikya Yahwe obu alimugambira ngu akasumi kahikire ak’okuhwerekereza emirimo ya Sitaani? Emu ha nsonga eri ngu Yesu mwebundaazi. Amanyire ngu Yahwe nuwe aracwamu ni di obu araaleeta empero.—Ebik. 1:7.
13. Yesu akooleka ata ngu naagumiisiriza abakwenda be, kandi habwaki?
13 Yesu obu akaba ali omu nsi, akagumiisiriza muno abakwenda be. Ekyokurorraho, obu baikaraga nibateera empaka ezirukukwata hali nooha arukukira obukuru omuli bo, Yesu atababihirirwe. Oihireho akagumizaamu naayoleka okugumiisiriza. (Luk. 9:46; 22:24-27) Akaba naakigumya ngu akasumi kakaba nikaija kuhika bahindulemu enteekereza yabo. Haroho ensobi ei oikaire nookora emirundi nyingi? Obu kiraaba nukwo kiri, tikirukukusemeza kukimanya ngu omukama ow’arukukulema mwebundaazi kandi ayoleka okugumiisiriza?
14. Nitusobora tuta kukurakuraniza okugumiisiriza?
14 Nitusobora tuta kwegera hali Yahwe? Obu tukurakuraniza “enteekereza ya Kristo,” kitwanguhira kuteekereza n’okwetwaza nka Yahwe. (1 Kol. 2:16) Kiki ekiraatukoonyera kweyongera kuba n’enteekereza nk’eya Kristo? Omulingo ogurukukirayo ogu tusobora kukikoramu nukwo kusoma ebitabu by’Enjiri. Hanyuma tusemeriire kutunga obwire kuteekerezaaho omulingo ebi turukusoma byoleka enteekereza ya Yesu. Kandi hataroho kugurukyagurukya, tusemeriire kusaba Yahwe kutukoonyera kuba bebundaazi kandi abarukugumiisiriza nka Yesu. Obu turakurakuraniza enteekereza nk’eya Kristo, nitwija kweyongera kuba nka Ruhanga kuraba omu kwoleka okugumiisiriza okw’amaani hali itwe itwenka hamu n’Abakristaayo bagenzi baitu.—Mat. 18:26-30, 35.
YAHWE ATA OMUTIMA HALI ABEEBUNDAAZI
15. Bazaaho ebyokurorraho ebirukwoleka omulingo Yahwe ata omutima h’abeebundaazi (Zabbuli 138:6)
15 Soma Zabbuli 138:6. Mali ka mugisa gw’amaani kukimanya ngu Yahwe anyakuli Omulemi w’iguru n’ensi, ata omutima h’abantu abeebundaazi! Teekerezaaho ebyokurorraho by’abantu abamu abaarorwaga nk’aba hansi baitu Yahwe aba yataireho omutima. Bamu hali bo nitusobora kuba tutabateekerezaaho baitu Yahwe akabahandiikisa omu Baibuli. Yahwe akatereekereza Musa kuhandiika ibara ly’omulezi arukwetwa Debora ayabaireho omu kasumi ka Isaka na Yakobbo. Debora akaba muheereza omwesigwa omu ka ya Yakobbo na Isaka kumara emyaka nka 125! Noobu kiraaba ngu omukazi onu omwesigwa titumumanyireho bingi, Yahwe akakigumya ngu yamuhandiikisa omu Baibuli nukwo tumanye nkooku yamugonzaaga muno. (Kub. 24:59; 35:8, ftn.) Hanyuma y’okurabaho emyaka nyingi muno, Yahwe akakoma omuliisa omuto ow’arukwetwa Daudi kufooka omukama w’ihanga lya Isaleeri. (2 Sam. 22:1, 36) Hanyuma y’akacu kake Yesu amazire kuzaarwa, Ruhanga akasindika malaika hali abaliisa abeebundaazi, obu naabaha omugisa ogw’okuba ab’okubanza kukimanya nkooku omu Beterehemu hakaba haliyo omwana ow’akaba azairwe ow’akaba naija kufooka Masiya. (Luk. 2:8-11) Kandi Yusufu na Malyamu obu baalesere Yesu ha yekaru, Yahwe akaha omugisa Simeoni na Ana abakaba bakuzire omu myaka ogw’okurora Omwana we. (Luk. 2:25-30, 36-38) Mali, ‘Yahwe noobu araaba ali haiguru, ata omutima h’abaculeezi’!
16. Yesu akeegera ata ha mulingo Ise atwazaamu abandi?
16 Yesu ayegera hali Ise. Kusisanaho na Ise, Yesu akatamu ekitiinisa abantu abaarorwaga nk’aba hansi. Akeegesa abantu “abateegesiibwe kandi aba buli kiro,” amananu agarukukwata ha Bukama bwa Ruhanga. (Ebik. 4:13; Mat. 11:25) Ekindi, akakiza abarwaire kandi yabatwaza omu mulingo ogwabaleetiire kuhurra nibagonzebwa kandi nibateekwamu ekitiinisa. (Luk. 5:13) Yesu atakafiire, akanaabya ebigere by’abeegeswa be, omulimo ogwakorwaga abaheereza bonka. (Yoh. 13:5) Kandi obu akaba atakatembere omu iguru, akaha abeegeswa be boona otwaliremu na itwe omugisa ogw’okwejumbira omu mulimo omukuru ogw’okukoonyera abantu kutunga obwomeezi obutahwaho.—Mat. 28:19, 20.
17. Nitusobora tuta kwoleka ngu nitugonza abandi kandi nitubatamu ekitiinisa? (Rora n’ekisisani.)
17 Nitusobora tuta kwegera hali Yahwe? Twoleka ngu nitugonza abantu kandi nitubatamu ekitiinisa obu tubatebeza amakuru amarungi tutarukusigikirra ha buhangwa bwabo, ha rangi yabo, rundi obwegese bwabo. Kandi twoleka ngu nitugonza ab’oruganda na banyaanya itwe kandi nitubatamu ekitiinisa obu tubarora nk’abarukutukira noobu tuba twine obujunaanizibwa rundi obusobozi kubakira. (Baf. 2:3) Tusemeza Yahwe obu tuba abeebundaazi kandi tukeebembera omu kutamu abandi ekitiinisa omu miringo enu hamu n’endi.—Bar. 12:10.
Twegera ha bwebundaazi bwa Yahwe obu tutebeza abantu boona amakuru amarungi (Rora akacweka 17)a
18. Habwaki noogonza kwegera ha bwebundaazi bwa Yahwe?
18 Obu turaakora kyona eki turukusobora kwegera ha bwebundaazi bwa Isiitwe ow’omu iguru, nikiija kuleetera abantu kwanguhirwa kutuhikirra, tweyongere kuba bantu abarukwoleka okwetegereza kandi abarukugumiisiriza. Kandi kusisanaho na Yahwe, nitwija kwoleka abandi okugonza kandi tubatwaze omu mulingo ogw’ekitiinisa. Kandi obu turaatamu amaani kweyongera kwirra haihi na Ruhanga, nitwija kweyongera kuba b’omuhendo omu maiso ge!—Is. 43:4.
EKIZINA 159 Muhe Yahwe Ekitiinisa
a KUSOBORRA EBISISANI Ekyesweko: Taata ow’arukwegera hali Yahwe n’obwebundaazi naahuliiriza mutabani we ow’ayasire omukebe gw’ebyakyo obu naazaana. Orupapura 18: Banyaanya itwe nibeegera ha bwebundaazi bwa Yahwe obu nibeegesa abantu abali omu nkomo.