Habwaki Ibara Lya Yahwe Likuru Muno Hali Yesu

1-2. (a) Bintu ki Yesu ebi yakozere omu bwire bw’ekiro atakafiire? (b) Bikaguzo ki ebiturukwija kubazaaho omu kicweka kinu?

KIKABA kiri Kyakana rwebagyo, Nisani 14, omwaka 33 Y.A.K., kandi Yesu akaba ali haihi kugobezebwa, kucwerwa omusango, kubonabonesebwa n’okwitwa. Nubwo akaba yakaruga kulya ekiihuro eky’embaganiza omu kisiika ekya haiguru n’abakwenda be abesigwa. Hanyuma y’ekiihuro, Yesu akabaliza abakwenda be ebigambo eby’okumalirra ebirukugarramu amaani. Kandi obu bakaba batakarugire omu kisiika, Yesu akasaba esaara enkuru muno. Omukwenda Yohana akahandiika esaara egi, kandi neesangwa omu Yohana esuura 17. Omu kicweka kinu nitwija kurora bimu ha bintu ebi tusobora kwegera ha saara ya Yesu.

² Biki ebikaba bimweraliikiriize obu akaba atakafiire? Bintu ki ebikaba biri bikuru hali uwe omu buheereza bwe bwona obu akaba ali hanu omu nsi? Leka tubazeeho eby’okugarukamu eby’ebikaguzo binu.

“MBAMANYISIZE IBARA LYAWE”

3. Kiki Yesu eki yagambire obukirukuhika hali ibara lya Ruhanga, kandi akaba naamanyisa ki? (Yohana 17:​6, 26)

³ Yesu obu akaba naasaba akagamba ati: “Mbamanyisize ibara lyawe.” Nitumanya ngu ebigambo ebi byali bikuru muno hali Yesu habwokuba akabibaza emirundi ebiri hali abegeswa be. (Soma Yohana 17:​6, 26.) Akaba naamanyisa ki? Tugambe ngu akaba abamanyisize ibara eri bakaba batamanyire? Abegeswa ba Yesu bakaba bali Bayudaaya, nahabweki bakaba bamanyire ibara lya Ruhanga, Yahwe. Ibara eri likaba lihandiikirwe omu byahandiikirwe eby’Oruheburaniya emirundi eruhukuhika nka 7,000. Nahabweki Yesu obu yagambire ngu mbamanyisize ibara lyawe, akaba atarukumanyisa ngu akaba aliyo naabeegesa ngu ibara lya Ruhanga niryo Yahwe; oihireho, akaba naabeegesa ibara eri ekirirukukiikirra. Akakonyera abeegeswa be kumanya kurungi Yahwe ekirukutwarramu ekigendererwa kye hali ensi n’abantu, ebintu akaba akozere, ebi akaba naagenda kukora hamu n’emiringo ye. Yesu nuwe wenka ow’arukumanya kurungi Yahwe.

4-5. (a) Ibara ly’omuntu nirisobora lita kufooka likuru muno hali itwe. Bazaaho ekyokurorraho? (b) Abegeswa ba Yesu bakeeyongera bata kumanya Yahwe?

⁴ Ekyokurorraho, tugambe ngu omu kitebe kyawe harumu omugurusi ow’arukwetwa David kandi naakora nka dakitaali ow’arukusemeza. Ow’oruganda ogu omumanyire kumara emyaka nyingi. Baitu kiro kimu, otunga oburwaire kandi oburukukwetaagisa kutunga obujanjabi obw’ahonaaho. Bakutwara omu irwarro nambere ow’oruganda ogu akorra kandi akozesa obukugu bwe kujuna obwomeezi bwawe. Habwokuba ajunire obwomeezi bwawe, oyeyongera kumugonza kandi buli murundi ohurra ibara lye oteekerezaaho ekintu eki yakukoliire. Oba otakyatwara David nk’omugurusi ou oikaire omanyire kyonka, baitu afooka na dakitaali ayajunire obwomeezi bwawe.

⁵ Omu mulingo nugwo gumu, abeegeswa ba Yesu bakaba bamanyire ibara lya Yahwe. Baitu ibara eri likeyongera kuba likuru muno hali bo habwokuba Yesu akabakonyera kumanya kurungi Yahwe. Habwaki nitugamba tuti? Habwokuba Yesu akooleka emiringo ya Ise omu buli kimu eki yabazaaga n’eki yakoraga. Nahabweki abakwenda obu baarozere omulingo Yesu yayegesaamuga kandi baarora omulingo yatwazaamuga abantu, kikabakonyera kumanya kurungi Yahwe.—Yoh. 14:9; 17:3.

“IBARA LYAWE ERI WAMPAIRE”

6. Yesu akaba naamanyisa ki obu yagambire ngu Yahwe amuhaire ibara lye? (Yohana 17:​11, 12)

⁶ Yesu akasabira abegeswa be naagamba ati: “Balinde habw’ibara lyawe eri wampaire.” (Soma Yohana 17:​11, 12.) Kinu nikimanyisa ngu Yesu akaba naija kwetwa Yahwe? Nangwa. Wetegereze ngu Yesu obu akaba naabazaaho ibara Yahwe, akagamba ati, “ibara lyawe.” Nahabweki ibara lya Yahwe litafooke ibara lya Yesu. Hati Yesu akamanyisa ki obu yagambire ngu ibara lya Ruhanga limuhairwe? Eky’okubanza, Yesu akaba atumirwe Yahwe kandi akaba naakora nka Kagambigambi. Akaija omu ibara lya Ise kandi yakora ebyamahano eby’amaani omu ibara eri. (Yoh. 5:43; 10:25) Ekindi, ibara Yesu nirimanyisa “Yahwe Nukwo Kujunwa.” Ego ibara lya Ruhanga likaba liine akakwate k’amaani n’ibara lya Yesu.

7. Habwaki Yesu akaba naasobora kubaza omu ibara lya Yahwe. Bazaaho ekyokurorraho.

⁷ Ekyokurorraho, omulemi naasobora kusindika omuntu ondi kubaza omu ibara lye. Nahabweki ebigambo by’omuntu ogu ow’asindikirwe nibiba biine amaani kusisana oti rundi omulemi wenyini nuwe abibalize. Omu mulingo nugwo gumu, Yesu akaba aine obusobozi obw’okubaza omu ibara lya Yahwe habwokuba Yahwe nuwe akaba amusindikire.—Mat. 21:9; Luk. 13:35.

8. Habwaki Yahwe yagambire ngu ibara lye likaba liri ‘omuli’ Yesu noobu akaba atakaizire omu nsi? (Okuruga 23:​20, 21)

⁸ Baibuli eyeta Yesu Kigambo habwokuba Yahwe akamukozesa kugambira bamalaika hamu n’abantu ebintu Yahwe akaba naagonza bamanye kandi bakole. (Yoh. 1:​1-3) Yesu naasobora kuba akaba nuwe malaika Yahwe ou yasindikire kurolerra Abaisaleeri obu bakaba bali omu irungu. Yahwe obu akaba naagambira Abaisaleeri kworobera malaika ogu, akagamba ati: “Baitu ibara lyange liri omuluwe.”a (Soma Okuruga 23:​20, 21.) Ibara lya Yahwe likaba liri omuli Yesu habwokuba Yesu naakiikirra Yahwe kandi nuwe arukukirrayo kimu kweza ibara lya Ise.

“TAATA, NYUMIZA IBARA LYAWE”

9. Ibara lya Yahwe likaba likuru muno hali Yesu omu mulingo ki?

⁹ Nkooku turozere, Yesu noobu akaba atakaizire omu nsi, ibara lya Yahwe likaba liri likuru muno hali uwe. Egi niyo ensonga habwaki obu akaba ali hanu omu nsi akooleka ngu ibara lya Yahwe likaba likuru muno hali uwe omu buli kimu kyona eki yakoraga. Yesu obu akaba ali haihi kumalirra obuheereza bwe akasaba Yahwe ati: “Taata, nyumiza ibara lyawe.” Ahonaaho iraka lya Ise likaruga omu iguru nirigamba liti: “Ndinyumiize kandi ndyongera ndinyumize.”—Yoh. 12:28.

10-11. (a) Yesu akanyumiza ata ibara lya Yahwe? (Rora n’ekisisani.) (b) Habwaki ibara lya Yahwe lisemeriire kwezebwa n’okwihwaho omusango?

¹⁰ Ekindi, Yesu akanyumiza ibara lya Ise. Omu mulingo ki? Gumu ha miringo yakikozeremu nukwo kugambiraho abandi ha miringo ya Ise erukuhuniiriza hamu n’ebintu ebikuru ebi akora. Baitu akakora ekirukukiraho kusobora kunyumiza ibara lya Ise. Akaba aine kwoleka ngu buli kimu Yahwe eki akora kihikire kandi ngu ibara lye niryera. Yesu akooleka obukuru bw’ekintu kinu obu yayegeseze abahondezi be omulingo basemeriire kusabamu. Akagamba ati: “Isiitwe ali omu iguru, ibara lyawe lyezebwe.”—Mat. 6:9.

¹¹ Habwaki ibara lya Yahwe lisemeriire kwezebwa n’okwihwaho omusango? Habwokuba omu rugonjo rwa Adeni, Sitaani akabazaaho Yahwe Ruhanga ebisuba. Sitaani akagamba ngu Yahwe akaba ali mubiihi w’ebisuba kandi ngu haroho ekintu ekirungi eki akaba aserekere Adamu na Haawa. (Kub. 3:​1-5) Ekindi, Sitaani akaba naayoleka ngu omulingo Yahwe akoramu ebintu gukaba gutahikire. Ebisuba Sitaani yabalize bikaba nibisiisa ibara lya Yahwe. Hanyuma, omu kasumi ka Yobu, Sitaani akagamba ngu abo abaheereza Yahwe bakikora habw’ebintu ebi arukubaha. Ekindi, omuhangirizi ogu akagamba ngu busaho muntu ow’asobora kugumizaamu naaheereza Yahwe kakuba ahikwaho ebirengo. (Yob. 1:​9-11; 2:4) Nahabweki kikaba nikyetaagisa akasumi kurabaho kwoleka nooha omubiihi w’ebisuba, Yahwe rundi Sitaani.

“MPAYO OBWOMEEZI BWANGE”

12. Kiki Yesu eki akaba ayehaireyo kukora kwoleka okugonza oku akaba ainire ibara lya Yahwe?

¹² Habwokuba Yesu naagonza Yahwe, akaba naagonza kukora kyona eki arukusobora kweza ibara lya Yahwe n’okuliihaho omusango. Yesu akagamba ngu ahayo obwomeezi bwe. (Yoh. 10:​17, 18) Akaba ayehaireyo kufa habw’ibara lya Yahwe.b Abantu babiri ab’okubanza abahikiriire Adamu na Haawa, bakajeemera Yahwe kandi baacwamu kuhondera Sitaani. Kwahukanaho na bo, Yesu akaba ayehaireyo kwija omu nsi, n’okwoleka okugonza oku ainiire Yahwe. Kinu akakikora kuraba omu kworobera Yahwe omu buli kimu kyona eki yakoraga n’eki yabazaaga. (Baheb. 4:15; 5:​7-10) Akalinda obwesigwa obu akaba ali hanu omu nsi kuhikira kimu obu yaferiire ha muti omu mulingo ogw’obusaasi. (Baheb. 12:2) Eki kikooleka okugonza oku akaba ainiire Yahwe hamu n’ibara lye.

13. Habwaki Yesu akaba nuwe omuntu ahikire kwoleka ngu Sitaani mubihi w’ebisuba? (Rora n’ekisisani.)

¹³ Hataroho kugurukyagurukya, buli kimu kyona Yesu eki yakozere, kikoolekera kimu ngu Sitaani nuwe mubiihi w’ebisuba hatali Yahwe. (Yoh. 8:44) Yesu nuwe akaba amanyire kurungi Yahwe kukira omuntu ondi weena, kakuba bimu ha bintu Sitaani yabalize hali Yahwe bikaba bihikire, Yesu yaakubaire akimanyire. Baitu Yesu akaba acweriiremu kimu kurwanirra ibara lya Yahwe kwoleka ngu byona Sitaani ebi yabalize bikaba bisuba. N’omu kasumi kyazookere ngu Yahwe akaba aihireho Yesu obulinzi bwe, Yesu akaba ayehaireyo kufa omu kiikaro ky’okujeemera Ise ow’okugonza.—Mat. 27:46.c

“OMULIMO OGU WAMPAIRE KUKORA NGUMALIRIIZE”

14. Migisa ki Yahwe ei yahaire Yesu habw’okwikara ali mwesigwa?

¹⁴ Omu saara Yesu ei yasabire omu bwire bw’ekiro atakafiire, akagamba ati: “Omulimo ogu wampaire kukora ngumaliriize.” Akaba naakigumya ngu Yahwe naija kumuha empeera habw’okwikara ali mwesigwa. (Yoh. 17:​4, 5) Kandi Yesu akaba ahikire kwesiga Ise. Yahwe atamuleke kwikara omu kituuro. (Ebik. 2:​23, 24) Akahumbuura Yesu kandi yamuha ekiikaro ekirukukirayo omu iguru. (Baf. 2:​8, 9) Kandi hanyuma akatandika kulema nk’Omukama w’Obukama bwa Ruhanga. Obukama obu bulikora ki? Yesu akooleka Obukama eki bulikora obu yayegeseze abegeswa be kusaba, naagamba bati: “Leka Obukama bwawe bwije. Leka ebi [Yahwe] ogonza bikorwe omu nsi, nk’oku bikorwa omu iguru.”—Mat. 6:10.

15. Bintu ki ebindi Yesu ebi alihikiiriza?

¹⁵ Omu kasumi akatali ka hara, Yesu naija kurwanisa abanyanzigwa ba Ruhanga kandi ahwerekereze ababi omu bulemu bw’Amagedoni. (Kus. 16:​14, 16; 19:​11-16) Hanyuma y’obulemu obu, Yesu naija kunaga Sitaani omu kiina ekitaine h’okugarukira nambere aliba atakyasobora kukora ekintu kyona. (Kus. 20:​1-3) Yesu naija kugarraho obusinge n’okuhikirra hali abantu omu Bulemi bwe obw’Emyaka Rukumi. Naija kuhumbuura abaafiire. Naija kufoora ensi yoona orugonjo orurungi. Ekigendererwa kya Yahwe kiriba kihikiiriziibwe.—Kus. 21:​1-4.

16. Obwomeezi buliba buta hanyuma y’Obulemi bwa Yesu obw’Emyaka Rukumi?

¹⁶ Obwomeezi buliba buta hanyuma y’Obulemi bwa Yesu obw’Emyaka Rukumi? Ekibi ky’abantu n’obutahikirra biriba bihoireho. Abantu kiriba kitakyabeetaagisa kusaba ekiganyiro habw’ebibi byabo nibasigikirra ha kicunguro kandi baliba batakyayetaaga Yesu kukora nka nyakatagara wabo omukuru kusobora kutunga enkoragana enungi na Yahwe. Kandi “omunyanzigwa ow’okumalirra aliihwaho, nukwo okufa.” Abaafiire baliba bahumbuukire, kandi buli omu weena omu nsi aliba ahikiriire.—1 Kol. 15:​25, 26.

17-18. (a) Kiki ekirukwija kubaho ha kumalirra kw’Obulemi obw’Emyaka Rukumi? (b) Kiki Yesu eki alikora akasumi ke ak’okulema obu kalihwayo? (1 Abakolinso 15:​24, 28) (Rora n’ekisisani.)

¹⁷ Kiki ekindi ekiribaho hanyuma y’Obulemi bwa Yesu obw’Emyaka Rukumi? Omu kasumi ako halibaho ekintu ekyembaganiza. Busaho n’omu ow’alyongera kugurukyagurukya ngu Yahwe ali Ruhanga ow’arukwera kandi ow’obwinganiza. Habwaki? Omu musiri gwa Adeni Sitaani akagamba ngu Yahwe mubiihi w’ebisuba kandi ngu tayebembera abantu n’okugonza. Kurugira kimu omu kasumi ako, abo abarukuheereza Yahwe baikaire nibooleka ngu emiringo ya Yahwe niyo erukukirrayo kimu oburungi. Nahabweki, ha kumalirra kw’Obulemi bw’Emyaka Rukumi, Ibara lya Yahawe liriba liihiirweho kimu omusango. Mali Yahwe aliba ayolekiire ngu ali Isiitwe ow’omu iguru ow’okugonza.

¹⁸ Hanyuma y’Obulemi bw’Emyaka Rukumi, buli omu weena naija kukimanya ngu Sitaani ebi yabalize hali Yahwe, bikaba biri bisuba. Kiki Yesu eki alikora akasumi ke ak’okulema obu kalihwayo? Alihondera ekyokurorraho kya Sitaani obu naajeemera Yahwe? Nangwa! (Soma 1 Abakolinso 15:​24, 28.) Yesu aligarurra Ise Obukama. Naija kuba hansi y’obulemi bwa Yahwe. Ego, kwahukanaho na Sitaani, Yesu ayehaireyo kugarurra Yahwe obusobozi bwona habwokuba naamugonza.

19. Kiki eki twegere omu kicweka kinu ekirukukwata hali Yesu?

¹⁹ Tikirukuhuniiriza ngu Yahwe akaha Yesu ibara lye. Yesu ayolekiire kimu kurungi emiringo ya Ise. Hati Ibara lya Yahwe nirimanyisa ki hali Yesu? Likuru muno hali Yesu kukira ekintu ekindi kyona. Akeehayo kufa habw’ibara eri, kandi naija kuba ayeteekaniize kugarurra Yahwe buli kimu kyona hanyuma y’Obulemi bwe obw’Emyaka Rukumi. Nitusobora tuta kwegera ha kyokurorraho kya Yesu? Nitwija kubazaaho eky’okugarukamu ky’ekikaguzo eki omu kicweka ekirukuhonderaho.