EKICWEKA KY’OKWEGA 23
EKIZINA 2 Ibara Lyawe Niryo Yahwe
Habwaki Ibara Lya Yahwe Likuru Muno Hali Iwe
“Inywe muli bakaiso bange, agambire [Yahwe].”—IS. 43:10.
EBI TURAYEGA
Nitwija kurora nkooku tusobora kwoleka ngu Yahwe ali Ruhanga ow’arukwera, kandi ngu byona Sitaani ebi yamubalizeeho bisuba.
1-2. Nitukimanya tuta ngu ibara lya Yahwe likuru muno hali Yesu?
IBARA lya Yahwe nikyo ekintu ekirukukira obukuru hali Yesu. Nuwe arukukirrayo kimu kumanyisa ibara lya Yahwe. Nkooku twarozere omu kicweka ekihoire, Yesu akaba ayehaireyo kufa nukwo akyoleke ngu Yahwe ali Ruhanga arukwera, kandi ngu ebi akora byona bihikire. (Mar. 14:36; Baheb. 10:7-9) Kandi hanyuma y’Obulemi bwe obw’Emyaka Rukumi, n’okugonza Yesu naija kugarurra Ise obusobozi bwona habwokuba naagonza ekitiinisa kyona kiheebwe Ise. (1 Kol. 15:26-28) Buli kimu kyona Yesu eki yakoliire Yahwe, nikyoleka ngu naamugonza muno.
2 Yesu akaija omu nsi omu ibara lya Ise. (Yoh. 5:43; 12:13) Akamanyisa abahondezi be ibara lya Ise. (Yoh. 17:6, 26) Obu yayegeseze abantu kandi yakora eby’amahano akakyolekera kimu ngu Yahwe nuwe akaba amuhaire amagezi n’amaani ag’okukora ebintu ebi. (Yoh. 10:25) Kandi egi niyo ensonga habwaki Yesu yasabire Yahwe kurolerra abegeswa be habw’ibara lye. (Yoh. 17:11) Hati obu kiraaba ngu ibara lya Yahwe likaba kintu ekikuru muno hali Yesu kukira ekintu ekindi kyona, omuntu naasobora ata kugamba ngu muhondezi wa Yesu kandi kunu tamanyire ibara lya Yahwe kandi takulikozesa?
3. Nitwija kubazaaho ki omu kicweka kinu?
3 Nk’Abakristaayo ab’amananu, tulengaho kurubatira omu bigere bya Yesu kandi tutwara ibara lya Ise nk’ekintu ekikuru. (1 Pet. 2:21) Omu kicweka kinu nitwija kurora habwaki Yahwe naayeta ibara lye abo abarukutebeza “amakuru ganu amarungi ag’Obukama.” (Mat. 24:14) Ekindi, nitwija kurora omulingo ibara lya Yahwe lisemeriire kuba likuru hali itwe.
ABANTU ABARUKWETWA IBARA LYE
4. (a) Mulimo ki Yesu ogu yahaire abegeswa be obu akaba atakagarukire omu iguru? (b) Omulimo ogu nigutuleetera kwekaguza kikaguzo ki?
4 Yesu obu akaba ali haihi kugaruka omu iguru, akagambira abegeswa be ati: “Nimwija kutunga amaani, omwoyo ogurukwera obu gulibaijaho, kandi muliba bakaiso bange omu Yerusalemu, n’omu Buyudaaya yoona hamu na Samaliya, n’omu bicweka ebya hara omu nsi.” (Ebik. 1:8) Nahabweki, amakuru amarungi gaakutebeziibwe n’aheeru ya Isaleri. Habw’ensonga egi, abantu kuruga omu mahanga goona baakutungire omugisa ogw’okufooka bahondezi ba Yesu. (Mat. 28:19, 20) Yesu akagamba ati: “Muliba bakaiso bange.” Kyakwetaagisize abegeswa banu abahyaka kumanya ibara lya Yahwe, rundi baakubaire bakaiso ba Yesu kyonka? Ebintu ebirukubazibwaho omu Ebikorwa by’Abakwenda esuura 15 nibitukonyera kutunga eky’okugarukamu ky’ekikaguzo eki.
5. Abakwenda hamu n’abakuru omu Yerusalemu bakooleka bata ngu abantu boona basemeriire kumanya Ibara lya Yahwe? (Rora n’ekisisani.)
5 Omu mwaka 49 Y.A.K., abakwenda hamu n’abakuru omu Yerusalemu bakaikarra hamu kubazaaho obu kiraaba kikaba nikyetaagisa abantu abakaba batali Bayudaaya kusarwa kusobora kufooka Bakristaayo. Ha kumalirra kw’orukurato oru, Yakobo mugenzi wa Yesu akagamba ati: “[Petero] asoboroire kurungi nkooku Ruhanga habw’omurundi ogw’okubanza ahindukiire amahanga, yakomamu abantu habw’ibara lye.” Ibara ki Yakobo eri akaba naabazaaho? Obu naajuliza ebigambo bya nabbi Amosi, akongera yagamba ati: “Nukwo abantu abasigaireho basobole kwekamba kuserra Yahwe bali hamu n’abantu kuruga omu mahanga goona, abantu abarukwetwa ibara lyange, agambire Yahwe.” (Ebik. 15:14-18) Abegeswa banu abahyaka bakaba batarukwija kugarukira ha kwega hali Yahwe kyonka, baitu bakaba nibaija n’okwetwa ibara lye. Kinu nikimanyisa ngu baakumanyisize abantu ibara lya Yahwe kandi abantu baakubamanyiire ha ibara eri.
Abasaija abesigwa abakaba bali h’akatebe akalemi omu kyasa eky’okubanza obu bakaba bali omu rukurato, bakakyetegereza kurungi ngu Abakristaayo basemeriire kuba abantu abarukwetwa ibara lya Ruhanga (Rora akacweka 5)
6-7. (a) Habwaki Yesu yaizire omu nsi? (b) Nsonga ki endi enkuru eyaleesere Yesu omu nsi?
6 Ibara lya Yesu nirimanyisa ngu “Yahwe Nukwo Kujunwa,” kandi Yahwe akakozesa Yesu kujuna abantu boona abarukumwikiririzaamu n’abarukwikiririza omu Mwana we. Yesu akaija omu nsi kuhayo obwomeezi bwe habw’abantu. (Mat. 20:28) Obu yahaireyo obwomeezi bwe nk’ekicunguro, akasobozesa abantu kujunwa n’okutunga obwomeezi obutahwaho.—Yoh. 3:16.
7 Baitu habwaki abantu bakaba baine kubanza kujunwa? Habw’eki ekyabaireho omu musiri ogwa Adeni. Nkooku twarozere omu kicweka ekyahoire, abazaire baitu ab’okubanza Adamu na Haawa bakajeemera Yahwe, kandi baafeerwa omugisa ogw’okwomeera ebiro n’ebiro. (Kub. 3:6, 24) Baitu Yesu akaija omu nsi kukora ekintu ekikuru ekirukukira okujuna abantu. Sitaani akaba abalize ebisuba hali Yahwe. (Kub. 3:4, 5) Nahabweki, okujunwa kw’abaijukuru ba Adamu na Haawa kukaba kwine akakwate n’ensonga enkuru muno kandi egi niyo kweza ibara lya Yahwe. Kandi Yesu nuwe akaba muntu ow’akaba asemeriire kugonjoora ensonga enu, habwokuba akaba naakikirra Yahwe kandi akakora kurungi byona Yahwe ebi akaba naagonza akole.
Omuntu naasobora ata kugamba ngu muhondezi wa Yesu kandi kunu tamanyire ibara lya Yahwe kandi takulikozesa?
8. Abahondezi ba Yesu boona bakaba nibetaaga kumanya ki?
8 Abahondezi ba Yesu boona kababe Bayudaaya rundi batali Bayudaaya, bakaba baine kumanya endugirro y’okujunwa kwabo kandi ogu nuwe Ise Yesu, Yahwe Ruhanga. (Yoh. 17:3) Kwongerraho, nka Yesu, baakweserwe ibara lya Yahwe. Ekindi, kyakubeetaagisize n’okumanya obukuru bw’okweza ibara eri. Okujunwa kwabo nuho kukaba nikusigikirra. (Ebik. 2:21, 22) Nahabweki abahondezi ba Yesu boona abesigwa bakaba nibetaaga kwega hali Yahwe na Yesu. Egi niyo ensonga habwaki Yesu yamaliriize esaara ye ey’erukusangwa omu Yohana 17 n’ebigambo binu: “Mbamanyisize ibara lyawe kandi ndirimanyisa, nukwo okugonza oku wanyolekere kusobole kuba omuli bo, kandi na nyowe mbe omu bumu na bo.”—Yoh. 17:26.
“MULI BAKAISO BANGE”
9. Nitusobora tuta kwoleka ngu ibara lya Yahwe likuru muno hali itwe?
9 Abahondezi ba Yesu boona ab’amananu basemeriire kweza ibara lya Yahwe. (Mat. 6:9, 10) Basemeriire kurora ibara lya Yahwe nk’erirukukirra kimu amabara agandi goona. Kinu nikimanyisa ngu baine kugira eki baakoraho. Baitu hati kiki eki tusobora kukoraho kusobora kweza ibara lya Yahwe, kandi tukooleka ngu Sitaani ebi yamubalizeeho bisuba?
10. Kiki eki turukusomaho omu kitabu kya Isaya esuura 42 kuhika ha 44? (Isaya 43:9; 44:7-9) (Rora n’ekisisani.)
10 Ensonga enkuru ey’etuleetera kweza ibara lya Yahwe neebazibwaho hanu omu Isaya esuura eya 42 kuhika ha 44. Omu suura ezi, Yahwe naasaba abantu abatarukumuramya kuha obwakaiso kwoleka baruhanga baabo obu baraaba baroho kwo. Kusisanaho n’omusango oguli omu kooti, Yahwe asaba obu haraaba haroho abantu abasobora kuha obwakaiso oburukwoleka ngu baruhanga banu baroho kwo. Baitu busaho n’omu arugayo kuha obwakaiso!—Soma Isaya 43:9; 44:7-9.
Twoleka ngu busaho Ruhanga ondi weena oihireho Yahwe kuraba omu bintu byona ebi tukora n’ebi tubaza (Rora akacweka 10-11)
11. Kiki Yahwe eki arukugambira abantu be nkooku kirukwolekwa omu Isaya 43:10-12?
11 Soma Isaya 43:10-12. Yahwe abazaaho abantu be ati: “Muli bakaiso bange, . . . kandi ninyowe Ruhanga.” Kandi abasaba kugarukamu ekikaguzo kinu: “Haroho Ruhanga ondi, rundi nyowe nyenka?” (Is. 44:8) Nahabweki, twine omugisa ogw’amaani ogw’okugarukamu ekikaguzo eki. Ebigambo byaitu n’ebikorwa byaitu, bisemeriire kwoleka ngu Yahwe nuwe Ruhanga omu wenka ow’amananu kandi ngu ibara lye nirikira amabara agandi goona. Omulingo tutwazaamu obwomeezi bwaitu gusemeriire kwoleka ngu nitugonza Yahwe kandi ngu tuli besigwa hali uwe noobu kiraaba ngu Sitaani naalengaho kutulemesa kukikora. Obu tukora eki, tuba nitweza ibara lya Yahwe.
12. Obunabbi oburukusangwa omu Isaya 40:3, 5 bukahikirizibwa buta?
12 Obu tweza ibara lya Yahwe, tuba nitwegera hali Yesu Kristo. Isaya na uwe akaranga ngu haakubaireho omuntu ayaakubandize kwija ‘akateekaniza omuhanda gwa Yahwe.’ (Is. 40:3) Eki kikahikirizibwa kita? Yohana Omubatizi akateekaniriza Yesu omuhanda, Yesu ayaizire kandi yabaza omu ibara lya Yahwe. (Mat. 3:3; Mar. 1:2-4; Luk. 3:3-6) Obunabbi obu bwonyini bukongera bwagamba buti: ‘Ekitinisa kya Yahwe kirisukurrwa.’ (Is. 40:5) Eki kikabaho kita? Yesu obu yaizire omu nsi, akakikirra Yahwe kikumi ha kikumi kyasisana oti rundi Yahwe wenyini nuwe akaba aizire omu nsi.—Yoh. 12:45.
13. Nitusobora tuta kwegera hali Yesu?
13 Kusisanaho na Yesu, na itwe tuli Bakaiso ba Yahwe. Twetwa ibara lya Yahwe kandi tugambiraho buli omu weena ou tutangatangaana ha mirimo ye ey’erukuhuniriza. Baitu kusobora kuba Bakaiso ba Yahwe abarungi, tusemeriire kugambiraho abantu ebintu byona Yesu ebi yakozere kusobora kweza ibara lya Yahwe. (Ebik. 1:8) Yesu nuwe akyakizireyo kuheera Yahwe obwakaiso, kandi na itwe tuhondera eky’okurorraho kye. (Kus. 1:5) Baitu miringo ki endi ei twolekamu ngu ibara lya Yahwe likuru muno hali itwe?
EMIRINGO EI TWOLEKAMU NGU IBARA LYA YAHWE LIKURU HALI ITWE
14. Nkooku kyolekerwe omu 1 Abakolinso 1:31, ibara lya Yahwe lituleetera kwehurra tuta?
14 Twenyumiriza omu ibara lya Yahwe. (Soma 1 Abakolinso 1:31.) Yahwe kimusemeza muno obu twenyumiriza omu ibara lye. (Yer. 9:23, 24; 1 Kol. 1:31; 2 Kol. 10:17) ‘Kwenyumiza omuli Yahwe’ nikimanyisa kwepankisa Yahwe nka Ruhanga waitu. Tugurora nk’omugisa kuteekamu ekitiinisa ibara lya Yahwe n’okulirwanirra. Titusemeriire kuswara kugambiraho abakozi bataahi baitu, abeegi bataahi baitu, abataahi hamu n’abandi ngu tuli Bakaiso ba Yahwe! Sitaani naagonza tuleke kugambiraho abandi ibara lya Yahwe. (Yer. 11:21; Kus. 12:17) Kandi Sitaani na banabbi be ab’ebisuba nibagonza kuleetera abantu kwebwa ibara lya Yahwe. (Yer. 23:26, 27) Baitu okugonza oku twiniire ibara lya Yahwe kutuleetera kwikara nitulyegondezaamu “obwire okwira.”—Zab. 5:11; 89:16.
15. Nikimanyisa ki kukunga ibara lya Yahwe?
15 Tugumizaamu nitukunga ibara lya Yahwe. (Yo. 2:32; Bar. 10:13, 14) Kukunga ibara lya Yahwe tikigarukira ha kumanya ibara lya Ruhanga n’okulikozesa. Baitu kitwarramu n’okumumanya kurungi, kumwesiga, n’okumusaba obukonyezi n’oburagirizi. (Zab. 20:7; 99:6; 116:4; 145:18) Ekindi, nikitwarramu kurangirra ibara lye hamu n’emiringo ye hali abandi nitubekambisa kwegarukamu n’okugira eki baakoraho nukwo basobole kusiimwa omu maiso ga Yahwe.—Is. 12:4; Ebik. 2:21, 38.
16. Nitusobora tuta kukyoleka ngu Sitaani mubiihi w’ebisuba?
16 Twehayo kubonabonesebwa habw’ibara lya Yahwe. (Yak. 5:10, 11) Obu twikara tuli besigwa hali Yahwe noobu tuba nitubonabona, twoleka ngu Sitaani mubiihi w’ebisuba. Omu kasumi ka Yobu, Sitaani akabazaaho abo abarukuheereza Yahwe ati: “Omuntu ebyanyinabyo alibihayo habwobwomezibwe.” (Yob. 2:4) Sitaani akagamba ngu abantu baheereza Yahwe obu baba bali omu nyikara enungi kandi ngu baakumulekereho kakuba bahikwaho ebizibu. Yobu akooleka ngu eki tikihikire. Na itwe twine omugisa ogw’okwoleka ngu Sitaani noobu aratuhikyaho enyikara ya mulingo ki, titulireka kuheereza Yahwe. Nitukigumiza kimu ngu Yahwe naija kwikara naatulinda habw’ibara lye.—Yoh. 17:11.
17. Nkooku kirukubazibwaho omu 1 Petero 2:12, mulingo ki ogundi ogu tusobora kuhaisa ibara lya Yahwe ekitiinisa?
17 Tuteekamu ekitiinisa ibara lya Yahwe. (Nfu. 30:9; Yer. 7:8-11) Habwokuba abantu batumanyire nk’Abakaiso ba Yahwe, ebi tukora nibisobora kuhaisa ibara lye ekitiinisa rundi kulijumisa. (Soma 1 Petero 2:12.) Nahabweki, nitugonza kukora kyona ekirukusoboka kukugiza ibara lya Yahwe kuraba omu bigambo byaitu n’omu bikorwa byaitu. Obu turakora tuti, nitwija kuhaisa ibara lye ekitiinisa noobu kiraaba ngu tuli bantu abatahikiriire.
18. Mulingo ki ogundi ogu tusobora kwoleka ngu ibara lya Yahwe likuru muno hali itwe? (Rora n’obugambo obuli hansi.)
18 Tuteeka muno omutima ha kweza ibara lya Yahwe kukira kuguteeka ha mulingo abantu baraturoramu. (Zab. 138:2) Habwaki kinu kikuru muno? Habwokuba obu tukora ebintu ebirukusemeza Yahwe, emirundi erukukira obwingi kireetera abantu kutunoba.a Yesu akaba ayehaireyo kwitwa nk’omucwi w’ebiragiro kandi omu mulingo ogurukuswaza, kusobora kuhaisa ibara lya Yahwe ekitiinisa. ‘Akagaya ensoni’ omu mulingo ngu atateeke omutima hali eki abantu abandi eki bakaba nibamuteekerezaaho. (Baheb. 12:2-4) Omutima akaguteeka ha kukora Ruhanga ebi agonza.—Mat. 26:39.
19. Ibara lya Yahwe nirikuleetera kwehurra ota, kandi habwaki?
19 Twenyumiriza omu ibara lya Yahwe kandi tugutwara nk’omugisa ogw’amaani kwetwa Abakaiso ba Yahwe. Habwokuba ibara lya Yahwe likuru muno hali itwe, twehaireyo kugumizaamu nitumukugiza abandi noobu baraturora kubi. Ibara lya Yahwe likuru muno hali itwe kukira omulingo abandi baturoramu. Nahabweki, leka tucweremu kimu kugumizaamu nitukugiza ibara lya Yahwe Sitaani noobu aralengaho kutumaramu amaani. Obu turakora eki, nitwija kwoleka ngu ibara lya Yahwe likuru muno hali itwe, nkooku likaba liri likuru muno hali Yesu Kristo.
EKIZINA 10 Kugiza Yahwe Ruhanga Waitu!
a N’omusaija omwesigwa Yobu akatandika kuteekerezaaho muno omulingo abantu abandi bakaba nibamuroramu, abanywani be basatu obu baagambire ngu aine ekibi eki asobora kuba yakozere. Ha kubanza, obu yaferiirwe abaana be hamu n’ebintu bye byona, ‘Yobu atasiise, nobukwakuba kugamba ngu Ruhanga akozere ekintu ekibi.’ (Yob. 1:22; 2:10) Baitu Yobu obu baamujunaine ngu aine ekibi eki akaba akozere, akatandika kwerwanaho obu naabaza kubi. Akateeka omutima ha kurwanirra ibara lye omu kiikaro ky’okweza ibara lya Ruhanga.—Yob. 6:3; 13:4, 5; 32:2; 34:5.