EKICWEKA KY’OKWEGA 43
EKIZINA 41 Huliiriza Okusaba Kwange
Ijuka Kusabira Abandi
“Musabirangane . . . Okwesengereza okw’omuntu ow’okuhikirra kwine amaani maingi.”—YAK. 5:16.
EBI TURAYEGA
Nitwija kurora habwaki kikuru kusabira abandi n’omulingo tusobora kukikoramu.
1. Nitukimanya tuta ngu esaara zaitu nkuru muno hali Yahwe?
OKUSABA kiri kisembo ekirukuhuniiriza muno. Teekerezaaho kinu: Yahwe ahaire bamalaika obujunaanizibwa obumu. (Zab. 91:11) N’Omwana we amuhaire obujunaanizibwa obukuru muno. (Mat. 28:18) Baitu, haroho omuntu weena ow’ahaire obujunaanizibwa obw’okuhurra esaara zaitu? Nangwa. Obujunaanizibwa obu akabwesigaliza. Yahwe, “Anyakuhurra okusaba,” nuwe ahurra esaara zaitu.—Zab. 65:2.
2. Omukwenda Paulo akatuteeraho kyokurorraho ki obukirukuhika ha kusabira abandi?
2 Noobu kiraaba ngu tusemeriire kusaba Yahwe nitumugambira ebyetaago byaitu, tusemeriire n’okusabira abandi. Kinu nikyo omukwenda Paulo yakozere. Ekyokurorraho, akahandiikira ekitebe eky’omu Efeeso naagamba ati: “Nyikara nimbabazaaho omu saara zange” (Bef. 1:16) Paulo yasabiraga n’abandi. Ekyokurorraho akagambira Timoseo ati: “Ninsiima muno Ruhanga, . . . nyikara ninkwijuka omu kwesengereza kwange nyamusana n’ekiro.” (2 Tim. 1:3) Paulo na uwe akaba aine ebirukumutuntuza ebi akaba asemeriire kusabaho. (2 Kol. 11:23; 12:7, 8) Baitu nabwo, akatunga obwire obw’okusabira abandi.
3. Habwaki nitusobora kwebwa kusabira abandi?
3 Obwire obumu nitusobora kwebwa kusabira abandi. Habwaki? Munyaanya itwe ow’arukwetwa Sabrinaa naabazaaho emu ha nsonga naagamba ati: “Kasumi kanu twine bingi eby’okukora. Ebizibu byaitu nibisobora kutuhugura tukata omutima ha kwesabira itwenka.” Kinu na iwe obwire obumu kikubaho? Obu kiraaba nukwo kiri, ekicweka kinu nikiija kukukoonyera. Nikiija kusoborra (1) habwaki kikuru kusabira abandi, kandi (2)kitwoleke n’omulingo tusobora kukikoramu.
HABWAKI TUSEMERIIRE KUSABIRA ABANDI?
4-5. Kusabira abandi “kwine amaani maingi” omu mulingo ki? (Yakobbo 5:16)
4 Kusabira abandi “kwine amaani maingi.” (Soma Yakobbo 5:16.) Mali kusabira abandi nikisobora kuhindura enyikara yabo? Ego. Yesu obu yakyetegeriize ngu omukwenda Petero akaba naija kumwehakana, akamugambira ati: “Nkusabiire nukwo okwikiriza kwawe kutahwaho.” (Luk. 22:32) Paulo akaba akimanyire ngu kusabira abandi nikisobora kuhindura enyikara yabo. Obu akaba atairwe omu nkomo omu Rooma, akahandiikira Firemooni naamugambira ati: “Ninnihira ngu, kuraba omu saara zaawe ninyija kugaruka nambere muli.” (Fir. 22; rora study note “for I am hoping that through your prayers.”) Obwire bukahika, Paulo yalekerwa kandi yayongera yatandika kutebeza.
5 Baitu, kinu tikirukumanyisa ngu obu tusaba tuba nituhambiriza Yahwe kugira eki yakoraho. Ateeka omutima ha byetaago by’abaheereza be, kandi obwire obumu agarukamu okusaba kwabo. Eki obu tukimanya, kitukoonyera kusaba Yahwe kuruga ha mutima ha nyikara ei turumu, obu nitukigumya ngu naija kugonjoora ensonga omu mulingo ogurukukirayo oburungi.—Zab. 37:5; rora 2 Abakolinso 1:11 na study notes.
6. Kusabira abandi kikwataho kita omulingo twehurra hali bo? (1 Petero 3:8)
6 Kusabira abandi kitukoonyera kukurakuraniza “embabazi.” (Soma 1 Petero 3:8.) Kuba n’embabazi nikimanyisa kurora okubonabona omuntu ondi oku arukurabamu kandi okagonza kumukoonyera. (Mar. 1:40, 41) Omugurusi w’ekitebe ow’arukwetwa Michael naagamba ati: “Obu nsabira abandi ha byetaago byabo, kinkoonyera kumanya ebizibu ebi barukurabamu kandi kinu kindeetera kweyongera kubagonza. Nyehurra ngu ndi haihi na bo, noobu kiraaba ngu nibasobora kuba batakimanyire.” Omugurusi w’ekitebe ondi ow’arukwetwa Richard abazaaho omugaso ogundi ati: “Obu tusabira omuntu, kituleetera kugonza kugira eki twakoraho kumukoonyera. Obu tukoonyera omuntu ou turukusabira, kisisana oti rundi Yahwe atukozeseze kugarukamu esaara ei tuba tumusabiire.”
7. Kusabira abandi kitukoonyera kita kutateekerezaaho ebizibu byaitu byonka? (Abafiripi 2:3, 4) (Rora n’ebisisani.)
7 Kusabira abandi kitukoonyera kurora ebizibu byaitu omu mulingo oguhikire. (Soma Abafiripi 2:3, 4.) Habwokuba nitwikara omu nsi ey’erukulemwa Sitaani, buli omu hali itwe aine ekizibu eki arukurabamu. (1 Yoh. 5:19; Kus. 12:12) Obu tugifoora ngeso yaitu kusabira abandi kitukoonyera kwijuka ngu “ab’oruganda omu nsi yoona nibahikwaho okubonabona nukwo kumu.” (1 Pet. 5:9) Munyaanya Itwe Katherine ow’arukuheereza nka payoniya naagamba ati: “Kusabira abandi kinkoonyera kukiijuka ngu na bo baine ebizibu ebi barukurabamu. Kinu kinkoonyera kuleka kuteekerezaaho muno ebizibu ebi ndukurabamu.”
Kusabira abandi kitukoonyera kutateekerezaaho muno ebizibu byaitu byonka (Rora akacweka 7)d
NIBEETAAGA ESAARA ZAITU
8. Bazaaho ebyokurorraho eby’abantu aba tusobora kusabira.
8 Nibaha aba tusobora kusabira? Nitusobora kusabira abarwaire, abato abarukusindikirizibwa abeegi bagenzi baabo ha isomero, rundi abo abaine obuceke habw’okukura omu myaka. Abakristaayo nibahikwaho okuhakanizibwa kuruga hali ab’omu maka gaabo rundi abakuru b’omu gavumenti. (Mat. 10:18, 36; Ebik. 12:5) Bamu h’ab’oruganda na banyaanya itwe balekereho amaka gaabo habw’obutabanguko obuleeserweho ab’eby’obulemi. Abamu nibabonabona habw’ebigwererezi. Nitusobora kuba tutakabarorahoga. Baitu obu tubasabira tuba nitwoleka ngu nituhondera ekiragiro kya Yesu eky’okugonzangana.—Yoh. 13:34.
9. Habwaki tusemeriire kusabira abo abarukwebembera omu kitebe hamu n’abakazi baabo?
9 Nitusobora n’okusabira abo abarukwebembera omu kitebe. Kinu nikitwarramu abali h’Akatebe Akalemi n’abakoonyezi baabo, abali ha butebe bw’amataagi, abaroleerezi b’ebitongole ha ofiisi z’amataagi, abaroleerezi b’ebicweka, abagurusi omu kitebe hamu n’abaheereza. Baingi h’ab’oruganda banu baine ebizibu ebi barukurabamu, kandi ha murundi nugwo gumu nibakora n’amaani kutukoonyera. (2 Kol. 12:15) Ekyokurorraho, omuroleerezi w’ekicweka ow’arukwetwa Mark naagamba ati: “Kimu ha bizibu ebi ndukurabamu nukwo kuba hara n’abazaire bange abakuzire omu myaka. Boona baine oburwaire oburukubatalibaniza. Noobu kiraaba ngu mugenzi wange na musaija we nibabarolerra, kinsaasa muno habwokuba tindukusobora kubaho maiso h’amaiso kubakoonyera.” Tusemeriire kwikara nitusabira ab’oruganda banu abarukukora n’amaani katube tumanyire ebizibu ebi barukurabamu rundi nangwa. (1 Bas. 5:12, 13) Nitusobora n’okusabira abakazi baabo habwokuba na bo bakora n’amaani kubasagika nukwo bahikirize kurungi obujunaanizibwa bwabo.
10-11. Yahwe asiima esaara zaitu n’obu tuba tutabalizeeho amabara g’ab’oruganda na banyaanya itwe? Soborra.
10 Nkooku turozere, tukira kusabira ab’oruganda na banyaanya itwe. Ekyokurorraho, noobu tuba tutabalizeeho ibara ly’omuntu, nitusobora kusaba Yahwe akoonyere abo abali omu nkomo, rundi ahuumuze abo abafeeriirwe abagonzebwa baabo. Omugurusi w’ekitebe ow’arukwetwa Donald naagamba ati, “Twine ab’oruganda na banyaanya itwe baingi abarukugumira ebizibu, nahabweki obwire obumu tusaba esaara emu ey’erukubazaaho abo boona abarukubonabona.”
11 Esaara nk’ezi zisemeza Yahwe? Ego! Habwaki? Habwokuba titumanyire ebyetaago bya buli Mukristaayo mugenzi waitu. Nahabweki kihikire kusaba esaara emu ey’erukutwarramu ebyetaago by’ab’oruganda na banyaanya itwe boona. (Yoh. 17:20; Bef. 6:18) Esaara ezi buli bwakaiso oburukwoleka ngu nitugonza ab’oruganda boona.—1 Pet. 2:17.
OBU TUBA NITUSABIRA OMUNTU OMU OMU
12. Kulengaho kumanya enyikara abandi ezi barukurabamu nikiija kutukoonyera kita obu turaaba nitusaba?
12 Lengaho kumanya enyikara abantu ezi barukurabamu. Kwongerra ha kusabira ab’oruganda na banyaanya itwe boona, kikuru n’okubazaaho ibara lya buli muntu ou turukusabira. Haroho ow’oruganda rundi munyaanya itwe omu kitebe kyawe ow’aine oburwaire obw’amaani? Omu kitebe kyanyu harumu ensinganto ow’ahoirwemu amaani habw’okusindikirizibwa oku arukurabamu ha isomero? Haroho omuzaire omu kitebe kyanyu ow’arukukora n’amaani kworoora omwana “omu kuhana n’omu kuteerererwa kwa Yahwe”? (Bef. 6:4) Kakuba olengaho kumanya enyikara abandi ezi barukurabamu, nikiija kukuleetera kubagonza n’okubasaalirirwa kandi kikwekambise kubasabira.b—Bar. 12:15.
13. Nitusobora tuta kusabira abo abatutakaroraga?
13 Sabira abandi nookozesa amabara gaabo. Kinu nitusobora kukikora na hali abo abatutakaroraga. Ekyokurorraho, teekerezaaho ab’oruganda na banyaanya itwe abali omu nkomo omu Crimea, Eritrea, Russia, na Singapore. Noosobora kurora amabara g’abo abali omu nkomo kakuba ogenda ha jw.org.c Omuroleerezi w’ekicweka ow’arukwetwa Brian naagamba ati: “Obu mpandiika ibara ly’Omukristaayo mugenzi wange ow’asibirwe omu nkomo kandi nkaikara nindibaza omu iraka erirukuhulirwa, kinkoonyera kumwijuka n’okumubazaaho omu saara zange.”
14-15. Nitusobora tuta kubazaaho ebintu byonyini ebi turukugonza bikorwe?
14 Bazaaho ebintu byonyini ebi orukugonza bikorwe. Michael, ou tusangirwe tubalizeeho naagamba ati: “Obu nsomaho ab’oruganda abali omu nkomo ha jw.org, ndengaho kuteeramu akasisani omulingo nsobora kwehurra kakuba mba ndi omu nyikara yabo. Ekyokurorraho, ninsobora kweralikirra kakuba mba ntali na mukazi wange, kandi mba ningonza kukigumya ngu yatunga buli kimu kyona eki arukwetaaga. Obu nteekerezaaho ebintu binu, kinkoonyera kumanya ekintu kyonyini eky’okubazaaho obu mba ninsabira ab’oruganda abali omu buswere abali omu nkomo.”—Baheb. 13:3, ftn.
15 Obu tulengaho kuteekerezaaho obwomeezi bw’ab’oruganda na banyaanya itwe abali omu nkomo, nikisobora kutukoonyera kuteekerezaaho ebintu ebi tusobora kubazaaho omu saara zaitu obu turukuba nitubasabira. Ekyokurorraho nitusobora kusaba ngu abalinzi b’enkomo batwaze kurungi ab’oruganda abo kandi ngu abo abaine obusobozi babaikirize begondeze omu bugabe bwabo obw’okuramya. (1 Tim. 2:1, 2) Nitusobora n’okusabira ekitebe nambere ow’oruganda ow’ali omu nkomo arukuruga kigarurwemu amaani habw’obwesigwa bwe, rundi ngu abo abatarukuheereza Yahwe barole engeso ze enungi kandi bahuliirize amakuru amarungi. (1 Pet. 2:12) Nitusobora n’okukora ekintu nikyo kimu obu turukuba nitusabira ab’oruganda na banyaanya itwe abarukugumira ebirengo ebindi. Nitusobora kwoleka ngu ‘nitugonza muno abantu abandi’ kakuba tulengaho kumanya ebi barukurabamu, tukabasabira nitukozesa amabara gaabo, kandi tukabazaaho ebintu byonyini ebi turukugonza bikorwe.—1 Bas. 3:12.
BA N’ENTEEKEREZA EY’EHIKIRE HA SAARA ZAAWE
16. Nitusobora tuta kuba n’enteekereza ey’ehikire obukirukuhika ha saara zaitu? (Matayo 6:8)
16 Nkooku turozere, esaara zaitu nizisobora kuhindura enyikara omuntu ei arukurabamu. Baitu nabwo, tusemeriire kuba n’enteekereza ey’ehikire. Obu turukuba nitusaba, kiba kitarukumanyisa ngu nitugambira Yahwe ekintu eki atarukumanya; rundi ngu tuba nitumuha amagezi ha mulingo asemeriire kukwatamu ensonga. Yahwe aba amanyire ebyetaago by’abaheereza be noobu baba batakabimanyire, rundi na itwe tutakabimanyire. (Soma Matayo 6:8.) Hati, habwaki tusemeriire kusabira abandi? Kwongerra ha nsonga ezibazibweho omu kicweka kinu, kusabira abandi guli mulingo ogu twoleka ngu nitubafaaho. Okugonza nukwo kutwekambisa kusabirangana. Kandi Yahwe asemererwa obu arora abaheereza be nibeegera ha kugonza kwe.
17-18. Kusabira abandi nitusobora kukirengesaniza na ki?
17 Noobu kiraaba ngu esaara zaitu nizisobora kutahindura enyikara, zooleka okugonza oku twiniire ab’oruganda na banyaanya itwe, kandi eki kisemeza Yahwe. Teekerezaaho ekyokurorraho kinu: Eka enyakurumu abaana babiri, omwojo n’omwisiki. Omwojo arwaire kandi abyamire omu kitabu. Omwisiki ayesengereza ise ati: “Taata caali gira eki wakoraho kukoonyera mugenzi wange. Arwaire muno!” Isebo asangirwe aine eki aliyo naakoraho kurora omwojo yakira; naagonza omwana we kandi aliyo naamurolerra kurungi. Baitu, kisemeza muno taata ogu obu arora muhara we naafaaho muno mugenzi we kuhika ha rulengo orw’okumusaba kukoonyera mugenzi we.
18 Omu mulingo nugwo gumu, Yahwe atwekambisa kufaahongana n’okusabirangana. Obu tukora eki, kiba nikyoleka ngu titukwefaaho itwenka, kandi eki kisemeza Yahwe. (2 Bas. 1:3; Baheb. 6:10) Nkooku twarora, obwire obumu esaara zaitu nizisobora kuhindura enyikara y’omuntu. Nahabweki, leka tukole kyona ekirukusoboka kusabirangana.
EKIZINA 101 Kukorra Hamu omu Bumu
a Amabara agamu gahindwirwe.
b Rora vidiyo Takeshi Shimizu: Yahwe “Anyakuhurra Okusaba” ha jw.org.
c Kusobora kutunga amabara g’ab’oruganda na banyaanya itwe abali omu nkomo, serra ha jw.org “Jehovah’s Witnesses Imprisoned for Their Faith—By Location.”
d KUSOBORRA EBISISANI Orupapura 26-27: Ab’oruganda na banyaanya itwe abarukuraba omu bizibu nibaijuka kusabira abandi.