Ab’oruganda Babiri Abahyaka Abali h’Akatebe Akalemi

OMU Okitobba 5, 2024, ha rusorrokano orw’omwaka, hakabaho ekirango eky’embaganiza ekikaba nikigamba ngu: Ow’oruganda Jody Jedele na Jacob Rumph bakomerwe kuheereza h’Akatebe Akalemi. Ab’oruganda banu beheeriize Yahwe n’obwesigwa kumara emyaka nyingi.

Ow’oruganda Jedele akazaalirwa omu Missouri, U.S.A. kandi bazaire be bakaba bali bamu h’Abakaiso ba Yahwe. Eka yabo ekaba niikara omu kiikaro nambere hakaba hali Abakaiso ba Yahwe bake. Nahabweki, akatangatangana ab’oruganda na banyaanya itwe kuruga omu biikaro ebirukwahukana abaabungaga omu kicweka ky’owabu kutebeza amakuru amarungi. Okugonza n’obumu ebikaba biri hagati y’ab’oruganda na banyaanya itwe banu bikamukwataho muno. Akabatizibwa omu Okitobba 15, 1983. Yagonzaaga kutebeza kandi hanyuma y’okumara kusoma, akatandiika kuheereza nka payoniya ow’akasumi koona omu Sebutemba 1989.

Ow’oruganda Jedele obu akaba akyali muto, abazaire be baamutwaraga na mugenzi we omwisiki kubunga ha Beseeri. Kinu kikeekambisa abaana kweteeraho ekigendererwa eky’okuheereza ha Beseeri kandi boona bakakihikiiriza. Ow’oruganda Jedele akagenda ha Beseeri ya Wallkill omu Sebutemba 1990. Akabanza kukora omu Kitongole ky’Okuyonja kandi hanyuma akakora omu Kitongole ky’eby’Obujanjabi.

Omu kasumi ako, ebitebe eby’orulimi Orusipanisi bikaba biriyo nibikurakurana kandi bikaba nibyetaaga ab’oruganda. Nahabweki Ow’oruganda Jedele akeeteranizaaho kimu ha bitebe ebi kandi yatandika kwega Orusipanisi. Hanyuma, akatangatangana Munyaanya Itwe Damaris ow’akaba naahereza nka payoniya omu kiikaro eki. Hanyuma bakataaha obuswere kandi yamweteeranizaaho ha Beseeri.

Omu 2005 bakaruga ha Beseeri kurolerra abazaire baabo abakaba nibaheereza Yahwe n’obwesigwa. Omu kasumi ako, bakaba nibaheereza nka bapayoniya ab’akasumi koona. Ow’oruganda Jadele akakoonyera kwegesa omu Isomero lya Bapayoniya kandi akaheereza na h’Akatebe Akarukukorra Hamu na Badakitaali n’Akatebe Akarukujunaanizibwa n’Eby’okwombeka.

Omu 2013, Ow’oruganda na Munyaanya Itwe Jedele bakongera baraalizibwa kugenda ha Beseeri kukoonyera ha purojekiti ey’okwombeka eya Warwick. Kuruga omu kasumi ako, basoboire kuheereza omu Patterson na Wallkill. Ow’oruganda Jedele aheeriize omu Kitongole kya LDC hamu n’Ekitongole ky’Obujanjabi. Omu Maaci 2023, akakomwa kuheereza nk’omukoonyezi h’Akatebe ak’Obuheereza. Obu aba naateekerezaaho obuheereza bwe bwona, naagamba ati: “Obu otunga obujunaanizibwa obuhyaka, obwire obumu noosobora kwehurra otiinire. Baitu ako nuko kasumi osemeriire kwesiga Yahwe habwokuba nuwe atusobozesa kukora byona ebi atusaba kukora.”

Ow’oruganda Rumph akazaalirwa omu California, U.S.A. Obu akaba akyali muto, nyina akaba afukire omu by’omwoyo baitu nabwo, nyina akalengaho kumwegesa amananu kuruga omu Baibuli. Ekindi, buli mwaka yabungiraga nyinenkuru ow’akaba naahereza Yahwe n’obwesigwa. Akamukoonyera kugonza kumanya amananu kandi ha myaka 13, akasaba kwegesebwa Baibuli. Omu Sebutemba 27, 1992, akabatizibwa. Ekirukusemeza kiri ngu, nyina akoongera yatandika kuheereza Yahwe, kandi ise hamu na bagenzi be bakakurakurana kandi hanyuma baabatizibwa.

Obu akaba akyali nsinganto, Ow’oruganda Rumph akarora omulingo bapayoniya bakaba baine okusemererwa. Nahabweki, hanyuma y’okumara kusoma, akatandika kuheereza nka payoniya omu Sebutemba 1995. Omu 2000, akagenda omu Ecuador kuheereza nambere hakaba hali obwetaago. Obu akaba ali omu Ecuador akatangatangana Munyaanya Itwe Inga kuruga Canada ow’akaba naahereza nka payoniya, kandi hanyuma bakataaha obuswere. Hanyuma y’okutaaha obuswere, bakaheereza omu tawuni ey’omu Ecuador omu guruupu ey’ekaba erumu abatebezi bake. Hati ekafooka ekitebe eky’amaani.

Hanyuma y’akasumi, Ow’oruganda na Munyaanya Itwe Rumph bakakomwa kuheereza nka bapayoniya ab’embaganiza kandi hanyuma baheereza omu mulimo gw’okubungira ebitebe. Omu 2011, bakaraalizibwa omu kilaasi ya 132 ey’isomero lya Gilead. Hanyuma y’isomero, bakaheereza omu mahanga agarukwahukana kandi bayegondeza omu buheereza oburukwahukana, nk’okuheereza ha Beseeri, kuheereza nk’abamiisani n’omu mulimo gw’okubungira ebitebe. Ow’oruganda Rumph akatunga n’omugisa ogw’okwegesa omu Isomero ly’Abatebezi b’Obukama.

Habw’oburwaire bwa Korona, Ow’oruganda na Munyaanya Itwe Rumph bakagaruka omu United States. Bakaraalizibwa ha Beseeri ya Wallkill, nambere Ow’oruganda Rumph yatendekiirwe kuheereza omu Kitongole ky’Obuheereza. Hanyuma, bakoongera baasindikwa kuheereza ha itaagi lya Ecuador, nambere Ow’oruganda Rumph yaheeriize h’Akatebe k’Itaagi. Omu 2023 bakagaruka omu Warwick. Omu Janwali 2024, Ow’oruganda Rumph akakomwa kuheereza nk’omukoonyezi h’Akatebe k’Obuheereza. Obu aba naateekerezaaho nambere aheeriize, naagamba ati, “Ekintu ekifoora obujunaanizibwa bw’embaganiza tikiri kiikaro, baitu abantu ab’oheereza na bo.”

Nitusiima muno omulimo gw’amaani ogukorwa ab’oruganda banu, kandi abantu ‘nk’abo nitubatwara nk’ab’omuhendo.’—Baf. 2:29.