EKICWEKA KY’OKWEGA 47
EKIZINA 38 Yahwe Arakuha Amaani
‘Oli w’Omuhendo Muno’!
‘Oli w’omuhendo muno.’—DAN. 9:23.
EBI TURAYEGA
Ekicweka kinu nikiija kukoonyera abo abeehurra nk’abatali b’omugaso kukimanya ngu b’omuhendo muno hali Yahwe.
1-2. Kiki ekisobora kutukoonyera kukigumya ngu tuli b’omuhendo hali Yahwe?
OMU baheereza ba Yahwe harumu abamu abeehurra nk’abatali b’omugaso hali uwe. Nibasobora kuba nibeehurra bati obundi habwokuba haroho omuntu ayabatwaize nk’abatali b’omugaso. Wakeehurraga omu mulingo nk’ogu? Obu kiraaba nukwo kiri, kiki ekisobora kukukoonyera kukimanya ngu oli w’omuhendo hali Yahwe?
2 Kimu ha bintu ebisobora kukukoonyera nukwo kwesomesaaho ebyokurorraho eby’omu Baibuli ebirukwoleka omulingo Yahwe arukugonza abantu batwazibwemu. Omwana we Yesu, yatwazaaga abantu omu mulingo ogw’ekitiinisa. Yesu akooleka ngu abantu abeerora nk’abatali b’omugaso, b’omuheendo muno hali uwe na hali Ise. (Yoh. 5:19; Baheb. 1:3) Omu kicweka kinu, nitwija kurora: (1) omulingo Yesu yakonyiire abantu kukimanya ngu b’omuhendo (2) n’omulingo tusobora kukigumya ngu tuli b’omuhendo muno hali Ruhanga.—Hag. 2:7.
OMULINGO YESU YAKOONYIIRE ABANTU KUKIMANYA NGU B’OMUHENDO
3. Yesu akatwaza ata Abanyagaliraaya abakaba nibagonza abakoonyere?
3 Yesu obu akaba naatebeza omu Galiraaya, abantu baingi bakaija hali uwe kumuhuliiriza n’okukizibwa. Yesu akagamba ngu: “Bakaba nibabonabona kandi balekerweho nk’entaama ezitaine omuliisa.” (Mat. 9:36; rora study notes.) Abebembezi baabo ab’amadiini baabaroraga nk’abantu abataine ekibamanyire bahika n’okubeeta ‘abantu abakyenerwe.’ (Yoh. 7:47-49; study note) Baitu Yesu akooleka ngu naabatamu ekitiinisa kuraba omu kukozesa obwire bwe kubeegesa n’okubakiza endwaire zaabo. (Mat. 9:35) Kandi kusobora kukoonyera abantu baingi, akatendeka abakwenda be nukwo beejumbire omu mulimo ogw’okutebeza kandi yabaha n’obusobozi obw’okukiza endwaire n’obulema.—Mat. 10:5-8.
4. Kiki eki turukwegera ha mulingo Yesu yatwaizeemu abantu abaarorwaga nk’aba hansi?
4 Yesu obu yatwaize kurungi abantu abakaba nibarorwa nk’aba hansi kandi nk’abataine omugaso, akooleka ngu uwe hamu na Ise nibabatwara nk’ab’omuhendo. Obu oraaba nooheereza Yahwe, baitu noogurukyagurukya obu oraaba oli w’omuhendo hali uwe, teekerezaaho omulingo Yesu yaroramuga abantu abaayeroraga nk’abatali b’omugaso abakaba nibagonza kumwegeraho. Obu oraakikora, nikiija kukukoonyera kukimanya ngu oli w’omuhendo hali Yahwe.
5. Bazaaho enyikara y’omukazi Omunyagaliraaya Yesu ou yatangatangaine.
5 Yesu atagarukire ha kwegesa abantu abaabaga beesoroize hamu, baitu n’abo abaabaga bali omu omu. Ekyokurorraho, obu akaba naatebeza omu Galiraaya, akatangatangana omukazi ow’akaba arwaire ekyejwiso ky’esagama kumara emyaka 12. (Mar. 5:25) Kusigikirra ha biragiro, omukazi onu akaba atasemiire, kandi weena ayamukwatahoga yafookaga atasemeiire. Nahabweki obwire oburukukira obwingi yaikaraga wenka. Ekindi, akaba atasobora kweteeranizaaho abandi omu bijaguzo ebyateekanizibwaga kuramya Yahwe. (Lev. 15:19, 25) Hataroho kugurukyagurukya, omukazi onu akaba aine obusaasi obw’omu mubiri n’omu nyehurra.—Mar. 5:26.
6. Kiki omukazi ow’akaba aine ekyejwiso ky’esagama eki yakozere kusobora kukizibwa?
6 Omukazi onu ow’akaba naabonabona muno akaba naagonza Yesu amukize. Baitu atahikirre Yesu naamusaba kumukiza. Habwaki? Obundi akahurra aswaire habw’enyikara ei akaba arumu. Rundi, akaba naatiina ngu Yesu akaba naija kumubinga omu bantu habwokuba akaba atasemiire. Nahabweki akakwata kwonka ha kijwaro kye ekya haruguru obu naakigumya ngu naija kukira. (Mar. 5:27, 28) Okwikiriza kwe kukarugamu emigisa habwokuba akakizibwa. Hanyuma, Yesu obu yakagwize ow’akaba amukwasireho, omukazi akamugarukamu ngu nuwe akaba amukwasireho. Yesu akamutwaza ata?
7. Yesu akatwaza ata omukazi ow’akaba naabonabona muno? (Marako 5:34)
7 Yesu akatwaza omukazi onu omu mulingo gw’embabazi kandi ogw’ekitiinisa. Akakyetegereza ngu akaba ‘naatiina muno kandi naatukumira.’ (Mar. 5:33) Nahabweki akamubaliza omu mulingo ogw’embabazi kandi yamugarramu amaani. Akamweta ‘muhara we’. Yesu obu yabalize ebigambo binu akooleka ngu akaba naamutamu ekitiinisa, kandi ngu naamutwaza omu mulingo gw’embabazi kandi ogw’okugonza. (Soma Marako 5:34.) Gunu nugwo murundi gwonka omu Baibuli nambere yayesere omukazi “muhara we.” Naasobora kuba yakozeseze ebigambo binu eby’embabazi habwokuba akarora omukazi onu atiinire muno. Mali kinu kiine kuba kyamuhuumwize muno! Kakuba Yesu ataraabaliize omukazi onu omu mulingo gw’embabazi, akaba naija kugenda akiziibwe omu mubiri, baitu naayecwera omusango habw’okukwata ha kijwaro kya Yesu n’okuba omu bantu atasemiire. Yesu akamukoonyera kukimanya ngu akaba ali w’omuhendo hali Ise ow’omu iguru ow’okugonza.
8. Bizibu ki munyaanya itwe kuruga Brazil ebi yarabiremu?
8 N’omu kasumi kanu, abaheereza ba Ruhanga abamu baine oburwaire obu baleetera kwenuuba n’okwehurra nk’abatali b’omugaso. Maria,a arukuheereza nka payoniya ow’akasumi koona kuruga omu Brazil, akazaarwa ataine maguru hamu n’omukono ogw’emoso. Naagamba ati: “Abaana ha isomero bansekerezaaga habw’obulema bwange. Baanyetaga ebirukirro ebyansalizaaga muno. Kandi obwire obumu n’ab’omuka bansorooraga.”
9. Kiki ekyakoonyiire Maria kukimanya ngu w’omuhendo muno hali Yahwe?
9 Bukoonyezi ki Maria obu yatungire? Obu yafookere omu h’Abakaiso ba Yahwe, ab’oruganda na banyaanya itwe omu kitebe kye bakamuhuumuza kandi baamukoonyera kwerora omu mulingo Yahwe amuroramu. Naagamba ati: “Ab’oruganda na banyaanya itwe baingi bankoonyiire kuhika ha rulengo ngu tinsobora kubahandiika nkabamarayo! Mali ninsiima muno Yahwe kuruga ha mutima habw’okumpa eka enungi ey’eby’omwoyo.” Ab’oruganda na banyaanya itwe abo bakakoonyera Maria kukimanya ngu w’omuhendo muno hali Ruhanga.
10. Malyamu Magadalene akaba aine kizibu ki, kandi kyamuleeteraga kwehurra ata? (Rora n’ebisisani.)
10 Teekerezaaho omulingo Yesu yakoonyiiremu Malyamu Magadalene. Akaba aine daimooni musanju! (Luk. 8:2) Daimooni nizisobora kuba zaamuleteraga kwetwaza omu mulingo gutali gwa buli kiro kandi ekyarugiremu, abantu baamwetantaraga. Omu kasumi ako aine kuba yayehuliire alekerweho, ataine bulinzi, kandi ataine bukoonyezi. Yesu akabinga daimooni ezikaba nizimutalibaniza kandi yamukoonyera kufooka mwegeswa we. Yesu akakoonyera ata Malyamu Magadalene kukimanya ngu akaba ali w’omuhendo muno hali Ruhanga?
Yesu akooleka ata Malyamu Magadalene ngu akaba ali w’omuhendo hali Yahwe? (Rora akacweka 10-11)
11. Yesu akooleka ata Malyamu Magadalene ngu w’omuhendo muno hali Ruhanga? (Rora n’ebisisani.)
11 Yesu akaraaliza Malyamu Magadalene kugenda na uwe omu kutebeza.b Kandi ekyarugiremu, akagasirwa muno obu yahurraga Yesu naayegesa abandi. Ekindi, Yesu akamweyoleka ha kiro kyonyini obu yahumbuukire. Akaba ali omu h’abeegeswa Yesu abayabandize kubaza na bo kiro eki. Ekindi, Yesu akamuha obujunaanizibwa obw’okumanyisa abakwenda be nkooku akaba ahumbuukire. Binu byona bikaleetera Malyamu Magadalene kukimanya ngu akaba ali w’omuhendo muno hali Yahwe!—Yoh. 20:11-18.
12. Kiki ekyaletiire Lidia kwehurra nk’ow’atarukugonzebwa?
12 Kusisanaho na Malyamu Magadalene, baingi kasumi kanu beehurra nk’abatali b’omugaso. Munyaanya itwe Lidia kuruga omu Spain, naagamba ngu obu akaba atakazairwe, nyina akaba naateekerezaaho kwihamu enda. Lidia naijuka ngu noobu akaba akyali muto, nyina tiyamufaahoga kandi yamubalizaaga ebigambo ebirukusaaliza. Naagamba ati: “Habwokuba nyinanyowe atanyoleke okugonza, naikaraga ninnihira ngu abandi nibaija kukunyoleka. Natiinaga ngu abandi tibarukwija kungonza habwokuba nyinanyowe akandeetera kwerora nk’omuntu omubi.”
13. Kiki ekyakoonyiire Lidia kwerora nk’ow’omuhendo hali Yahwe?
13 Lidia obu yatandikire kwega Baibuli, enyikara ye ekahinduka. Kusaba, kwesomesa Baibuli, ebigambo hamu n’ebikorwa eby’embabazi eby’ab’oruganda na banyaanya itwe, bikamukoonyera kukimanya ngu w’omuhendo hali Yahwe. Naagamba ati: “Ibanyowe aikara naagambira ngu nangonza muno. Kandi aikara nanyijukya emiringo yange enungi. Na banywani bange bakora ekintu nikyo kimu.” Haroho omuntu omu kitebe kyanyu ow’osobora kukoonyera kukirora ngu w’omuhendo muno hali Yahwe?
OMULINGO TUSOBORA KWERORA NKOOKU YAHWE ATURORA
14. Ebigambo ebirukusangwa omu 1 Samwiri 16:7 nibitukoonyera bita kwerora omu mulingo Yahwe aroramu abantu? (Rora n’akasanduuko “Habwaki Yahwe Arora Abantu Be nk’ab’Omuhendo?”)
14 Ijuka ngu Yahwe takurora nkooku ensi ekurora. (Soma 1 Samwiri 16:7.) Yahwe takurora nk’ow’omugaso naasigikirra ha nzooka yaawe, sente ezi oine rundi obwegese bwawe. (Is. 55:8, 9) Nahabweki, lengaho kwerora omulingo Yahwe akuroramu hatali kwerora nkooku abantu bakurora. Noosobora kusomaho ebyokurorraho omu Baibuli okarora omulingo Yahwe yaroramuga abo abaayeroraga nk’abatali b’omugaso, nka Eriya, Naomi na Hana. Noosobora n’okuhandiika ebintu ebi warabiremu ebirukugumya ngu Yahwe naakugonza kandi naakurora nk’ow’omuhendo. Ekindi, noosobora kusoma amasomo agarukukwata ha kwerora nk’ow’omugaso agali omu bitabu byaitu.c
15. Habwaki Yahwe yarozere Danieri ‘nk’ow’omuhendo muno’? (Danieri 9:23)
15 Kigumye ngu obwesigwa bwawe bukufoora w’omuhendo hali Yahwe. Haroho akasumi nambere nabbi Danieri asobora kuba yayehuliire ahoirwemu amaani obu akaba ali nk’omu myaka 90. (Dan. 9:20, 21) Yahwe akamugarramu ata amaani? Ruhanga akasindika malaika Gabulyeri kwijukya Danieri ngu ‘w’omuhendo muno’ kandi ngu esaara ye ekaba ehuliirwe. (Soma Danieri 9:23.) Habwaki Danieri akaba ali w’omuhendo muno hali Ruhanga? Habwokuba akaba ahikiriire kandi ali mwesigwa. (Ez. 14:14) Yahwe akahandiikisa ekyokurorraho kinu omu Baibuli kutuhuumuza. (Bar. 15:4) Ekindi, Yahwe ahurra esaara zaawe kandi akurora nk’ow’omuhendo habwokuba noogonza ekihikire kandi oli mwesigwa hali uwe nka Danieri.—Mik. 6:8; Baheb. 6:10.
16. Kiki ekisobora kukukoonyera kurora Yahwe nka So ow’okugonza?
16 Rora Yahwe nka So ow’arukukugonza. Naagonza kukukoonyera hatali kukuserramu ensobi. (Zab. 130:3; Mat. 7:11; Luk. 12:6, 7) Kwecumiitirizaaho eki kikoonyiire baingi abeehurra nk’abatali b’omugaso. Ekyokurorraho, teekerezaaho Munyaanya Itwe Eliana, kuruga omu Spain ayayehuliire atarukugonzebwa kandi atali w’omugaso hanyuma ya iba kumara emyaka nyingi naamugambira ebigambo ebirukusaaliza. Naagamba ati: “Obu nyehurra nk’ow’ataine mugaso, ndengaho kuteeramu akasisani Yahwe ankiikiire omu ngaro ze, nanyoleka okugonza, kandi nandinda.” (Zab. 28:9) Munyaanya itwe Lauren, kuruga omu South Africa, naagamba ati, “Habwokuba Yahwe akancunda, yankoonyera kwikara ndi haihi na uwe kumara emyaka enu yoona, kandi nankozesa kwegesa abandi, nikyoleka ngu nandora nk’ow’omugaso kandi nk’ow’omuhendo hali uwe.”—Hos. 11:4.
17. Kiki ekisobora kukukoonyera kukigumya ngu noosiimwa Yahwe? (Zabbuli 5:12) (Rora n’ekisisani.)
17 Kigumye ngu noosiimwa omu maiso ga Yahwe. (Soma Zabbuli 5:12.) Daudi akalengesaniza kusiimwa omu maiso ga Yahwe ‘n’engabu enkooto’ ey’erinda abantu abahikiriire. Kukimanya ngu Yahwe naakusiima kandi naakusagika nikisobora kukukoonyera kuleka kwehurra nk’ow’atali w’omugaso. Noosobora kukimanya ota ngu noosiimwa Yahwe? Nkooku turozere, Yahwe ayoleka ngu naatusiima kuraba omu Kigambo kye. Ekindi, akozesa abagurusi, abanywani hamu n’abandi kukwijukya ngu oli w’omuhendo muno hali uwe. Osemeriire kwehurra ota kakuba abandi bakugarramu amaani?
Kukimanya ngu nitusiimwa omu maiso ga Yahwe nikisobora kutukoonyera kuleka kwehurra nk’abatali b’omugaso (Rora akacweka 17)
18. Habwaki osemeriire kwikiriza ebigambo eby’okusiima abandi ebi bakugambira?
18 Abo abakumanyire kandi abarukukugonza obu bakusiima habw’emiringo enungi ei oine, otateekereza ngu nibakwerabyaho kwonka. Ijuka ngu Yahwe naasobora kuba naabakozesa kukukoonyera kukigumya ngu noosiimwa omu maiso ge. Eliana, ou tusangirwe tubalizeeho, naagamba ati: “Mpora mpora ndiyo niinyega kwikiriza ebigambo eby’embabazi kuruga hali abandi. Kigumire kwikiriza ebigambo ebi, baitu nkimanyire ngu Yahwe nikyo arukugonza nkole.” Abagurusi na bo bakoonyiire Eliana kukigumya ngu Yahwe naamugonza. Hati, naaheereza nka payoniya ow’akasumi koona kandi naakonyera na ha Bbeseeri.
19. Habwaki osemeriire kukigumya ngu oli w’omuhendo hali Ruhanga?
19 Omu mulingo ogw’embabazi, Yesu naatwijukya ngu Isiitwe ow’omu iguru naatufaaho. (Luk. 12:24) Nahabweki nitusobora kukigumya ngu Yahwe naaturora nk’ab’omuhendo hali uwe. Eki titusemeriire kukyebwa! Kandi leka tukole kyona ekirukusoboka kukoonyera abandi kukimanya nkooku bali b’omuhendo hali Ruhanga!
EKIZINA 139 Werole Oli omu Nsi Empyaka
a Amabara agamu gahindwirwe.
b Nikizooka ngu, Malyamu Magadalene akaba ali omu h’abakazi abaagendaga na Yesu. Abakazi banu bakakozesa byona ebi bakaba baine kurolerra Yesu n’abakwenda be.—Mat. 27:55, 56; Luk. 8:1-3.