Ekitabu kya Yobbu Nikisobora Kukukoonyera Obu Orukuba Noobonabona

1-2. Nsonga ki ezimu ezisemeriire kutuleetera kusoma ekitabu kya Yobbu?

NUBWO waakaruga kusoma ekitabu kya Yobbu? Noobu kiraaba ngu kikahandiikwa emyaka nka 3,500 enyuma, abantu baingi bakitwara kuba nka kimu ha bitabu ebikyakizireyo kuba birungi ebyakahandiikwa. Abantu bahaisaniza omuhandiiki w’ekitabu kinu, habwokuba akakozesa ebigambo ebyanguhire kwetegereza, ebirungi, kandi ebikwataho emitima y’abantu. Musa nuwe yahandiikire ekitabu kinu eky’embaganiza, baitu omuntu Ayakihandiikisize ni Yahwe Ruhanga.—2 Tim. 3:16.

² Ekitabu kya Yobbu kikuru muno omu Baibuli. Habwaki? Habwokuba kitukoonyera kwetegereza ngu bamalaika hamu n’abantu basemeriire kucwamu kuheereza Yahwe obu nibeekambisibwa okugonza oku bamwiniire hamu n’ibara lye. Ekindi, kitwegesa ha miringo ya Yahwe ey’erukuhuniiriza nk’okugonza kwe, amagezi, obwinganiza, hamu n’amaani. Ekyokurorraho, ekitabu kya Yobbu nikibazaaho Yahwe nka Ruhanga Ow’obusobozi bwona emirundi nyingi muno. Ekitabu kya Yobbu kigarukamu ebikaguzo bingi ebirukukwata ha bwomeezi otwaliiremu n’ekikaguzo kimu ekitalibaniza abantu baingi. Kandi eki nikyo: Habwaki Ruhanga aikiriza okubonabona kubaho?

3. Mulingo ki ogundi ogu tusobora kugasirwa kuruga omu kitabu kya Yobbu?

³ Nkooku kutemba haiguru y’orusozi kitukoonyera kurora kurungi ebintu ebitwetoroire, n’ekitabu kya Yobbu kitukoonyera kwetegereza kurungi omulingo Yahwe aroramu ebizibu ebituhikaho. Leka turole omulingo ekitabu kya Yobbu kisobora kutukoonyera obu tuba nitubonabona. Nitwija kurora omulingo Abaisaleeri bakaba nibasobora kugasirwa omu kyokurorraho kya Yobbu, n’omulingo na itwe kisobora kutugasira kasumi kanu. Nitwija n’okurora omulingo tusobora kukozesa ekitabu kinu kukoonyera abandi.

YAHWE AIKIRIZA YOBBU KUBONABONA

4. Mbaganiza ki ey’amaani ey’ekaba eri hagati ya Yobbu hamu n’Abaisaleeri abakaba bali omu Misiri?

⁴ Abaisaleeri obu bakaba nibabonabona nk’abairu omu ihanga lya Misiri, omusaija ow’arukwetwa Yobbu akaba naikara omu nsi ya Uzi, ey’esobora kuba ekaba eri haihi na Buharabbu. Kwahukanaho n’Abaisaleeri abakaba batandikire kuramya ebisisani omu Ihanga lya Misiri, Yobbu akaba naaheereza Yahwe n’obwesigwa. (Yos. 24:14; Ez. 20:8) Yahwe akabazaaho Yobbu ati: ‘Busaho arukumusisana omu nsi yoona.’a (Yob. 1:8) Yobbu akaba aine itungo lingi muno, kandi yateekwamuga ekitiinisa kingi kukira abantu abandi boona ab’omu burugaizooba. (Yob. 1:3) Sitaani aine kuba yabiihiirwe muno kurora omusaija onu ow’akaba amanyirwe abantu baingi muno kandi naatekwamu ekitiinisa, naaheereza Ruhanga n’obwesigwa!

5. Habwaki Yahwe yaikiriize Yobbu kubonabona? (Yob. 1:20-22; 2:9, 10)

⁵ Sitaani akagamba ngu Yobbu akaba naija kuleka kuheereza Yahwe n’obwesigwa kakuba atandika kubonabona. (Yob. 1:7-11; 2:2-5) Noobu kiraaba ngu Yahwe yagonzaaga muno Yobbu, ebigambo Sitaani yabalize bikaleetaho ebikaguzo bingi, nahabweki Yahwe akaikiriza Sitaani kulengaho kwoleka ebi yabalize obu garaaba gali mananu. (Yob. 1:12-19; 2:6-8) Sitaani akahwerekereza igana lya Yobbu, yahwerekereza abaana be ikumi, kandi yarwaza omubiri gwe gwona ebizimba ebirukusaasa muno. Baitu noobu kiraaba ngu Sitaani akaleetera Yobbu kubonabona muno, Yobbu akagumizaamu naaheereza Yahwe n’obwesigwa. (Soma Yobbu 1:20-22; 2:9, 10.) Hanyuma y’akasumi, Yahwe akagarurra Yobbu obwomeezi oburungi, itungo, ekitiinisa, hamu n’abaana abandi ikumi. Ekindi, omu mulingo ogw’ekyamahano Yahwe akongeraho Yobbu emyaka 140, nahabweki akasobora kurora abaijukuru be n’abaijukuru b’abaijukuru be. (Yob. 42:10-13, 16) Ekyokurorraho kinu kikaba nikisobora kugasira kita abaheereza ba Yahwe aba kara, kandi na itwe nikisobora kutugasira kita kasumi kanu?

6. Ekyokurorraho kya Yobbu kikaba nikisobora kugasira kita Abaisaleeri abakaba nibabonabona? (Rora n’ekisisani.)

⁶ Omulingo Abaisaleeri bakaba nibasobora kugasirwa. Abaisaleeri bakaba nibabonabona muno omu ihanga lya Misiri. Ekyokurorraho, Yosuha na Kalebu bakamara emyaka yabo yoona ey’obusigazi bali bairu. Kandi bakamara emyaka 40 nibagendagenda omu irungu habw’ensobi ei bataraakozere. Abaisaleeri obu baraaba baamanyire ebirukukwata hali Yobbu, biine kuba byabagarwiremu amaani. Bakaba nibaija kukyetegereza ngu Sitaani nuwe aleetaho okubonabona hatali Ruhanga. Kandi baakwetegeriize kurungi habwaki Ruhanga aikiriza abantu kubonabona kandi bakyetegereze ngu Yahwe agonza abantu abaikara bali beesigwa hali uwe noobu baba bali omu nyikara ezigumangaine kandi abaha emigisa.

7-8. Ekitabu kya Yobbu nikisobora kutukoonyera kita obu tuba nitubonanabona? Bazaaho ekyokurorraho.

⁷ Omulingo tusobora kugasirwa. Eky’obusaasi, abantu baingi kasumi kanu balekere kwikiririza omuli Ruhanga habwokuba tibarukwetegereza ensonga habwaki ebintu ebibi bihikaho abantu abarungi. Teekerezaaho ekyokurorraho eky’omukazi ow’arukwetwa Hazelb kuruga Rwanda. Obu akaba akyali muto yaikiririzaaga omuli Ruhanga. Baitu hanyuma ebintu bikahinduka. Abazaire be bakagaitururwa, kandi nyina akaswerwa omusaija ondi ayatwazaaga kubi Hazel. Obu akaba akyali nsinganto, bakamuhamba. Hazel obu yagenzere nambere yasabiraga kuserra okuhuumuzibwa, atakutunge. Hanyuma, Hazel akahandiikira Ruhanga ebbaruha naagamba ati: “Ruhanga, nyikaire ninkusaba, ndengereho kukora ebintu ebirungi, baitu omu kiikaro ky’okunkorra ebirungi, nonkorra ebibi. Tindukwija kwongera kukuramya, kandi hati niinyija kukora ekintu kyona ekirukundetera okusemererwa.” Mali nitusaalirirwa muno abantu abaingi abali nka Hazel, abaikiriza ngu Ruhanga nuwe aleetaho okubonabona habwokuba nukwo beegesiibwe!

⁸ Baitu, itwe twegere kuruga omu kitabu kya Yobbu ngu Ruhanga tali nuwe aleetaho okubonabona baitu ni Sitaani! Kandi ekindi twegere ngu titusemeriire kuteekereza ngu abantu obu baba nibabonabona, baba nibabonabona ngu habwokuba haroho ekintu ekibi eki bakozere. Baibuli egamba ngu ebintu ebibi nibisobora kuhikaho omuntu weena omu kaire koona. (Mug. 9:11; Yob. 4:1, 8) Kandi twegere ngu kakuba twikara tuli beesigwa hali Yahwe n’omu nyikara ezigumangaine, tuba nituha Yahwe omugisa ogw’okwoleka ngu Sitaani mubiihi w’ebisuba. (Yob. 2:3; Nfu. 27:11) Nitusiima muno habw’ebintu ebi twegere kuruga omu Baibuli, habwokuba bitukoonyiire kumanya ensonga yonyini habwaki abantu abarungi babonabona. Hanyuma, Hazel akeega Baibuli n’Abakaiso ba Yahwe kandi yakyetegereza ngu Ruhanga tali nuwe yamuleetiire okubonabona. Akagamba ati: “Nkongera nasaba Ruhanga kuruga ha mutima. Nkagambira Yahwe ngu noobu ndaaba nagambire ngu nkaba niinyija kuleka kumuheereza, nkaba ntarukugonza kukikora. Nkabaza ebigambo ebi habwokuba nkaba ntarukumumanya kurungi. Hati nkimanyire ngu Yahwe nangonza. Nyine okusemererwa n’okumarwa.” Mali nitusiima muno habw’okumanya ensonga habwaki Ruhanga aikiriize okubonabona kubaho! Hati leka turole omulingo ekyokurorraho kya Yobbu kisobora kutukoonyera obu tuba nituraba omu nyikara ezigumangaine.

OMULINGO EKYOKURORRAHO KYA YOBBU KITUKOONYERA KUGUMIISIRIZA

9. Kiki Yobbu eki yakozere obu akaba naabonabona? (Yakobbo 5:11)

⁹ Teeramu akasisani orole Yobbu aikaliire wenka omu iju, omubiri gwe gwijwire ebizimba kandi ali omu busaasi obw’amaani muno. Omubiri gwe gwiragwire habw’oburwaire kandi nigususuuka. Yobbu akaba ataine amaani ag’okwekorra emirimo, yaikarraga hansi kandi ayeyaguza oruguhyo. Yaikaraga naatontorroma habw’obusaasi obu akaba naarabamu. Baitu, Yobbu akaba atarukuraba omu busaasi bunu ngu habwokuba taine eky’okukora, oihireho akaikara naagumiisiriza kandi ali mwesigwa hali Yahwe. (Soma Yakobbo 5:11.) Kiki ekyamukoonyiire kugumiisiriza?

10. Kiki ekirukwoleka ngu Yobbu akaba atarukutiina kugambira Yahwe omulingo akaba naayehurra? Soborra.

¹⁰ Yobbu akagambira Yahwe omulingo gwonyini ogu akaba naayehurramu. (Yob. 10:1, 2; 16:20) Ekyokurorraho, esuura 3 etugambira ngu Yobbu akatontorroma habw’ebizibu ebikaba bimuhikireho obu naateekereza ngu Yahwe nuwe akaba abireesere. Hanyuma, banywani ba Yobbu basatu bakaikara nibagamba ngu Ruhanga akaba naamufubira habw’ebibi akaba akozere, baitu Yobbu akaikara naagamba ngu akaba ali mwesigwa hali Yahwe. Ebigambo bya Yobbu nibyoleka ngu haroho akasumi obu yateekeriize ngu ahikiriire kukira Ruhanga. (Yob. 10:1-3; 32:1, 2; 35:1, 2) Na Yobbu akakiikiriza ngu obwire obumu obu yabaga naalengaho kurwanirra obwesigwa bwe, yamalirraga abalize ebigambo ebitarumu. (Yob. 6:3, 26) Kandi omu suura 31, hooleka ngu Yobbu akaba naagonza Ruhanga amugarukemu kandi amugambire ensonga habwaki akaba naamufubira ataine ekibi eki akozere. (Yob. 31:35) Baitu, akaba atahikire kulemeraho obu naakaguza Ruhanga kumugambira ensonga habwaki akaba naabonabona.

11. Yahwe akagarukamu ata Yobbu obu yagambire ngu akaba ataine ekibi eki akaba akozere?

¹¹ Ekintu kinu nikitwoleka ngu Yobbu kubaza na Yahwe omu mulingo ogu, kikaba nikyoleka ngu akaba aine enkoragana ey’amaani muno na uwe, kandi akaba naakigumiza kimu ngu Yahwe akaba naija kumucwera omusango ogw’obwinganiza. Yahwe obu yakozeseze omuyaga kugarukamu Yobbu, atamusoborre ensonga habwaki akaba naabonabona. Kandi atacwere Yobbu omusango habw’ebintu ebi akaba abalize, rundi habw’okugamba ngu akaba ataine ekintu ekibi eki akaba akozere. Oihireho, Yahwe akahabura Yobbu nkooku taata ahabura omwana we. Kandi ogu gukaba mulingo omurungi ogw’okumukoonyera. Ekyarugiremu, n’obwebundaazi, Yobbu akakiikiriza ngu akaba amanyire bike kandi yayegarukamu habw’ebigambo ebitarumu ebi yabalize. (Yob. 31:6; 40:4, 5; 42:1-6) Ekyokurorraho kinu kikaba nikisobora kita kukoonyera abaheereza ba Yahwe aba kara, kandi na itwe nikisobora kita kutukoonyera kasumi kanu?

12. Abaisaleeri bakaba nibasobora bata kugasirwa omu kyokurorraho kya Yobbu?

¹² Omulingo Abaisaleeri bakaba nibasobora kugasirwa. Abaisaleeri bakaba nibasobora kwegera ha kintu ekyahikire hali Yobbu. Ekyokurorraho, teekerezaaho Musa. Kikaba kitanguhire Musa kwebembera ihanga lya Isaleeri. Emirundi nyingi Abaisaleeri bakajeemera Yahwe kandi bakamaramu Musa amaani. Kwahukanaho n’Abaisaleeri abajeemu abaikaraga nibatontorromera Yahwe, Musa uwe yagendaga hali Yahwe naamusaba kumukoonyera omu nyikara ezigumangaine. (Kurug. 16:6-8; Kubar. 11:10-14; 14:1-4, 11; 16:41, 49; 17:5) Ekyokurorraho kya Yobbu kikaba nikisobora n’okukoonyera Musa, Yahwe obu yamuhanire. Ekyokurorraho, Abaisaleeri obu bakaba bali haihi kutaaha omu Nsi ey’Ekaba Eraganiziibwe, Musa akabakwatirwa ekiniga ‘yagamba ebigambo ebitali by’amagezi n’eminwa ye,’ kandi yalemwa kuha Yahwe ekitiinisa ekimusemeriire. (Zab. 106:32, 33) Kandi ekyarugiremu, Yahwe ataikirize Musa kutaaha omu Nsi ey’Ekaba Eraganiziibwe. (Bir. 32:50-52) Okuhana kunu kwine kuba kwasaalize Musa, baitu n’obwebundaazi, akakwikiriza. Ekyokurorraho kya Yobbu kikaba nikisobora n’okukoonyera Abaisaleeri abeesigwa abaabaireho hanyuma ya Musa, kugumira ebizibu ebi bakaba nibarabamu. Kuraba omu kwecumiitirizaaho ekyokurorraho kinu, abaheereza ba Yahwe abeesigwa bakaba nibasobora kumanya omulingo basobora kugambira Yahwe nkooku barukwehurra, n’okwetantara kwerora nk’abahikiriire kukira Yahwe. Kandi bakaba nibasobora n’okwega omulingo basobora kwikiriza okuhana kwa Yahwe n’obwebundaazi.

13. Ekyokurorraho kya Yobbu nikitukoonyera kita kugumiisiriza? (Abahebburaniya 10:36)

¹³ Omulingo tusobora kugasirwa. Nk’Abakristaayo, na itwe nitwetaaga okugumiisiriza. (Soma Abahebburaniya 10:36.) Ekyokurorraho, bamu omuli itwe nitusobora kuba turwaire, twetuntwire, twine ebizibu omu maka gaitu, tufeeriirwe omuntu ou turukugonza, rundi ebizibu ebindi eby’amaani. Kandi obwire obumu, ebigambo by’abantu rundi ebikorwa byabo nibisobora kuleetera enyikara yaitu kweyongera kuguma. (Nfu. 12:18) Baitu, ekitabu kya Yobbu nikitwegesa ngu nitusobora kugambira Yahwe omulingo turukwehurra obu nitukigumiza kimu ngu naija kutuhurra. (1 Yoh. 5:14) Yahwe tarukwija kutubiihirirwa kakuba tumugambira omulingo turukwehurra noobu kiraaba ngu obwire obumu kusisanaho na Yobbu, ebi tubaza nibisobora kuba bitarumu. Oihireho, naija kutuha amaani hamu n’amagezi aga turukwetaaga kusobora kugumiisiriza. (2 Byom. 16:9; Yak. 1:5) Naasobora n’okutuhana obukirukuba nikyetaagisa nkooku yakozere hali Yobbu. Kandi ekitabu kya Yobbu nikitwegesa omulingo tusobora kugumiisiriza obu tutunga okuhanwa kuruga omu Baibuli, omu kitebe, rundi hali abanywani abakuzire omu by’omwoyo. (Baheb. 12:5-7) Nkooku Yobbu yagasiirwe obu yaikiriize okuhanwa, na itwe tugasirwa obu twikiriza okuhanwa n’obwebundaazi. (2 Kol. 13:11) Mali ekitabu kya Yobbu nikitwegesa amasomo amarungi! Leka turole omulingo tusobora kukozesa ekyokurorraho kya Yobbu kukoonyera abandi.

KOZESA EKITABU KYA YOBBU KUKOONYERA ABANDI

14. Mulingo ki ogumu ogu osobora kukoonyera omuntu omu buheereza kumanya ensonga habwaki haroho okubonabona?

¹⁴ Waakatangatangana omuntu omu buheereza akakukaguza habwaki haroho okubonabona? Okamugarukamu ota? Noosobora kuba wamugambiire ekintu Baibuli eki egamba ekyabaire omu musiri gwa Adeni. Obundi noosobora kuba watandikire noomugambira nkooku malaika omubi Sitaani yagambiire abantu ab’okubanza ekisuba ekyabaleetiire kujeemera Ruhanga. (Kub. 3:1-6) Hanyuma noosobora kuba wamugambiire ngu Adamu na Haawa obu baajeemere, ensi yoona ekaijura okubonabona hamu n’okufa. (Bar. 5:12) Ha kumalirra, noosobora kuba wamugambiire ngu Ruhanga alekere obwire kurabaho nukwo asobole kwoleka ngu Sitaani mubiihi w’ebisuba, kandi ngu Ruhanga naakozesa akasumi ako kukoonyera abantu kukimanya ngu naija kumaraho okubonabona kwona kandi nibaija kwogondeza omu bwomeezi ebiro n’ebiro. (Kus. 21:3, 4) Gunu guli mulingo omurungi ogw’okugarukamu ekikaguzo eki, kandi nigusobora kurugwamu ebirungi.

15. Nitusobora kukozesa tuta ekitabu kya Yobbu kukoonyera omuntu kakuba akukaguza habwaki haroho okubonabona? (Rora n’ebisisani.)

¹⁵ Teekerezaaho omulingo ogundi ogu osobora kusoborramu omuntu ensonga habwaki abantu abarungi babonabona obu nookozesa ekitabu kya Yobbu. Noosobora kutandika noosiima omuntu habw’okukukaguza ekikaguzo eki ekirungi. Hanyuma, omugambire nkooku na Yobbu, omusaija omwesigwa akaba naagonza kumanya ensonga habwaki akaba naabonabona. Akateekereza ngu Ruhanga nuwe akaba naamuleetera okubonabona. (Yob. 7:17-21) Omuntu ow’orukubaza na uwe naasobora kukwatwaho kukimanya ngu n’abantu aba kara bakaba nibateekereza nka uwe. Kandi omu mulingo ogw’amagezi, noosobora kumusoborra ngu Ruhanga tali nuwe akaba naaleetera Yobbu kubonabona, baitu ni Sitaani. Sitaani akaba naamubonabonesa habwokuba akaba agambire ngu abantu baheereza Ruhanga habw’ebintu ebi abakorra, baitu obu babonabona, balekeraaho kumuheereza. Noosobora nookumugambira ngu noobu kiraaba ngu Ruhanga tali nuwe yaleetiire Yobbu kubonabona, akaikiriza kwabaho, kandi kinu nikyoleka ngu Ruhanga naayesiga abaheereza be abeesigwa ngu nibaija kugumizaamu nibamuheereza n’obwesigwa noobu baba nibabonabona, ekirukwoleka ngu Sitaani mubiihi w’ebisuba. Kandi ha kumalirra noosobora kumwoleka ngu hanyuma y’akasumi, Ruhanga akaha Yobbu emigisa habw’okwikara ali mwesigwa hali uwe. Nahabweki, nitusobora kuhuumuza abandi obu nitubagumya ngu Yahwe tali nuwe ndugirro y’okubonabona kwabo.

16. Bazaaho ekyokurorraho ekirukwoleka omulingo ekitabu kya Yobbu kisobora kukoonyera omuntu ow’arukubonabona.

¹⁶ Teekerezaaho omulingo ekitabu kya Yobbu kyakoonyiire omusaija ow’arukwetwa Mario. Kiro kimu, omu mwaka 2021, munyaanya itwe akaba naatebeza naakozesa esimu. Omuntu ou yabandize kuterra nuwe Mario, kandi akamusomera orukarra orurukwoleka ngu Ruhanga tagarukira ha kuhurra esaara zaitu kyonka, baitu atuha n’okunihira okw’akasumi ak’omumaiso. Munyaanya itwe obu yamukagwize enteekereza ye ha rukarra oru, Mario akamugambira ngu nambere ateeriire, abaire naahandiika ebbaruha naagambira ab’eka ye nkooku naabagonza muno kandi ngu naagenda kweyita. Mario akagamba ati, “Niinyikiririza omuli Ruhanga, baitu niinyehurra ngu tarukunfaaho.” Omurundi ogwa kabiri munyaanya itwe kumuterra esimu, akabazaaho okubonabona kwa Yobbu. Mario akacwamu kusoma ekitabu kya Yobbu kyona. Nahabweki munyaanya itwe akacwamu kumusindikira linki ey’erukumutwara omu Babuli eya New World Translation of the Holy Scriptures. Kiki ekyarugiremu? Mario akaikiriza kwegesebwa Baibuli, kandi kikamusemeza muno kumanya ebirukukiraho ebirukukwata hali Ruhanga ow’okugonza ayayolekere ngu naamufaaho.

17. Habwaki noosiima Yahwe habw’okuhandiikisa ekitabu kya Yobbu omu Baibuli? (Yob. 34:12)

¹⁷ Nikyeyoleka kurungi ngu Ekigambo kya Ruhanga kiine amaani maingi muno ag’okukoonyera abantu otwaliiremu n’abo abarukubonabona. (Baheb. 4:12) Mali nitusiima muno Yahwe habwokuba akahandiikisa ekyokurorraho kya Yobu omu Kigambo kye Baibuli! (Yob. 19:23, 24) Ekitabu kya Yobbu kitugumya ngu ‘Ruhanga tasobora kukora ebintu ebibi.’ (Soma Yobbu 34:12.) Kandi kitwegesa ensonga habwaki Ruhanga aikiriza okubonabona n’omulingo tusobora kukugumira. Kandi kitukoonyera n’okuhuumuza abo abarukubonabona. Omu kicweka ekirukuhonderaho, nitwija kurora omulingo ekitabu kya Yobbu kisobora kutukoonyera obu tuba nituha omuntu obuhabuzi.