Nookyaijuka?

Osomere kurungi magaziini eza Omunaara gw’Omulinzi ez’omwaka gunu? Hati, rora obu oraaba noosobora kugarukamu ebikaguzo ebirukuhonderaho:

Kiki ekitwekambisa kuha Yahwe ekitiinisa?

Tukikora habwokuba tutamu ekitiinisa kandi tumugonza kuruga ha mutima. Kandi tumuhaisa ekitiinisa habwokuba nitugonza n’abandi bamumanye.—w25.01, rup. 3.

Nitusobora tuta kuba abantu abarukuganyira, kakuba omuntu atutwaza kubi?

Titusemeriire kwitira eriiso enyehurra zaitu; baitu kakuba tuleka kukwatwa ekiniga n’okwahura enzigu, nikiija kutukoonyera kwetantara ebizibu ebiruga omu kukwatwa ekiniga.—w25.02, rup. 15-16.

Habwaki omwegeswa Marako ali kyokurorraho ekirungi hali ab’oruganda abato?

Marako akaikiriza obujunaanizibwa obu yahairwe. Noobu kiraaba ngu naasobora kuba yasaaliirwe kandi yahwamu amaani habw’enyikara eyabaireho, ataleke kuheereza Yahwe. Akagumya enkoragana ye na Paulo hamu n’Abakristaayo abandi abakaba bakuzire omu by’omwoyo.—w25.04, rup. 27.

Yesu akamanyisa ki obu yasabire naagamba ati: “Mbamanyisize ibara lyawe”? (Yohaana 17:26)

Abeegeswa be bakasangwa bamanyire ibara lya Ruhanga. Baitu Yesu akaba naabeegesa ibara eri ekirirukukiikirra, otwaliiremu n’ekigendererwa kye hali ensi n’abantu, ebintu akaba akozere, hamu n’emiringo ye.—w25.05, rup. 20-21.

Kuba bantu abaculeezi kitukoonyera kwetegereza ki?

Tukyetegereza ngu haroho ebintu ebimu ebi tutamanyire. Ekyokurorraho, titumanyire ni di empero obu erihika rundi omulingo Yahwe alikoramu ebintu omu kasumi ako. Kandi titumanyire ekiraabaho nyenkya rundi kwetegereza kurungi omulingo Yahwe atumanyire.—w25.06, rup. 15-18.

Kiki ekisobora kutukoonyera kugasirwa kuruga omu kicweka rundi omu rubazo rwa boona?

Tusemeriire kwekaguza: ‘Bwakaiso ki obuliyo nibukozesebwa kukoonyera abandi kwetegereza ensonga?’ ‘Haroho ekyokurorraho ekirungi ekiri omu kicweka kinu rundi omu vidiyo, eki nsobora kukozesa obu ndaaba niinyegesa omuntu amananu ganu?’ ‘Nooha asobora kuba naagonza kumanya amananu ganu?’—w25.07, rup. 19.

Kiki eki turukwegera ha kuganyira kwa Ruhanga obukirukuhika ha mulingo yaganyiire Daudi?

Noobu kiraaba ngu Daudi akakora ebibi eby’amaani muno, obu yayegarukiremu kuruga ha mutima, Yahwe akamuganyira. (1 Bakam. 9:4, 5) Ruhanga obu aganyira taikara naatwijukya ekibi eki twakozere kara rundi kukigarra omu kasumi ak’omumaiso.—w25.08, rup. 17.

Kakuba kiba nikigumira omwegi wa Baibuli kwetegereza ensonga, kiki eki osobora kukora?

Kakuba kiba nikimugumira kwetegereza ensonga na hanyuma y’okulengaho kugimwegesa kuruga omu Baibuli, mugireke mugende ha kintu ekindi nukwo muligigarukira hanyuma.—w25.09, rup. 24.

Baibuli obu ebazaaho ebisuba by’amaani g’ekibi eba neemanyisa ki? (Baheb. 3:13)

Ekibi nikisobora kutuleetera kukora ebintu ebibi. Nikisobora n’okutuleetera kwikara nitugurukyagurukya, nk’ekyokurorraho kugurukyagurukya Ruhanga obu araaba naatugonza.—w25.10, rup. 16.

Bintu ki bisatu ebisobora kutukoonyera kusemezaamu esaara zaitu?

(1) Nitusobora kwecumiitirizaaho emiringo ya Yahwe. (2) Nitusobora kuteekerezaaho ekizibu eki turukurabamu kandi tukibazeeho omu saara zaitu nk’okwega kuganyira abandi. (3) Nitusobora kumara obwire bwingi nitusaba. Kinu nikisobora kutukoonyera kubaza omulingo gwonyini ogu turukwehurramu.—w25.10, rup. 19-20.

Nitusobora tuta kukoonyera abakuzire omu myaka?

Nitusobora kubabungira rundi kubaterra esimu. Ekindi, nitusobora kubatwara omu irwarro kandi tukakigumya ngu baatunga obujanjabi. Rundi nitusobora kukora na bo omu miringo ey’erukwahukana ey’okutebeza.—w25.11, rup. 6-7.

Bintu ki ebikuru Abakristaayo ebi basemeriire kwijuka obu barukuba nibeeteekaniriza ekiro kyabo eky’okugaitwa kukigumya ngu kyahaisa Yahwe ekitiinisa?

Muhondere ebiragiro bya gavumenti. Mukigumye ngu ebiraabaho ha kiro eki byayoleka ekyana eky’omwoyo ogurukwera. Mutakihinguraniza obukirukuhika ha kujwara n’okwekoraho kandi mwetantale emigenzo ey’etarukwikirraniza n’emisingi ya Baibuli. Mubalizangane kurungi obu muraaba nimukora enteekaniza.—w25.12, rup. 21-24.