Baibuli Eyegesa Ki ha Kugaba?
Eky’okugarukamu Kuruga omu Baibuli
Baibuli eyekambisa kugaba oyegondiize kandi habw’ekigendererwa ekihikire. Eyongera eyoleka ngu kugaba kugasira anyakugabiirwe hamu n’omugabi. (Enfumo 11:25; Luka 6:38) Yesu ati: “Okugaba kwomugisa okukira okuhebwa.”—Engeso Ezabakweda 20:35.
Ni di okugaba obukusemeza Ruhanga?
Okugaba kuba kw’omugaso omuntu obw’akikora eyegondiize. Baibuli egamba eti: “Omuntu wena akole nkokuyatekeriize kara omu mutimagwe; okutaima nobukwaba okuhambirizibwa: baitu Ruhanga nagonza omwenda.”—2 Abakolinso 9:7.
Kugaba oihire ha mutima kiri kicweka ‘eky’ediini esemiire’ Ruhanga eyarukusiima. (Yakobo 1:27) Omuntu ow’akonyera abali omu bwetaago naba nakorra hamu na Ruhanga, ow’arora okugaba kwe nk’ibanja eryaine kusasura. (Enfumo 19:17) Baibuli eyegesa ngu Ruhanga naija kusasura omuntu ogu omugabi.—Luka 14:12-14.
Ni di okugaba obukutasemeza Ruhanga?
Kakuba omuntu agaba n’ebigendererwa ebitali birungi. Ekyokurorraho kugaba:
Habw’okugonza kusemeza abantu.—Matayo 6:2.
Kusobora kugira ekiwatunga.—Luka 14:12-14.
Habw’okugonza kutunga obwomeezi obutahwaho.—Zabuli 49:6, 7.
Obukuba nikusagika entekereza rundi ebintu Ruhanga ebyatanga. Ekyokurorraho, nikiba kitahikire kugabira omuntu sente nukwo azikozese kuteera ejaara, kunywa amaarwa akatamiira rundi kugura ebitokooza bwongo. (1 Abakolinso 6:9, 10; 2 Abakolinso 7:1) Ekindi, nikiba kitahikire kugabira omuntu sente ow’arukusobora kwerolerra omu byentahya baitu kandi atarukugonza kukikora.—2 Abasesalonika 3:10.
Kakuba okugaba kulemesa omuntu kurolerra ab’omu ka ye. Baibuli eyegesa ngu omutwe gw’eka nuwe asemeriire kuhikyaho eka ye ebyetaago byayo. (1 Timoseo 5:8) Mali nikiba kitahikire omutwe gw’eka kugabira abandi obukiba nikimulemesa kuhikyaho ab’omu ka ye ebyetaago byabo. Yesu akajumirra abo abaali bangire kurolerra abazaire abakuzire omu myaka obu nibagamba ngu ebintu byabo byona baali ‘babihongiire Ruhanga’.—Marako 7:9-13.