Yesu Ajuna—Omu Mulingo Ki?
Ekyokugarukamu Kuruga omu Baibuli
Yesu akajuna abantu abesigwa obuyahaireyo obwomeezi bwe nk’ekicunguro. (Matayo 20:28) Egi niyo nsonga habwaki Baibuli eyeta Yesu “Omujuni owensi.” (1 Yohana 4:14) Eyongera egamba ngu: “Busaho omu ondi okujunwa, baitu busaho ibara lindi hansi yiguru eryabahairwe abantu erituhikiriire okutujuna.”—Engeso Ezabakwenda 4:12.
Yesu ‘akaroza ha kufa habw’abantu boona’ abarukumwikiririzaamu. (Abaheburaniya 2:9; Yohana 3:16) Hanyuma, ‘Ruhanga akamuhumbuura omu bafu,’ kandi Yesu akagaruka omu iguru nk’ekihangirwe eky’omwoyo. (Engeso Ezabakwenda 3:15) Yesu ali omu iguru, nasobora “okubajunira kimu abanyakuija hali Ruhanga omuluwe, baitu aikara omwomezi ebiro byona okubatonganiraga.”—Abaheburaniya 7:25.
Habwaki nitwetaaga Yesu kututonganirra?
Itwena tuli basiisi. (Abarumi 3:23) Ekibi kikaleetaho orukomera hagati yaitu na Ruhanga, kandi kiturugirramu okufa. (Abarumi 6:23) Baitu Yesu nakora ‘nk’omutonganirizi’ hali abo abarukwikiririza omu kicunguro kye. (1 Yohana 2:1) Abatonganirra kurabira omu kusaba Ruhanga kurra esaara zaabo kandi n’okubaganyira ebibi byabo nasigikirra ha kihongwa kye. (Matayo 1:21; Abarumi 8:34) Ruhanga ahuliiriza okwesengereza kwa Yesu oku habwokuba nikukwatagana n’ekigendererwa kye. Ruhanga akatuma Yesu omu nsi, nukwo “ensi ejunwe habwe.”—Yohana 3:17.
Kwikiririza omu Yesu nikyo kyonka ekirukwetaagisa kusobora kujunwa?
Nangwa. Nobukiraaba ngu tusemeriire kwikiririza omuli Yesu nukwo tujunwe, haroho n’ebindi ebitusemeriire kukora. (Engeso Ezabakwenda 16:30, 31) Baibuli n’egamba ngu: “nkomubiri hataloho mwoyo okuguba gufire, nukwo nokuikiriza hataloho okukora kuba kufire.” (Yakobo 2:26) Nahabweki kusobora kujunwa, tusemeriire:
Kwega ebirukukwata hali Yesu hamu na Ise, Yahwe.—Yohana 17:3.
Kubaikiririzaamu boona.—Yohana 12:44; 14:1.
Kwoleka okwikiriza omu bikorwa kurabira omu kworobera ebiragiro byabo. (Luka 6:46; 1 Yohana 2:17) Yesu akegesa ngu tali ogu wena anyakumweta “Mukama wange” alijunwa baitu abo bonka ‘abakora Ise ali omu iguru eby’agonza.’—Matayo 7:21.
Kugumizaamu nitwoleka okwikiriza kwaitu n’obukiraaba ngu twine ebizibu. Eki Yesu akakyolekera kimu kurungi obuyagambire ngu: “Anyakuguma okuhika ha mpero, nuwe alijunwa.”—Matayo 24:13.