Omulingo Yesu Yalinzirwemu

OBWIRE obumu Yahwe akora ebintu omu mulingo ogurukuhuniiriza kulinda abato hamu naabo abatasobora kwerinda. Kinu n’osobora kurora omulingo Yahwe arukukikoramu obworalengaho kurubatira omu kyaro. Baitu hakubanza n’osobora kutetegereza ekirukubaho.

Orora ekinyonyi nikihurruka kandi kyemerra ha itaka haihi naiwe. Nikisisana ekihutaire. Obwolengaho kukirra haihi nakyo kihurruka nikirrayo. Obwoikara n’okihondera, nakyo kiikara nikirrayo. Kandi hanyuma, kihurruka kigenda. Ekinyonyi kibaire kitahutaire na kati! Nomanya eki kibaire nikikora?—

Obwana bw’ekinyonyi kinu bubaire bwesereke omu kisaka haihi na nambere obaire oyemeriire. Kibaire kitiinire ngu noija kuzoora obwana bwakyo obukole kubi. Nahabweki kyayefoora ngu kihutaire nukwo okihondere kandi oruge omu mwanya ogu. Nomanya arukusobora kutulinda nk’oku ekinyonyi kinu kirinda obwana bwakyo?— Omu Baibuli, Yahwe ­nalengesanizibwa n’isamba, erikonyera obwana bwalyo.​—Ekyebiragiro 32:11, 12.

Omwana wa Yahwe omugonzebwa ow’arukukirayo kuba w’omuhendo ni Yesu Kristo. Yesu obw’akaba ali omu iguru, akaba ali kihangirwe eky’amaani eky’omwoyo nka Ise. Akaba n’asobora kwerolerra. Baitu Yesu obuyazairwe nk’enkerembe omu nsi, akaba atasobora kwekonyera, akaba nayetaaga obulinzi.

Kusobora kuhikiriza ekigendererwa kya Ruhanga omu nsi, Yesu akaba aine kukura kufooka musaija. Baitu Sitaani akalengaho kwita Yesu akyali nkerembe. Omulingo Sitaani yali nagonza kwita Yesu obw’akaba akyali nkerembe, n’omulingo Yahwe yamulinziremu bisemeza kusomaho. Wakugondeze kumanya ekyabaireho?—

Hanyuma y’akasumi kake Yesu amazire kuzaarwa, Sitaani akakozesa ekyali nikizooka kuba nk’enyunyuuzi omu mwanya omu buturuka izooba. Abasaija abaraguza enyunyuuzi, bahondera enyunyuuzi mailo nyingi muno kuhika omu Yerusalemu. Obubahikayo, bakaguza nambere ow’arukwija kuba omukama w’Abayudaaya yakuzaaliirwe. Abasaija abamanyire Baibuli eky’egamba ha nsonga enu obubakaguzibwa bagarukamu ngu: “Omu Beterehemu.”​—Matayo 2:1-6

Hanyuma ya Herode omukama omubi omu Yerusalemu kuhurra ebirukukwata ha mukama onu omuhyaka ayakazaarwa omu rubuga oruli haihi na Beterehemu, agambira abasaija banu abaraguza enyunyuuzi ngu: ‘Muserre kandi murole omwana okwarukusisana kandi obumulimubona mwije mungambire.’ Nomanya habwaki Herode n’agonza kumanya nambere asobora kusanga Yesu?— Habwokuba aine ihali kandi n’agonza kumwita!

Ruhanga alinda ata omwana we?— Abaraguzi banu obubarora Yesu bamuha ebisembo. Hanyuma Ruhanga atererra abaraguzi kurabira omu kirooto kutagaruka mwa Herode. Nahabweki bagaruka muka yabo nibakozesa omuhanda ogundi batarabire Yerusalemu. Herode obw’akimanya ngu abaraguzi batahiire, abiihirwa muno. Habw’okugonza kwita Yesu, Herode aragira ngu aboojo boona abali omu Beterehemu abatakahize emyaka ebiri baitwe! Baitu, Yesu akaba atakyaliyo.

Nomanya omulingo Yesu yagenzere?— Hanyuma y’abaraguzi kugenda, Yahwe atererra iba Malyamu, Yusufu, kugenda Misiri. Obwaba ali oku Yesu alindwa hali Herode omubi. Hanyuma y’emyaka kurabaho, Malyamu na Yusufu baruga Misiri hamu na Yesu, Ruhanga ayongera atererra Yusufu. Agambira Yusufu kurabira omu kirooto kugenda Nazalesi, nambere Yesu arukwija kulindirwa.​—Matayo 2:7-23.

Norora omulingo Yahwe yalinziremu Omwana we?— Noha ow’osobora kugamba ngu ali nk’obwana bw’ekinyonyi obuserekerwe nyina bwo omu kisaka rundi nka Yesu obw’akaba akyali nkerembe? Naiwe toli nka bwo?— Naiwe haroho abarukugonza kukukora kubi. Obamanyire?—

Baibuli egamba ngu Sitaani ali nk’entale erukububura kandi erukugonza kutulya. Kandi nk’entale okuzigonza kulya obusoro obutaito, Sitaani hamu na badaimoni be bendereza muno abaana. (1 Petero 5:8) Baitu Yahwe n’akira Sitaani amaani. Yahwe n’asobora kulinda abaana be rundi kwihaho ebibi Sitaani ebyakozere.

Noijuka ebiri omu suura 10 ey’ekitabu kinu Sitaani na badaimoni be ebibalengaho kutuletera kukora?— Ego, balengaho kutusonasona kuterana omu mulingo Ruhanga atarukusiima. Baitu nooha asemeriire kuterana?— Ego, abantu babiri abakuzire kandi abali omu buswere.

Baitu eky’obusaasi, bamu h’abantu abakuzire bagonza kuterana n’abaana abato. Obu bakikora, aboojo n’abaisiki nibasobora kutandika kukora ebintu ebibi ebibeegere hali abantu banu abakuru. Batandika kukozesa ebicweka byabo eby’ensoni omu mulingo ogutahikire. Eki nikyo kyabaireho ira muno omu rubuga rwa Sodomu. Baibuli egamba ngu abantu ab’omu kiikaro ekyo, “abato nabakuru,” bakalengaho kuterana n’abasaija abaali baizire kubungira Loti.​—Okubanza 19:4, 5.

Nahabweki nk’oku Yesu yaali n’ayetaaga obulinzi, naiwe n’oyetaaga obulinzi hali abantu abakuzire​—na hali abaana abandi—​abasobora kulengaho kuterana naiwe. Obwire oburukukira obwingi, abantu banu nibefoora kuba banywani baawe. Nibasobora n’okugira ekibaakuha kakuba obaraganiza ngu torukwija kugira ouwagambiraho ekibarukugonza kukora naiwe. Baitu kusisanaho na Sitaani na badiamoni be, abantu banu nibefaaho bonka kandi nibagonza kwesemeza bonka. Abantu banu balengaho kwesemeza obu nibaterana n’abaana. Ekintu kinu tikihikire!

Nomanya ekibasobora kukora kwesemeza bonka?— Nibasobora kulengaho kukukwatakwata omu bicweka byawe eby’ensoni. Rundi nibasobora kusiiga ebicweka byabo eby’ensoni ha byawe. Baitu tosemeriire kwikiriza omuntu wena kuzaanisa ebicweka byawe eby’ensoni. Nobw’araaba, mugenzi waawe omwisiki, omwojo, maama rundi Baaba waawe. Ebicweka binu byawe wenka busaho asemeriire kubikwataho.

N’osobora ota kulinda omubiri gwawe hali abantu abarukukora ebintu ebibi nka binu?— Eky’okubanza, ijuka ngu tosemeriire kwikiriza omuntu wena kuzaanisa ebicweka byawe eby’ensoni. Kakuba omuntu alengaho kukikora, mugambire otarukutiina n’ogamba ngu: “Lekeraho! Ninyija kukulega!” Kandi omuntu ogu obw’aragamba ngu niiwe arukujunanizibwa habw’ekibaireho, otakiikiriza. Tikihikire. Genda omulege! N’obw’aragamba ngu nsiita yanyu babiri, otamwikiririzaamu, genda bwangu omulege. N’obw’arakuraganiza ebisembo ebirungi muno rundi akakutiinisiriza, iruka omurugeho kandi omulege.

Tosemeriire kutiina, baitu oine kwegendereza. Abazaire baawe obubarakuhabura ha biikaro n’abantu abasobora kukuhikyaho akabi, obahuliirize. Obw’orakikora, noija kutangira omuntu arukugonza kukukora kubi.