Omu kasumi akatali ka hara, Yahwe naija kukozesa Obukama bwe kumaraho ebizibu byaitu byona. Amakuru ago marungi muno kandi buli omu asemeriire kugahurra. Yesu akaba n’agonza abahondezi be bagambireho buli omu obutumwa bunu! (Matayo 28:19, 20) Abakaiso ba Yahwe nibahikiriza bata ekiragiro kya Yesu kinu?

1. Ekyahandikirwe ekiri omu Matayo 24:14 nikihikirizibwa kita kasumi kanu?

Yesu akaranga ngu: “Nenjiri enu eyobukama eritebezebwa omu nsi zona.” (Matayo 24:14) Abakaiso ba Yahwe baliyo nibakora omulimo gunu omukuru n’okusemererwa. Nitutebeza amakuru amarungi omu nsi yoona omu ndimi ezirukuhingura 1,000! Omulimo gunu omukooto nigwetaagisa kutamu amaani maingi hamu n’okuba n’entekaniza enungi. Tigusobora kukorwa hataroho obukonyezi bwa Yahwe.

2. Maani ki agatutamu kusobora kutebeza abantu?

Tutebeza hoona nambere tusanga abantu. Kusisanaho n’Abakristaayo ab’omu kyasa eky’okubanza, tutebeza abantu “omu maka gabu.” (Engeso Ezabakwenda 5: 42) Omulingo gunu ogw’okutebeza ogutekaniziibwe kurungi gutukonyera kutebeza obukaikuru n’obukaikuru bw’abantu buli mwaka. Nk’oku abantu batakira kwikara omu maka gaabo, tutebeza n’omurwijwire. Twikara nituserra omugisa gw’okugambiraho abantu abandi hali Yahwe hamu n’ebigendererwa bye.

3. Nibaha abaine obujunanizibwa obw’okutebeza amakuru amarungi?

Abakristaayo boona ab’amananu baine obujunanizibwa bw’okutebeza abantu abandi amakuru amarungi. Obujunanizibwa bwaitu tubutwara nk’ekintu ekikuru muno. Tukora kyona ekirukusoboka kutebeza habwokuba tukimanyire ngu obwomeezi bw’abantu buli omu kabi. (Soma 1 Timoseo 4:16.) Titusasurwa kukora omulimo gunu habwokuba Baibuli egamba ngu: “Mukahebwa kwonka muhege kwonka.” (Matayo 10:7, 8) Abantu abamu tibaikiriza obutumwa bwaitu. Baitu twikara nitutebeza habwokuba kutebeza kiri kicweka ky’okuramya kwaitu kandi kisemeza Yahwe.

YEGA EBIRUKUKIRAHO

4. Tukora n’amaani kuhikaho abantu boona

VIDIYO: Kutebeza “Nokuhikya Empero Zensi” (7:33)

• Kiki ekikizire kukukwataho habw’amaani Abakaiso ba Yahwe batamu kutebeza?

Musome Matayo 22:39 na Abarumi 10:13-15, hanyuma mubazeeho ebikaguzo binu:

• Obuheereza bwaitu nibwoleka buta ngu nitugonza bataahi baitu?

• Yahwe ayehurra ata hali abo abatebeza amakuru amarungi? (Rora orukarra 15.)

5. Tuli bakozi hamu na Ruhanga

Haroho ebyokurorraho bingi ebirukwoleka ngu Yahwe n’ayebembera omulimo gwaitu. Ekyokurorraho, omu ihanga lya New Zealand ow’oruganda arukwetwa Paul, akaba n’atebeza enju ha nju omu bwire bwa nyamusana kandi akatangatangana omukazi. Kiro eki nyenkyakara, omukazi onu akaba asabire Ruhanga n’akozesa ibara lya Ruhanga, Yahwe, kandi yamusaba ngu habeho ayaija kumutebeza. Paulo n’agamba ati; “Hanyuma y’esaaha isatu kurabaho, nkahika ha rwigi rwe.”

Musome 1 Abakolinso 3:9, hanyuma mubazeeho ekikaguzo kinu:

• Ekyokurorraho nk’eki eky’omu ihanga lya New Zealand nikyoleka kita ngu Yahwe n’ayebembera omulimo gw’okutebeza?

Musome Engeso Ezabakwenda 1:8, hanyuma mubazeeho ekikaguzo kinu:

• Habwaki nitwetaaga obukonyezi bwa Yahwe kuhikiriza obuheereza bwaitu?

Obaire okimanyire?

Buli wiiki, omu rusorrokano orwa hagati omu wiiki, tutunga okutendekwa okutukonyera kutebeza. Obworaaba wabaireho ha rumu ha nsorrokano zinu, okutendekwa kunu okakutekerezaaho ki?

6. Tworobera ekiragiro kya Ruhanga eky’okutebeza

Omu kyasa eky’okubanza, abahakani bakalengaho kutanga abahondezi ba Yesu kutebeza. Abakristaayo aba kara bakarwanirra obugabe bwabo obw’okutebeza kurabira omu “kutonganira nokugumya” amakuru amarungi. (Abafiripi 1:7) Abakaiso ba Yahwe bakora ekintu nikyo kimu kasumi kanu.a

VIDIYO: Kurwanirra Amakuru Amarungi omu Mbuga z’Ebiragiro (2:28)

Musome Engeso Ezabakwenda 5:27-42, hanyuma mubazeeho ekikaguzo kinu:

• Habwaki tutalireka kutebeza?​—Rora orukarra 29, 38, na 39.

OYEGERE KI?

Yesu akaragira abahondezi be kutebeza amakuru amarungi omu mahanga goona. Yahwe n’akonyera abantu be kukora omulimo gunu.

Kweijukyamu

• Amakuru amarungi galiyo nigatebezebwa gata omu nsi yoona?

• Obuheereza bwaitu bwoleka buta ngu nitugonza bataahi baitu?

• Notekereza ngu kutebeza nigusobora kuba omulimo ogurukuleeta okumarwa? Habwaki?

SERULIIRIZA

Rora omulingo Abakaiso ba Yahwe batebezaamu abantu omu bibuga ebikooto.

Kutebeza Omurwijwire omu Paris (5:11)

Abakaiso ba Yahwe bahikireho bata ensuhuuki?

Kumaraho Iroho ly’Eby’Omwoyo omu Nsuhuuki (5:59)

Wehulirre omutebezi ow’akasumi koona n’asoborra omulingo kyamusemiize kumara obwomeezi bwe bwona n’atebeza.

Kikansemeza Kukomamu Omulimo Gunu (6:29)

Manya omulingo emisango eyesingirwe omu kooti esoboire kutwara omumaiso omulimo gw’okutebeza amakuru amarungi.

“Abatebezi b’Obukama Bagenda omu Mbuga z’Ebiragiro” (God’s Kingdom Rules!, Esuura 13)

Yesu akegesa ngu Abakristaayo boona basemeriire kubatizibwa. (Soma Matayo 28:19, 20.) Okubatizibwa nikimanyisa ki? Kandi omuntu asemeriire kukora ki kusobora kuhikiriza ekigendererwa kinu?

1. Okubatizibwa nikimanyisa ki?

Ekigambo “batiza” nikiruga omu kigambo ky’Oruyonaani ekirukumanyisa “kwibika” omu maizi. Yesu obuyabatiziibwe, akaibikwa omu Kyambu Yorudani, kandi hanyuma akaruga “omu maizi.” (Marako 1:9, 10) Omulingo nugwo gumu, Abakristaayo ab’amananu babatizibwa obu nibaibikirwa kimu omu maizi.

2. Okubatizibwa kwoleka ki?

Omuntu obwabatizibwa, aba n’ayoleka ngu ayehaireyo hali Yahwe Ruhanga. Omuntu ayehayo ata? Obwaba atakabatiziibwe, kurabira omu kusaba, agambira Yahwe ngu n’agonza kumuheereza ebiro n’ebiro. Araganiza ngu naija kuramya Yahwe wenka kandi ngu kukora eby’agonza nikyo kirukwija kuba kintu ekikuru omu bwomeezi bwe. Acwamu ‘kweyangisa wenka, kandi aikara nakuratira’ enyegesa za Yesu n’ekyokurorraho kye. (Matayo 16:24) Okwehayo n’okubatizibwa bisobozesa omuntu kutunga enkoragana enungi na Yahwe hamu n’Abakristaayo bagenzi be.

3. Biki omuntu eby’asemeriire kukora kuhika ha idaara ly’okubatizibwa?

Otakabatiziibwe, kikuru muno kwega hali Yahwe hamu n’okukurakuraniza okwikiriza okugumire omuli uwe. (Soma Abaheburaniya 11:6.) Okumanya kwawe n’okwikiriza obubiragenda nibyeyongera, n’okugonza okwoiniire Yahwe nikwija kweyongera. Hataroho kugurukyagurukya noija kugonza kutebeza abandi ebirukumukwataho n’okuhondera endengo ze. (2 Timoseo 4:2; 1 Yohana 5:3) Omuntu obwarukuba ‘n’agenda kurungi nk’oku kisemeriire omu maiso ga Yahwe kusobora kumusemeza,’ n’asobora kucwamu kuhayo obwomeezi bwe hali Ruhanga kandi akabatizibwa.​—Abakolosai 1:9, 10.a

YEGA EBIRUKUKIRAHO

4. Nitusobora kwegera ha kubatibwa kwa Yesu

Musome Matayo 3:13-17 kumanya ebirukukiraho ebirukukwata ha kubatizibwa kwa Yesu. Hanyuma mubazeeho ebikaguzo binu:

• Yesu obuyabatiziibwe, akaba ali nkerembe?

• Akabatizibwa ata? Bakamuseesaho amaizi?

Yesu akatandika kukora omulimo ogw’embaganiza Ruhanga ogw’akaba amuhaire obuyamazire kubatizibwa. Musome Luka 3:21-23 na Yohana 6:38, hanyuma mubazeeho ekikaguzo kinu:

• Yesu obuyamazire kubatizibwa, mulimo ki oguyayebembiize omu bwomeezi bwe?

5. Okubatizibwa kiri kigendererwa eky’osobora kuhikiriza

Hakubanza, ekitekerezo eky’okwehayo n’okubatizibwa nikisobora kuzooka nk’ekitarukusoboka. Baitu n’osobora kukurakurana okahika ha kutunga obumanzi obw’okukora encwamu egi enkuru. Kusobora kurora abantu abamu abaagikozere, muteho VIDIYO.

VIDIYO: Kwombeka Enkoragana na Yahwe (1:11)

Musome Yohana 17:3 na Yakobo 1:5, hanyuma mubazeeho ekikaguzo kinu:

• Kiki ekisobora kukonyera omuntu kuhika ha idaara ly’okubatizibwa?

1. Twehayo hali Yahwe obutumugambira kurabira omu kusaba ngu nitugonza kumuheereza ebiro n’ebiro

2. Ha kubatizibwa, twoleka boona abaroho ngu twehaireyo hali Ruhanga

6. Obutubatizibwa tufooka kicweka ky’eka ya Yahwe

Obutubatizibwa, tufooka kicweka ky’eka ya Yahwe ey’omu nsi yoona enyakuli omu bumu. N’obukiraaba ngu turuga omu biikaro ebirukwahukana kandi tukakurra omu nyikara ezitarukusisana, itwena twine enyikiriza ezirukusisana kandi tuhondera endengo nizo zimu. Musome Zabuli 25:14 na 1 Petero 2:17, hanyuma mubazeeho ekikaguzo kinu:

• Okubatizibwa kukwataho kuta enkoragana y’omuntu na Yahwe hamu n’abantu abandi abamuramya?

OYEGERE KI?

Yesu akegesa ngu Abakristaayo basemeriire kubatizibwa. Omuntu atakabatiziibwe, asemeriire kwombeka okwikiriza okugumire omuli Yahwe, ahondere endengo ze, kandi ayeheyo hali uwe.

Kweijukyamu

• Kubatizibwa nikyo kiki, kandi habwaki kikuru?

• Kakwate ki akali hagati y’okwehayo n’okubatizibwa?

• Bintu ki omuntu eby’asemeriire kukora atakehaireyo kandi akabatizibwa?

SERULIIRIZA

Manya okubatizibwa nikimanyisa ki kandi manya ekikutarukumanyisa.

“Okubatizibwa Nikimanyisa Ki?” (Ekicweka kinu kiri ha mukura)

Mweijukyemu ebintu omuntu asobora kukora kuhika ha idaara ly’okubatizibwa.

“Kugonza Yahwe n’Okumusiima Nibiija Kukuletera Kubatizibwa” (Omunaara gw’Omulinzi ogwa Maaci 2020)

Soma orole nk’oku encwamu y’omusaija omu yakozere ey’okubatizibwa etarasigikiriire ha nyehurra ze kwonka.

“Bakagonza Nyerorre Amananu Nyenka” ( Watchtower eya Febwali 1, 2013)

Wetegereze ensonga habwaki kikuru kweteraho ekigendererwa ky’okubatizibwa n’omulingo osobora kukwetekaniriza.

“Mbatizibwe?” (Questions Young People Ask​—Answers That Work, Volume 2, esuura 37)