Ekisembo Kuruga Hali Ruhanga Habwaki ky’Omuhendo?

NOHA AYATUHAIRE EKICUNGURO?

Ekisembo nikisobora kuba ky’omuhendo mwingi halitwe kakuba omuntu ow’obusobozi rundi outurukutamu ekitinisa nuwe aba akituhaire. Kandi ekisembo nikisobora kuba kya sente ntaito baitu kiri ky’omuhendo halitwe habwokuba omunyabuzaale rundi omunywani nuwe aba akituhaire. Kinu nikisisana n’ekisembo ekibaziibweho omu kicweka eky’okubanza eki Russell yahaire Jordan. Ensonga enu n’ekwatagana eta n’ekicunguro?

Ensonga ey’okubanza, Baibuli egamba: ‘Ruhanga akatuma omwanawe ayazairwe omu wenka omu nsi, tube abomezi habwe.’ (1 Yohana 4:9) Ensonga enu n’efoora ekisembo kinu kuba eky’omuhendo mwingi muno, habwokuba busaho muntu arukukira Ruhanga obusobozi. Omuhandiiki wa Zabuli akamubazaaho ati: “Niwe wenka, ibara lyawe Yahwe, oli haiguru muno, nolema ensi zona.” (Zabuli 83:18) Ekisembo kinu kikaruga hali Yahwe Ruhanga ow’obusobozi bwona.

Eyakabiri, Ruhanga nuwe “isitwe.” (Isaya 63:16) Omu mulingo ki? Akatuha obwomeezi. Kwongerezaaho, Ruhanga aturolerra nka taata omulingo ogw’afaaho kandi arolerra abaana be. Obwakaba nabaza n’abaheereza abakara abayayesere Eferaimu, Ruhanga akakaguza ati: “Eferaimu tali mwana wange, omugonzebwa? . . . omu nda yange nimutunturra, mananu kwo ndimugirra embabazi.” (Yeremiya 31:20, NW) N’omu kasumi kanu Ruhanga akwatwaho hali abaheereza be. Kandi n’obwaraaba ali w’obusobozi bwona, Ruhanga munywani waitu kandi isitwe. Eki tikiretera ekisembo kyona ekiruga hali Ruhanga kuba eky’omuhendo?

HABWAKI Y’AKITUHAIRE?

Ekisembo kyona nikisobora kuba ky’omuhendo mwingi hali iwe habwokuba ayakikuhaire akakikora habwʼokugonza. Omuntu anyakwine omutima gw’okugaba, tagabira abandi n’ekigendererwa ky’okumugarurra.

Yahwe Ruhanga akahayo Omwana we ha bwaitu habwokuba n’atugonza. Baibuli n’egamba ngu: ‘Numwo hamanyisibwemu okugonza kwa Ruhanga namberetuli, ngu Ruhanga akatuma omwanawe ayazairwe omu wenka.’ N’ekigendererwa ki? “Tube abomezi habwe.” (1 Yohana 4:9) Notekereza Ruhanga akaba nateekwa kukikora? Nangwa! ‘Okucungurwa okuli omu Kristo Yesu’ kwoleka ‘embabazi’ za Ruhanga​—Abarumi 3:24.

Habwaki ekisembo kinu kuruga hali Ruhanga kyoleka embabazi ze? Baibuli n’esoborra ngu: “Baitu Ruhanga nanyumiza okugonzakwe wenka halitwe, baitu obutukaba tukyali abasisi, Kristo akatufera.” (Abarumi 5:8) Okugonza kukaletera Ruhanga kujuna itwe abantu abaceke, abataine obukonyezi kandi abasiisi. Akaba atasemeriire kutwoleka okugonza kandi titusobora kumusasura habw’okutugonza. Ekisembo ekiyatuhaire nikyo kikyakizireyo kwoleka okugonza omu byafaayo.

KIKI EKIYAYEFERIIZE KUSOBORA KUKITUHA?

Ekisembo kyona nikisobora kuba ky’omuhendo mwingi habwokuba ayakituhaire akefeereza muno kusobora kukituha. Omuntu obwacwamu kukuha ekintu kye ekirungi kandi eky’omuhendo, okisiima kandi okitwara kuba ky’omuhendo mwingi habwokuba n’aba ayaferiize biingi kusobora kukikuha.

Ruhanga akahayo “Omwanawe ayazairwe omu wenka.” (Yohana 3:16) Akatuha ekintu eky’akaba n’akirayo kugonza. Yesu akakora hamu na Yahwe emyaka nyingi muno obu Yahwe akaba n’ahanga ebintu byona, kandi Yesu akaba ali “okusemererwakwe.” (Enfumo 8:30) Yesu nuwe mwana “owokugonzakwe” kandi “kisisani kya Ruhanga atarukurorwa.” (Abakolosai 1:13-15) Enkoragana ey’amaani nk’enu tekabahoga.

Baitu, Ruhanga ‘atatwime Omwana we.’ (Abarumi 8:32) Yahwe akatuha ekisembo ekikyakizereyo kuba kirungi kandi busaho ekindi kyona ekirukukingana.

TUKABA NITUKYETAAGA MUNO

Ekisembo kisobora kuba ky’omuhendo habwokuba obwire obu barukuba bakikuheriiremu obaire nokyetaaga muno. Ekyokurorraho, n’osobora kwehuura ota kakuba omuntu akusasurra sente ez’okujanjaba oburwaire obw’amaani kandi ez’obaire otarukusobora kusasura! Eki kiba kisembo ky’omuhendo mwingi muno. Tinukwo kiri?

‘Baitu nka bona okubafa omu Adamu, nukwo omu Kristo bona balyomezebwa.’ (1 Abakolinso 15:22) Itwena nk’abaijukuru ba Adamu tufa kandi titusobora kwejuna oburwaire hamu n’okufa. Kandi titusobora kugarraho enkoragana enungi na Ruhanga ha bwaitu nobukwakuba kweyihaho omusango. Ekindi, itwe nk’abantu abatahikiriire titusobora kwecungura rundi kucungura obwomeezi obw’omuntu ondi wena. Baibuli egamba: “Busaho omulibo asobora okucungura mwene wabu nakake, nobukwakuba okumuhera Ruhanga omuhendogwe.” (Zabuli 49:7) Mali nitwetaaga obukonyezi habwokuba titusobora kusasura omuhendo gw’ekicunguro.

Habw’engonzi ze enyingi, Yahwe akasasurra obujanjabi bwaitu nukwo kuraba omu Kristo “bona balyomezebwa.” Kinu nikihikirra kita kuraba omu kicunguro? “Nesagama ya Yesu Omwanawe etwogyaho ebibi byona.” Nahabweki, okwikiririza omu sagama ya Yesu kutuleetera kuganyirwa ebibi n’okutunga okunihira okw’obwomeezi obutahwaho. (1 Yohana 1:7; 5:13) Abagonzebwa baitu abafiire nibaija kugasirwa bata omu kicunguro? “Baitu nkokufa okukwaizire obwomuntu, nukwo obwomuntu [Yesu] okuhumbuka kwabafu kwaizire kuti.”​—1 Abakolinso 15:21.a

Busaho kisembo kuruga ha muntu ow’obusobozi kandi ow’engonzi enyingi ekirukukira ekisembo kya Ruhanga eky’ekicunguro. Kandi busaho muntu wena arayeferiize kusobora kutukonyera kukira Ruhanga. Busaho kisembo ekirukwingana ekicunguro habwokuba kitucungura kuruga omu kibi n’okufa.