Yohana Omubatizi​—Ekyokurorraho Kye Nikisobora Kutukonyera Kwikara Twine Okusemererwa

HAROHO obujunanizibwa omu kitebe obuwakugondeze kuba nabwo baitu omu kasumi kanu torukusobora kubutunga? Obundi, obujunanizibwa obuwakugondeze omuntu ondi nuwe abwine. Nikisobora kuba ngu obujunanizibwa obu rundi obuheereza obuwakugondeze okasangwa obutungireho kara. Baitu habw’emyaka, oburwaire, ebizibu byentahya, rundi habw’obujunanizibwa bw’amaka tokyasobora kuheereza nk’oku wakugondeze. Rundi habw’empindahinduka empyaka omu kitebe n’osobora kuba okaleka obujunanizibwa obwokaba oine kumara emyaka nyingi. Habw’ensonga zinu rundi ezindi zoona, n’osobora kuba n’oyehurra nkatakuheereza Ruhanga nk’oku wakugondeze. Obwoba oli omunyikara nk’enu, kyanguhire kwehurra ohoirwemu amaani. Baitu kiki ekisobora kukukonyera kwentatara enyehurra embi nk’ekiniga, kuhwamu amaani, rundi kwahura enzigu? Nosobora ota kwikara oine okusemererwa?

Ekyokurorraho kya Yohana omubatizi nikisobora kutukonyera kumanya omulingo tusobora kwikara twine okusemererwa. Yohana akatunga emigisa nyingi omu buheereza bwe kandi nasobora kuba akaba atarukunihira ngu naija kuhikwaho ebintu ebibi. Nasobora kuba akaba atarukukinihira ngu akaba nagenda kumara obwire bwingi omu nkomo kukira n’obuyamanzire natebeza. Binu byona n’obubiraaba by’amuhikireho, Yohana akaikara aine okusemererwa obwomeezi bwe bwona. Kiki eky’amukonyire? Kandi naitwe nitusobora tuta kwikara twine okusemererwa n’obutuhikwaho ebintu ebitubaire tutakunihira?

OMULIMO OGWALETIIRE YOHANA OKUSEMERERWA

Nk’omu kwezi kwa Apuli omu mwaka 29 C.E., Yohana akatandika omulimo Yahwe ogw’akaba omuhaire ogw’okukonyera abantu kwetekaniriza Masiya. Akatebeza nagamba ati: “Mwegarukemu; baitu obukama obwomu iguru bumalize okuhika.” (Mat. 3:2; Luk. 1:12-17) Kandi baingi bakamuhuliiriza. Ebitebe by’abantu barugaga omu biikaro ebya haihi n’ebya hara nibagonza kuhurra obutumwa bwe, kandi baingi bakakwatwaho bayegarukamu kandi babatizibwa. N’obumanzi Yohana akagambira abebembezi b’ediini abayefooraga kuba abahikiriire ngu Ruhanga akaba nagenda kubacwera omusango kuba bategarukamu. (Mat. 3:5-12) Nk’omu Okitobba omu mwaka 29 C.E. Yohana akabatiza Yesu, ekintu ekyali nikikirayo obukuru omu mulimo Yahwe akaba amuhaire. Kuruga obu Yohana akatandika kuragira abantu kuhondera Yesu, Masiya ow’akaba araganiziibwe.​—Yoh. 1:32-37.

Habw’omulimo ogw’embaganiza Yohana akaba atungire, Yesu akamubazaaho ati: “Tihakarugaga omuli abo abazairwe abakazi omuntu arukukira Yohana omubatizi.” (Mat. 11:11) Busaho kugurukyagurukya Yohana akasemererwa muno habw’omugisa ogw’akaba atungire. Nka Yohana, abaheereza ba Yahwe baingi omu kasumi kanu batungire emigisa nyingi kuruga hali Yahwe. Tekerezaaho eky’okurorraho ky’Oworuganda arukwetwa Terry. Uwe na mukazi we bamazire emyaka 50 bali omu buheereza bw’akasumi koona. Terry nagamaba ati: “Ntungire omugisa ogw’okuheereza omu buheereza obw’embaganiza. Nkaheerezaho nka payoniya, nk’Omubeseri, nka payoniya ow’embaganiza, nk’omuroleerezi w’ekicweka, nk’omuroleerezi wa distrikiti kandi hati nyongiire kuheereza nka payoniya w’embaganiza.” Mali kireta okusemererwa kwingi obututunga obujunanizibwa omu kuheereza Yahwe, baitu nk’oku turukugenda kurora, omu kyokurorraho kya Yohana, nikyetagisa kutamu amaani maingi kusobora kwikara twine okusemererwa enyikara yaitu obw’ehinduka.

IKARA NOSIIMA BYONA YAHWE EBY’AKWIKIRIIZE KUKORA

Yohana Omubatizi akaikara aine okusemererwa habwokuba akasiima habw’emigisa yoona Yahwe akaba amuhaire. Ekyokurorraho, hanyuma y’okubatiza Yesu, abahondezi ba Yohana bakakeeha baitu aba Yesu bakeyongera. Abegeswa ba Yohana abakwasirweho ekintu kinu bakamugambira ngu: “Dora ogu nabatiza, abantu bona nibaija namberali.” (Yoh. 3:26) Baitu Yohana akabagarukamu ati: ‘Anyakuina omugole nuwe muswezi: baitu enganjani yomuswezi, ayemerra namuhurra asemererwa muno obwiraka lyomuswezi: okusemererwa kwange oku nukwo kuhikiriire.’ (Yoh. 3:29) Yohana atalengeho kurwanisa Yesu, kandi atatekereze ngu omulimo gwe gwali gutaine mugaso habwokuba Yesu akaba aine omulimo ogurukukira ogwe obukuru. Oihireho, Yohana akaikara aine okusemererwa habwokuba akaikara narora omugisa gw’okuba “enganjani yomuswezi” nk’ekintu eky’omuhendo.

Entekereza enu ekakonyera Yohana kwikara aine okusemererwa n’obukiraaba ngu omulimo gwe gwali gutanguhire. Ekyokurorraho, Yohana akaba ali Munaziri kurugira kimu ha kuzaarwa kwe nahabweki akaba atarukwikirizibwa kunywa amaarwa. (Luk. 1:15) Yesu obw’akaba n’amubazaaho akagamba ati: “Yohana akaija atarukulya atarukunywa.” Baitu nk’oku Yesu n’abegeswa be bakaba batali hansi y’ebiragiro by’Abanaziri, obwomeezi bwabo bukaba nibusisana n’obw’abantu abandi. (Mat. 11:18, 19) N’obukiraaba ngu Yohana atakole kyamahano kyona, akaba akimanyire ngu Ruhanga akaba ahaire Yesu n’abegeswa be amaani ag’okukora ebyamahano otwaliremu n’abo abamuhonderaga batakafokere bahondezi ba Yesu. (Mat. 10:1; Yoh. 10:41) Omu kiikaro ky’okutekerezaho muno ebintu eby’embaganiza Yesu hamu n’abegeswa be baali nibakora, Yohana omutima akaguteeka ha kukora omulimo Yahwe ogw’akaba amuhaire.

Nitwija kwikara twine okusemererwa kakuba turora obujunanizibwa bwona Yahwe obw’atuhaire nk’ekintu eky’omuhendo. Terry, outusangirwe tubalizeho nagamba ati: “Omutima gwange nagutekaga ha bujunanizibwa obunabaga mpairwe bwonka.” Kandi hati obw’atekerezaaho obwire obuyamazire omu buheereza obw’akasumi koona, nagamba ati: “Tinkweyijukya kintu kyona baitu ninyijuka emigisa nyingi ei natungire.”

Nitusobora kweyongera kuba n’okusererwa kakuba twecumitirizaaho ekintu ekiretera obuheereza bwaitu rundi obujunanizibwa obutwine kuba bw’omuhendo. Ekintu kinu nugwo omugisa ogw’okuba “bakozi hamu na Ruhanga.” (1 Kol. 3:9) Obutuba twine ekintu ky’omuhendo tukirolerra nukwo kiikale nikizooka kurungi. Omu mulingo nugwo gumu obutwikara nitutekerezaaho omugisa gw’amaani ogutwine ogw’okukorra hamu na Yahwe, kitukonyera kwikara twine okusemererwa. Kinu nikiija kutukonyera kwetantara kulengesaniza ebiturukukora hamu n’eby’abandi barukukora. Kandi nikiija kutuletera kugonza obujunanizibwa bwona Yahwe obw’atuhaire omu kiikaro ky’okwehurra kubi habwokuba abandi nibakora biingi okutukira.​—Bag. 6:4.

WEBEMBEZI EBINTU EBY’OMWOYO

Obuheereza bwa Yohana bukahwaho omu kasumi akakaba atarukunihira n’obukiraaba ngu akaba akimanyire obuheereza bwe bwakubaire obw’akasumi kake. (Yoh. 3:30) Omu mwaka gwa 30 C.E., Omukama Herode akakwata Yohana y’amuta omu nkomo, hanyuma y’ameezi nka mukaaga amazire kubatiza Yesu. Baitu nabwo Yohana akagumizaamu n’abaza amananu. (Mar. 6:17-20) Kiki ekyakonyire Yohana kwikara aine okusemererwa n’obukiraaba ngu enyikara ye ekaba ehindukire? Akaikara nayebembeza ebintu eby’omwoyo.

Obwakaba ali omu nkomo akatunga amakuru ngu abantu baingi bali nibahondera Yesu. (Mat. 11:2; Luk. 7:18) Yohana akaba nakigumya ngu Yesu nuwe Masiya baitu nasobora kuba y’ayekagwize omulingo Yesu akaba nagenda kuhikiriza obunabbi bwona oburukukwata hali Masiya. Nk’oku Yohana akaba akimanyire ngu Masiya asemeriire kufooka mukama, nasobora kuba y’ayekagwize Yesu obwaraaba nagenda kutandika kulema omu kasumi akatali kahara. Kandi nasobora kuba y’ayekagwize Yesu obwaraaba nagenda kumwiha omu nkomo. Habw’okugonza kumanya kiki kyonyini Yesu eky’akaba nagenda kukora, Yohana akatuma abegeswa be babiri hali Yesu kumukaguza bati: ‘Niiwe ogu arukuija, nandiki tutegereze ondi?’ (Luk. 7:19) Abegeswa be obubagarukire, Yohana aine kuba yahulirize kurungi obubaali nibamusobororra ebyamahano Yesu ebiyakozere nukwo hanyuma y’abasindika bagambire Yohana bati: “Abafu bamaiso nibarora, abaramaire nibagenda, abagenge basemezibwe, abafu bamatu nibahurra, abafire bahumbuirwe, abasege batebeziibwe ebigambo ebirungi.”​—Luk. 7:20-22.

Yohana obuyahuliire abegeswa be ebibamugambire aine kuba y’agarukirwemu amaani. Kinu kikamugumya ngu Yesu akaba nahikiriza obunabbi oburukukwata hali Masiya. Nobukiraaba ngu Yesu atamukonyere kuruga omu nkomo, Yohana akakimanya ngu amaani ge gaali gatafiire busa. N’obukiraaba ngu akabaali omunyikara ey’egumire, kinu kikamukonyera kutunga okusemererwa.

Nka Yohana kakuba naitwe twebembeza ebintu eby’omwoyo nitusobora kugumisiriza twine okusemererwa. (Bak. 1:9-11) Kinu nitusobora kukikora kuraba omu kusoma Baibuli buli kiro n’okugyecumitirizaaho, kandi nikiija kutukonyera kumanya ngu ebintu byona ebitukorra Yahwe by’omugaso. (1 Kol. 15:58) Sandra nagamba ati: “Kusoma esuura emu eya Baibuli buli kiro kinkonyire kwirra haihi na Yahwe. Kandi kinkonyire kumwebembeza omu bwomeezi bwange hatali kwebembeza ebindukugonza.” Nitusobora n’okutekerezaaho muno ebintu ebirungi ab’oruganda n’abanyaanya itwe barukukorra Yahwe, kinu nikisobora kutukonyera kuleka kwetekerezaaho ekihinguraine. Kandi Sandra nayongera nagamba ati: “Puroguramu eya JW Broadcasting^® eya buli kwezi enkonyire kweyongera kumanya ekitebe n’okwikara nyine okusemerwa omu buheereza bwange.”

Omu kasumi akake Yohana Omubatizi akayatebiize, akatebeza “omu mwoyo namani ga Eriya.” Kandi nka Eriya, Yohana nawe akaba ali muntu nkaitwe. (Luk. 1:17; Yak. 5:17) Kakuba tuhondera ekyokurorraho kya Yohana eky’okusiima hamu n’okwebembeza ebintu eby’omwoyo, naitwe nitusobora kwikara nituheereza Yahwe twine okusemererwa n’obuturaraba omunyikara ezigumire.