Kiki Ekibaho Obutufa?

Wakafeerwaga omuntu ow’orukugonza muno? Omu kasumi ako ak’obusaasi bwingi, n’osobora kwekaguza: ‘Kiki ekibaho obutufa? Haroho okunihira kwona ngu tulyongera turole abantu baitu abaafiire?’ Omu isomo linu hamu n’erikuhonderaho, wetegereze eby’okugarukamu ebirukuhuumuza kuruga omu Baibuli.

1. Kiki ekibaho obutufa?

Yesu akalengesaniza okufa n’okugwijagira. Omuntu anyakuli omu turo tw’amaani naaba atamanyire ebintu ebirukugenda mu maiso. Okufa nikusisana kuta n’okugwijagira? Omuntu obw’amara kufa, aba atakyahurra obusaasi. Naaba atakyahurra amasu n’obukiraaba ngu yagonzaaga muno banywani be hamu n’abanyabuzaale. Baibuli egamba ngu “Abafire tibamanyire kigambo nekimu.”​—Soma Omugambizi 9:5.

2. Habwaki kikuru kumanya amananu agarukukwata ha kufa?

Abantu baingi batiina kufa, kandi batiina abafu! Baitu Baibuli eky’egamba ha kufa nikisobora kukugarramu amaani. Yesu akagamba ati: “Namananu galibafora bobugabe.” (Yohana 8:32) Kwahukanaho n’eby’amadiini agandi gegesa, Baibuli teyegesa ngu hanyuma y’omuntu kufa, haroho ekintu ekimurugamu kandi kikaikara kyomiire. Nahabweki busaho muntu ow’abonabona hanyuma y’okufa. Ekindi, nk’oku abafu batamanyire kintu kyona, tibasobora kutuhikyaho akabi. Nahabweki titusemeriire kugira ekitwakora kusemeza abafu rundi kubaramya kandi tikirukwetaagisa n’okubasabira.

Abantu abamu bagamba ngu nibasobora kubaza n’abafu. Baitu eki tikirukusoboka. Nk’oku twaruga kwega, abafu tibamanyire kintu kyona. Abo abarukutekereza ngu nibabaza n’abantu baabo abaafiire, baba nibabaza na badaimoni abefoora nk’abantu abaafiire. Nahabweki kumanya amananu agarukukwata ha kufa kitulinda hali badaimoni. Yahwe n’atutererra kutalengaho kubaza n’abafu habwokuba akimanyire ngu kwirra haihi na badaimoni nikiija kutuhikyaho akabi.​—Soma Ekyebiragiro 18:10-12.

3. Manya amananu agarukukwata ha nyikara yonyini abafu eibarumu

Omu nsi yoona, abantu baine enyikiriza ezirukwahukana ezirukukwata ha kiki ekibaho obutufa. Kyamananu ngu enyikiriza ezi zoona tizisobora kuba zihikire.

• Nyikiriza ki ezirukukwata ha nyikara y’abafu ezikanyire nambere orukwikara?

VIDIYO: Abafu Bali Munyikara ya Mulingo Ki?​—Akacweka ka vidiyo (1:19)

Musome Omugambizi 3:20, hanyuma mubazeeho ebikaguzo binu:

• Kusigikirra ha rukarra runu, kiki ekibaho omuntu obwafa?

• Haroho ekintu kyona ekiikara kyomiire omuntu obwafa?

Baibuli ebazaaho okufa kwa Lazaro munywani wa Yesu nfe na nfe. Obw’oraaba n’osoma Yohana 11:11-14, wetegereze Yesu ekiyabalize ha nyikara Lazaro ey’akaba arumu. Hanyuma mubazeeho ebikaguzo binu:

• Yesu akalengesaniza okufa na kintu ki?

• Kinu nikitwoleka ki ha nyikara y’abafu?

• N’oyehurra ota ha Baibuli eky’erukugamba ha kufa?

4. Amananu agarukukwata ha kufa nigatugasira

Kumanya amananu agarukukwata ha kufa kitukonyera kuleka kutiina abafu. Musome Omugambizi 9:10, hanyuma mubazeeho ekikaguzo kinu:

• Abafu nibasobora kutuhikyaho akabi?

Ekindi, amananu agali omu Baibuli gatulinda hali enyikiriza ey’ebisuba ey’erukugamba ngu tusemeriire kusemeza abafu n’okubaramya. Musome Isaya 8:19 na Okusuku’rwa 4:11, hanyuma mubazeeho ekikaguzo kinu:

• N’otekereza Yahwe ayehurra ata ha muntu ow’arukuramya rundi ow’arukugonza kukonyera omuntu ayafiire?

5. Amananu agarukukwata ha kufa gatuhuumuza

Abantu baingi begesiibwe ngu omuntu obwafa, afubirwa habw’ebibi ebiyakozere. Baitu nikitugarramu amaani kumanya ngu busaho muntu ow’abonabona hanyuma y’okufa​—nobuyakuba akozere ebintu ebibi muno. Musome Abarumi 6:7, hanyuma mubazeeho ekikaguzo kinu:

• Baibuli egamba ngu omuntu obwafa, Ruhanga aba atakyamutwara nk’owaine omusango habw’ebibi ebiyakozere nahabweki n’otekereza ngu omuntu ow’afiire aliyo n’abonabona habw’ebibi ebiyakozere atakafiire?

Nk’oku tweyongera kumanya Yahwe, nukwo tweyongera kumanya ngu tasobora kufubira abafu. Musome Ekyebiragiro 32:4 na 1 Yohana 4:8, hanyuma mubazeeho ebikaguzo binu:

• Ruhanga anyakwine emiringo enyakubazibweho omu nkarra zinu n’asobora kufubira abo abaafiire?

• Amananu agarukukwata ha kufa nigakuhuumuza? Habwaki?

OYEGERE KI?

Omuntu obwafa, obwomeezi bwe buhwaho. Abafu tibabonabona kandi tibasobora kuhikyaho abomeezi akabi.

Kweijukyamu

• Kiki ekibaho obutufa?

• Amananu agarukukwata ha kufa nigatugasira gata?

• Amananu agarukukwata ha kufa nigatuhuumuza gata?

SERULIIRIZA

Manya ekigambo “omwoyo” nikimanyisa ki omu Baibuli.

“Omwoyo Nikyo Kiki?” (Ekicweka kinu kiri ha mukura)

Manya Ruhanga obw’araaba afubira ababi omu murro ogutaraara.

Omurro Ogutaraara Mali Kiikaro eky’Okubonaboneramu? 3:07

Tusemeriire kutiina abafu?

Emyoyo y’Abafu​—N’esobora Kukukonyera Rundi Kukukora Kubi? Baitu Eroho Kwo? (burocuwa)

Manya omulingo omusaija yahuumuziibwe obuyamanyire amananu agarukukwata ha kiki ekibaho obutufa.

“Eby’okugarukamu Ebirukwetegerezebwa Kurungi Kuraga omu Baibuli Bikampuniiriza” (Watchtower, eya Febwali 1, 2015)