Kiki eky’Osobora Kukora Nukwo Ruhanga Ahurre Esaara Zaawe?
Yahwe ali Ruhanga “Anyakuhurra okusaba.” (Zabuli 65:2) Nitusobora kubaza na uwe hona nambere tuli, obwire bwona, nitwatura ebigambo rundi nitubaliza omu mutima. Yahwe nagonza tumwete “Isiitwe,” kandi mananu kwo nuwe, Isiitwe arukukirrayo kimu oburungi. (Matayo 6:9) Omu mulingo ogw’okugonza Yahwe atwegesa nk’oku tusemeriire kusaba nukwo ahurre esaara zaitu.
SABA HALI YAHWE RUHANGA KURABA OMU IBARA LYA YESU
“Obumulisaba Isenyowe ekigambo kyona, alikibaha omu ibara lyange.”—Yohana 16:23.
Ebigambo bya Yesu nibyoleka kurungi ngu Yahwe nagonza tusabe hali uwe, kuraba omu ibara lya Yesu Kristo hatali kuraba omu bisani, abahikiriire, bamalaika, rundi ba isenkuru itwe abaafiire. Obutusaba hali Ruhanga kuraba omu ibara lya Yesu, twoleka ngu nitwetegereza ngu Ruhanga ahurra esaara zaitu habw’ebintu Yesu yatukoliire. Yesu akagamba ngu “Busaho aija hali Isenyowe rundi araba omuli nyowe.”—Yohana 14:6.
BAZA KURUGA HA MUTIMA
“Musesege omutima gwanyu omu maisoge.”—Zabuli 62:8.
Obutusaba hali Yahwe, tusemeriire kubaza nk’oku omuntu abaza na ise ow’agonza. Omu kiikaro ky’okusoma busoma esaara eziri omu kitabu rundi kugarukamu eitwakwasire omu mutwe, tusemeriire kubaza na uwe omu mulingo ogw’ekitiinisa kandi kuruga ha mutima.
SABA OMU MULINGO OGURUKWIKIRANGANIZA N’EBYA RUHANGA AGONZA
“Obutusaba ekintu kyona nkokwagonza, atuhurra.”—1 Yohana 5:14.
Omu Baibuli, Yahwe natugambira ebintu eby’arukwija kutukorra kandi n’eby’arukugonza tumukorre. Ruhanga obwaraaba ali w’okugarukamu esaara zaitu, tusemeriire kusaba kusigikirra ha by’agonza. Kukora eki, tusemeriire kwega Baibuli nukwo tusobole kumumanya kurungi. Obuturakora eki, esaara zaitu niziija kumusemeza.
NITUSOBORA KUMUSABA KI?
Saba Ebyetaago Byawe. Nitusobora kusaba Ruhanga kutuha ebyetaago byaitu ebya buli kiro—nk’ebyokulya, engoye, n’oburaaro. Nitusobora n’okumusaba amagezi agaratukonyera kukora encwamu ezihikire kandi n’amaani ag’okugumira ebizibu. Nitusobora kusaba Ruhanga kutuha okwikiriza, kutuganyira ebibi byaitu, n’okutukonyera omu miringo endi.—Luka 11:3, 4, 13; Yakobo 1:5, 17.
Sabira Abandi. Abazaire abarukugonza abaana baabo kibasemeza obubarora abaana b’abo nibagonzangana. Na Yahwe n’agonza abaana be ab’omu nsi kufaahongana. Kirungi kusabira outuli na uwe omu buswere, abaana baitu, abanyabuzaale, hamu na banywani. Omwegeswa Yakobo akahandiika ati: “Musabiranganege.”—Yakobo 5:16.
Siima Ruhanga. Baibuli n’ebazaaho Omuhangi waitu eti: “Akakora kurungi, nabanagira enjura okuruga omu iguru, nebiro ebyokwerezamu ebyokulya, naigusa emitima yanyu ebyokulya nokusemererwa.” (Engeso Ezabakwenda 14:17) Obuturatekerezaaho ebintu byona Ruhanga eby’atukoliire, nikiija kutuletera kumusiima kuraba omu saara zaitu. Baitu tusemeriire n’okwoleka ngu nitusiima Ruhanga kuraba omu kumworobera.—Abakolosai 3:15.
GUMIISIRIZA KANDI OIKALE N’OSABA
Obwire obumu, nitusobora kusalirwa habwokuba esaara zaitu ezitusaba kuruga ha mutima tizigarukirwemu aho naaho. Eki nikimanyisa ngu Ruhanga tarukutufaaho? Nangwa! Leka tubazeeho ebyokurorraho ebirukwoleka ngu nikisobora kutwetaagisa kugumizaamu nitusaba.
Steve, outubalizeehoga omu kicweka eky’okubanza nagamba ngu, “Kakuba ntaragumizeemu ninsaba, nakuhoirwemu okunihira kwona ngu nkaba ningenda kwongera ntunge okusemererwa.” Kiki ekyamukonyire? Akatandika kwega Baibuli kandi yayega omugaso ogw’okusaba hamu n’okusaba obutalekerra. Steve nayongera nagamba ngu “Nsaba hali Ruhanga kumusiima habw’obusagiki bwona obuntungire kuruga hali banywani bange ab’okugonza. Hati nyine okusemererwa kwingi kukira kara.”
Kandi uwe Jenny, ayatekerezaaga ngu tasemeriire kuhulirwa Ruhanga? Nagamba ngu, “Ha bwire nambere nk’aba ninkirayo kwehurra nk’ataine mugaso, nkesengereza Ruhanga kunkonyera kumanya habwaki nkaba ninyehurra omu mulingo ogu.” Eki kikamukonyera kita? Nagamba ngu, “Kubaza na Ruhanga kinkonyire kwerora omu mulingo Ruhanga andoramu, n’okukyetegereza ngu omutima gwange n’obuguraaba guncwera omusango, uwe takikora. Kandi kubaza na Ruhanga kunkonyire kutahwamu amaani.” Kiki ekirugiremu? Nagamba ngu, “Okusaba kunkonyire kurora Yahwe nka Ruhanga ow’aroho kwo, ow’arukungonza, arukunfaaho, nka Isenyowe, kandi nk’omunywani ow’aikara ayetekaniize kunkonyera kakuba nyikara nindengaho kukora eby’agonza.”
Isabel obw’arora mutabani we Gerard nayegondeza omu bwomeezi n’obwaraaba ali mulema, agamba ngu, “Nkyetegeriize ngu Yahwe akamumpa kugarukamu esaara zange”
Tekerezaaho n’ebya Isabel yarabiremu. Obuyatwaire enda, badakitaali bakamugambira ngu omwana ow’arazaara akaba aine obulema bwamaani. Akasaasa muno! Abamu bakamuha amagezi ngu enda agihemu. Nagamba ngu, “Nkahurra oti rundi nkaba ningenda kufa habw’obusaasi obwingi obwali buli omu mutima gwange.” Akakora ki? Nagamba ngu, “Nk’asaba, kandi nasaba muno Ruhanga angumye.” Obwire bukahika, yazaara omwana omwojo Gerard, kandi akaba ali mulema. Isabel n’ahurra ngu Ruhanga akagarukamu esaara ze? Ego! Omu mulingo ki? Isabel nagamba ngu, “Obundora mutabani wange, hati ow’ahikize emyaka 14 n’ayegondeza omu bwomeezi n’obwaraaba ali mulema, nkyetegereza ngu Yahwe akamumpa kugarukamu esaara zange kandi nuwe omugisa ogurukukirrayo kimu Yahwe oguyampaire.”
Ebigambo nk’ebi ebiruga ha mutima bituletera kutekerezaaho ebigambo by’omuhandiiki owa zabuli ayagambire ati: “Mukama, okahurra okuserra kwabanaku: Olibatekaniza emitima yabo, olitega okutu kwawe okuhurra.” (Zabuli 10:17) Ezi ka nsonga nungi muno habwaki tusemeriire kugumizaamu nitusaba hali Ruhanga.
Omu Baibuli harumu esaara nyingi eza Yesu. Eyerukukirrayo kimu kumanywa niyo egi eiyayegeseze abegeswa be. Kiki ekitusobora kugyegamu?