Yesu Akora eby’Amahano Bingi

Yesu akaija omu nsi kutebeza amakuru amarungi ag’Obukama. Kusobora kwoleka Yesu ebyarakora nk’Omukama, Yahwe akamuha omwoyo ogurukwera kukora eby’amahano. Akaba aine obusobozi obw’okukiza endwaire zoona. Hoona nambere yagendaga, abarwaire baijaga nambere ali nibagonza abakize, kandi boona yabakizaaga. Akakiza abafu ba maiso, yakiza abafu b’amatu, abakaba basaraire bakasobora kurubata, kandi n’abakaba baine badaimoni akazibabingamu. Abarwaire n’obu bakwataga ha rugoye rwe bakizibwaga. Abantu bahonderaga Yesu hoona nambere yagendaga. Yesu n’obuyagonzaaga kuba wenka, tiyabingaga muntu wena ayaijaga nambere ali.

Kiro kimu, abantu bakaleta omusaija ow’akaba asaraire, omu nju nambere Yesu yaikaraga. Batasobole kutahamu habwokuba enju ekaba ijwire abantu baingi. Bakadubura ha rusu rw’enju kandi nuho barabize omusaija owakaba asaraire kumuhikya hali Yesu. Hanyuma, Yesu akagambira omusaija ati: ‘Imuka orubate.’ Obuyarubasire, abantu boona bakuhunirra.

Ekiro ekindi, Yesu obwakaba naraba omu kyaro kimu, abasaija abakaba barwaire ebigenge bakamweta nigamba bati: ‘Yesu, ija otukonyere!’ Kasumi ako, abagenge tibaikirizibwaga kwija haihi n’abantu. Yesu akagambira abasaija kugenda ha yekaru nk’oku Yahwe yali aragiire omu Biragiro hanyuma y’abagenge kukizibwa. Obu bakaba nibagenda ha yekaru, bakakira. Omu ha bagenge banu obuyakyetegeriize ngu akizire, akagaruka yasiima Yesu kandi yahaisaniza Ruhanga. Omu bagenge ikumi, omugenge omu wenka nuwe yagarukire kusiima Yesu.

Omukazi ow’akaba arwaire kumara emyaka 12 akaba nagonza kukizibwa. Akaizira omu bantu abaingi yakwata ha rugoye rwa Yesu. Aho n’aho omukazi onu akakira. Kinu obukyabaireho, Yesu akakaguza abantu ati: ‘Noha ankwasireho’ Omukazi akatiina, kandi yaija hali Yesu yamugambira amananu. Yesu akamuhumuza nagamba ati: ‘Mwisiki, genda omu businge.’

Omukuru arukwetwa Yairo akesengereza Yesu ati: ‘Ija omu ka yange! Omuhara wange arwaire.’ Baitu obwakaba atakahikire omu ka ya Yairo, omwisiki akafa. Yesu obuyahikireyo, akasanga abantu baingi nibaganya n’eka ya Yairo. Yesu yabagambira ati: ‘Muleke kurra; omwisiki agwijagiire.’ Hanyuma Yesu akakwata omukono gw’omwisiki, yamugambira ati: ‘Mwisiki, imuka!’ Aho n’aho, omwisiki akaimuka yaikarra kandi Yesu akagambira abazaire be kuha omwisiki eby’okulya. Tekerezaaho omulingo abazaire b’omwisiki basemeriirwemu!