Omu nsi yoona, abantu baine entekereza ezirukwahukana obukirukuhika h’amaarwa. Abamu bagonza kutunga obwire bakanywera hamu n’abanywani baabo. Abandi bacwamu kutanywa amaarwa n’akake. Baitu nabwo abandi banywera kimu batamiira. Baibuli ebazaaho ki h’amaarwa?

1. Kibi kunywa amaarwa?

Baibuli tegamba ngu kibi kunywa amaarwa. Ekindi, Baibuli obw’eba n’ebazaaho ebisembo Ruhanga eby’atuhaire, ebazaaho “namarwa agasemeza omutima gwomuntu.” (Zabuli 104:14, 15) Abamu h’abaheereza ba Ruhanga abarukubazibwaho omu Baibuli abasaija n’abakazi bakanywa amaarwa.​—1 Timoseo 5:23.

2. Buhabuzi ki Baibuli obw’eha abo abacwamu kunywa amaarwa?

Yahwe atanga kunywa amaarwa maingi n’obutamiizi. (Abagaratiya 5:21) Ekigambo kye kigamba ngu: “Otaikara hamu nabesesera amarwa.” (Enfumo 23:20) Nahabweki obuturacwamu kunywa amaarwa​—abantu abandi n’obubarukuba batarukuturora​—titusemeriire kunywa muno tukalemwa kutekereza kurungi, kulema orulimi n’engeso zaitu, rundi tukehikyaho akabi ha mibiri yaitu. Obuturaaba tutarukusobora kunywa amaarwa make agasemeriire, tusemeriire kugalekera kimu.

3. Nitusobora tuta kuteekamu ekitiinisa encwamu z’abandi obukirukuhika ha kunywa amaarwa?

Buli muntu asemeriire kwecweramu kunywa rundi kutanywa amaarwa. Omuntu kakuba acwamu kunywa amaarwa make, titusemeriire kumucwera omusango, kandi titusemeriire kusindikiriza omuntu kuganywa. (Abarumi 14:10) Nitusobora kucwamu kutanywa kakuba okunywa kwaitu kuba nikuleetera abantu abandi ebizibu. (Soma Abarumi 14:21.) Tituserra ‘ebyaitu byonka, baitu tuserra n’eby’abandi.’​—Soma 1 Abakolinso 10:23, 24.

YEGA EBIRUKUKIRAHO

4. Cwamu obworaaba n’ogonza kunywa amaarwa rundi kutanywa

Yesu yaroraga ata kunywa amaarwa? Kumanya eky’okugarukamu, wetegereze ekyamahano eky’okubanza Yesu ekiyakozere. Musome Yohana 2:1-11, hanyuma mubazeeho ebikaguzo binu

• Omu kyamahano kinu, nitwega ki ha mulingo Yesu aroramu amaarwa hamu n’abo abarukuganywa?

• Nk’oku Yesu atarajumiriire abo abarukunywa amaarwa, Omukristaayo asemeriire kurora ata omuntu ow’acwiremu kunywa amaarwa?

Nobukiraaba ngu omukristaayo aine obugabe kunywa amaarwa, kinu tikirukumanyisa ngu buli kasumi kiraabaga ky’amagezi kunywa. Musome Enfumo 22:3, hanyuma mubazeeho omulingo enyikara zinu zisobora kukonyera omuntu kunywa rundi kutanywa:

• Obworukuba n’ogenda kuvuga rundi kukozesa masini.

• Obworukuba oine enda.

• Kakuba dakitaali aba akugambiire kutanywa amaarwa.

• Kakuba oba otasobora kwetanga obukirukuhika ha bwingi bw’amaarwa.

• Kakuba ebiragiro by’ihanga ery’orumu biba bitarukukwikiriza.

• Kakuba oba oli n’omuntu ayacwiremu kutanywa habwokuba tikyamwanguhiraga kwetanga obukirukuhika ha maarwa.

Osemeriire kuha abantu amaarwa ha mikoro y’okugaitwa rundi emikoro endi yoona? Kumanya ekirakukonyera kucwamu, Mutekeho VIDIYO.

VIDIYO: Nsemeriire Kuha Abantu Amaarwa? (2:41)

Musome Abarumi 13:13 na 1 Abakolinso 10:31, 32. Hanyuma y’okusoma buli kyahandiikirwe, mubazeeho ekikaguzo kinu:

• Kuteeka omu nkora omusingi gunu nikisobora kukukonyera kita kukora encwamu ey’erukusemeza Yahwe?

5. Cwamu obwingi bw’amaarwa ag’oraanywa

Kakuba ocwamu kunywa amaarwa, oijuke kinu: n’obukiraaba ngu Yahwe tarukujumirra kunywa amaarwa, ajumirra kunywa ekihinguraine. Habwaki? Musome Hoseya 4:11, 18, hanyuma mubazeeho ekikaguzo kinu:

• Kiki ekisobora kubaho kakuba omuntu anywa ekihinguraine?

Nitusobora tuta kwetantara kunywa ekihinguraine? Tusemeriire kuba bebundaazi kandi tumanye nambere tusemeriire kugarukira. Musome Enfumo 11:2, hanyuma mubazeeho ekikaguzo kinu:

• Habwaki kirungi kweteraho ekipimo ky’amaarwa ag’orukusobora kunywa?

6. Ekisobora kukukonyera kutanywa amaarwa ekihinguraine

VIDIYO: ‘Nkatamwa Omulingo Natwazamuga Obwomeezi Bwange’ (6:32)

• Omu vidiyo, amaarwa gaaleteraga Dmitry kwetwaza ata?

• Akasobora kuleka kunywa aho naaho?

• Akasobora ata kuleka kunywa amaarwa ekihinguraine?

Musome 1 Abakolinso 6:10, 11, hanyuma mubazeeho ebikaguzo binu:

• Baibuli ebazaaho ki obutamiizi?

• Kiki ekirukwoleka ngu n’omuntu arukunywa amaarwa ekihinguraine n’asobora kuhinduka?

Musome Matayo 5:30, hanyuma mubazeeho ekikaguzo kinu:

• Ekyokurorraho eky’okutemaho omukono nikimanyisa ngu haroho ekitusemeriire kwefeereza kusobora kusemeza Yahwe. Kiki eky’osobora kukora kakuba oba n’otalibanizibwa ekizibu eky’okunywa amaarwa maingi?a

Musome 1 Abakolinso 15:33, hanyuma mubazeeho ekikaguzo kinu:

• Kiki ekirarugamu kakuba onywana abantu abarukunywa amaarwa ekihinguraine?

OYEGERE KI?

Yahwe akataho amaarwa nukwo tugegondezeemu, baitu atanga kuganywa ekihinguraine hamu n’obutamiizi.

Kweijukyamu

• Baibuli ebazaaho ki amaarwa?

• Kabi ki akali omu kunywa ekihinguraine?

• Nitusobora tuta kuteekamu ekitiinisa encwamu z’abandi obukirukuhika ha kunywa amaarwa?

SERULIIRIZA

Ensingaanto nibasobora bata kukora encwamu enungi obukirukuhika ha kunywa amaarwa?

Banza Otekereze Otakanywire (2:31)

Manya ebintu eby’osobora kukora kusingura ekizibu ky’okunywa ekihinguraine.

“Ikaza Amaarwa omu Kiikaro Kyago” (Watchtower, eya Janwali 1, 2010)

Omukristaayo asemeriire kwimukya egilaasi omu mwanya atakanywire amaarwa?

“Ebikaguzo Kuruga omu Basomi Baitu” (Watchtower, eya Febwali 15, 2007)

Omu kicweka “Nanywaga Amaarwa Maingi,” rora omulingo omusaija yalekere kunywa amaarwa ekihinguraine.

“Baibuli Ehindura Obwomeezi” (Watchtower, eya Maayi 1, 2012)

Itwena tugonza kwekomeramu engoye eziturajwara hamu n’omulingo turayekoraho. Kakuba tuhondera emu ha misingi ya Baibuli, nitusobora kukomamu ekiturukugonza kujwara kandi tukasemeza Yahwe. Leka tubazeeho emu ha misingi egi.

1. Misingi ki ey’eratukonyera kukomamu ebiturajwara n’omulingo turayekoraho?

Tusemeriire kukomamu “ebyokujwara ebisemiire, hamu nobuculezi nokwerinda,” kandi twikale tuli becumi nukwo abandi barole “okutina [okutwiniire] Ruhanga.” (1 Timoseo 2:9, 10) Tekerezaaho ensonga zinu inna: (1) Ebyokujwara byaitu bisemeriire kuba ‘ebisemeriire.’ Nk’oku osobora kuba orozere omu nsorrokano z’ekitebe, abaheereza ba Yahwe bajwara omu miringo erukwahukana, baitu enjwara yaitu n’omulingo tukoraho isoke lyaitu, byoleka ngu nitutamu Ruhanga ekitiinisa. (2) Tusemeriire kujwara kurungi, ekirukumanyisa tutajwara omu mulingo ogusobora kuletera abandi kuba n’ebitekerezo eby’obusiihani rundi ogurukwoleka ngu nitwetekerezaaho muno itwenka. (3) Twoleka ngu nitwerinda obututahondera buli mulembe gw’orugoye orukaizire. (4) Enzooka yaitu esemeriire kwoleka ngu tuli bantu ab’eby’omwoyo kandi ngu nituramya Ruhanga ow’amananu.​—1 Abakolinso 10:31.

2. Habwaki tusemeriire kutekerezaaho Abakristaayo bagenzi baitu obuturukuba nitukomamu eky’okujwara?

N’obikiraaba ngu twine obugabe kukomamu ekiturajwara, tusemeriire kutekerezaaho omulingo enjwara yaitu erakwataho abandi. Tukora kyona ekirukusoboka kutabiihiza abandi oihireho ‘tusemeza bataahi baitu omu burungi obwokwekambisa.’​—Soma Abarumi 15:1, 2.

3. Omulingo tujwaramu nigusobora guta kuleetera abantu kugonza kumanya Yahwe?

N’obukiraaba ngu tukira kujwara kurungi omu buli nyikara, tusemeriire kwegendereza omulingo tujwaramu kukira muno obuturukuba nitugenda omu nsorrokano rundi omu buheereza. Tusemeriire kukora kyona ekirukusoboka kurora ngu abantu tibahuguka kuruga h’amakuru amarungi habw’omulingo tujwairemu. Oihireho, nitugonza enzooka yaitu ebaleetere kugonza kumanya bingi kandi batemu “ekitinisa okwegesa Okwomujuni waitu Ruhanga.”​—Tito 2:10.

YEGA EBIRUKUKIRAHO

4. Obutuba nituzooka kurungi twoleka ngu nitutamu Yahwe ekitiinisa

Nsonga ki enkuru muno ey’etuleetera kukora kyona ekirukusoboka kurora ngu twazooka kurungi? Musome Zabuli 47:2, hanyuma mubazeeho ebikaguzo binu:

• Kukimanya ngu nitukikirra Yahwe kisemeriire kukwataho kita omulingo tujwaramu?

• N’otekereza ky’amagezi kufaaho omulingo turukuzookamu obuturukuba nitugenda omu nsorrokano rundi omu buheereza? Habwaki?

5. Kiki ekisobora kutukonyera kukomamu ekiturajwara n’omulingo turayekoraho?

Mutekeho VIDIYO.

VIDIYO: “Mubikolege Byona Obwekitinisa kya Ruhanga” (10:18)

N’obukiraaba ngu engoye zaitu za sente nyingi rundi za sente ntaito, zisemeriire kuba zecumi kandi niziisemerra buli nyikara eiturukuba turumu. Musome 1 Abakolinso 10:24 na 1 Timoseo 2:9, 10. Hanyuma mubazeeho ensonga habwaki tusemeriire kwetantara kujwara engoye . . .

• ezitali zecumi rundi ezitarukwiziirra ha mukoro

• ezirukukwatira ha mubiri, ezirukurorrana, rundi ezirukuleetera omuntu kuba n’ebiteekerezo eby’obusiihani

N’obukiraaba ngu Abakristaayo tibali hansi y’Ebiragiro bya Musa, nibitwoleka entekereza ya Yahwe. Musome Ekyebiragiro 22:5, hanyuma mubazeeho ekikaguzo kinu:

• Habwaki tusemeriire kwetantara kujwara rundi kwekoraho omu mulingo oguraleetera abasaija kusisana abakazi rundi abakazi kusisana abasaija?

Musome 1 Abakolinso 10:32, 33 na 1 Yohana 2:15, 16, hanyuma mubazeeho ebikaguzo binu:

• Habwaki tusemeriire kukora kyona ekirukusoboka kurora ngu omulingo turukuzookamu tigwatabaijura abantu nambere turukwikara rundi omu kitebe?

• Miringo ki ey’okujwara n’okwekoraho ey’ekanyire nambere orukwikara?

• N’otekereza emu ha miringo egi tesemiire hali Omukristaayo? Habwaki?

OYEGERE KI?

Obutukora encwamu enungi obukirukuhika ha by’okujwara n’omulingo twekoraho twoleka ngu nitutamu Yahwe hamu n’abandi ekitiinisa.

Kweijukyamu

• Habwaki enjwara yaitu n’omulingo twekoraho bikuru hali Yahwe?

• Misingi ki ey’eratukonyera kukora encwamu enungi obukirukuhika ha mulingo tusemeriire kuzookamu?

• Enzooka yaitu n’esobora eta kukwataho omulingo abandi baroramu okuramya okw’amananu?

SERULIIRIZA

Rora abandi ekibasobora kutekereza kakuba barora omulingo ojwairemu.

“Ninzooka Nta?” (Ekicweka kinu kiri ha mukura)

Manya habwaki kikuru kubanza kutekereza otaketiire tatu.

“Baibuli Egamba Ki ha Kweteera Tatu?” (Ekicweka kinu kiri ha mukura)

Tekerezaaho emisingi endi ey’esobora kutukonyera kukora encwamu enungi.

“Omulingo Ojwaramu Guhaisa Ruhanga Ekitiinisa?” (Watchtower, eya Sebutemba 2016)

Omukazi omu ow’akaba n’agonza kumanya Ruhanga akegera ata ha mulingo abandi baajwaramuga?

“Kujwara n’Okwekoraho Byantabaijuraga” (Awake!, eya Desemba 22, 2003)