Ebbaruha ya Paulo ey’Okubanza Hali Abakolinso
10 Ab’oruganda, hati ningonza inywena mukimanye ngu, baisenkuruitwe bakaba bali hansi y’ekicu, boona bakaraba omu nyanja, 2 boona bakabatizibwa omuli Musa kuraba omu kicu n’enyanja, 3 boona bakalya ebyokulya eby’omwoyo nibyo bimu, 4 kandi boona bakanywa eky’okunywa eky’omwoyo nikyo kimu. Habwokuba baanywaga ha mwandara ogw’omwoyo ogukaba nigubahondera kandi omwandara ogu gukaba nigumanyisa* Kristo. 5 Baitu abarukukira obwingi batasemeze Ruhanga, kandi bakahwerekerezebwa omu irungu.
6 Ebintu binu bikafooka byokurorraho hali itwe, nukwo na itwe tuteegomba ebintu ebibi ebi baayegombere. 7 Tutaramya ebisisani nkooku bamu hali bo baakozere, nkooku kyahandiikirwe kiti: “Abantu bakaikarra kulya n’okunywa. Hanyuma baimuka kwegonza.” 8 Kandi tuteejumbira omu busiihani,* nk’abamu oku baasiihaine, kandi ekyarugiremu, abantu 23,000 baafa ha kiro kimu. 9 Kandi tutalenga Yahwe,* nkooku bamu hali bo baamulengere, kandi ekyarugiremu enjoka zaabahwerekereza. 10 Kandi tutaba bantu abarukutontorroma nkooku bamu hali bo baatontorromere, omuhwerekerezi y’abahwerekereza. 11 Ebintu binu bikababaho nukwo bibe ebyokurorraho, kandi bikahandiikwa kuhabura itwe abaiziirwe empero ey’obusinge bunu.
12 Nahabweki, leka ogu arukuteekereza ngu ayemeriire, ayerinde atagwa. 13 Busaho ekyohyo kyona ekibaiziire, ekitahikaho abantu boona. Baitu Ruhanga mwesigwa, kandi tarukwija kubaleka kwohebwa kuhingura hali eki, eki musobora kugumira, baitu obu murukuba nimwohebwa, alibateeraho ah’okwirukira nukwo musobole kugumiisiriza okwohebwa oku.
14 Nahabweki abagonzebwa bange, mwiruke okuramya ebisisani.* 15 Nimbaza na inywe nk’arukubaza n’abantu abarukwetegereza; mwecweremu inywenka ebi ndukubaza. 16 Ekikopo eky’omugisa eki turukusabira omugisa, tinukwo kubagana ha sagama ya Kristo? Omugaati ogu tucwamu, tinukwo kubagana ha mubiri gwa Kristo? 17 Habwokuba haroho omugaati gumu, na itwe noobu kiraaba ngu tuli baingi, tuli mubiri gumu, habwokuba itwena tulya ha mugaati ogu gumu.
18 Murole Isaleeri ey’omubiri: Abo abalya ebihongwa, tibabaganira hamu n’ekyoto? 19 Hati, nindengaho kumanyisa ki? Eki ekihongiirwe ekisisani, kiine omugaso gwona, rundi ekisisani kiine omugaso gwona? 20 Nangwa; baitu nimbagambira ngu, ebintu amahanga gahonga, gahongera badaimooni hatali Ruhanga; kandi nyowe tindukugonza inywe mubagane na badaimooni. 21 Timusobora kunywera ha kikopo kya Yahwe,* na ha kikopo kya badaimooni; timusobora kuliira ha “meeza ya Yahwe”* na ha meeza ya badaimooni. 22 Rundi, ‘nitulengaho kuleetera Yahwe* kukwatwa ihali’? Nitumukira amaani?
23 Ebintu byona nibiikirizibwa, baitu tikiri ngu ebintu byona nibigasa. Ebintu byona nibiikirizibwa, baitu tikiri ngu byona byombeka. 24 Buli omu aleke kuserra ebirukumugasira wenka, baitu aikale naaserra ebirukugasira abantu abandi.
25 Mulyege buli kimu kyona ekirukutundwa omu katale k’enyama, mutakaguliiriza habw’omuntu waanyu ow’omunda, 26 habwokuba “ensi n’ebintu byona ebirumu bya Yahwe.”* 27 Omuntu ow’atarukwikiriza kakuba abaraaliza, kandi mukaikiriza kugenda, mulye buli kimu eki araabaha, mutakaguliiriza habw’omuntu waanyu ow’omunda. 28 Baitu kakuba omuntu weena abagambira ati: “Ekintu kinu kihairweyo nk’ekihongwa,” mutalya habw’ogu ow’abagambiire kandi na habw’omuntu ow’omunda. 29 Tindukumanyisa omuntu waanyu ow’omunda, baitu ow’omuntu ondi. Habwaki omuntu w’omunda ow’omuntu ondi, ancwera omusango habw’obugabe bwange? 30 Obu ndya mmazire kusiima Ruhanga, habwaki nimbazibwaho kubi, habw’eki eki nsiimiire?
31 Nahabweki, obu muraabaga nimulya rundi nimunywa, rundi nimukora ekintu ekindi kyona, mukolege ebintu byona habw’okuhaisa Ruhanga ekitiinisa. 32 Mwikale nimwetantara kutabaijura Abayudaaya, Abayonaani hamu n’ekitebe kya Ruhanga, 33 nkooku na nyowe ndukulengaho kusemeza abantu boona omu bintu byona, ntarukuserra ebirukugasira nyowe nyenka, baitu n’ebirukugasira baingi, nukwo basobole kujunwa.