‘Mutatwarwa Omukwohebwa’
“Ba bulindaara, murole musabe muleke okutaha omukwohebwa.”—MATAYO 26:41, NW.
OKUPIKIRIZIBWA kwali kw’amaani muno hali Yesu Kristo okwakaba atakatungaga mu bwomezi bwe. Yesu Kristo, Omwana wa Ruhanga, akaba ali haihi kuhika ha mperu y’obwomezi bwe. Yesu akakimanya ngu nagenda kukwatwa, bamusarre omusango, gw’okufa, bamuhanike ha muti gw’okubonabona. Akamanya ngu ekiyakusaziremu kyoona n’ekikorwa kyoona eki yakukozire ky’akukwasire ha’ibara lya Ise. Yesu akamanya ngu obwomezi obw’omu maiso obwa bantu bwali nibukwatwaho. Obu yatungire okupikirizibwa kunu kwoona, akakora ki?
2 Yesu akagenda omu kikaro ekyetwa Gesusemani hamu n’abageswa be. Nikyo kikaro Yesu yagonzaga. Baitu, akagendaho akanya kake kuruga ha begeswa be. Obu akaba ali wenka, akatandika kusaba Ise ow’omu iguru okumuha amaani, namugambira byoona ebyali ha mutima gwe, hatali murundi gumu gwonka kuleka emirundi esatu. Nobwakaba ahikirire, Yesu atakitwale ngu asobora kugumira okupikirizibwa wenka.—Matayo 26:36-44.
3 Naitwe hati, twine okupikirizibwa kw’amaani. Mu kubanza mu brocuwa enu, tukarora obujulizi obw’orukwoleka ngu tuli mubiro bya ha mperu ebye ntekaniza enu embi. Okwohebwa n’okunyigirizibwa kuruga mu nsi ya Sitani nikweyongera. Eby’orasaramu n’ebyorakora nkomu ha bahereza ba Ruhanga, bine akakwate ha ibara lye, naha mugisa gwoine ogw’okutunga obwomezi obutahwaho mu nsi empyaka. Nitugonza Yahwe. Nitugonza ‘kugumisiriza kuhikya ha mperu’—y’entekaniza enu embi rundi emperu y’obwomezi bwaitu, kyoona ekiraija okubanza. (Matayo 24:13) Tusobora kugumya tuta niturora kandi tukasigara bulindaara?
4 Yesu akakimanya ngu abegeswabe—abahati n’abakara—bakaba nibaija kuba n’okupikirizibwa, akabatererra ati: “Murole, musabe, muleke kutaha omu kwohebwa.” (Matayo 26:41) Ebigambo binu biina makuru ki halitwe ebiro binu? Kwohebwa ki oku kwizira? Kandi osobora ota “kwikara bulindaara”?
Okwohebwa Kukora Bintu Ki?
5 Buli kiro itwena, tunyina kwohebwa kugwa mu “mutego gwa Sitani.” (2 Timoseo 2:26) Baibuli n’etuhabura hali Sitani ngu ataire omutima gwe okukira muno hali abaramya ba Yahwe. (1 Petero 5:8; Okusuku’rwa 12:12, 17) Habw’ekigenderewa ki? Tikiri ky’okutwita. Habwokuba nibuba butali businguzi hali Sitani kakuba tufa tukyali besigwa hali Ruhanga. Sitani namanya ngu Yahwe naija kuhumbura abo rufu abayaisire.—Luka 20:37, 38.
6 Sitani nayenda kuhwerekereza ekintu ekikuru muno okukira obwomezi bwaitu obwahati—obwesigwa bwaitu hali Ruhanga. Sitani nalengaho nage goona okwoleka ngu nasobora kutuhindura kuruga hali Yahwe. Kakuba nitusendasendebwa kuba abatali besigwa, nukwo kugamba kuleka kutebeza amakuru marungi rundi kulekeraho kuhondera engeso z’Ekikristayo—ekyo nikija kuba businguzi hali Sitani! (Abefeso 6:11-13) Nahabwekyo, “Omwohi” atuletera ebyohyo.—Matayo 4:3.
7 ‘Emitego ey’obugobya’ eya Sitani y’emiringo nyingi. (Abefeso 6:11) Nasobora kutwohya n’e by’amatungo, okutina okugurukyagurukya rundi okuserra amasemererwa. Ogumu ha mitego ye emikuru nugwo okumaramu abantu amaani. Onu omubihi n’amanya nti kinu nikisobora kutugarra enyuma mu by’omwoyo nukwo kitwanguhire kusisa. (Enfumo 24:10) Ebitekerezo byaitu obu ‘bicwekera kimu,’ nukwo atwohya tuleke kuhereza.—Zabuli 38:8.
8 Obuturukweyongera munda mu biro ebyahanyuma, ebintu ebirukumaramu amaani nabyo nibyeyongera; naitwe nibitukwataho. (Dora akasanduku “Bimu ha Bintu Ebimaramu Amaani.”) Kyoona ekituletera kuhwamu amaani kituceekya. Twine ‘kwegurra omwanya’ ogw’ebintu eby’omwoyo—nk’okw’esomesa Baibuli, okuba munsorrokano z’Abakristayo, n’okwetaba mu buhereza—nikisobora kukugumira obworaba ojwahiire kimu omu omubiri, mu bitekerezo n’omubwongo. (Abefeso 5:15, 16) Ijuka omwohi nayenda tulekeraho kuhereza. Baitu bunu tinubwo bwire bw’okugarukirra enyuma rundi obutafaayo nkoku turukumanya obusumi obuturumu! (Luka 21:34-36) Osobora ota kwetantara ebyohyo n’okwikara bulindaara? Cumitiriza ha by’okuhabura bbina ebisobora kukuyamba.
‘Musabe Obutayosa’
9 Wesige Yahwe n’oraba omu kusaba. Ijuka eky’okurorraho kya Yesu omukikaro kya Gesusamane. Obu akaba ali mukweralikirra kw’amaani, Yesu akakora ki? Akahindukira Yahwe okutunga obukonyezi okuraba omukusaba okw’amaani “n’empiitaze nisisana nk’obutonyezi obw’esagama obukoto obugwa hansi.” (Luka 22:44) Kicumitirizeho. Yesu akaba namanya kurungi Sitani. Yesu akaba ayetegerize kuruga omu iguru emitego ya Sitani eyakozesa natega abahereza ba Ruhanga. Baitu, Yesu atakyeteho ngu akaba basobora okusingura buli katego koona Sitani aka yakumutegere. Kakuba omwana Ruhanga anyakuhikirire akahurra nayetaga kusaba kutunga obuyambi n’amaani okuruga hali Ruhanga, kandi itwe twakubaire tuta!—1 Petero 2:21.
10 Ijuka, hanyuma y’okugambira abeegeswa be ‘okusaba obutayosa,’ Yesu akagamba: “Omutima nugwo gurukugonza, baitu, omubiri nugwo mugara.” (Matayo 26:41) Mubiri gwoha Yesu ogu akaba nagambaho? Mananu tiguligwe, habwokuba omubiri gwe ogw’obuntu gukaba gutalimu buceeke. (1 Petero 2: 22) Kyali ky’embaganiza bali abeegeswa be. Habwokuba bali bagwesirwe ekibi n’obutahikirra, nahabwekyo bali nibetaga obukonyezi okwetantara ebyohyo. (Abarumi 7:21-24) Habw’ensonga enu nikyo Yesu yagambire abeegeswa be—hamu n’Abakristayo ab’amazima hanyuma yabo—okuguma nibasaba nukwo batunge obukonyezi okubayamba obutagwa mukwohebwa. (Matayo 6:13) Yahwe agarukamu okusaba nkoku. (Zabuli 65:2) Ata? Mu miringo ebiri.
11 Ogw’okubanza, Ruhanga atuyamba okwetegereza ebyohyo. Omulingo Sitani arukwohyamu abantu nasisana nk’emitego omutegi eyi asasaniza omu muhanda ogw’omwirima. Obw’oraba otagubaine nigukukwata. Okuraba omu Baibuli n’ebitabu ebigikwataho, Yahwe atuha eky’ererezi hali emitego ya Sitani, nukwo tusobole kwetantara kugwa mu kwohebwa. Omu myaka ey’enyuma, ebitabu ebitirwe hamu n’entegeka z’ensorrokano enkooto zibaire nizitwoleka akabi akali mu kutiina abantu, obusihani, okugonza itungo n’ebyohyo ebindi ebya Sitani. (Enfumo 29:25; 1 Abakolinso 10:8-11; 1 Timoseo 6:9, 10) Torukusima Yahwe okutugambire bukyali ha mitego ya Sitani? (2 Abakolinso 2:11) Okuhabura kunu kwona kuba kugarukwamu okusaba kwawe nukwo otunge obuyambi okurwanisa ebyohyo.
12 Eky’akabiri, Yahwe agarukamu okusaba kwaitu natuha amaani agarukutuyamba kugumira ebyohyo. Ekigambo kye kigamba: “Ruhanga . . . atalibaleka okwohebwa okukira ekimusobora baitu hamu nokwohebwa alitaho hokwirukira.” (1 Abakolinso 10:13) Ruhanga tasobora kwikiriza ekyoho kutubutikira nukwo kikatumaramu amaani ag’eby’omwoyo ag’okugumisiriza—kakuba tweyongera kumwesiga. Uwe atuteraho ata “h’okwirukira”? Aha “omwoyo gurukwera abo abamusaba.” (Luka 11:13) Omwoyo ogu gutuyamba kwijuka engeso eza Baibuli n’okututamu amaani okusaramu okukora ebihikire n’okutuyamba okusaramu n’amagezi. (Yohana 14:26; Yakobo 1:5, 6) Nigusobora kutuyamba okwoleka emiringo yoona erukwetagibwa kusingura entekereza embi. (Abagaratiya 5:22, 23) Omwoyo gwa Ruhanga nigusobora kuletera abaikiriza bene baitu ‘kutugarramu amaani.’ (Abakolosai 4:11) Torukusima emiringo ey’embabazi Yahwe eyagarukamu okusaba kwawe nukwo otunge obukonyezi?
Ba w’Amazima Mwebyo eby’Okunihira
13 Okuba bulindaara, twine kuba b’amazima mwebyo ebitunihira. Ha bw’okupikirizibwa kw’obwomezi, obundi twesanga tutandikire kujwaha muno. Twine kwijuka ngu Ruhanga takaraganiza ngu naija kutuleteera obwomezi obutalimu mihito muntekaniza y’ebintu enu. N’omubiro ebya Baibuli, abahereza ba Ruhanga batungaga emihito, otwaliremu okuhiganizibwa, amaseege, kweralikirra, hamu n’okurwara.—Engeso 8:1; 2 Abakolinso 8:1, 2; 1 Abasesalonika 5:14; 1 Timoseo 5:23.
14 Biro binu, naitwe twine omugabo gwaitu gw’ebizibu. Tusobora kutunga kuhiganizibwa, kweralikirra kw’ebyentahya, kweralikirra kw’ebitekerezo, turwara, n’okubonabona mu muringo endi yoona. Kakuba Yahwe yakutulinzire mu mulingo gw’eky’amahano kuruga mu kabi koona, tikyakuhaire Sitani akagisa k’okujuma Yahwe? (Enfumo 27:11) Yahwe alekere abaherezabe okwohebwa, n’okugezesebwa, obu n’okuleka abahereza be kwitwa abarukubahakaniza.—Yohana 16:2.
15 Kiki Yahwe ekiyaraganize? Nkoku tumazire kumanya ngu araganize ngu naija tutugumya tukasingura ebyohyo byoona kakuba nitumwesigira kimu. (Enfumo 3:5, 6) Okuraba mu kigambo kye, omwoyo gwe, ekitebe kye, atulinda mu by’omwoyo, atukonyera kulinda enkoragana yaitu nawe. Enkoragana enu obw’egumaho, n’obutufa tuba abasingwire. Busaho—n’obukwakuba kufa—kusobora kutanga Ruhanga okuha empera abahereza be abesigwa. (Abaheburaniya 11:6) Kandi omunsi empyaka, enyakuli haihi, Yahwe tarukwija kulemererwa kuhikiriza ebyo byoona ebi yanihize abo abamugonza.—Zabuli 145:16.
Ijuka Ensonga Enkuru
16 Okugumisiriza okuhikya hamperu, twine kwijuka ensonga enkuru habwaki Ruhanga alekereho obubi. Obundi ebizibu byaitu obu bizooka bihinguraine kandi tukohebwa kuleka kuhereza, twine kwijuka nti Sitani ahakanize okuhikirra kw’obulemi obwa Yahwe obw’obusobozi bwoona. Sitani akaletaho okugurukyagurukya kw’obwesigwa bwa bahereza ba Ruhanga. (Yobu 1:8-11; 2:3, 4) Ensonga zinu n’omulingo Yahwe yasaziremu n’okuzigonjora kikuru muno. Kita?
17 Ruhanga okwikiriza omuhito okubaho habwa kaanya kake, kihaire abamu omugisa okumanya amananu. Kicumitirizeho: Yesu akabonabona nukwo tutunge obwomezi. (Yohana 3:16) Titurukusiima ekintu ekyo? Nitwikiriza kugumisiriza emihito habwakanya kake nukwo n’abandi basobole kutunga obwomezi? Okugumisiriza okuhikya ha mperu; twine kumanya ngu amagezi ga Yahwe nigakirra hara agaitu. (Isaya 55:9) Alimarraho kimu obubi habwire bwe oburungi nagonjorra kimu ensonga zoona enkuru habw’oburungi bwaitu obw’ebiro n’ebiro. Kyakubaire kita? Busaho obutahikirra hali Ruhanga!—Abarumi 9:14-24.
“Mwirre Haihi Ruhanga”
18 Okwikara bulindaara twine kwirra haihi na Yahwe. Toina kwebwa ngu Sitani nakora kyoona ekyarukusobora mumaani ge okusisa omuganjano gwaitu na Yahwe. Sitani nayenda twikirize ngu empero terija, kandi ngu tikine mugaso kutebeza amakuru amarungi aga Baibuli rundi kukwata engeso za Baibuli. Baitu “nuwe mubihi w’ebisuba kandi ise w’ebisuba.” (Yohana 8:44) Twine kumalirra ‘kurwana n’Omuhangirizi.’ Enkoragana yaitu na Yahwe titwine kugitwara nk’ekitali ky’omugaso. Baibuli etugambira ngu: “Mwirre haihi Ruhanga, nauwe alibairra haihi.” (Yakobo 4:7, 8) Osobora ota kwirra haihi Yahwe?
19 Okucumitiriza okulimu okusaba kw’omugaso muno. Okupikizibwa kw’obwomezi obu kuba kwingi, twine kuhindukira Yahwe mu kusaba. Obw’omugambira ebiri ha mutima gwawe nikija kukwanguhira okurora okugarukwamu kwawe. Obundi tukuru kwija kuba nkoku orukukunihira, baitu obworaba nogonza kumusemeza n’okumuha ekitinisa, naija kukuha obukonyezi nukwo ogumisirize kurungi. (1 Yohana 5:14) Obw’orora oburagirizibwe mu bwomezi bwawe, nikija kukusembeza haihi nawe. Okusoma hamu n’okucumitiriza ha miringo ya Yahwe n’engeso ze, nkoku zirukwolekwa omu Baibuli, nakyo kyamugaso. Okucumitiriza kunu nikukuyamba okumumanya kurungi; nikukwata ha mutima gwawe n’okumugondeza kimu. (Zabuli 19:14) Okugonza kunu, kukirayo ekintu kyona ekindi, nikwija kukuyamba kugumira ebyohyo n’okuba bulindaara.—1 Yohana 5:3.
20 Okwirra haihi Yahwe nikyetaagisa kwirra haihi na bene baitu mu kwikiriza. Kinu nikijja kugambwaho mukicweka kyaitu ekya hamperu mu brocuwa enu.
EBIKAGUZO EBY’OKWEGA
• Kiki Yesu eki yakozire obu yatungire okupikirizibwa okw’amaani ha mperu y’obwomezi bwe obw’omunsi, kandi akatererra abegeswa be okukora ki? (Bucweka 1-4)
• Habwaki Sitani narumba muno abarukuramya Yahwe, kandi atwohya mu miringo ki? (Bucweka 5-8)
• Okusingura ebyohyo, habwaki twine kusaba obutayosa (Bucweka 9-12), okuba ab’amazima mubyo ebitukunihira (Bucweka 13-15), okwijuka ensonga enkuru (Bucweka 16-17), kandi ‘kwirra haihi Ruhanga’ (Bucweka 18-20)?
[Akasanduuko akali ha rupapura 26]
Bimu ha Bintu Ebimaramu Amaani
Obwomezi/n’emyaka. Kakuba tuba turwaire oburwaire obutarukukira rundi obukuru okutuceekya muno, nikusobora kutuletera okweralikirra habwokuba titusobora kuhereza Ruhanga muno.—Abaheburaniya 6:10.
Okuhwamu amaani. Tusobora kuhwerwamu kimu amaani kakuba turora bake abasiima amaani gaitu ag’okutebeza Ekigambo kya Ruhanga.—Enfumo 13:12.
Okuhurra nkataine omugaso. Okumara emyaka omuntu nabonabonesebwa, kinu kisobora kuletera omuntu okutekereza ngu tarukugonzebwa abandi hamu na Yahwe.—1 Yohana 3:19, 20.
Okusasa kw’omutima. Kakuba omuntu omu aba abihizibwe n’omwikiriza ondi, nasobora kuhweramu kimu amaani kuhika kwohebwa kuleka kugenda munsorrokano hamu n’okugenda mukutebeza.—Luka 17:1.
Okuhiganizibwa. Abatali nanyikiriza emu n’eyawe basobora kukuhakaniza, kukuhiganiza, rundi n’okukusekerra.—2 Timoseo 3:12; 2 Petero 3:3, 4.
[Ekisisani ekiri ku lupapula 26]
Yesu akatutererra kuguma ‘nitusaba obutayosa’ okutunga obuyambi okurwanisa okwohebwa