“Batafeeyo”

OBUTEEFERAYO ha kuhaburwa nikusobora kurugwamu akabi kamaani.

Orubuga rwa Darwin, orw’omu Australia, rwali mukwetegekera emikoro omu mwaka 1974 obugombe bukarra muno niburabura ha muyaga ogw;amaani ogwali nigwija. Baitu Darwin rukaba rutakasiswaga muyaga gwona kumara nk’emyaka 30. Baitu habwaki hati? Abantu baali murubuga runu bakakitwara nk’eky’okuzana okuhikya ihunga lyatandikire kubamburaho obusolya bw’amaju n’ebisiika ebimu bikagwa abamu nambere baali beserekere. Omu kiro ekyagarukireho orubuga rwona rwali nk’ekifurukwa.

Omu Novemba 1985 omu Colombia, orusozi rukahulikwamu omurro gw’amaani. Ebirika ebyayagire bikaleeta ebisabu n’itaka ebyazikire abantu abarukukira 20,000 abaali nibaikara omurubuga owa Armero. Abantu bataraburwe bukiri kara? Orusozi rukatandika kutukumira emyezi y’enyumaho. Abantu abomu Armero habwokumanyira kwikara haihi n’orusozi runu batefeereyo. Abaleemi bakatunga amakuru ganu ngu akabi kaali nikaija bwangu baitu tibaine eki bakozire okuhabura abantu. Ebirango bikarangwa ha radio ngu abantu baleke kutiina. Emizindaro ey’omumaramizo ekakozesebwa okugumya abantu ngu bagume busaho kabi. Orwebagyo oru, hakabaho okuhuliika kw’amaani muno okw’emirundi ebiri. Wakwiirukire okaleka ebintu byawe byoona? Bake muno abafiireyo baitu baingi bakagonza kwiruka ha saaha eya muheeru.

Obundi abasoma ebyomu itaka hamu n’amabale baragurra kimu omusisa nambere guraaba. Baitu tibasobora okugambira kimu nk’aha nambere guraraba. Omu 1999 emisisa omunsi yoona gikaita abantu nka 20,000. Baingi hali banu abafiire bakagira ngu kinu tikisobora kubabaho.

Okuhaburwa Okuruga Hali Ruhanga w’Enyini Okutwara Ota?

Baibuli esobororra kimu bukiri kara ebintu ebyakwolekere ngu tuli mubiro bya hanyuma. Mukutwarra hamu, nakinu netutererra okucumutiriza ha “biro bya Nuha.” “Mu biro ebyo okusandara kwa maizi kutakaizire” abantu bali mubwomezi bwabu obwabuli kiro, n’obukyakubaire bali niberalikirra ha busasamaro obwali buloho obwingi omu nsi. Hakuhaburwa okwa Ruhanga okuyahaire kuraba omuhereza we Nuha, “batakufeeho okuhikya okusandara kw’amaizi obukwaizire nukubatwara boona.” (Matayo 24:​34-39) Wakuhulirize okuhaburwa oku? Hati nokikora?

Kakuba okaba noikara omu Sodomu, haihi n’Enyanja Enfu, omu biro by’omusaija Loti, omwana wa mugenzi wa Abulamu. Ensi yoona eyekaba eyetoroire Sodomu ekaba n’esisana nk’orugonjo. Rwali orubuga orukurakuraine. Abantu baali abatarukweralikirra kintu kyoona. Omu biro bya Loti baali “nibalya, nibanywa, nibagura, nibaguza, nibabyara, nibombeka.” Abantu ab’omu bwiire bwabu baali b’engeso mbi muno. Wakufireyo ha kuhaburwa kwa Loti obwakaba najumirra habikorwa ebibi? Wakuhulirize kakuba yakukugambire ngu Ruhanga asaziremu kuhwerekereza orubuga orwa Sodomu? Rundi wakukitwaire nk’eky’okuzana nk’abo abaali nibagenda kuba bakobe? Wakulengereho kutandika kwirukamu baitu okagaruka enyuma nk’omukazi wa Loti. N’obukyakuba ngu abandi okuhaburwa batakwikirize, ekiro Loti ekiyarugiire mu Sodomu “omurro n’ekibiriti bikagwa okuruga omu iguru nibibahwerekereza bona.”​​—⁠Luka 17:​28, 29.

Abantu baingi ebiro binu tibarukwefeerayo. Eby’okurorraho binu bikalindwa omu kigambo kya Ruhanga okutuhabura n’okututererra OKUBA BULINDAARA!

[Akasanduuko/Eisisani ekiri ha rupapura 22]

Mananu Hakabaho Okusandara kw’Amaizi Omunsi Yoona?

Abasekerezi nibakihakaniza. Baitu Baibuli n’egamba ngu kukabaho.

Yesu Kristo akakugambaho, habwokuba akaba aroho obukwali nikubaho, akakurorra kimu okuruga omu iguru.

[Akasanduuko/Eisisani ekiri ha rupapura 23]

Sodomu na Gomora Mali Bikahwerekerezebwa?

Abarukuseruliza eby’omu itaka ebya ira nibakigumya.

Ebyafaayo nibikigambaho.

Yesu Kristo nakigumya, ngu kinu kikabaho n’ebyabaireho nibijulizibwa omu bitabu 14 eby’embaganiza ebya Baibuli.