Okufaayo Kukajuna Obwomezi Bwabu
YESU KRISTO akaha okuhabura bukyali kara ha kuhwaho kw’entekaniza ey’Ekiyudaya ey’ekaba n’eyetororra ha kuramya mu yekaru eyomu Yerusalemi. Atahe kiro obu byakubaireho. Akaha obw’okurorraho obwakubaireho nibwoleka ngu okuhwerekerezibwa kusembire. Akatererra abageswabe okuba nibarora n’okuruga omukikaro eky’akubairemu akabi.
Yesu akaragura: “Baitu obumulikarora Yerusalemi amahe gagyehingulirize, nubwo mumanye ngu okuhwerekerra kwayo kumalize okuhika.” Akongeraho okugamba: “Nukwo obumulirora ekinugwa ekirukuhwerekereza . . . kyemerire omu kikaro ekirukwera, . . . nabo abali omu Buyudaya balirukira ha nsozi.” Yesu akatererra abegeswa be obutagaruka kucungura ebintu byabu. Baali baine kwiruka mu bwangu nukwo bakize obwomezi bwabu.—Luka 21:20, 21; Matayo 24:15, 16.
Mukuculeza akaimukirro akaali karoho kumara akanya omu Yerusalemi, Cestius Gallus akebembera amahe ga Baroma okurumba Yerusalemi omu mwaka 66 C.E. Akataha n’omurubuga n’okwetorora yekaru. Akajagarro kaingi kaali omurubuga. Abakaire nibarora baketegereza ngu akabi kali kairire haihi. Okwirukamu kyali nikisiboka? Ekyali kitakunihirwa Cestius Gallus akaihayo amahe ge. Abajemu B’Abayudaya bakabahambya. Hati obwire bwali buhikire okwiruka omu Yerusalemi na Buyudaya yoona!
Omu mwaka ogwakurasireho (67 C.E.), amahe g’Abaroma gakagaruka hansi ya Vespasian na mutabani we Titus. Hati ensi yoona ekacwekamu obulemu. Okutandika kw’omwaka ogwa 70 C.E., Abarumi baketorora Yerusalemi barwombekaho orukomera nibarwehunguliriza. Obwirukiro bwoona bwali tiburoho. (Luka 19:43, 44) Ebitebe eby’omunda y’orubuga bikatandika kwitangana. Abo abasigaireho bakaitwa Abarumi nabamu bakahambwa. Orulembo rwoona hamu na yekaru yarwo bikahwerekerezebwa. Omuhandiki w’ebyafaayo by’Ekiyudaya Josephus, ey’abaireho mu kyasa kyokubanza akagamba ngu Abayudaya oburukukira ha kakaikuru kamu, bakabonabona n’okufa. Yekaru tekagarukaga kwombekwa.
Kakuba Abakristayo bagumire omu Yerusalemi mu mwaka 70 C.E., bakwisirwe rundi kutwarwa omubwiru nkabandi. Baitu, ab’ebyafayo bagamba ngu Abakristayo bakahuliriza okuhabura kwa Ruhanga bakairuka omu Yerusalemi na Buyudaya, bakairukira omunsozi buruga izoba y’Ekisaru kya Yorudani. Abandi bakaikarra kimu omu Pella ekyo mu Perea. Bali basengukire kimu kuruga omu Buyudaya batagarukeyo. Okuhuliriza hakuhabura kwa Yesu kukakiza obwomezi bwabu.
Okuhaburwa Okutwara Okuba kwa Mugaso Obukuba Kurugire Musonda Ezirukwesigwa?
Hanyuma y’okuhurra okuhabura ha bintu ebitakahikirizibwe, kinu kiretire abantu baingi obutesiga okuhaburwa kwona. Baitu, okufaayo hakuhaburwa nukusobora kukiza obwomezi bwawe.
Omu 1975 mu China, okuhabura okurukukwata ha musisa kukahebwa. Abakungu bakatamu emikono. Abantu bakahuliriza. Baingi bakakiza obwomezi bwabu.
Omu Apuli 1991 omu ihanga lya Philippines, ab’ekyaro abaikaraga ha Rusozi Pinatubo bakagamba ngu nibarora omwika niiju nibiruga omu rusozi. Hanyuma y’okuseruliza kumara emyezi ebiri, itendekero ery’omu Philipine erikwata ha kuhulika kw’omurro kuruga mu nsozi n’emyandara kukahabura abantu ngu akabi kaali nikaija. Mu bwangu, enkumi n’enkumi z’abantu bakafururwa. Nyenkya kara ya June 15, hakabaho okuhulika kw’amaani, iju n’ebisabu ebirukwokya bikakasasanizibwa omu kicweka kyoona. Baitu obuhulizi bukakiza obwomezi bw’abaingi
Na Baibuli n’ehabura hamperu y’entekaniza y’ebintu enu. Tuli mu biro bya hamperu. Emperu ebwerukugenda n’esembera haihi, iwe oli bulindaara? Oine ekyokozireho okwetantara akabi? Mukumanya nti emperu eri haihi, naiwe nohabura abantu abandi mubwangu?
[Ekisisani ekiri ha rupapura 20]
Okufaayo hali akuhaburwa kukakiza obwomezi bwa baingi obu Orusozi Pinatubo rwahulikiremu omurro, niju
[Ekisisani ekiri ha rupapura 21]
Abakristayo abahulirize okuhaburwa kwa Yesu, obwomezi bwabu bukakira obu Yerusalemi yahwerekerizibwe omu 70 C.E.