Ebikaguzo Kuruga Omu Basomi Baitu

Ebigambo by’omukwenda Paulo ebirukusangwa omu 1 Abakolinso 15:29 nibimanyisa ngu Abakristaayo abamu omu kasumi ke babatizibwaga habw’abafu?

Nangwa, Baibuli rundi ebyafaayo tibirukwoleka ngu ekintu kinu kyakorwaga.

Omulingo orukarra runu ruhindwirwemu omu Baibuli nyingi guletera abantu abamu kutekereza ngu omu kasumi ka Paulo abantu babatizibwaga habw’abafu. Ekyokurorraho: “Abafu obubaraaba batahumbuuka, abantu bagendera ki kubatizibwa habw’abafu?”​—Baibuli ey’Orunyoro-Rutoro eya 2012.

Baitu wetegereze abakugu babiri habirukukwata ha Baibuli ekibaagambire. Omukugu Dr. Gregory Lockwood akagamba ngu busaho obwakaiso bwona omu Baibuli rundi omu byafaayo oburukwoleka ngu omuntu wena akabatizibwa omu kiikaro ky’omuntu ay’afiire. Na Purofeesa Gordon D. Fee akahandiika ngu: “Busaho kyokurorraho kyona omu Baibuli rundi omu byafaayo ekirukubazaaho okubatizibwa nk’oku. Kandi nagamba ngu okubatizibwa nka kunu tikurukubazibwaho omu Ndagaano Empyaka kandi busaho obwakaiso bwona oburukwoleka ngu kukakorwa Abakristaayo ab’okubanza rundi omu makanisa agakozerwe hanyuma y’akasumi kake abakwenda bamazire kufa.

Baibuli negamba ngu abahondezi ba Kristo baali basemeriire ‘kuhindura amahanga gona abegeswa nibababatiza . . . nibabegesa okukwata byona’ ebiyabaragiire. (Mat. 28:19, 20) Omuntu obuyabaga atakafookere omwegeswa ow’abatiziibwe, akaba asemeriire kwegaho Yahwe hamu na Yesu, kubaikiririzaamu kandi n’okuborobera. Omuntu ow’akaba amazire kufa kandi ali omu kituuro, akaba atasobora kukora ebintu binu; kandi n’Omukristaayo omwomeezi akaba atasobora kubimukorra.​—Nfu. 9:5, 10; Yoh. 4:1; 1 Kol. 1:14-16.

Hati, Paulo akaba namanyisa ki?

Abakolinso abamu bagambaga ngu abafu tibalihumbuuka. (1 Kol. 15:12) Paulo akabooleka ngu entekereza egi egwire. Omu mulingo ki? Akagamba ngu bukyabukya yatangatanganaga okufa. Baitu, akaba akyali mwomeezi. Nobukiraaba ngu akaraba omu kabi, akaba nakigumiza kimu ngu hanyuma y’okufa kwe, yakuhumbuukire agenda kwikara omu iguru nka Yesu.​—1 Kol. 15:30-32, 42-44.

Abakolinso baali nibetaaga kukyetegereza ngu kuba Abakristaayo abaseserweho amagita, kyali nikimanyisa ngu bakubandize kuhikwaho ebirengo obutoosa kandi n’okufa, batakahumbuukire. ‘Kubatizibwa okutaaha omu Kristo Yesu’ kyali nikitwarramu ‘n’okubatizibwa okutaaha omu kufwa kwe.’ (Bar. 6:3) Kinu nikimanyisa ngu nka Yesu, bakubandize bahikwaho ebirengo kandi bafe nukwo basobole kuhumbuuka okugenda omu iguru.

Emyaka erukuhingura mw’ebiri hanyuma ya Yesu kubatizibwa omu maizi, akagambira abegeswa be babiri ati: “Nokubatizibwa okumbatizibwamu nukwo mulibatizibwamu.” (Marako 10:38, 39) Hanu Yesu akamanyisa ngu kwikara ali mwesigwa hali Ruhanga, kyakumurugiiremu kufa. Paulo akahandiika ngu abaseserweho amagita bakaba nibagenda ‘kubonabona hamu, nukwo [basobole] kuheebwa hamu ekitiinisa.’ (Bar. 8:16, 17; 2 Kol. 4:17) Nahabweki nabo baali baine kufa kusobora kuhumbuuka kugenda kwikara omu iguru.

Nahabweki, ebigambo bya Paulo obubirukuhindurwa omu mulingo oguhikire, nibigamba biti: “Abafu obubaraaba batarukugenda kuhumbuuka, abo ababatizibwa n’ekigendererwa eky’okufooka abafu, balikora ki? Habwaki babatizibwa n’ekigendererwa eky’okufooka abafu?”