ISOMO 56

Linda Obumu omu Kitebe

Omulingo Kirukusisana ha Rupapura

Obutuba tuli n’Abakristaayo bagenzi baitu, twehurra nk’oku Omukama Daudi yagambire: “Dora okukiri ekirungi, okukisemera Bene baitu, okuikara hamu [omu bumu]!” (Zabuli 133:1) Obumu bwaitu tibwija bwija. Buli omu aine ekyasemeriire kukoraho.

1. Kiki ekirukuhuniriza omu bantu ba Ruhanga?

Kakuba ogenda omu rusorrokano orw’ekitebe omu nsi endi, noija kusanga torukwetegereza orulimi rwabo, baitu noija kwehurra otangiriirwe, otekaine kandi n’ogonzebwa. Habwaki? Habwokuba twega Baibuli nitukozesa ebitabu nibyo bimu omu nsi yoona. Kandi twekamba kwolekangana okugonza. Katube nitwikara nkaha, itwena ‘tukunga ibara lya Yahwe kandi tumukorra n’omutima gumu.’—Zefaniya 3:9.

2. Kiki eky’osobora kukora kukurakuraniza obusinge?

“Mugonzangane omu mutima nokugonza kwingi.” (1 Petero 1:22) N’osobora ota kuteeka obuhabuzi bunu omu nkora? Omu kiikaro ky’okuteeka omutima ha butahikirra bw’abantu abandi, serra emiringo emirungi eibaine. Omu kiikaro ky’okumara obwire n’abantu abarukugonza eby’ogonza bonka, lengaho kumanya ab’oruganda na banyaanya itwe abarukwahukana. Nitusobora n’okukora ekirukusoboka kweyihiramu kimu enyehurra ey’okusoroora.—Soma 1 Petero 2:17.a

3. Kiki eky’orakora obw’oratunga obutetegerezangana n’Omukristaayo mugenzi wawe?

Tuli omu bumu baitu tituhikiriire. Obwire obumu tubiihizangana rundi tusaalizangana. Nahabweki Ekigambo kya Ruhanga kitugambira ngu: Mwikale “nimuganyirangana,” kandi kyongera kigamba: “Nka [Yahwe] okuyaganyire inywe nukwo nainywe mukole muti.” (Soma Abakolosai 3:13.) Obwire bwingi tusaaliza Yahwe, baitu atuganyira. Nahabweki n’agonza naitwe tuganyire ab’oruganda. Kakuba okimanya ngu okozere kubi omuntu, gira ekiwakoraho kugonjoora ensonga.—Soma Matayo 5:23, 24.b

YEGA EBIRUKUKIRAHO

Serra emiringo ey’erakukonyera kwongera ha bumu n’obusinge omu kitebe.

Ebisisani: Ow’oruganda n’agarraho obusinge. 1. Ow’oruganda ondi n’amucoomera. 2. N’atekerezaaho ekigambo ow’oruganda eky’amugambiire. 3. N’atekerezaaho obuhabuzi obuli omu Baibuli oburukwoleka eky’osobora kukora kakuba bakubiihiza. 4. N’atangatangana ow’oruganda onu kunywa hamu kaawa kandi bagarraho obusinge. — Kiki eky’orakora kugarraho obusinge?

4. Singura okusoroora

Nitugonza kugonza ab’oruganda boona. Baitu nikisobora kutugumira kwikiriza omuntu ow’atarukusisana naitwe. Kiki ekisobora kutukonyera? Musome Engeso Ezabakwenda 10:34, 35, hanyuma mubazeeho ebikaguzo binu:

Yahwe aikiriza abantu aba buli mulingo kufooka Bakaiso be. Eki kisemeriire kukwataho kita omulingo ororamu abantu abatarukusisana naiwe?
Kusoroora kwa mulingo ki okuli omu kiikaro orukwikaramu okw’orukugonza kwetantara?

Musome 2 Abakolinso 6:11-13, hanyuma mubazeeho ekikaguzo kinu:

N’osobora ota kweyongera kugonza ab’oruganda na banyaanya itwe abatarukusisana naiwe?

5. Ganyira kandi ogarreho obusinge

Yahwe atuganyira n’obukiraaba ngu talitwetaagisa kumuganyira. Musome Zabuli 86:5, hanyuma mubazeeho ebikaguzo binu:

Orukarra runu nirutwegesa ki ha kuganyira kwa Yahwe?
Habwaki n’osiima habw’okuganyira kwe?
Nyikara ki ezisobora kutulemesa kwikara omu businge n’abandi?

Nitusobora tuta kuhondera ekyokurorraho kya Yahwe tukaikara omu bumu n’ab’oruganda na banyaanya itwe? Musome Enfumo 19:11, hanyuma mubazeeho ekikaguzo kinu:

Kakuba omuntu akubiihiza, n’osobora kukora ki kugarraho obusinge?

Obwire obumu naitwe tubiihiza abandi, kakuba eki kibaho, kiki ekitusemeriire kukora? mutekeho VIDIYO, hanyuma mubazeeho ekikaguzo ekirukuhonderaho.

VIDIYO: Kuserra Obusinge Kirugamu Emigisa (6:01)

Omu vidiyo, munyaanya itwe akozere ki kugarraho obusinge?

6. Serra ebirungi omu b’oruganda na banyaanya itwe

Obutwirra haihi n’aboruganda na banyaanya itwe, tumanya emiringo yabo enungi hamu n’obuceke bwabo. Nitusobora tuta kuteeka omutima ha miringo yabo enungi? Mutekeho VIDIYO, hanyuma mubazeeho ekikaguzo ekirukuhonderaho.

VIDIYO: Weyongere Kusemera! (5:10)

Kiki ekisobora kukukonyera kurora emiringo enungi ey’aboruganda na banyaanya itwe?

Yahwe ata omutima ha miringo yaitu enungi. Musome 2 Ekyebyomubusinge 16:9a, hanyuma mugarukemu ekikaguzo kinu:

Kumanya ngu Yahwe ateeka omutima ha miringo yaawe enungi nikikuleetera kwehurra ota?

Empeta ey’ekozerwe omu mabaale ag’omuheendo. — Empeta ey’ekozerwe omu mabaale ag’omuheendo n’esobora kuba ine akamogo, baitu esigara eri y’omuhendo. Nikyo kimu, ab’oruganda na banyaanya itwe tibahikiriire baitu b’omuhendo hali Yahwe

ABANTU ABAMU BAGAMBA: “Ntakaganyiire omuntu, nuwe aine kubanza kunsaba ekiganyiro.”

Habwaki tusemeriire kwikara twetekaniize kuganyira abandi?

OYEGERE KI?

N’osobora kukonyera kwikazaaho obumu omu kitebe kurabira omu kuganyira n’okwoleka ab’oruganda na banyaanya itwe boona okugonza.

Kweijukyamu

N’osobora ota kuleka kusoroora?
Noija kukora ki kakuba otunga obutaikiranganiza n’Omukristaayo mugenzi wawe?
Habwaki n’ogonza kuhondera ekyokurorraho kya Yahwe eky’okuganyira abandi?

Ekiro tumaliriize isomo linu:

Lengaho kinu

Kakuba kiba nikikugumira kukoragana n’Omukristaayo mugenzi wawe, lengaho kumumanya kurungi kandi oserre emiringo ye enungi.

Ekindi:

Your other goal

SERULIIRIZA

Manya omulingo kimu ha byokurorraho bya Yesu kisobora kutukonyera kwetantara kucwera abandi omusango.

Ihamu Enyomyo (6:56)

Nikitwetaagisa kusaba ekiganyiro kakuba tuba tutaine ekibi kyona ekitukozere?

“Kusaba Ekiganyiro—Nikikonyera Kugarraho Obusinge” (Watchtower, eya Novemba 1, 2002)

Rora omulingo abasaija babiri abaakuliire omu kiikaro ekirumu okusoroora baazoire obumu bwonyini.

Johny na Gideon: Baali Banyanzigwa, Baitu Hati b’Oruganda 6:42

Manya emiringo osobora kukwatamu obutetegerezangana butakamazireho obusinge omu kitebe.

“Maraho Obutetegerezangana omu Mulingo ogw’Okugonza” (Watchtower, eya Maayi 2016)

a Ebyongiirweho 6 nibibazaaho omulingo okugonza kuleetera Abakristaayo kwetantara kujanjaaza oburwaire oburukuturra.

b Ebyongiirweho 7 nibibazaaho omulingo tusobora kumaraho obutetegerezangana omu by’obusubuzi n’omu by’ebiragiro.