Kwirra Haihi n’Ab’oruganda Na Banyaanya Itwe Kirungi Hali Itwe!

1-2. Kimu ha bintu ebikuru hali Yahwe nikyo kiha, kandi naagonza tukole ki?

OMULINGO tutwazaamu abantu abandi kikuru muno hali Yahwe. Yesu akeegesa ngu tusemeriire kugonza bataahi baitu nk’oku turukwegonza itwenka. (Mat. 22:​37-39) Kinu nikitwarramu kwoleka embabazi na hali abantu abatarukuheereza Yahwe. Eki obu twoleka embabazi eza mulingo gunu tuba nituhondera ekyokurroraho kya Yahwe Ruhanga “[ow’aleka] omusana gwe kujwera ababi n’abarungi, kandi anagira enjura ye abahikiriire n’abatahikiriire.”—Mat. 5:45.

² N’obu kiraaba ngu Yahwe agonza abantu boona, akira kugonza muno abo abakora ebihikire. (Yoh. 14:21) Naagonza na itwe tumwegereho. Nahabweki, naatwekambisa ‘kugonza muno’ ab’oruganda na banyaanya itwe. (1 Pet. 4:8; Bar. 12:10) Okugonza kunu nikusisana n’okugonza oku tuba twiniire omunyabuzaale ou turukugonza muno rundi omunywani nfenanfe.

3. Kiki eki tusemeriire kwijuka obukirukuhika ha kugonza?

³ Nk’oku kirukwetaagisa kurolerra ekimera kusobora kukura kurungi, na itwe nikitwetaagisa kukurakuraniza okugonza oku twiniire abantu abandi nukwo kusobole kweyongera. Omukwenda Paulo akahabura Abakristaayo ati: ‘Okugonzangana kwanyu kweyongerege.’ (Baheb. 13:1) Yahwe naagonza twikale nitukurakuraniza okugonza oku twiniire abandi. Ekicweka kinu nikiija kubazaaho ensonga habwaki tusemeriire kwirra haihi n’ab’oruganda na banyaanya itwe n’omulingo tusobora kugumizaamu nitukikora.

HABWAKI TUSEMERIIRE KWIRRANGANA HAIHI

4. Nitusobora tuta kugumizaamu nitusiima habw’obumu obu twine hagati y’ab’oruganda na banyaanya itwe oburukubazibwaho omu Zabuli 133:1? (Rora n’ebisisani.)

⁴ Soma Zabuli 133:1. Nitwikiraniza n’omuhandiiki wa zabuli ayahandikire ngu kunywana abanywani abagonza Yahwe ‘kirungi’ kandi ‘kisemiire.’ Nk’oku omuntu asobora kulemwa kuteeka omutima ha muti omurungi ogu arora buli kiro, na itwe nitusobora kulemwa kuteeka omutima ha bumu obu twine nk’Abakristaayo. Twikara niturora ab’oruganda na banyaanya itwe, obwire obumu emirundi nyingi omu wiiki. Nitusobora tuta kwikara nitubarora nk’ab’omuhendo? Okugonza oku tubainire nikwija kweyongera kukura kakuba tutwara obwire tukateekerezaaho nk’oku buli omu hali bo ali w’omuhendo hali ekitebe na hali itwe.

5. Okugonza okuli hagati y’ab’oruganda na banyaanya itwe nukusobora kukwataho kuta abandi?

⁵ Abantu abamu abaija omu nsorrokano zaitu habw’omurundi gwabo ogw’okubanza bakwatwaho muno habw’okugonza oku twinirengana. Eki nikisobora kubaleetera kukigumya ngu bazoire amananu. Yesu akagamba ati: “Boona nuho balimanyira ngu muli begeswa bange, obu muragonzanganaga.” (Yoh. 13:35) Teekerezaaho ekyokurorraho ekya Chaithra, ow’akaba ali ha yunivasite kandi ow’akaba naayega n’Abakaiso ba Yahwe. Obu baamuraalize kugenda ha rusorrokano orukooto, akaikiriza. Ha kiro kye eky’okubanza ha rusorrokano orukooto akagambira omwegesa we wa Baibuli ati: “Abazaire bange tibakangwaga omu kifuba. Baitu ha rusorrokano runu orukooto, abantu 52 nubo bangwire omu kifuba omu kiro kimu kyonka! Nkehurra ngu Yahwe akaba nanyoleka okugonza naakozesa abaheereza be. Ningonza kuba omu h’abaheereza be.” Chaithra akagumizaamu naakurakurana kandi akabatizibwa omu 2024. Mali, abantu abahyaka obu barora ebikorwa byaitu ebirungi otwaliiremu n’okugonza oku twiniire ab’oruganda na banyaanya itwe, emirundi erukukira obwingi kibekambisa kufooka abaheereza ba Yahwe.—Mat. 5:16.

6. Kwirra haihi n’ab’oruganda na banyaanya itwe nikisobora kita kutulinda?

⁶ Kwirra haihi n’ab’oruganda na banyaanya itwe nikisobora kutuha obulinzi. Omukwenda Paulo akatererra Abakristaayo bagenzi be ati: ‘Mugarranganemuga amaani obukya bukya . . . omuntu weena omulinywe aleke okugumangana obw’ebisuba by’ekibi.’ (Baheb. 3:13) Kakuba tuhwamu muno amaani kuhika ha rulengo ngu nikitugumira kukora ekihikire, Yahwe naasobora kukozesa Omukristaayo mugenzi waitu kwetegereza enyikara yaitu kandi akatukonyera. (Zab. 73:​2, 17, 23) Obukonyezi bwa mulingo ogu mali burungi hali itwe.

7. Kakwate ki akali hagati y’okugonza n’obumu? (Abakolosai 3:​13, 14)

⁷ Twegondeza omu migisa nyingi habwokuba tuli kicweka ky’abantu abarukugonzangana. (1 Yoh. 4:11) Ekyokurorraho, okugonza kutwekambisa ‘kugumiisirizangana,’ kandi eki kitukonyera kwikara hamu omu bumu n’ab’oruganda na banyaanya itwe. (Soma Abakolosai 3:​13, 14; Bef. 4:​2-6) Egi niyo ensonga habwaki twegondeza omu nsorrokano zaitu nk’ab’oruganda na banyaanya itwe kukira guruupu endi yoona ey’abantu omu nsi.

MUTEEKANGANEMU EKITIINISA

8. Yahwe atukonyera ata kwikara omu bumu?

⁸ Obumu obu turukwegondezaamu n’ab’oruganda na banyaanya itwe kiri kyamahano kuruga hali Yahwe. Yahwe nuwe naasobozesa ekyamahano kinu kubaho n’obu kiraaba ngu tuli bantu abatahikiriire. (1 Kol. 12:​24, 25) Baibuli egamba ngu Ruhanga nuwe atwegesa kugonzangana. (1 Bas. 4:9) Kinu nikimanyisa ngu Yahwe akozesa Baibuli kutwegesa eki tusemeriire kukora kusobora kwirrangana haihi. Nitusobora kwegesebwa Ruhanga kuraba omu kwesomesaaho enyegesa ze kandi tukaziteeka omu nkora. (Baheb. 4:12; Yak. 1:25) Kandi eki nikyo kyonyini Abakaiso ba Yahwe bekamba kukora.

9. Ekyahandiikirwe ekiri omu Abarooma 12:​9-13 nikitwegesa ki obukirukuhika ha kutaamungana ekitiinisa?

⁹ Ekigambo kya Ruhanga kitwegesa kita kwirrangana haihi? Teekerezaaho Paulo eki yagambire ha nsonga enu nk’oku kirukwolekwa omu Abarooma 12:​9-13. (Soma.) Wetegereze Paulo akagamba ngu “omu kutamungana ekitiinisa ninywe mubanzege.” Eki nikimanyisa ki? Niitwe abasemeriire kubanza kugira eki twakoraho kwoleka abandi okugonza kuraba omu kubaganyira, kubooleka amakune, kuba abagabi n’okubakorra ebintu ebindi ebirungi. (Bef. 4:32) Tikirukukwetaagisa kubanza kulinda ow’oruganda rundi munyaanya itwe kukwirra haihi. Niiwe osemeriire kubanza kukikora. Obu orakikora noija kwerorra Yesu eki yaraganize obu yagambire ati: “Okugaba kuleeta okusemererwa kwingi kukira okuheebwa.”—Ebik. 20:35.

10. Nitusobora tuta kuba bekambi “omu kutamungana ekitiinisa”? (Rora n’ekisisani.)

¹⁰ Ekirukuhuniriza, hanyuma ya Paulo kutugambira kwebembera omu kutaamungana ekitiinisa, akongera yatutererra ngu twekambege tutaba bagara. Omuntu omwekambi akora n’amaani. Obu aheebwa omulimo, agukora kurungi. Ekyahandiikirwe ekiri omu Enfumo 3:​27, 28 kitutererra kiti: “Otaliima ebirungi abo ababisemeriire, obu kiriba kiri omu busobozi obwomukono gwawe okubikora.” Nahabweki, obu turora omuntu ali omu bwetaago, tusemeriire kukora kyona eki turukusobora kumukonyera. Titusemeriire kwikaraho kumukonyera, rundi kuteekereza ngu omuntu ondi naija kumukonyera.—1 Yoh. 3:​17, 18.

11. Kiki ekisobora kutukonyera kwirrangana haihi?

¹¹ Omulingo ogundi ogu tusobora kwoleka ngu nitutamu abandi ekitiinisa nukwo kurahuka kubaganyira obu batusobeza. Ekyahandiikirwe ekiri omu Abefeso 4:26 nikigamba ngu: “Mutaikiriza izooba kugwa mukyaine ekiniga.” Habwaki? Habwokuba orukarra orwa 27 nirwoleka ngu kakuba twikiriza izooba kulenga tukyaine ekiniga tuba ‘nituha Sitaani omugisa.’ Kuraba omu Kigambo kye, Yahwe aikara naatutererra kuganyirangana. Ekyahandikirwe ekiri omu Abakolosai 3:13 kitwekambisa ‘kugumizaamu . . . nituganyirangana.’ Kuganyira abandi kiri kimu ha bintu ebikuru ebituleetera kubairra haihi. Obu tukikora, kitukonyera “kwikazaaho obumu obw’omwoyo, n’obusinge.” (Bef. 4:3) Kinu nikyoleka kurungi ngu obu tuba abantu abarukuganyira kitukonyera kwikara omu bumu n’omu businge.

12. Yahwe atukonyera ata kuba bantu abarukuganyira?

¹² Amananu gali nikisobora kutugumira kuganyira abo abatusaaliza. Baitu omwoyo ogurukwera gwa Ruhanga nigusobora kutukonyera kubaganyira. Hanyuma y’okutugambira ‘kugonzangana muno’ n’okuba ‘abekambi,’ Baibuli eyongera etugambira eti: “Leka omwoyo gubaleetere kuba bekambi.” Kinu nikimanyisa ngu omwoyo ogurukwera nigusobora kutuleetera kuba bekambi. Kandi nigusobora n’okutukonyera kwolekangana okugonza n’okuganyirangana kuruga ha mutima. Egi niyo ensonga habwaki tusaba muno Yahwe kutukonyera.—Luk. 11:13.

“HATABAHO OKWEBAGANIZAAMU OMULI INYWE”

13. Kiki ekisobora kutuleetera kwebaganizaamu?

¹³ Ekitebe kirumu abantu aba buli mulingo abarukuruga omu buhangwa oburukwahukana. (1 Tim. 2:​3, 4) Kakuba tutegendereza ebintu binu nibisora kutuleetera kwebaganizaamu obukirukuhika ha nsonga ez’okwecweramu nk’okujwara n’okwekoraho, eby’obujanjabi rundi eby’okwesemeza. (Bar. 14:4; 1 Kol. 1:10) Habwokuba twegesiibwe Ruhanga kugonzangana tusemeriire kwegendereza kutebembeza encwamu zaitu kandi tukazirora nk’ezirukukira ez’abandi.—Baf. 2:3.

14. Kiki eki tusemeriire kwikara nitulengaho kukora, kandi habwaki?

¹⁴ Ekindi, nitusobora kwetantara kwebaganizaamu omu kitebe kuraba omu kuhuumuza abandi n’okubagarramu amaani obwire bwona. (1 Bas. 5:11) Omu busumi obwenyuma, abantu abaikaire bafukire omu by’omwoyo rundi baihirwe omu kitebe basoboire kugaruka. Mali tusemeriire kubatangirra omu mulingo gw’okugonza! (2 Kol. 2:8) Wetegereze ekyokurorraho kya munyaanya itwe omu ayaizire ha Kyombeko ky’Obukama hanyuma y’okumara emyaka ikumi afukire omu by’omwoyo. Naagamba ati, “Buli omu akansekera, yankwata omu ngaro kandi yandamukya.” (Ebik. 3:19) Ebikorwa ebi ebitaito kandi eby’embabazi bikamukwataho bita? Naagamba ati, “Kikandetera kwehurra ngu Yahwe akaba aliyo naankonyera kwongera kutunga okusemererwa.” Kakuba tulengaho kugarramu abandi amaani, Yesu Kristo naasobora kutukozesa kuhuumuza abo “abajwahire muno n’abalemeriirwe.”—Mat. 11:​28, 29.

15. Mulingo ki ogundi ogu tusobora kukurakuranizaamu obumu? (Rora n’ekisisani.)

¹⁵ Omulingo ogundi ogu tusobora kukurakuranizaamu obumu nukwo kuraba omu mbaza yaitu. Yobu 12:11 nihagamba ngu: ‘Okutu tukulenga ebigambo, nk’orulimi okururoza ebyokulya?’ Nk’oku omucumbi omurungi aikara naaroza ebyokulya kukigumya ngu binuzire atakabiihuliire abandi, na itwe tutakabalize ekintu tusemeriire kubanza kukiteekerezaaho n’obwegendereza. (Zab. 141:3) Tusemeriire kwikara nitukigumya ngu ebigambo ebi turukugonza kubaza nibihuumuza, nibyombeka, kandi nibiija kugasira abo abaraabihurra.—Bef. 4:29.

16. Nibaha abasemeriire kukirayo kwegendereza kurora ngu baakozesa ebigambo ebirukugarramu amaani?

¹⁶ Banyineeka hamu n’abazaire nubo basemeriire kukirayo kwegendereza batakabalize kukigumya ngu ebi baarabaza nibyombeka. (Bak. 3:​19, 21; Tit. 2:4) Abagurusi na bo basemeriire kuba abantu abarukuhuumuza kandi abarukugarramu amaani entaama za Yahwe. (Is. 32:​1, 2; Bag. 6:1) Orufumo orumu orw’omu Baibuli rugamba ngu: “Ekigambo ekibazibwa omu kasumi akahikire—ka kirungi muno!”—Nfu. 15:​23, NWT.

YOLEKA OKUGONZA OMU BIKORWA N’OMU MANANU

17. Nitusobora kukigumya tuta ngu nitugonza ab’oruganda na banyaanya itwe kurugira kimu ha mutima?

¹⁷ Omukwenda Yohana naatutererra ngu “tuleka okugonza omu kigambo nobuhokuba omu rulimi; baitu omu ngeso nomu mazima.” (1 Yoh. 3:18) Nitugonza kwoleka okugonza ab’oruganda na banyaanya itwe kurugira kimu ha mutima. Baitu eki nitusobora kukikora tuta? Kuraba omu kumara obwire n’ab’oruganda na banyaanya itwe, kandi eki nikiija kutukonyera kubairra haihi n’okwongera kubagonza muno. Leka tulengeho kuserra omugisa ogw’okumara na bo obwire obu barukuba baizire omu nsorrokano rundi omu buheereza. Leka tutunge obwire tubabungire. Obu turaakora ebintu binu nikiija kwoleka ngu ‘twegesiibwe Ruhanga okugonzangana.’ (1 Bas. 4:9) Kandi nitwija kugumizaamu nitwerorra ‘okukiri ekirungi, okukisemera bene baitu okuikara hamu omu bumu!’—Zab. 133:1.