Ebbaruha ya Paulo Hali Abakolosai
3 Baitu, obu muraaba mwahumbwirwe hamu na Kristo, mugumizeemu nimuserra ebintu eby’omu iguru, nambere Kristo aikaliire ha mukono gwa Ruhanga ogw’obulyo. 2 Ebiteekerezo byanyu mubiikaze ha bintu eby’omu iguru hatali ha bintu eby’omu nsi. 3 Habwokuba mukafa kandi obwomeezi bwanyu bwikaire buserekerwe hamu na Kristo omu bumu na Ruhanga. 4 Kristo, obwomeezi bwaitu, obu araayolekwa na inywe nimwija kwolekwa hamu na uwe omu kitiinisa.
5 Nahabweki, mufiise ebicweka byanyu eby’omubiri ebiri omu nsi, obukirukuhika ha busiihani,* okutasemera, kulemwa kwetanga obukirukuhika ha kuteerana, okwegomba okubi, hamu n’omururu, kandi oku nukwo kuramya ebisisani. 6 Habw’ebintu ebi, ekiniga kya Ruhanga nikiija. 7 Na inywe nukwo mwayetwazaaga* muti omu bwomeezi bwanyu obwa kara.* 8 Baitu hati musemeriire kweihiraho kimu ebintu binu byona: ekiniga, okubiihirwa, kukora ebintu ebibi, kubaza ebigambo ebirukujuma, n’ebigambo ebirukuhemura bitaliruga omu kanwa kanyu. 9 Mutabiihangana ebisuba. Mujuule omuntu owa ira n’engeso ze, 10 kandi mujwale omuntu omuhyaka, arukufoorwa muhyaka kuraba omu kumanya okuhikire kusigikirra ha kisisani ky’Ogu ayamuhangire, 11 nambere hatali Omuyonaani rundi Omuyudaaya, okusarwa* rundi kutasarwa, omunyaihanga, Omusikuzi,* omwiru, rundi ow’obugabe;* baitu Kristo nuwe byona, omu byona.
12 Nahabweki, nk’abakomerwemu ba Ruhanga abarukwera kandi abarukugonzebwa, mujwale okugonza okw’okusaalirirwa abandi, embabazi, obwebundaazi, obuculeezi, hamu n’okugumiisiriza. 13 Mugumizeemu nimugumiisirizangana, nimuganyirangana, noobu kiraaba ngu omuntu weena aine eki arukujunaana mutaahi we. Nkooku Yahwe* yabaganyiriire kimu, na inywe nukwo mukole muti. 14 Oihireho ebi byona, mujwale okugonza, habwokuba nukwo kugumiza kimu obumu.
15 Ekindi, mwikirize obusinge bwa Kristo buleme omu mitima* yanyu, habwokuba mukeetwa omu businge obu omu mubiri gumu, kandi mwolekege ngu nimusiima. 16 Mwikirize ekigambo kya Kristo kiikale omuli inywe omu bwijwire omu magezi goona, mwikale nimwegesangana, nimugarramungana amaani* nimukozesa zabbuli, nimuzina ebizina eby’okukugiza Ruhanga, nimuzina ebizina eby’omwoyo, ebizinwa kwoleka okusiima, nimuzinira Yahwe* omu mitima yanyu. 17 Kyona eki muraaba nimukora omu bigambo, rundi omu bikorwa, buli kimu kyona mukikolege omu ibara lya Mukama waitu Yesu, nimusiima Ruhanga Isiitwe kuraba omuli uwe.
18 Inywe abakazi, mworoberege baibainywe, nkooku kisemeriire omu Mukama waitu. 19 Inywe abasaija, mwikale nimugonza abakazi banyu kandi mutabakwatirwa ekiniga kingi.* 20 Inywe abaana, mworoberege abazaire banyu omu bintu byona, habwokuba kinu nikisemeza muno Mukama waitu. 21 Inywe baisebaana, mutabiihiza abaana banyu, nukwo batahwamu amaani. 22 Inywe abairu, mworobere abakama banyu ab’omu nsi* omu bintu byona, hatali obu barukuba nibabarora honka habw’okugonza kusemeza abantu, baitu muboorobere kurugira kimu ha mutima, nimutiina Yahwe.* 23 Buli kimu kyona eki muraabaga nimukora, mukikolege n’omutima gwanyu gwona, nk’abarukukikorra Yahwe* hatali abantu, 24 habwokuba mukimanyire ngu Yahwe,* nuwe arukwija kubaha obugwetwa nk’empeera. Mukorre Mukama waitu Kristo, nk’abairu. 25 Hataroho kugurukyagurukya, ogu arukukora ekibi naija kusasurwa habw’ekibi eki akozere, kandi Ruhanga naija kucwera abantu omusango atarukusoroora.