Nitusobora Tuta Kuba Abecumi omu Maiso ga Ruhanga?

Tekerezaaho omuzaire omukazi natekaniza omwana we kugenda ha isomero. Arora ngu ayogere kandi ngu engoye ze nizeera. Kinu kimwikaza ali mwomeezi kandi kyoleka abandi ngu bazaire be nibamufaaho. Omu mulingo nugwo gumu, Isitwe ow’engonzi Yahwe n’agonza tube becumi omu mubiri n’omu ngeso. Obutuba becumi kitugasira kandi kihaisa Yahwe ekitiinisa.

1. Nitusobora tuta kuba becumi omu mubiri?

Yahwe n’atugambira ngu: ‘Mube abarukwera.’ (1 Petero 1:16) Kusobora kuba abarukwera, tusemeriire kuba n’engeso ezisemiire kandi tuli becumi omu mubiri. Nitusobora kuba becumi omu mubiri kurabira omu kwoga buli kiro hamu n’okwikaza engoye zaitu, amaka gaitu hamu n’ebiiruka byaitu biri byecumi. Tusemeriire n’okwikaza Ebyombeko byaitu eby’Obukama biri byecumi. Obutwikara tuli becumi omu mubiri, tuhaisa Yahwe ekitiinisa.​—2 Abakolinso 6:3, 4.

2. Kusobora kuba becumi, ngeso ki ezitusemeriire kwetantara?

Baibuli n’etutererra ngu “tweyogyeho okusisikara kwona okwomubiri nokwomwoyo.” (2 Abakolinso 7:1) Nahabweki, tukora kyona ekirukusoboka kwetantara ekintu kyona ekisobora kusiisa omubiri gwaitu n’ebitekerezo byaitu. Ebitekerezo byaitu bisemeriire kusemeza Yahwe, nahabweki tukora kyona ekirukusoboka kwanga ebitekerezo ebitasemiire. (Zabuli 104:34) Ekindi, tukora kyona ekirukusoboka kubaza kurungi.​—Soma Abakolosai 3:8.

Bintu ki ebindi ebisobora kutufoora abatali becumi omu mubiri n’omu ngeso? Haroho ebintu ebimu ebisobora kusiisa omubiri gwaitu. Nahabweki twetantara ebintu nk’etaaba, amairungi, kandi titukozesa ebitokooza bwongo rundi kukozesa kubi emibazi. Obutubyetantara, tuba n’obwomeezi oburungi kandi twoleka ngu nitutamu ekitiinisa ekisembo eky’obwomeezi. Ekindi, tukora kyona ekirukusoboka kwikara tuli becumi omu ngeso obu nitwetantara engeso ezitasemiire nk’okuzanisa ebicweka eby’ensoni, n’okurora ebisisani eby’orwanju. (Zabuli 119:37; Abefeso 5:5) Nikisobora kuguma kurwanisa engeso zinu, baitu Yahwe n’asobora kutukonyera kuzisingura.​—Soma Isaya 41:13.

YEGA EBIRUKUKIRAHO

3. Kuba becumi omu mubiri kihaisa Yahwe ekitiinisa

Nitusobora kumanya omulingo Yahwe aroramu obwecumi kurabira omu kwekebiija ebiragiro ebiyahaire Isaleri eya kara. Musome Okuruga 19:10 na 30:17-19, hanyuma mubazeeho ebikaguzo binu:

• Enkarra zinu nizooleka ki ha mulingo Yahwe aroramu obwecumi bw’omubiri?

• Osobora kukora ki buli kiro kwikara oli mwecumi omu mubiri?

Kuba mwecumi omu mubiri kitwara obwire hamu n’amaani. Baitu nitusobora kuba becumi katube nitwikara nkaha, tuli baguuda rundi banaku. Mutekeho VIDIYO, hanyuma mubazeeho ebikaguzo ebirukuhonderaho.

VIDIYO: Ruhanga Agonza Abantu Abecumi (4:10)

• Kwikaza ebintu byaitu biri byecumi kandi biteekaniziibwe kurungi kihaisa kita omulimo gwaitu ogw’okutebeza ekitiinisa?

4. Singurra kimu engeso embi

Obw’oraaba okozesa etaaba rundi okozesa ebibazi ebitokooza obwongo, n’omanya omulingo kitanguhire kubireka. Kiki ekisobora kukukonyera? Tekerezaaho omulingo engeso erukukwataho obwomeezi bwawe. Musome Matayo 22:37-39, hanyuma mubazeeho omulingo kukozesa etaaba rundi ebibazi ebitokooza obwongo bikwataho . . .

• Enkoragana y’omuntu na Yahwe

• Eka y’omuntu hamu n’abo abamwetoroire

Kora entekaniza ey’erakukonyera kusingura engeso embi.a Mutekeho VIDIYO.

VIDIYO: Ba n’Okwetanga (2:47)

Musome Abafiripi 4:13, hanyuma mubazeeho ekikaguzo kinu:

• Okusaba butoosa, kwesomesa Baibuli, hamu n’okugenda omu nsorrokano bisobora bita kuha omuntu amaani ag’okusingura engeso embi?

5. Rwanisa ebitekerezo n’engeso ezitasemiire

Musome Abakolosai 3:5, hanyuma mubazeeho ebikaguzo binu:

• Nitukimanya tuta ngu kurora ebisisani eby’orwanju, kusindika obutumwa obw’orwanju, hamu n’okuzanisa ebicweka eby’ensoni ziri ngeso ezitasemiire omu maiso ga Yahwe?

• Notekereza ky’amagezi Yahwe kugonza tube becumi omu ngeso? Habwaki?

Manya omulingo osobora kurwanisa ebitekerezo ebitasemiire. Mutekeho VIDIYO.

VIDIYO: Gira Ekiwakoraho Kwikara Oli Mwecumi (1:51)

Yesu akakozesa ekyokurorraho kwoleka ngu tusemeriire kucweramu kimu kwikara tuli becumi omu ngeso. Musome Matayo 5:29, 30, hanyuma mubazeeho ekikaguzo kinu:

• N’obukiraaba ngu Yesu akaba atarukumanyisa ngu twekole kubi, akooleka ngu tusemeriire kugira ekitwakoraho. Bintu ki omuntu eby’asobora kukora kwetantara ebitekerezo ebitasemiire?b

Obworaaba n’orwana kusingura ebitekerezo ebitasemiire, Yahwe n’asiima habw’amaani orukutamu. Musome Zabuli 103:13, 14, Hanyuma mubazeeho ekikaguzo kinu:

• Obworaaba n’orwanisa engeso ey’etasemiire, ekyahandiikirwe kinu nikikwekambisa kita kwikara n’ogirwanisa?

Kugarukirra tikirukumanyisa ngu olemerwe!

Nikisobora kukwanguhira kutekereza oti, ‘ndemerwe, nahabweki kirungi kubirugaho.’ Baitu tekerezaaho kinu: Omwiruki obwagwa tikimanyisa ngu omuzaano gumulemere, kandi tikirukumanyisa ngu aine kutandika buhyaka. Nikyo kimu, kugarukirra tikirukumanyisa ngu olemerwe kurwanisa engeso embi. Kandi tikirukumanyisa ngu amaani oikaire n’otamu gafiire busa. Kugarukirra kiri kimu ha bintu eby’osobora kurabamu kuhika ha businguzi. Otajwaha, Yahwe n’asobora kukukonyera kusingura engeso embi.

OYEGERE KI?

Tusemeza Yahwe obutwikaza emibiri yaitu, ebitekerezo byaitu, n’engeso zaitu, biri byecumi.

Kweijukyamu

• Habwaki kikuru muno kuba becumi?

• N’osobora ota kuba mwecumi omu mubiri?

• N’osobora ota kwikaza ebitekerezo n’engeso zaawe biri byecumi?

SERULIIRIZA

Bintu ki ebyanguhire eby’osobora kukora kuba mwecumi omu mubiri n’obworaaba oli munaku?

Obuyonjo n’Obwecumi​—Kunaaba mu Ngaro (3:01)

Manya ebintu eby’osobora kukora kuleka kunywa etaaba.

“Omulingo Osobora Kuleka Etaaba” (Awake!, eya Maayi 2010)

Manya ebibi ebiruga omu kurora ebisisani eby’orwanju.

“Ebisisani eby’Orwanju by’Akabi?” (Watchtower, eya Agusto 1, 2013)

Manya omulingo omusaija omu y’asoboire kuleka kurora ebisisani eby’orwanju.

“Nkagarukirra Emirundi Nyingi Ntakasingwire” (Watchtower Na. 4 2016)