EKICWEKA KY’OKWEGA 15
EKIZINA 30 Ise Nyowe, Ruhanga Wange, Kandi Enganjani Yange
Kwirra Haihi na Ruhanga Kirungi Hali Itwe!
“Baitu kisemeriire nyowe okuirra haihi Ruhanga.”—ZAB. 73:28.
EBI TURAYEGA
Nitwija kurora omulingo tusobora kwirra haihi na Ruhanga hamu n’emigisa ei tutunga obu tumwirra haihi.
1-2. (a) Nikitwetaagisa kukora ki kusobora kufooka munywani w’omuntu nfenanfe? (b) Kiki eki turukwija kubazaaho mu kicweka kinu?
OINE munywani waawe nfenanfe? Kiki eki wakozere kurora mwafooka banywani? N’osobora kuba wamazire na uwe obwire, wamanya ebi arukurabamu kandi wamanya kurungi ebi agonza n’ebi atagonza. Okakyetegereza ngu aine emiringo enungi ei wakugondeze kumwegeraho. Kandi okatandika kumugonza.
2 Kuba munywani w’omuntu nfenanfe nikyetaagisa kutamu obwire n’amaani. Omu mulingo nugwo gumu, nikyetaagisa kutamu obwire n’amaani, kusobora kufooka banywani nfenanfe aba Yahwe Ruhanga. Omu kicweka kinu nitwija kubazaaho omulingo tusobora kwirra haihi na Ruhanga n’ebirungi ebirugamu obu tumwirra haihi. Baitu leka tubanze twetegereze habwaki kirungi kwirra haihi na munywani waitu nfenanfe Yahwe.
3. Habwaki tusemeriire kwecumitirizaaho ebirungi ebiruga omu kwirra haihi na Yahwe? Soborra.
3 Hataroho kugurukyagurukya noikiriza ngu kwirra haihi na Yahwe kirungi. Baitu kwecumiitirizaaho omulingo kiri kirungi nikisobora kutwekambisa kugumizaamu nitumwirra haihi. (Zab. 63:6-8) Ekyokurorraho, tukimanyire ngu kulya ebyokulya ebirumu ebiriisa ebirukwahukana, kukora ebisasaizi, kuhuumura ekirukumara, hamu n’okunywa amaizi agarukumara kitukonyera kuba n’obwomeezi oburungi. Baitu nabwo abantu baingi tibateekerezaaho ebintu binu, kandi ekirugamu tibafaaho obwomeezi bwabo. Baitu, obu twikara nitutekerezaaho omulingo ebintu binu bitukonyera, tweyongerra kimu kugonza kubikora. Omu mulingo nugwo gumu, nitusobora kukimanya ngu kwirra haihi na Yahwe kiri kintu ekirungi hali itwe, baitu obu twecumiitirizaaho ebirungi ebiruga omu kukikora, kitwekambisa kugumizaamu nitwirra haihi na uwe.—Zab. 119:27-30.
4. Kiki omuhandiiki wa Zabuli 73:28, eki yagambire?
4 Soma Zabuli 73:28. Omuhandiiki wa Zabuli 73 akaba ali Mulevi ow’akaba akomerwe kuheereza nk’omuzini ha yekaru ya Yahwe. Naasobora kuba akaba aheeriize Yahwe n’obwesigwa kumara akasumi. Baitu nabwo akaba naakyayetaaga kwijuka n’okwijukya abandi ngu ‘kwirra haihi na Ruhanga’ kikaba kirungi hali uwe hamu na bo. Birungi ki ebirugamu obu twirra haihi na Ruhanga?
‘KWIRRA HAIHI NA RUHANGA’ KIREETA OKUSEMERERWA
5. (a) Habwaki nitugamba ngu kwirra haihi na Yahwe kituleetera okusemererwa? (b) Bazaaho ebyokurorraho ebimu ebirukusangwa omu Enfumo 2:6-16, ebirukwoleka omulingo amagezi ga Yahwe gasobora kukugasira kandi gakakulinda hali akabi.
5 Obu turayeyongera kwirra haihi na Yahwe nitwija kweyongera kutunga okusemererwa. (Zab. 65:4) Haroho ensonga nyingi muno habwaki nitugamba tuti. Obu tusoma ebintu ebi arukutugambira omu Baibuli kandi tukabiteeka omu nkora, tufooka bantu ab’amagezi. Ebintu Yahwe atwegesa nibisobora kutulinda hali abantu ababi kandi bikatukonyera kutakora ensobi ez’amaani. (Soma Enfumo 2:6-16.) Egi niyo ensonga habwaki Baibuli egamba eti: “Anyina omugisa omuntu ogu azora amagezi, nomuntu arukutunga okwetegereza.”—Nfu. 3:13.
6. Kiki ekyaleetiire omuhandiiki wa zabuli kuburwa okusemererwa?
6 Kyamananu ngu abaheereza ba Yahwe obwire obumu na bo bahurra enaku. Omuhandiiki wa Zabuli 73 akaburwa okusemererwa obu yatandikire kutekerezaaho ebintu ebi akaba naarora nk’ebitali by’obwinganiza. Akatandika kuteekereza ngu abantu ababi bakaba baine obwomeezi oburungi n’obu kiraaba ngu bakaba batarukufayo kuheereza Ruhanga rundi kumworobera kandi kinu kikamuleetera kukwatwa ekiniga. Ekindi, akatandika kwegomba kutunga ebintu ebi bakaba baine. Akateekereza ngu abantu abakaba nibagonza kurwana kandi ab’emyehembo bakaba nibatunga buli kimu kyona eki barukugonza, baine obwomeezi oburungi kandi batarukubonabona. (Zab. 73:3-7, 12) Omuhandiiki wa zabuli onu akakwatwaho muno yahika na ha rulengo rw’okuteekereza ngu akaba naasiisa obwire kuheereza Yahwe. Akabiihirwa muno kandi yagamba ati: “Mananukwo nkasemereza busa omutima gwange ninabisa engaro zange okutasiisa.”—Zab. 73:13.
7. Nitusobora tuta kusingura enaku ey’amaani ey’esobora kutumaraho okusemererwa kwaitu? (Rora ekya ha kyesweko.)
7 N’obu kiraaba ngu omuhandiiki wa zabuli akaba asaaliirwe muno, aine eki yakozereho kuhindura entekereza ye. ‘Akataaha harukwera wa Ruhanga,’ nambere Yahwe yaterekeriize entekereza ye. (Zab. 73:17-19) Habwokuba Yahwe munywani waitu akimanya obu tuba tusaaliirwe. Obu tumusaba kandi tukaikiriza obukonyezi obu arukutuha kuraba omu Kigambo kye hamu n’ekitebe, nitwija kutunga amaani ag’okugumira enaku. N’obu tuhurra twetuntwire muno, Yahwe atuhuumuza.—Zab. 94:19.a
Omulevi ayahandiikire Zabuli 73, ayemeriire “harukwera wa Ruhanga” (Rora akacweka 7)
‘KWIRRA HAIHI NA RUHANGA’ KITUKONYERA KUTUNGA OKUNIHIRA N’EKIGENDERERWA OMU BWOMEEZI
8. Miringo ki endi enkuru ei tugasirwamu obu twirra haihi na Yahwe?
8 Haroho emiringo endi ebiri ei tugasirwamu obu twirra haihi na Yahwe. Ogw’okubanza, kitukonyera kuba n’obwomeezi oburungi. Ogwa kabiri, tutunga okunihira okugumire okw’akasumi ak’omumaiso. (Yer. 29:11) Leka tubazeeho emiringo enu omu bwijwire.
9. Kwirra haihi na Yahwe kitukonyera kita kutunga obwomeezi oburumu okusemererwa?
9 Kwirra haihi na Ruhanga kitukonyera kutunga obwomeezi oburungi. Abantu baingi kasumi kanu batekereza ngu Ruhanga taroho, nahabweki tibamanyire habwaki abantu bali omu nsi kandi nibatekereza ngu omu kasumi ak’omumaiso abantu nibaija kuhwaho. Baitu kusigikirra ha bitwegere kuruga omu Kigambo kya Ruhanga, nitukigumya ngu Ruhanga ‘aroho kwo kandi aha empeera abo abanyakumuserra.’ (Baheb. 11:6) Ekindi, Yahwe akatuhanga n’ekyetaago eky’okumuheereza nahabweki obu tumuheereza tutunga okusemererwa kwonyini.—Bir. 10:12, 13.
10. Kusigikirra ha Zabuli 37:29, kiki Yahwe eki araganiize abo abataire okunihira kwabo omuli uwe?
10 Abantu baingi kasumi kanu tibaine kunihira kwonyini okw’omu kasumi ak’omumaiso, ekintu kyonka eki bateekaho omutima nikyo kukora, kutaaha obuswere, kuzaara abaana n’okweyahurra sente ezirabakonyera obu baraleka kukora. Tibateekerezaaho Ruhanga. Kwahukanaho na bo abaheereza ba Yahwe bataire okunihira kwabo omuli uwe. (Zab. 25:3-5; 1 Tim. 6:17) Nitwesigwa Ruhanga waitu kandi munywani waitu, kandi nitwesigwa byona ebi aturaganiize. Tulindiriire ebintu bingi muno ebirungi omu kasumi ak’omumaiso kukira muno okumuramya ebiro n’ebiro omu rugonjo orurungi.—Soma Zabuli 37:29.
11. Kwirra haiha na Ruhanga kitugasira kita kandi uwe kimuleetera kwehurra ata?
11 Haroho n’emiringo endi nyingi ei tugasirwamu obu twirra haihi na Ruhanga. Ekyokurorraho, Yahwe naaturaganiza ngu naija kutuganyira ebibi byaitu obu twegarukamu. (Is. 1:18) Nahabweki titusemeriire kwikara nitwejunaana habw’ebibi ebi twakozere kara. (Zab. 32:1-5) Kandi kisemeza muno Yahwe obu tumwirra haihi. (Nfu. 23:15) Nosobora n’okutekerezaaho emigisa endi ey’eruga omu kuba n’enkoragana enungi na Ruhanga. Baitu nosobora ota kugumizaamu noirra haihi na Ruhanga?
OMULINGO TUSOBORA KUGUMIZAAMU ‘NITWIRRA HAIHI NA RUHANGA’
12. Bintu ki ebi tukozere kusobora kwirra haihi na Ruhanga?
12 Obu tukaba tutakabatiziibwe nka bamu h’Abakaiso ba Yahwe, twine ebintu bingi ebi twakozere kusobora kufooka banywani ba Yahwe. Tukeega amananu agarukukwata hali Yahwe Ruhanga na Yesu Kristo, twayegarukamu ebibi byaitu, twagumya okwikiriza kwaitu omuli Ruhanga, kandi twakora kyona ekirukusoboka kutwaza obwomeezi bwaitu nk’oku arukugonza. Baitu kusobora kweyongera kwirra haihi na Ruhanga, tusemeriire kugumizaamu nitukora ebintu binu.—Bak. 2:6.
13. Bintu ki bisatu ebisobora kutukonyera kugumizaamu nitwirra haihi na Yahwe?
13 Kiki ekiratukonyera kugumizaamu nitwirra haihi na Yahwe? (1) Tusemeriire kugumizaamu nitusoma Baibuli kandi nitugyesomesaaho. Obu turaaba nitusoma Baibuli kandi nitugyesomesa, ekigendererwa kyaitu tikisemeriire kugarukira ha kumanya ebirukukwata hali Ruhanga kyonka, baitu n’okulengaho kumanya Ruhanga eki arukugonza tukole kandi n’okuhondera emisingi ye ey’erukusangwa omu Kigambo kye Baibuli. (Bef. 5:15-17) (2) Tusemeriire kugumya okwikiriza kwaitu kuraba omu kuteekerezaaho obwakaiso bwona oburukwoleka okugonza kwe hali itwe. (3) Tusemeriire kugumizaamu nitunoba ebintu byona ebibiihiza Yahwe kandi twetantale kuba banywani b’abantu abarukubikora.—Zab. 1:1; 101:3.
14. Kusigikirra hali 1 Abakolinso 10:31, bintu ki ebimu ebi tusemeriire kukora omu bwomeezi bwaitu obwa buli kiro kusobora kusemeza Yahwe? (Rora n’ebisisani.)
14 Soma 1 Abakolinso 10:31. Kikuru muno kugumizaamu nitwekamba kukora ebintu ebirukusemeza Yahwe. Kinu tikirukugarukira ha kugenda omu buheereza n’omu nsorrokano. Ebikorwa ebirungi ebirukusemeza Yahwe nibitwarramu ebintu ebi tukora omu bwomeezi bwaitu obwa buli kiro. Ekyokurorraho, tusemeza Yahwe obu tuba besigwa omu byona n’obu tuba bantu abagabi. (2 Kol. 8:21; 9:7) Ekindi, Yahwe naagonza twoleke okusiima habw’ekisembo eky’obwomeezi eki atuhaire. Nahabweki, tusemeriire kwegendereza ebyokulya ebi tulya, n’ebyokunywa ebi tunywa kandi tukole n’ebintu ebindi ebi tukonyera kuba n’obwomeezi oburungi. Yahwe naija kweyongera kutugonza obu araarora nituteekamu amaani kumusemeza n’omu bintu ebirukuzooka nk’ebitaito.—Luk. 16:10.
Emu ha miringo tusobora kusemezaamu Yahwe niyo kuvuga n’obwegendereza, kwefaaho kuraba omu kukora ebisasaizi, kulya ebyokulya ebirumu ebiriisa by’embaganiza hamu n’okuba bantu abagabi (Rora akacweka 14)
15. Yahwe naatunihirramu kutwaza tuta abandi?
15 Yahwe agirra embabazi abahikiriire n’abatahikiriire. (Mat. 5:45) Kandi na itwe naatunihirramu kwoleka abandi embabazi. Ekyokurorraho, tusemeriire ‘okutajumaga omuntu wena, okutarwanaga, . . . nitwoleka okuculera kwona hali abantu boona.’ (Tit. 3:2) Nahabweki, titusemeriire kurabyamu abandi amaiso ngu habwokuba tibali baheereza ba Yahwe. (2 Tim. 2:23-25) Tweyongera kwirra haihi na Yahwe obu twikara nitutwaza abandi omu mulingo ogw’embabazi.
NITUSOBORA KWIRRA HAIHI NA YAHWE N’OBU TUKORA ENSOBI
16. Omuhandiiki wa Zabuli 73 akatandika kwehurra ata hanyuma y’akasumi?
16 Obwire obumu nosobora kwehurra ngu tokyali haihi na Yahwe habw’ensobi ezi wakozere. Nk’oku tusangirwe turozere, eki nikyo kyahikire hali omuhandiiki wa Zabuli 73. Akagamba ati: “Ebigere byange bikaba bimalize okugwa; okugenda kwange kukaba kuli haihi nokuterra.” (Zab. 73:2) Akagamba ngu akaba atandikire kusarra, atarukwetegereza nk’ekisoro omu maiso ga Yahwe. (Zab. 73:21, 22) Tugambe ngu akateekereza ngu Yahwe akaba atakyamugonza kandi ngu akaba atarukwija kumuganyira habw’enteekereza ye ey’etahikire?
17. (a) N’obu kiraaba ngu omuhandiiki wa zabuli akaba ahoirwemu muno amaani, kiki eki yakozere? (b) Isomo ki eri turukwegera ha kyokurorraho kye? (Rora n’ebisisani.)
17 Omuhandiiki wa zabuli obu araaba yayehuliire ngu Yahwe takyamugonza, enyehurra enu n’esobora kuba ekaba eri y’akacu kake. Nikizooka ngu obu akaba ahoirwemu amaani, akakyetegereza ngu asemeriire kwongera kwirra haihi na Ruhanga nk’oku kirukwolekwa omu bigambo bye. Akagamba ati: “Baitu nyowe ndi hamu naiwe [Yahwe] obutosa: onkwasire omukono gwange ogwobulyo. Oranterekerezaga namagezi gawe, hanyuma olintahya omu kitinisa.” (Zab. 73:23, 24) Na itwe tusemeriire kusaba Yahwe atugumye obu tuba nitwehurra ngu okwikiriza kwaitu kucekere rundi obu tuhurra tuhoirwemu amaani habw’ensobi ezi twakozere. (Zab. 73:26; 94:18) N’obu tukora ensobi ez’amaani nitusobora kugaruka hali Yahwe kandi tukigumye ngu arahuka kuganyira. (Zab. 86:5) Kukira muno tusemeriire kwirra haihi na Ruhanga obu turukuba tuhoirwemu amaani.—Zab. 103:13, 14.
Obu tuba nituhurra tucekere omu by’omwoyo, tusemeriire kwirra haihi na Yahwe kuraba omu kwongera ha mirundi ei tusaba hamu n’okwejumbira omu nsorrokano butoosa (Rora akacweka17)
‘KWIRRA HAIHI NA RUHANGA’ EBIRO N’EBIRO
18. Habwaki nitusobora kugumizaamu nitwirra haihi na Yahwe habw’ebiro n’ebiro?
18 Nitusobora kwikara nitwirra haihi na Yahwe habw’ebiro n’ebiro. Titulireka kumwegaho. Baibuli egamba ngu emihanda ya Yahwe, okumanya kwe hamu n’amagezi “ka bihamire!”—Bar. 11:33.
19. Zabuli n’etugumya eta?
19 Omu Zabuli 79:13 nihagamba ngu: “Naitwe abantu bawe kandi entama ezomu irisizo lyawe, turakusimaga ebiro byona: turayolekaga okukugizibwa kwawe obusinge bwona.” Obu oraikara noirra haihi na Yahwe, na iwe noija kukigumya ngu naija kukuha emigisa ebiro n’ebiro kandi n’obumanzi ogambe ngu: ‘Ruhanga nuwe mwandara gw’omutima gwange n’omugabo gwange ogw’ebiro byona.’—Zab. 73:26.
EKIZINA 32 Heereza Yahwe n’Obwesigwa!
a Abantu abamu abaikara benuubire, betuntwire rundi baine enaku kumara akasumi basemeriire kuserra obukonyezi bwa badakitaali. Kumanya ebirukukiraho, rora Omunaara gw’omulinzi, Na. 1 2023.