‘Mwecweremu Inywenka Ou Muraheereza’

1. Kiki eki tusemeriire kukora kusobora kutunga okusemererwa kwonyini kandi habwaki? (Isaya 48:​17, 18)

ISIITWE ow’omu iguru naatugonza muno, kandi naagonza twegondeze omu bwomeezi hati n’omu kasumi ak’omumaiso. (Mug. 3:​12, 13) Akatuhanga n’obusobozi obw’okukora ebintu ebirukuhuniiriza baitu atatuhe obusobozi obw’okwerema rundi kweteraho endengo ezirukukwata ha kihikire n’ekitahikire. (Mug. 8:9; Yer. 10:23) Akimanyire ngu kusobora kutunga okusemererwa kwonyini, tusemeriire kumuheereza n’okuhondera endengo ze.—Soma Isaya 48:​17, 18.

2. Kiki Sitaani eki arukugonza twikirize kandi kiki Yahwe eki akozere?

² Sitaani naagonza tuteekereze ngu nitusobora kutunga okusemererwa tutarukuheereza Yahwe, kandi ngu abantu nibasobora kuba basinguzi kakuba beerema. (Kub. 3:​4, 5) Kusobora kwoleka ngu Sitaani eki yabalize kisuba, Yahwe aikiriize abantu kwerema kumara akasumi. Nikyeyolekera kimu ngu abantu tibasobora kwerema. Baitu nabwo omu Baibuli harumu ebyokurorraho bingi eby’abasaija n’abakazi abaatungire okusemererwa omu kuheereza Yahwe. Kandi ekyokurorraho ekirukukirayo nikyo ekya Yesu Kristo. Omu kicweka kinu nitwija kurora ensonga habwaki Yesu Kristo yacwiremu kuheereza Yahwe. Kandi hanyuma nitwija kurora ensonga habwaki tusemeriire kuramya Isiitwe ow’omu iguru. Kandi ha kumalirra nitwija kurora ensonga ezimu habwaki nitucwamu kuheereza Yahwe.

ENSONGA HABWAKI YESU YACWIREMU KUHEEREZA YAHWE

3. Kiki Sitaani eki yahaire Yesu, baitu kiki Yesu eki yacwiremu kukora?

³ Yesu obu akaba ali omu nsi akaba aine kucwamu nooha ow’araheereza. Hanyuma y’akaire kake Yesu amazire kubatizibwa, Sitaani akamugambira ngu naija kumuha obukama bwona obw’ensi kakuba amuramya. Yesu akamugarukamu ati: “Genda Sitaani, kikahandiikwa ngu: ‘Yahwe Ruhanga waawe nuwe osemeriire kuramya, kandi nuwe wenka ou osemeriire kuheereza.’” (Mat. 4:​8-10) Habwaki Yesu yakozere encwamu ya mulingo ogu? Wetegereze zimu ha nsonga ezaamuleetiire kukora encwamu egi

4-5. Nsonga ki ezimu ezaleetiire Yesu kucwamu kuheereza Yahwe?

⁴ Ensonga enkuru eyaletiire Yesu kucwamu kuheereza Yahwe niyo ngu habwokuba naagonza muno Ise. (Yoh. 14:31) Ekindi, Yesu naaheereza Yahwe habwokuba nikyo ekintu eki asemeriire kukora. (Yoh. 8:​28, 29; Kus. 4:11) Akimanyire ngu Yahwe nuwe Ensoro y’obwomeezi, mwesigwa kandi mugabi. (Zab. 33:4; 36:9; Yak. 1:17) Yahwe akaba amazire akasumi naabaliza Yesu amananu kandi akaba amuhaire buli kimu kyona eki akaba aine. (Yoh. 1:14) Baitu kwahukanaho na Yahwe, Sitaani aletiire abantu ekibi n’okufa. Sitaani mubiihi w’ebisuba ow’aine omururu kandi ow’arukwegondeza wenka. (Yoh. 8:44) Habwokuba Yesu akaba amanyire kurungi Yahwe na Sitaani, akaba atarukugonza kuba nka Sitaani obu naajeemera Yahwe.—Baf. 2:​5-8.

⁵ Ensonga endi eyaletiire Yesu kucwamu kuheereza Yahwe niyo ngu akateeka omutima ha bintu ebirungi ebikaba nibiija kurugamu habw’okwikara ali mwesigwa hali Yahwe. (Baheb. 12:2) Akaba akimanyire ngu obu yakwikaire ali mwesigwa akaba naija kweza ibara lya Ise kandi amaleho okubonabona okuleserweho Sitaani.

ENSONGA HABWAKI TUSEMERIIRE KURAMYA YAHWE

6-7. Habwaki abantu baingi kasumi kanu batarukuheereza Yahwe, baitu habwaki nuwe wenka ou tusemeriire kuramya?

⁶ Abantu baingi kasumi kanu tibarukuheereza Yahwe habwokuba tibarukumanya emiringo ye enungi kandi tibarukumanya ebintu ebirungi ebi abakoliire. Nibasisana n’abantu ab’omu Asene Paulo abayatebiize. Na bo bakaba batarukumanya Ruhanga.—Ebik. 17:​19, 20, 30, 34.

⁷ Paulo akasoborra abantu ab’omu Asene ngu Ruhanga ow’amananu “nuwe aha abantu boona obwomeezi, orwoya orw’okwikya, n’ebintu byona.” Akongera yagamba ati: “Habwokuba habwe, twine obwomeezi, nitugenda kandi turoho.” Ruhanga nuwe Omuhangi waitu ayakozere “kuruga omu muntu omu abantu ab’amahanga goona.” Nahabweki nuwe wenka ou tusemeriire kuramya.—Ebik. 17:​25, 26, 28.

8. Kiki Yahwe eki atasobora kukora, kandi ayolekere ata ngu naatugonza?

⁸ Yahwe naasobora kutuhambiriza kumuheereza habwokuba nuwe Muhangi kandi Omulemi w’iguru n’ensi. Baitu eki Yahwe tasobora kukikora. Oihireho atuhaire obwakaiso oburukwoleka ngu aroho kandi ngu naagonza muno buli omu hali itwe. Kinu kitukonyera kwecweramu kumuheereza rundi nangwa. Naagonza abantu boona babe banywani be habw’ebiro n’ebiro. (1 Tim. 2:​3, 4) Egi niyo ensonga habwaki Yahwe naatutendeka kwegesa abandi ha kigendererwa kye n’okubagambiraho ebintu ebirungi ebi alibakorra. (Mat. 10:​11-13; 28:​19, 20) Atuteriireho ebitebe nambere tusobora kumuramiza kandi atuteriireho n’abagurusi abarukuturolerra omu by’omwoyo.—Ebik. 20:28.

9. Yahwe ayolekere ata ngu naagonza abantu boona?

⁹ Okugonza kwa Yahwe nikweyolekera ha mulingo atwazaamu abantu abanga kwikiriza ngu aroho kwo. Tekerezaaho kinu, kumara emyaka nyingi obuhumbi bw’abantu bacwiremu kweteraho endengo ezirukukwata ha kihikire n’ekitahikire. Baitu n’obu kiraaba kiri kiti, Yahwe abahaire buli kimu kyona eki barukwetaaga kusobora kwikara baine obwomeezi oburungi n’okubwegondezaamu. (Mat. 5:​44, 45; Ebik. 14:​16, 17) Abahaire obusobozi obw’okutunga abanywani, kutunga amaka n’okwegondeza omu birungi ebi batunga habw’okukora n’amaani. (Zab. 127:3; Mug. 2:24) Obwakaiso nibwoleka kurungi ngu Isiitwe ow’omu iguru agonza abantu boona. (Kurug. 34:6) Hati leka tweyijukyemu zimu ha nsonga ezituleetera kuheereza Yahwe hamu n’omulingo aha omugisa abo abacwamu kumuheereza.

ENSONGA HABWAKI TUCWAMU KUHEEREZA YAHWE

10. (a) Nsonga ki enkuru ey’etuleetera kuheereza Yahwe? (Matayo 22:37) (b) Nikikuleetera kwehurra ota kukimanya ngu Yahwe naakwetegereza kurungi kandi ngu akuganyira? (Zabuli 103:​13, 14)

¹⁰ Kusisanaho na Yesu, nituheereza Yahwe habwokuba nitumugonza muno. (Soma Matayo 22:37.) Obu twegaho emiringo ye, kituleetera kugonza kumwirra haihi. Ekyokurorraho, teekerezaaho okuganyira kwa Yahwe. N’obu kiraaba ngu Abaisaleri bakamujeemera emirundi nyingi, akabesengereza naagamba ati: “Mugaruke hati bunu nimuleka omuntu wena omuhandagwe omubi.” (Yer. 18:11) Na itwe n’obu kiraaba ngu tukora ensobi nyingi, Yahwe aikara naatuganyira habwokuba naijuka nk’oku tuli bantu abatahikiriire kandi nk’oku tuli cuucu. (Soma Zabuli 103:​13, 14.) Mali kituleetera kugonza kuheereza Yahwe ebiro n’ebiro obu twecumitirizaaho okugumisiriza kwe hamu n’emiringo ye endi enungi.

11. Nsonga ki ezindi ezituleetera kucwamu kuheereza Yahwe?

¹¹ Ekintu ekindi ekituleetera kuheereza Yahwe nikyo ngu kiri kintu eki tusemeriire kukora. (Mat. 4:10) Kandi tukimanyire ngu kakuba twikara tuli besigwa hali Yahwe, nihaija kurugamu ebintu bingi ebirungi. Ekyokurorraho, obu twikara tuli besigwa hali Yahwe, tweza ibara lye, twoleka ngu Sitaani mubiihi w’ebisuba, kandi tusemeza omutima gwe. Kandi kakuba tucwamu kuheereza Yahwe kasumi kanu, nitwija kutunga okunihira okw’okumuheereza ebiro n’ebiro!—Yoh. 17:3.

12-13. Kiki eki turukwegera ha kyokurorraho kya Jane na Pam?

¹² Obu turukuba tukyali bato, nitusobora kukurakuraniza okugonza okw’amaani oku twiniire Yahwe, kandi nk’oku orayeyongera kukura, nukwo orayeyongera kugonza Yahwe. Teekerezaaho ekyokurorraho kya Jane na mugenzi we Pam.a Jane akaba aine emyaka 11 kandi Pam akaba aine emyaka 10 nambere baatandikiire kwega Baibuli. N’obu kiraaba ngu abazaire baabo bakaba batarukugonza kwega Baibuli, bakaikiriza bahara babo kugumizaamu nibeega Baibuli n’Abakaiso ba Yahwe ekikuru kakuba bataleka kugenda ha kanisa n’abazaire baabo ha wiikendi. Jane naagamba ati: “Ebintu Abakaiso ba Yahwe banyegeseze kuruga omu Baibuli, bikankonyera kwangirra okusindikirizibwa okw’okukozesa ebitokooza bwongo hamu n’obusiihani.”

¹³ Hanyuma y’emyaka nke, boona bakafooka batebezi. Kandi hanyuma y’akasumi bakatandika kuheereza nka bapayoniya ha murundi nugwo gumu nibarolerra abazaire babo abakuzire omu myaka. Jane obu atekerezaaho ebi baarabiremu, naagamba ati: “Nkakyerorra ngu Yahwe afaaho banywani be, kandi nk’oku 2 Timoseo 2:19 hagamba, ‘Yahwe amanyire abe.’” Hataroho kugurukyagurukya, Yahwe afaaho abo abamugonza kandi abamuheereza!

14. Nitusobora tuta kurwanirra Yahwe? (Rora n’ebisisani.)

¹⁴ Nitugonza abantu boona kukimanya ngu ebintu byona ebibi ebi bahuliire hali Ruhanga tigali mananu. Tekerezaaho ekyokurorraho kinu: Oine omunywani nfenanfe, ow’aine embabazi, omugabi kandi ow’arukuganyira. Kiro kimu ohurra omuntu ondi naagamba ngu munywani waawe mukaali kandi mugobya. Kiki eki osobora kukora? N’omurwanirra. Omu mulingo nugwo gumu, Sitaani n’abantu be, obu balengaho kusiisa ibara lya Yahwe obu nibamubazaaho ebisuba, tumurwanirra kuraba omu kugambira abantu amananu agarukumukwataho. (Zab. 34:1; Is. 43:10) Twoleka ngu nitugonza kuheereza Yahwe n’omutima gwaitu gwona kuraba omu bigambo n’omu bikorwa.

15. Omukwenda Paulo akagasirwa ata habw’okukora empindahinduka omu bwomeezi bwe? (Abafiripi 3:​7, 8)

¹⁵ Nitugonza kukora empindahinduka omu bwomeezi bwaitu nukwo tuheereze Yahwe omu mulingo ogu arukusiima rundi twongere ha buheereza bwaitu. Ekyokurorraho, omukwenda Paulo akalekaho ekiikaro eky’amaani eki akaba aine omu diini ey’Ekiyudaaya nukwo asobole kufooka omuhondezi wa Kristo kandi omuheereza wa Yahwe. (Bag. 1:14) Ekyarugiremu, akaba n’obwomeezi oburumu okusemererwa kandi yatunga omugisa ogw’okulema hamu na Kristo omu iguru. Paulo ateyijukye habw’encwamu ei yakozere ey’okuheereza Yahwe, kandi na itwe titurukwija kweyijukya.—Soma Abafiripi 3:​7, 8.

16. Kiki eki turukwegera ha kyokurorraho kya Julia? (Rora n’ebisisani.)

¹⁶ Kakuba twebembeza okuramya Yahwe omu bwomeezi bwaitu, nitwija kutunga okusemererwa hati n’omu kasumi ak’omumaiso. Teekerezaaho ekyokurorraho kya munyaanya itwe ow’arukwetwa Julia. Julia akaba ali omu kwaya y’ekanisa obu akaba akyali mwisiki omuto kandi atakeegere amananu. Omuzini omu ow’amaani akarora ekisembo kye eky’okuzina kandi yatandika kumutendeka. Omu kaire kake Julia akafooka rurangaanwa kandi yatandika n’okuzinira omu biikaro eby’amaani. Kiro kimu obu akaba ali omu isomero erikaba limanyirwe omu kutendeka abantu kuzina, omwegi mutaahi we akatandika kubazaaho Ruhanga kandi yamusoborra ngu Ruhanga aine ibara kandi niryo Yahwe. Omu kaire kake, Julia akatandika kwega Baibuli emirundi ebiri buli wiiki. Hanyuma akateeka omutima ha kuheereza Yahwe omu kiikaro ky’okufooka omuzini rurangaanwa. Baitu encwamu egi ekaba etanguhire, naagamba ati. “Abantu baingi bakangambira ngu nkaba ninsiisa ekisembo kyange, baitu nyowe nkaba ningonza kukozesa obwomeezi bwange bwona kuheereza Yahwe.” Hati naayehurra ata kasumi kanu habw’encwamu ei yakozere emyaka ey’erukuhingura omu 30 enyuma? Naagamba ati: “Nyine obusinge omu biteekerezo kandi ninkigumya ngu Yahwe naija kuhikiriza byona omutima gwange ebi gwegomba omu kasumi ak’omumaiso.”—Zab. 145:16.

GUMIZAAMU NOHEEREZA YAHWE

17. Kukimanya ngu hasigaireyo akacu kake muno empero y’obusinge bunu ehike, nikikwataho kita abo abacwiremu kuheereza Ruhanga hamu n’abo abatakatandikire kumuheereza?

¹⁷ Tuli haihi muno kuhika ha mpero ey’obusinge bunu. Omukwenda Paulo akahandiika ati: “Baitu hasigaireho akacu kake muno, arukuija aliija, kunu taliikara.” (Baheb. 10:37) Kinu nikimanyisa ki? Hasigaireyo obwire buke muno abantu abatakatandikire kuheereza Yahwe kucwamu kumuheereza. (1 Kol. 7:29) Kandi obu turaaba tumazire ira kukora encwamu ey’okuheereza Ruhanga, n’obu kiraaba ngu nitwija kuhikwaho ebirengo, nitukimanya ngu nibiija kubaho habw’akacu kake muno.”

18. Kiki Yesu na Yahwe eki barukugonza tukole?

¹⁸ Yesu akekambisa abantu kufooka baheereza be kandi n’okugumizaamu nibamuhondera. (Mat. 16:24) Nahabweki obu turaaba twikaire nituheereza Yahwe kumara emyaka nyingi, leka tucweremu kimu kugumizaamu nitumuheereza. Kyetaagisa kuteekamu amaani kugumira ha ncwamu yaitu ey’okuheereza Yahwe. Eki nikisobora kutanguha, baitu kakuba tukikora, nitwija kutunga emigisa nyingi ey’eruga omu kumuheereza n’omu kasumi kanu!—Zab. 35:27.

19. Kiki eki turukwegera ha kyokurorraho kya Gene?

¹⁹ Abamu behurra ngu kakuba baheereza Yahwe, tibarukwija kwegondeza omu bwomeezi. Obu oraaba oli muto, noyehurra ngu kakuba ocwamu kuheereza Yahwe, torukwija kwegondeza omu bwomeezi? Ow’oruganda omu omuto, ow’arukwetwa Gene naagamba ati: “Nayehurraga ngu nkaba ntarukusobora kwegondeza omu bwomeezi habw’okuba omu h’Abakaiso ba Yahwe. Abaana abato aba nakuzire na bo baazookaga nk’abarukwegondeza omu kugenda omu bidongo, kugonza abaisiki n’aboojo, n’okuzaana emizaano eya vidiyo enyakurumu ebikorwa by’okurwana. Baitu nyowe ekintu kyonka eki nakoraga nukwo kugenda omu nsorrokano n’omu buheereza.” Enteekereza enu ekakwataho eta Gene? Naagamba ati: “Nkatandika kukora ebintu ebibi abato ab’emyaka yange ebi baakoraga. Ha kubanza nkabyegondezaamu baitu bitandetere okusemererwa kwonyini. Nkatandika kutekerezaaho ebirungi ebiruga omu kukora ebintu Baibuli ebi egamba kandi nacwamu kuheereza Yahwe n’omutima gwange gwona. Kuruga kasumi ako, Yahwe aikaire naagarukamu haihi buli saara yange yona.”

20. Kiki eki tusemeriire kucweramu kimu kukora?

²⁰ Omuhandiiki wa zabuli akazinira Yahwe ati: “Ayina omugisa omuntu owokoma, owoiriza holi, aikalege omu zigati zawe.” (Zab. 65:4) Leka na itwe tucweremu kimu nk’oku Yosuha yacwiremu obu yagambire ati. ‘Baitu nyowe n’eka yange, nitwija kuheereza Yahwe.’—Yos. 24:15.