Okusaba Kisembo

1, 2. Habwaki n’oteekereza ngu okusaba kiba kisembo eky’embaganiza, kandi habwaki tusemeriire kumanya Baibuli eky’eyegesa ha kusaba?

ENSI yaitu ntaito muno ogirengesaniize n’obuhangwa bwona. Yahwe obwarora hansi, abantu boona abarora nk’entoonyezi ey’amaizi. (Zabuli 115:15; Isaya 40:15) Baitu n’obuturaaba tuli bataito muno olengesaniize n’obuhangwa bwona, Zabuli 145:18, 19 rugamba: “Mukama ali haihi na bona abamukunga, bona abanyakumukunga namananu. Uwe alihikiriza okwegomba kwabo abanyakumutina, alihu’ra oku’ra kwabu, kandi alibajuna.” Ka mugisa gw’amaani kurora ngu Yahwe, ayahangire ebintu byona kandi ow’obusobozi bwona, n’agonza tumwirre haihi, kandi n’agonza kuhurra okusaba kwaitu! Mali okusaba guba mugisa, kandi kisembo Yahwe ahaire buli muntu weena.

² Baitu Yahwe n’aija kutuhuliriza obu turamusaba omu mulingo oguhikire. Nitusobora tuta kumusaba omu mulingo oguhikire? Katurole Baibuli eky’ebazaaho ha kusaba.

HABWAKI TUSEMERIIRE KUSABA YAHWE?

3. Habwaki osemeriire kusaba Yahwe?

³ Yahwe n’agonza tumusabe, rundi tubaze nauwe. Ekyo tukimanyire tuta? Soma Abafiripi 4:6, 7. Teekereza ha kyahandiikirwe eki. Mukama w’iguru n’ensi n’akugonza kandi n’agonza omugambire omulingo orukwehurramu hamu n’ebizibu eby’oine.

4. Kusaba Yahwe buli kiro kikonyera kita kugumya omuganjano gwawe nauwe?

⁴ Okusaba kutukonyera kuba n’ekoragana enungi na Yahwe. Abanywani obu babaza butoosa, nibagambirangana ebi barukuteekerezaaho, ebirukubakwataho, n’omulingo barukwehurra, obunywani bwabu bweyongera kuguma. Naitwe obunywani bwaitu bweyongera obutwikara nitumusaba. Akozeseze Baibuli kutugambira ebiteekerezo bye, omulingo akuroramu, n’eky’arukwija kukora omu busumi bw’omu maiso. Naiwe n’osobora kubaza nauwe buli kiro n’omugambira ekikuli ha mutima. Obw’orabaza nauwe buli kiro, omuganjano gwawe nauwe nigwija kweyongera kuguma.—Yakobo 4:8.

KIKI EKITUSEMERIIRE KUKORA KURORA RUHANGA YAHURRA OKUSABA KWAITU?

5. Kiki ekirukwoleka ngu haroho esaara Yahwe ez’atahuliiriza?

⁵ Yahwe ahuliiriza okusaba kwona? Nangwa. Omu biro bya nabbi Isaya, Yahwe akagambira Abaisareri: “Nobumurasabaga muno, timpu’rege, engaro zanyu ziijuire esagama.” (Isaya 1:15) Nahabwekyo, kakuba tutegendereza, nitusobora kukora ebintu ebirukusobora kutwahukaniza na Yahwe kandi bikalemesa n’esaara zaitu kuhika haliwe.

6. Habwaki okwikiriza kiri kintu kikuru muno? N’osobora ota kwoleka ngu oine okwikiriza?

⁶ Obuturaaba nitugonza Yahwe ahurre okusaba kwaitu, tusemeriire kuba n’okwikiriza. (Marako 11:24) Omukwenda Paulo akagamba: “Hata[r]oho okuikiriza tikisoboka okumusimwa, baitu anyakuija hali Ruhanga, kimuhikiriire okuikiriza ati aloho, kandi ati ahera abo abanyakumuse’ra.” (Abaheburaniya 11:6) Baitu tikirukumara kugamba bugamba ngu twine okwikiriza. Twine kuhondera ebiragiro bya Ruhanga buli Kiro ekirukwija kwoleka ngu mali nitumwikiririzaamu.—Soma Yakobo 2:26.

7. (a) Obuturaba nitubaza na Yahwe habwaki tusemeriire kwebundaaza kandi tukamuteekamu ekitiinisa? (b) Nitusobora tuta kwoleka ngu nitumanyisa ekiturukusaba?

⁷ Obuturaaba nitusaba Yahwe, tusemeriire kwebundaaza kandi tusemeriire kumutekamu ekitiinisa. Habwaki? Kakuba oba n’obaza n’omukama rundi omw’ebembezi w’ihanga tiwakulengereho kumutekamu ekitiinisa? Nk’oku Yahwe nuwe arukukirrayo kimu obusobozi, titwakumutairemu ekitiinisa kiingi kandi tukebundaaza obuturaaba nitumusaba? (Okubanza 17:1; Zabuli 138:6) Ebiturasaba bisemeriire kuruga ha mutima gwaitu kandi tubimanyise, tutarukugarukanganizaamu ebigambo.—Matayo 6:7, 8.

8. Obuturasaba Yahwe atukonyere, kintu ki ekindi ekitusemeriire kukora?

⁸ Ekirukumalirra, obuturamusaba ekintu, naitwe tusemeriire kuteekamu amaani nukwo tukorre hali ebiturukusaaba. Ekyokurorraho, obuturamusaba ebyetaago byaitu, titusemeriire kugayarra ngu Yahwe naija kutukonyera twikaliire bwikarra. Tusemeriire kwekamba obuturaaba twine omulimo, kandi twikirize kukora omulimo gwona obuguraaba gutarukucwa ebiragiro bya Ruhanga. (Matayo 6:11; 2 Abasesalonika 3:10) Rundi kakuba tusaba Yahwe atukonyere kulekeraaho kukora ekintu ekibi, tusemeriire kwerinda ekintu kyona ekirukusobora kutusikiriza kukigarukamu. (Abakolosai 3:5) Katurole ebikaguzo ebirukukwata ha kusaba ebikira kukagulizibwa abantu.

EBIKAGUZO EBIRUKUKWATA HA KUSABA EBIKIRA KUKAGUZIBWA

9. Noha ou tusemeriire kusaba? Yohana 14:6 rutwegesa ki ha kusaba?

⁹ Noha ou tusemeriire kusaba? Yesu akeegesa abegeswa kusaba, “Isitwe ali omu iguru.” (Matayo 6:9) Akagamba ati: “Ninyowe muhanda namananu nobwomezi. Busaho aija hali Isenyowe rundi araba omuli nyowe.” (Yohana 14:6) Nahabwekyo esaara zaitu zisemeriire kugenda hali Yahwe niziraba omuli Yesu. Kimanyisa ki kusaba nituraba omu ibara lya Yesu? Obuturaaba nitugonza Yahwe ahurre okusaba kwaitu, tusemeriire kumanya ngu akaheereza Yesu obujunanizibwa bw’embaganiza. Nk’oku twayegere, Yesu akaija omu nsi kutucungura kuruga omu kibi n’okufa. (Yohana 3:16; Abarumi 5:12) Ekintu ekindi, Yahwe akakoma Yesu kuba mucwi w’emisango kandi Nyakatagara Omukuru.—Yohana 5:22; Abaheburaniya 6:20.

10. Nikitwetagisa kuba omu mulingo gw’embaganiza obuturaaba nitusaba Yahwe? Soborra.

¹⁰ Haroho omulingo gwona ogw’embaganiza ogutusemeriire kusabirabamu Yahwe? Nangwa, Yahwe tagamba ngu obuturaaba nitusaba twine kuteeza amaju, kwikarra, rundi kwemera. Baibuli egamba ngu obuturaaba nitubaza nauwe nitusobora kuba omu mulingo gwona baitu ogw’ekitinisa. (1 Ekyebyomubusinge 17:16; Nehemiya 8:6; Danieri 6:10; Marako 11:25) Kuteeza amaju rundi kwemera tikiri nikyo kikuru hali Yahwe baitu n’agonza tumuteekemu ekitiinisa. Nitusobora kusabira omu kiikaro kyona, nyamisana rundi ekiro, kandi nitusobora kusaba nitwatura rundi tutarukwatura. Obuturaaba nitusaba Yahwe, tikugumye ngu naija kutuhurra n’obukiraaba ngu abantu bandi basobora butahurra ebitusabire.—Nehemiya 2:1-6.

11. Bintu ki ebitusobora kusaba?

¹¹ Biki ebitusemeriire kusaba? Tusobora kusaba byona kusigikirra ha kugonza kwa Yahwe. Baibuli egamba: “Obutusaba ekintu kyona nkokwagonza atuhu’ra.” (1 Yohana 5:14) Nitusobora kusaba ha bintu ebirukutukwataho nk’abantu? Ego. Kusaba Yahwe kusemeriire kuba nk’omulingo obazaamu na munywani waawe. Nitusobora kumugambira buli kintu kyona ekiri ha mutima gwaitu. (Zabuli 62:8) Nitusobora kumusaba atuheereze omwoyo gwe ogukirrayo kimu amaani nukwo gutukonyere kukora ebihikire. (Luka 11:13) Nitusobora n’okumusaba atuheereze amagezi nukwo kitukonyere kukora encwamu ezihikire, n’okumusaba amaani nukwo tugumisirize ebizibu. (Yakobo 1:5) Tusemeriire kusaba Yahwe atuganyire ebibi byaitu. (Abefeso 1:3, 7) Tusemeriire n’okusabira abantu abandi otwaliremu ab’omu maka gaitu, ab’oruganda hamu n’abanyanya itwe ab’omu kitebe.—Engeso Ezabakwenda 12:5; Abakolosai 4:12.

12. Kiki ekisemeriire kuba kikuru omu saara zaitu?

¹² Kintu ki ekisemeriire kuba kikuru muno omu kusaba kwaitu? Yahwe n’eby’agonza. Tusemeriire kumusiima kuruga ha mutima habw’eby’atukoliire. (1 Ekyebyomubusinge 29:10-13) Nitukigumya ngu kinu nikyo ekintu kikuru habwokuba Yesu obwakaba ali omu nsi, akeegesa abegeswa be omulingo gw’okusabamu. (Soma Matayo 6:9-13.) Akagamba, baine kubanza kusaba ngu ibara lya Ruhanga lyezebwe. Ekintu ekindi, Yesu akabagamba ngu basabe Obukama bwa Ruhanga bwije kandi Ruhanga eby’agonza bikorwe omu nsi yoona. Hanyuma y’okubazaaho ebintu binu ebikuru nubwo Yesu yagambire ngu tusabe ebyetaago byaitu. Obutwebembeza Yahwe n’ebintu eby’agonza omu kusaba kwaitu, tuba nitwoleka ngu nibyo bintu ebiturukutwara nk’ebikuru omu bwomeezi bwaitu.

13. Esaara zaitu zisemeriire kumara bwire ki?

¹³ Esaara zaitu zisemeriire kumara bwire ki? Baibuli tetugambira. Esaara zaitu nizisobora kuba ngufu rundi ziraihire kusigikirra ha byetaago byaitu. Ekyokurorraho, esaara yaitu n’esobora kuba ngufu obuturaaba nitugenda kulya, baitu n’esobora kuraihaho kakuba tuba nitugambira Yahwe ebirukutukwataho. (1 Samuiri 1:12, 15) Titurukugonza kusaba esaara eraihire nukwo abantu barole ngu tumanyire kusaba nk’oku abamu bakoraga omu bwire Yesu obwakaba ali omu nsi. (Luka 20:46, 47) Esaara nka zinu tizisobora kusemeza Yahwe. Yahwe eky’arukugonza nikyo ngu ebiturukusaba biruge ha mutima.

14. Tusemeriire kusaba emirundi ingaha, kandi kinu kitwegesa ki hali Yahwe?

¹⁴ Tusemeriire kusaba emirundi ingaha? Yahwe n’agonza tumusabe bulikiro. Baibuli egamba “musabe [mutalekeriire],” “mwekambe omu kusaba,” kandi “musabege obutosa.” (Matayo 26:41; Abarumi 12:12; 1 Abasesalonika 5:17) Yahwe aikara ayetegekere kuhuliiriza okusaba kwaitu. Nitusobora kumusiima buli kiro habw’okugonza okwatwolekere hamu n’okutugabira ebintu ebirungi. Nitusobora n’okumusaba atwebembere, atuheereze amaani, kandi atuhuumuze. Nitwija kusaba Yahwe buli kiro obuturaaba nitutwara okusaba nk’ekisembo.

15. Habwaki tusemeriire kugamba “amiina” hanyuma y’okusaba?

¹⁵ Habwaki tusemeriire kugamba “amiina” hanyuma y’okusaba? Ekigambo “amiina” kimanyisa “ego” rundi “nukwo kibe.” Guba mulingo gw’okwoleka ngu nitumanyisa ekitubaire nitusaba. (Zabuli 41:13) Baibuli egamba ngu, nitusobora kugamba “amiina” omu mutima rundi nitusobora kukyatura kakuba ondi aba nasaba. Kinu nikiija kwoleka ngu nitwikiraniza n’ebigambirweho omu kusaba.—1 Ekyebyomubusinge 16:36; 1 Abakolinso 14:16.

OMULINGO YAHWE AGARUKAMU ESAARA ZAITU

16. Mali Yahwe agarukamu okusaba kwaitu? Soborra.

¹⁶ Mali Yahwe agarukamu okusaba kwaitu? Ego, akugarukamu. Baibuli emweta “Anyakuhurra okusaba.” (Zabuli 65:2) Yahwe ahurra kandi agarukamu esaara z’abantu baingi muno abasaba n’ekigendererwa ekihikire. Azigarukamu omu miringo erukwahukana.

17. Yahwe akozesa ata abamaraika hamu n’abaheereza be kugarukamu okusaba kw’abantu?

¹⁷ Yahwe akozesa abamaraika hamu n’abaheereza be kugarukamu okusaba kwaitu. (Abaheburaniya 1:13, 14) Haroho eby’okurorraho bingi eby’abantu abasabire Ruhanga abakonyere kwetegereza Baibuli kandi hanyuma y’okusaba Abakaiso ba Yahwe bababungira. Baibuli eyoleka ngu abamaraika nabo nibakonyera omu mulimo gw’okutebeza “enjiri” omu nsi yoona. (Soma Okusuku’rwa 14:6.) Baingi hali itwe tusabire Yahwe atukonyere kuraba omu bizibu ebitwine rundi kutuha ebintu ebiturukwetaaga, kandi Yahwe atugarukiremu n’akozesa ab’oruganda rundi abanyaanya itwe.—Enfumo 12:25; Yakobo 2:16.

18. Yahwe akozesa ata omwoyo gwe ogurukwera hamu na Baibuli kugarukamu okusaba kwaitu?

¹⁸ Yahwe akozesa omwoyo gwe ogurukwera kugarukamu esaara. Kakuba tumusaba atukonyere kugumisiriza ekizibu, n’asobora kukozesa omwoyo gwe ogurukwera kutuheereza amaani rundi obuhabuzi. (2 Abakolinso 4:7) Yahwe akozesa na Baibuli kugarukamu okusaba kwaitu n’okutukonyera kukora encwamu ezihikire. Nitusobora kusoma Baibuli kandi tukatunga ekyahandiikirwe ekiratukonyera. Yahwe n’asobora kukozesa omuntu omu nsoro’kano kugarukamu ekikaguzo ekitubaire nitwekaguza, rundi n’asobora kukozesa omugurusi w’ekitebe kutugambira ekintu ekitubaire nitugonza kumanya.—Abagaratiya 6:1.

19. Habwaki obwire obumu nitusobora kuteekereza ngu Yahwe takagarukiremu okusaba kwaitu?

¹⁹ Obwire obumu n’osobora kwekaguza, ‘Habwaki Yahwe atakagarukiremu esaara zange?’ Oijuke ngu, uwe amanyire obwire n’omulingo aratugarukamu. Amanyire ebiturukwetaaga. Nitusobora kugumizaamu nitusaba nukwo tumwoleke ngu mali nitumanyisa ekiturukusaba kandi nitwesiga ngu naija kutugarukamu. (Luka 11:5-10) Obwire bumu Yahwe agarukamu okusaba kwaitu omu miringo eyitubaire tutarukunihira. Ekyokurorraho, nitusobora kumusaba atukoonyere kwihaho ekizibu ky’amaani ekitwine baitu mukiikaro ky’okukiihaho natuheereza amaani g’okukigumisiriza.—Soma Abafiripi 4:13.

20. Habwaki tusemeriire kwikara nitusaba Yahwe?

²⁰ Kamugisa gw’amaani kusaba Yahwe! Tukigumye ngu naija kutuhuliiriza. (Zabuli 145:18) Kandi obuturayeyongera kumusaba kuruga ha mutima, omuganjano gwaitu nigwija kuguma.